Dodadi 37 - Ma Jou ai Demo-demo o Totobelohoka

O Yusupu ai buluhara

¹ Ho naa o Yakubu wogogere o Kanani ma tonakoka abe hoka ma dihirali ai babali wogogere genangoka.

² De hokonaa manga ade-ade o Yakubu ai ngofa-ngofaka. O Yusupu gea wadonoka ai taongo ngimoi de tumidi de unangoo wotobagoa-goana ai baba ai duduono de wanii-niiki de ai ria-riaka abe o ngo Bilaha de o ngo Sipa manga ngofa-ngofaka. De abe naga ai ria-riaka yodiai itorou gea o Yusupu, ona wahitobahingahu manga babaika.

³ De nako o Isiraele ai ngofaka ona mata-mataika ma, ka o Yusupohi duru widora angamoi una iwiperekioka ma oraha o Yusupu womaboa. De ma titi duru wisanangi o Yusupika ho wihidoaka unangika ai baju ma gogurutuku de duru irahai.

⁴ Masara ai ria-riaka iwitaleana ma titi manga baba duru ka o Yusupohi wilegaika de ai dora. De ona igoungu iwidohata manga dodotika hiadono ko iwihidodiaiokaua iwitemo unangika.

⁵ De o futu moiuku o Yusupu wobuluhara de ai buluhara ma dola waade-ade ai ria-riakika. Ka de ai buluhara gea yoihene de manga dohata idogoli hiadono ilamoko unangika.

⁶ Abe una waade-ade onangika wato, “Abeika o futuika ahi buluhara!

⁷ Ngone o tau moi hongodumu o redioka hokarajaanga abe nanga gandumu hohidotoino de ma roehe ka ma moi ibooto de ahao hapaki-pakitino o papakiti amomoi. De to ngohi abe tapakitino ena imaokoiye duru imaboo-bootiye masara ti ngini homoi-homoiika abe niapaki-pakitino gea ena ikokiboa to ngohino de akilolitino de imaponu-ponuku to ngohi ahi papakitika.” Hokogea o Yusupu ai buluhara ma ade-ade.

⁸ Ka de gea yoihene de ai ria-riaka ato, “Iya, ya, ya, ngona naa nato nomihikoano e? De done sarakia ngona o dodoto de ngomi naga to ngona ani kuahaka?” Hokogea iwimia-mia de to ona manga dohata unangika ka idogokali ma titi ai buluhara de ai ade-ade gea.

⁹ De ipaha o Yusupu wobuluharoli de ai buluhara ma titi enangoo wahingahu ai ria-dodotika wato, “Marai ngohi ka tobuluharokali de hokonaa ahi buluhara: gea tamake o wange, de o mede, de o murumu ngimoi de moi ikokiboa ngohino de ahao ena mata-mata gea de ma horomati ngohino hiadono imaponu-ponuku ahi himangoka hiadono itiki o tonakuku. Hokogea ahi buluhara.”

¹⁰ De o Yusupu ahao ai buluhara gea wihingahuoo ai babaika. Ka de ai buluhara ma ade-ade woihene de ai baba witaere o Yusupika wato, “Marai ani buluhara gea duru toheranga! Ho ma titi o kia hiadono nomihingahu hokogea ngomino? De ngona done sarakia nato bote ngohi, de ngoni meme de ani ria-dodoto miboa la ani himangoka mimaponuku hiadono mia pea itiki o tonakuku?” Hokogea ai baba witaere.

¹¹ De ma titi ai buluhara gea hiadono ai ria-riaka manga daleana ka idogo-dogo masara manga baba duru womahihohininga ma titi o Yusupu ai buluhara gea.

O Yusupu ai ria-riaka iwifukunu

¹² De ipaha ko itedekanua de ahao o Yusupu ai ria-riaka manga duduono ihiolomo o Sikeme ma dolaika.

