Dodadi 33 - Ma Jou ai Demo-demo o Totobelohoka

O Yakubu de o Esau yomakamakeokali

¹ De ma oraha yoikoli de o Yakubu womalega de wimake ai riaka o Esau ka ai gurutikahi woboaino de igoungu naga o nauru yaratuhu iata iwiniiki. Ka de ona wamake de ngoi feka-fekata watinga-tingakika la ona homoi-homoiika yodadi o doomu amomoi de to ona manga ngofaka.

² De ahao o Yakubu ai tau wahiaturu la watatorika de wahuloko la ngoi fekata abe o hidoakino de manga ngofa-ngofaka kiani ona yohira, de ahao ngoi fekata o ngo Lea de ami ngofa-ngofaka ona yokokorona de ma bahaika naga o ngo Rahele de ami ngofaka o Yusupu.

³ Hokogea watatoro ibooto de ahao o Yakubu una wohira-hira womabole-bole wotagi ai riakika wibuhuku. Ka de ma oraha wotigioka unangika de o Yakubu duru de ai horomatioka womaponuku ma tumidino hiadono ai pea itiki o tonakuku o Esau ai himangoka.

⁴ Ma, ka de gea wimake de o Esau duru womapopaata wibuhuku ai dodoto de wikooino de wibounu de ona o ria-dodoto yoari.

⁵ De ahao o Esau womalega o ngo-ngofekaika de manga ngofa-ngofakika de wileha wato, “Ho ona abe ininiiki ngona naa onagona?” De o Yakubu wihingahu wato, “Naa abe ona Ma Jou ai doraka de aino wohihidoaka ani gilaongino ngohi naa.”

⁶ Hokogea o Yakubu wotemo ibooto de ngoi fekata o ngo Bilaha de o ngo Sipa de manga ngofa-ngofaka yoboaino o Esauino de duru yomaponuku ai himangoka.

⁷ De ahao o ngo Lea munangoo de ami ngofa-ngofaka yoboaino o Esauino de onangoo yomaponuku ai himangoka. De ma bahaika o ngo Rahele de o Yusupu yoboaino de onangoo hoka manga dodiawoli manga horomati ihitunguu abe yomaponuku o Esau ai himangoka.

⁸ De ahao o Esau wolehali wato, “Abe ka de totigioka toboa de naga tamakeino ahi ngekomoka o aewani o duduono ma ngoe. Ho gea ena idodoa?” De o Yakubu wipaluhu wato, “Ahi baluhu, o duduono mata-mata gea ahi hidoaka ngonaika la nohisanangi ngohino.”

⁹ De o Esau wato, “Ahi dodoto, duru tosanangi nohihidoaka gea ma ngaro ufae dika. To ngohi ahi aewani o dofo ihiwedonoka ho ngaro ufae dika! Ngona dika napaliara!”

¹⁰ Masara o Yakubu wato, “Hokogenangua ahi hininga, ngohi duru togahoko la ahi hidoaka naa nodafongo angamoi duru ahi hininga ma huha ihihangoka ma oraha tonimake abe ani himanga de ma gietoka. Abe ka de ani giete tamake de ahi garago hoka Ma Jou ai himanga ma giete tamakeoka!

¹¹ Ho nako noigo nohihisanangi kiani nodafongo abe ngohi toigo tonihidoaka de angamoi duru Ma Jou wohihiowa de o duduono ma ngoe hiadono ihiwedono ho koaho utu tonihidoaka ngonaika.” Hokogea o Yakubu duru wihigaro ai riakika la wato ai hidoaka wodafongo de ma bahauku o Esau wodafongo.

¹² De o Esau witila-tila wato, “Abeika ahi dodoto, hosobo homakiniiki abe ka idadi ngohi o ngekomika tonahihira-hira.”

¹³ Masara o Yakubu womahilooa dika wato, “Ahi baluhu, tomahilooa ma abeika ahi ngofa-ngofaka utu ka manga etetekohi. De ahi duduonoo ma ngoeika ka de ma ngofa-ngofakoka ho done utu ihonenge nako homatai-taiti hoiki.

¹⁴ Ho nako ka idadi irahai ngini nihira dika ngona de ani nyawa de ngomi ka idadi mimabole-bole miloiki minihidoduruika de ahao homakamakeoli o Seiri ma tonakoka.” Hokogea o Yakubu ai hininga womahingahu.

¹⁵ Masara o Esau wato, “Ahi dodoto, nako ani hininga hokogea ma ka idadi, masara, togahoko la nohihigunoa ahi nyawa utu tahuloko la ona inigoana nia dodagi ma goronaka.” De o Yakubu wipaluhu wato, “Ahi baluhu ani hininga ma rahai ngohino ilamokoholi hiadono tato ngaro ufae dika!”

¹⁶ Hokogea o Yakubu ai hininga ho duru o wange gea dika de o Esau de ai nyawa yokokisoboka yolio o Seiri ma tonakika.

¹⁷ De o Yakubu de ai nyawa mata-mata yogila-gila hiadono yoboa o ngi moiika abe ihiromanga o Sukoto abe nako to ona manga demo gea o aewani ma kurunga de ma tauoka. De genangoka ai tau moi womadiai de ai aewani ma kurunga muruono naga enangoo wodiai ho gea ma titi hiadono ma ngi gea ihiromanga o Sukoto.

^18-19 De ahao ika-ika o Sukoto gea yanoa de yoiki yogila-gila hidutu yomahiadono o Kanani ma tonakika abe genangoka naga womatengo ai romanga o Hamoro. De o nyawa mata-mataika genangoka wahibaluhu hiadono ona yomahiromanga o Hamoro ma nyawa. De o Hamoro naga ai ngofaka womatengo ai romanga o Sikeme. De manga kota ma romanga ihitoomuika o Hamoro ai ngofaka ai romangika ho manga kotaoo ma romanga o Sikeme. De abe hatoli o kota ma datekoka gea naga o tonaka ma hohutulu womaija o Yakubu de ma ija o haaka ise-senge o ratuhu moi. De genangoka o Yakubu ai nyawa manga tau o ngoerino ihikokigoko.

²⁰ De genangoka o Yakubu womadiai o huhuba ma ngi abe wahiromanga o El Elohe Isiraele. De ma titi yapake yomahuba-huba Ma Jouika abe Una o Isiraele manga Jouika.