Dodadi 34 - Ma Jou ai Demo-demo o Totobelohoka

O Sikeme o ngo Dinaika ai howono

^1-2 Ho gea o Yakubu wogogere o Hamoro ai nyawa manga hidogoronaka abe genangoka ai tonaka womaijaino o Sikeme ma kota ma datekoka, o kota gea abe ihiromanga manga baluhu o Hamoro ai ngofaka ai romangika. De naa ai ngofaka o Sikeme wahowono de o Yakubu ngoi oraika. Abe o wange moiuku o Yakubu de o ngo Lea manga ngofaka o ngofeka o ngo Dina moiki la madodiawo o ngo-ngofekaika abe yogogere o Sikeme ma kapongoka gea. De manga baluhu ai ngofaka o Sikeme gea womimake o ngo Dina moboaino de ahao womiribuutu hiadono womitaoko la yomakitigi de ngaro muna duru moluku masara una duru womiribuutu.

³ De yomakitigi ipaha de muna duru ami hininga ihuha masara o Sikeme womilaru wato, “Dina, ahi hininga yadaene ngonaika angamoi duru tonidora.” Hokogea ai demo munangika.

⁴ De ai baba o Hamorika gea wihuloko wato, “Baba, ngona kiani nohiaturu la hiadono o ngofeka gea tomile la tomihidadi ngohi fekata!” Hokogea o Sikeme wihuloko ai babaika.

⁵ De ahao o nyawa utu yahiade-ade ma titi o Sikeme ai howono de hiadono o ngo Dina ami baba unangoo woihene abe hokokia ngoi ora o Sikeme womidadidorouoka. Masara ma oraha gea o Yakubu ai ngofa-ngofaka ko yaiwa genangoka angamoi naga manga duduonoka o tonaka ma homoaka ho o Yakubu ko kia-kiauahi wodiai angamoi wadamaahi ai ngofa-ngofaka yolioinohi.

⁶ De o Sikeme ai baba o Hamoro woiki witutumu o Yakubika la ka idadi wohiaturu ma titi ai ngofaka woigo woilaka de o ngo Dina.

⁷ De onangoo ami iranga yoboa de manga hininga ma huha yaomangoka ma titi o ngo Dina ami kangela. Ho gea duru yatohata ma titi o Sikeme womiribuutu manga biranga, o Isiraele ngoi ora. De angamoi duru ko idadiua o nyawa yodiai itorou hokogea ho o Sikeme wahimaleke o Isiraele de ai nyawa mata-mata genangoka.

⁸ Masara o Hamoro wahingahu o Yakubu de ai ngofa-ngofakika wato, “Ahi ngofaka o Sikeme kiani tihilooa nginika masara una duru igou-goungu ai hininga adaene ngoni oraika ho naa toboa la tihidemo nginika la ka idadi niomodeke una womile. Ho naa duru togahoko la niwihigunoa la una womihidadi ngoi fekata.

⁹ De ngomi miato ahao to ngomi mia momoholehe miahidoaka ani goo-goduuruika la onangoo ka idadi manga feka-fekata yomale ngomioka. De ngomioo mimale ti nginino nia momoholehe la mia ngofa-ngofaka yamake manga fekata nginino.” Hokogea o Hamoro ai hiaturu.

¹⁰ De naa ka wogila-gilahi wahingahu onangika la wato wahisanangi wato, “Duru irahai nako ngini nigogere nenangoka la homaketedodiawo de ka idadi homaketeturuuru nanga kiahonanga la ngone houtumu mata-mata. Abeika ma tonaka ma homoa! De ma tonaka gea ngomi minihigunoa la ngini nimaija! Ho ka idadi ngini niaika niaino nia duduono niao-ao de ngaro ufa nitagi-tagiohi nimalingiri nia tonaka.” Hokogea o Hamoro wotemo ibooto.

¹¹ De o Sikeme kanganoinohi ai baba winiikino ho unangoo naga genangoka de naa unangoli wahingahu o ngo Dina ami baba de ami ira-irangika wato, “Ngohi duru togahoko nako ka idadi ngini nihidafongo ngohi de nia hininga ma gahumu ngohino la duru tosanangi. De ngini ka idadi nimagahoko o kia dika ngohino de ngohi duru tosanangi ma kiahonanga gea tinihidoaka.

¹² O kia dika ngaro niato tofangu de gea duru tosanangi tinihidoaka nginika iti nihihingahu de muna nihihidoaka ngohino la modadi ngohi fekata.” Hokogea o Sikeme ai demo.

¹³ Masara o ngo Dina ami ira-iranga duru ko idadiua yawohanga gea o Sikeme wodiai itorou manga birangika ho yapaluhu gea yapake o budi ma demo dika o Hamoro de o Sikemika.

¹⁴ Hokonaa manga budi ma demo ato, “Nako ngomi, naga mia biaha abe duru miagorakiye, de gea kiani ngomi o nauru mimahuna, masara nako ngini ko nimahunauahi. De nako mia biranga mimihidoaka o naurika abe ko womahunauahi hoka ngonali abe ko nomahunauahi, gea duru ko idadiua! Abe gea idadi o maleke ma dodunguu abe itaana midiai ko itiaiua.