¹³ De ko manga dekanino genangoka ho o wange moiuku o Isiraele wihibehehongo o Yusupika wato, “De naa ani ria-riaka manga dekanoka o Sikemoka yogoana nanga duduono ho ngohi toigo la ngona natutumu.” De o Yusupu wipaluhu ai babaika wato, “Iya, ngohi tosanangi dika toiki.”

¹⁴ De ai baba wato, “Irahai noiki la natutumohi done naga manga kuranga. De nanga duduonoo kiani hohioriki hokokia ma kangela eko ma rahai ho gea natutumu ibooto de nolioli ngohino de nohihingahu.” Hokogea o Isiraele wihidingoto o Yusupu o Sikeme ma dolaika. Ho manga gogere o Heborono ma dolaka gea wosoboka o Yusupu la woiki ai ria-riakika.

¹⁵ Ho o Sikeme ma dolaka womahiadonika de waika waino genangoka walingiri ai ria-riaka ma ko wamakeua. Masara naga womatengo genangoka wimake o Yusupu waika waino de wileha unangika wato, “De ngona o kia nolingiri?”

¹⁶ De o Yusupu wipaluhu wato, “Ngohi naa talingiri ahi ria-riaka de manga duduono. Ho sarakia, ngona ko namakeua o kiaka yaika?”

¹⁷ De womatengo gea wihingahu wato, “Iya, ona gea marai ngohi tamake, de gea toihene manga demo abe yomakoketemo ato, ‘Hoiki o Dotana ma dolaika.’” Hokogea ai ria-riaka manga demo wadofanga o Yusupika. Ho ka de ai demo gea woihenoka de o Yusupu wosobokali ai ria-riaka wahiduru de ahao ona wamake o Dotana ma dolaka.

¹⁸ De o Yusupu ko ai gurutikahi de ai ria-riaka iwimake abe woboaino de ona yomahikokagaro iwihidee ato iwitoma.

¹⁹ Abe yato, “Abeika, genanginoka ma Tobabuluhara!

²⁰ Abeika, nako una hitoma ibooto de ahao hiumo o nyawa manga baituku. De ahao ka idadi nanga baba hihingahu dika hato o fuhuku ma aewani iwigolioka. Gea de ngone ahao hamake hokokia to una ai buluhara idadi.”

²¹ Masara manga riaka o Rubene o Yusupu widemo wato, “Ufa hitoma nanga dodoto!

²² De gea ma titi o kia ho hiadono hato itiai ai awunu hakopoa? Koaho hiumo ai ngango dika o tonaka ma baituku de gea ika-ika de ahao wohonenge genangoka ho ngaro ufa dika de ai awunu hakopoa.” Hokogea o Rubene ai demo angamoi ai hiningaka womatemoka wato, “Nako hokogea dika yodiai de ka idadi ngohi ahao tomatohiki tigilio la ka idadi tihihupu de tingotaka o babaika la ufa wobodito ahi dodoto.” Hokogea o Rubene ai hininga.

²³ Ho gea o Yusupu womahiadonoka onangika de ai baju ma rorahai yahuputu yokokahigoraka. De ai baju gea ena abe duru irahai de ma bunga-bungaka.

²⁴ Ho ai baju gea iwioraka de ahao iwiumo o baituku abe kohagurutuku. De o nyawa manga baiti gea abe biaha yapake hoka o humu abe nako ma oraha o awana de ahao naga ma akere genangoka masara abe naa iwiumo gea ko iwa ma akere ho ma duu-dudungu.

²⁵ De ahao ma oraha ai ria-riaka yolomo de yamake o Isimaele ma nyawa manga ngoe yoboaino abe manga dodagi ma goronaka de gea manga dumutu o Mesiirika. To ona manga gogere o Gileada ma tonakoka abe ma romanga moioli o Midiana. De ona naa yapake manga unta la manga kiahonanga ihibarene de yao o Mesiirika. Manga kiahonanga gea o gota ma hilo o fara hange abe ma roma-romanga o damara, o balama de o muuru. De o hilo mata-mata gea de ma ijaka ho hiadono yao o Mesiiri ma tonakika la ato yofukunu genangoka.

^26-27 Ka de o Yusupu ai ria-riaka yamake ona yoboaino de o Yehuda ai hininga wahingahu ai ria-dodotika wato, “De naa nanga utumu o kia nako nanga dodoto hihohonenge de ai awunu hakopoauku? De ngone naa igoungu ka o wariki moi ho nako wohonenge de ahao ka ihikaika nanga hininga ma huha hamao ma titi nanga dodoto ai awunu hakopoaka. Masara nako hifukunu dika gea naga nanga utumu. Ho abeika, hoiki hihihupu o baitiye gea la ka idadi hifukunu o Isimaele ma nyawaika gea.”

²⁸ Hokogea o Yehuda ai demo de ai ria-dodoto iwihigihene ho ka de ona abe yoboa o Midiana ma tonakino gea yomahitiginoka de o Yusupu ai ria-riaka iwihihupu o humuino de iwifukunu onangika de ai ija o haaka ise-senge monaoko. De gea iwifanguoka de ahao o Isimaele ma nyawa gea o Yusupu iwiao o Mesiiri ma tonakika.

²⁹ De ma oraha o Yusupu iwifukunu gea o Rubene ko iwiwa ho ka de woiki witutumoli o Yusupu la wato wihihupu o baitiye masara ka de waika de o Yusupu ko iwiwa. De o Rubene duru ai hininga imaketero hoka womarofu, ma titi ai hininga ma huha, ho hiadono ai pakeanga wakakihoka.

³⁰ De ahao wolio ai doo-dodotika de wahingahu wato, “Hiokoo, una gea o goduuru de naa una o kiaikaka! De naa ngohioo duru tokangela angamoi ko iwaka ma ngekomo la ka idadi tiduhunu.” Hokogea o Rubene wohidaere de ai huha ma demo.

³¹ De ahao o Yusupu ai ria-riaka gea o kabingi moi yatoma la ma awunu yatakunu de ahao o Yusupu ai baju ma rorahai ihifoka de o kabingi ma awunu gea.

³² De ahao ai baju ma rorahai gea iwihimatoko manga babaika de iwileha ato, “Naa ena miamake o tonaka ma homoaka de sarakia gea o Yusupu ai baju eko ko to unangua?”

³³ Ka de manga hingahu gea woihene de manga baba duru iwitodokana de wato, “Adoo, marai ahi ngofaka iwigolioka o fuhuku ma aewani! Gea ena igoungu to una ai baju abe itaana duru o Yusupu iwiolomoka hiadono ai badanga ihikokatingakoka.”

³⁴ De duru o Yakubu ai hininga ma huha hoka woigo womarofu hiadono ai pakeangoo wakakihoka. De ahao womaturuuru de hoka o karongo womahinoauku ma titi ai hininga ma huha. De hiadono duru ai dekana o wange-wangeiye hokogea ai huha dika iwihipareta.

³⁵ De ngaro ai ngofaka de ngoi ora ona mata-mata iwilaru masara manga lalaru ma demo gea waoluku wato, “Ahi huha naa ko itoa-toakua ka hiadono tohidohonenge.” Hokogea o Yakubu wotemo de ahao ka woariokali.

³⁶ De doka o Mesiiroka yomahiadonoka o Isimaele ma nyawa gea abe yoboa o Midiana ma tonakino. Ona gea abe o Yusupu iwiijaino de naa ka de yomahiadonika de o Yusupu iwifukunokali. De womatengo ai romanga o Potifara gea una abe o Yusupu wiijali la wihidadi ai huhuloko. O Potifara gea wokarajaanga o Mesiiri manga koanoka abe iwihiromanga manga Firaunu. De o Firaunu naga to una ai gogoana manga ngoe de ona mata-mataika manga hidimono gea o Potifara.