¹⁵ Masara naga ma ngekomo. Hokonaa, kiani ngini mata-mataika o nau-nauru nimahuna imaketero hoka ngomioli de ahao nia demo miodafongo.

¹⁶ Hokogea nimahuna ibooto de ahao ka idadi ngini nimale o ngofeka ngomioka de ngomioli mimale o ngofeka nginioka la homaketeturuuru nanga ngo-ngofeka. De gea ma ngekomo abe ngomi mioigo la ngone homaketerimoi hiadono ngomi misanangi migogere nenangoka.

¹⁷ Ma nako ngini ko nisanangiua mia demo marai mia biranga mimiao de miloikoli.” Hokogea o ngo Dina ami ira-iranga manga demo.

¹⁸ Ka de manga demo yoihene de o Hamoro de o Sikeme yosanangi yodafongo.

¹⁹ De o Sikeme, duru womataiti wolio la manga behehongo gea wahingahu ai gogianongoruika angamoi duru womidogarago o ngo Dinaika. De una wato marai ka idadi o huhuna ma behehongo yaniiki angamoi nako una de ai gogianongoru utu ka unangohi duru o nyawa iwihoromati.

²⁰ Ho una de ai baba yoiki manga kota ma ngoranika de yomakoketemo de o kota ma dimo-dimono abe ona biaha yomatoo-toomuino genangoka.

²¹ De o Sikeme de ai baba yahingahu onangika ato, “Abeika, o nyawa naa abe inadionikino ngoneino ona naa yodadioka nanga dodiawo! Irahai o Yakubu gea de ai ngofa-ngofaka hahokino de hahingahu abe ngone hosanangi hadafongo la ona yogogere ngoneoka. De angamoi to ngone nanga tonaka kohaamokika hiadono ka idadi ona de ngone inawedono ma tonaka. De ahao ka idadi homaketeturuuru nanga ngo-ngofeka.

²² De onangoo yosanangi hokogea, masara naga moi kiani ngoneoo hodiai la yosanangi ngoneino de gea kiani ngone o nau-nauru mata-mata homakokihuna imaketero hoka onangoli.

²³ De abeika to ona manga duduono ma ngoe, ho ka de to ona manga biaha gea haniikoka de to ona manga duduono de manga kiahonanga mata-mata gea idadioka to ngoneoo nanga utumu!”

²⁴ Hokogea manga demo de manga kota ma dimo-dimono yomaputuhoka la o huhuna gea yaniiki ho o nau-nauru mata-mata manga kotaka gea ahao yomakokihunaka.

O ngo Dina ami iranga imihibalaha

²⁵ Masara ka de o wange hange ipahaika de manga nabo ma gogiriaka yadotodiri angamoi yahikangela hiadono ko yomasikaakaua. De ona ko yafikirua naga o bodito manga ngoranoka masara duru ma oraha gea yale o Yakubu ai ngofaka o Simeono de o Lewi ato manga biranga idodutu, o ngo Dina gea, imihibalaha. Ho yangika de manga humaranga ma doto arihononga de yakokitoma o nau-nauru mata-mataika o Sikeme ma kotaka.

²⁶ Ho o Hamoro to unangoo ai tauika yowohama de una de ai ngofaka o Sikeme onangoo yatomaka de manga humaranga de ahao manga biranga o ngo Dina imihigilio.

^27-29 Ho yolio o Simeono de o Lewi de ahao ka yoliokali ma kotaino ka ma moi de manga roria-dodoto yomakiniiki mangale o Yakubu ai ngofa-ngofaka ato, “O kota naa imihidadidorou nanga biranga ho homihibalaha.” De kanganoinohi manga nau-nauru yakokitomakau ho naa yakokile manga feka-fekata de manga ngofa-ngofaka de yakokigoraka manga kiahonanga mata-mata abe naga manga tau ma goronaka. De ngaro manga kiahonangoo abe naga o kota ma hoanoka hoka manga duduono de manga keledai enangoo yakokile. Ho gea manga kaya yamataka yomagora.

³⁰ De ahao manga baba o Yakubu duru ai hininga ihuha ho wataere o Simeonika de o Lewika wato, “Ngini duru nihihikangela hiadono ahi romanga idadioka hoka o mela kohagiria onangika abe yogogere o tonakoka naa. Hokogea ma mela ahi romangoo o Kanani ma nyawaika de o Ferisi ma nyawaika hiadono ona de ahao inaparangi. De ngone ko howoeua ho nako ona mata-mata yomatoomuino de yoboa yomakuduhunu inaparangi gea inahibinaaha ngohi de ngini de to ngone nanga nyawa ka ma moi!”

³¹ De o Simeono de o Lewi ka idadi iwipaluhu manga babaika ato, “Ho sarakia, gea ka hahigunoa yodiai mia birangika imaketero hoka muna o ngofeka abe ami biaha momafuku-fukunu dika?” Hokogea ma ade-ade ma titi o Sikeme de o ngo Dina.