Dodadi 31 - Ma Jou ai Demo-demo o Totobelohoka

O Yakubu womatohiki la womatingaka ai toroaino

¹ Hokogea o Yakubu wodadi wokaya masara o Labana ai ngofa-ngofaka yomulaenge iwihigurubungu ato, “Abeika nanga geri ai kaya, gea ma titi to baba wioraino, angamoi ai kiahonanga mata-mata gea wale nanga babaino.” De manga demo gea o Yakubu woihene.

² De wamake o Labanoo ai hininga waturuuru unangika hiadono womatemo wato, “Marai ahi toroa womulaenge ko wohisanangiokaua ngohino.”

³ De ahao Ma Jou o Yawe wotemo o Yakubika wato, “Adonoka ma oraha ngona kiani nolio ani ete de ani baba manga tonakika. Nolio abe genangoka ani gogianongoru yogogere de Ngohi ka ihikaika toniniiki.” Hokogea Ma Jou ai behehongo o Yakubika.

⁴ De o Yakubu naga ma hoanoka wogoa-goana ai dofo ma duduono de wabehehongo ngoi feka-fekata o ngo Rahele de o ngo Lea la yoboa de iwitutumu genangoka.

⁵ Ho ka de yoboaka de wahingahu onangika wato, “Marai ngini niamakeoka abe nia baba ai hininga ngohino imakohowonoka de ma dihira, abe naa naga una hoka ko wohisanangiokaua ngohino. Masara Ma Jou, abe ahi baba womahijou Unangika, ka ihikaika wohiniiki ngohi de wohiduhunu.

⁶ Ngini naa duru nihihiorikoka ahi karajaanga abe naa ma dekanino duru tokarajaanga de ahi buturungu ma gahumu nia babaka.

⁷ Masara wohibudi dika abe ngaro wohihibehehongo wato ahi hewa hokonaa de hokonaa wohihidoaka masara hokogenangua wohihidoaka. Abeika, ma ngimoiokau ahi hewa wohigali-gali waturuuru ho ngaro wohihibehehongoka ngohino ma, ko watobagou-goungua. Masara Ma Jou ko wihigunoaua wohihikangela hiadono tohuhaholi.

⁸ Ho Ma Jou wohiduhunu la nako ani baba wato o domba ma baa-baanga idadi to ngohi de ahao o duduono mata-mataika imulaenge ingofaka o domba ma baa-baanga. De ka de nia baba ai demo waturuuru de wato ka idadi tomale abe ma hohigilere dika de Ma Jou wohiduhunu la o kabingi ma ngofaka imaboa ma hohigilere.

⁹ Hokogea Ma Jou wohiaturu la nia baba ai aewani ma ngoe idadi to ngohi.”

¹⁰ “De naa kiani tinihingahu nginika naga ma moiuku Ma Jou wotemo ngohino ahi buluhara ma goronaka. Gea ma oraha o kabingi ma duduono ikokiniiki de tobuluhara de tamake hoka naga o kabingi ma beka mata-mataika ikokiniiki de o kabingi ma nauru ma dodigiiri dika.

¹¹ De ahao ahi buluhara ma goronaka naga Ma Jou ai malaekata wotemo ngohino wato, ‘Yakubu!’ De ngohi topaluhu tato, ‘Ngohi naga tototoihene!’

¹² De o malaekata gea wotemoli wato, ‘Nohidodiai nomalega de ka idadi ngona namake abe hokokia o kabingi ma nauru iniiki o duduono ma goronaka ka ma nauru dika abe ma dodigiiri dika eko ma baa-baanga dika. Hokogea idadi angamoi Ngohi tamakeoka mata-mata gea o Labana wodiai ko itiaiua ngonaika.

¹³ Ngohi naa Ma Jou tonitemo abe ma dihira tonitutumu o Beteloka de ngona napake ma hakaru gea hoka o hohininga ma liate de ma lokuku nogopoauku o minya la nohitunguu ma hakaru gea nomadingakoka Ngohino. De ma oraha gea nohihibehehongo abe nomahijou Ngohino dika. Ho naa tonihingahu adonoka ma oraha abe kiani o tonaka naa nanoaika de nolio to ngona ani tonakika abe genangoka nomaboa.’ Hokogea Ma Jou wohihibehehongo ngohino, ti ngini nia rokatino, ho naa tinileha sarakia ti ngini nia hininga?” Hokogea o Yakubu ai hitararono ngoi feka-fekatika.

¹⁴ De o ngo Rahele de o ngo Lea yopaluhu o Yakubika ato, “Nako ngomi, misanangi dika ani demoika. De abe nenangoka, ka o kiahi naga la ngomi mimahinganono genangika? Ngomi o ngofeka ho ko miamakeua mia oara mia babaino.

¹⁵ Ho ngaro ngoi ora idodutu masara o baba womiao imaketero hoka o homoaino ma ngofeka. Una womifukunu dika de ai utumu genangino wapake wamataka ho ko iwa ma titi la migogerohi nenangoka.

¹⁶ O baba ai duduono Ma Jou waleoka de wonihidoaka ngonaikali. De mata-mata gea kiani idadi to ngomi de nanga ngofa-ngofaka manga utumu. Ho mata-mata gea Ma Jou wonihibehehongo ngonaika wato kiani nodiai, ngomi miato kiani naniiki ai demo mata-mata gea.” Hokogea o ngo Lea de o ngo Rahele manga demo manga rokatika o Yakubu.

^17-19 De ahao o Yakubu wahidiai la ka idadi yosobo. Masara wato kiani o Labana woikokahi de ahao ka idadi yosobo ho yodamaa la o Labana woiki ai domba ma duduono moiika la ma gogo waguti. Ho una woikoka de ahao o Yakubu wato, “Ho naa ngone ka idadi hoiki.” Ho ka de wahingahu hokogea de manga kiahonanga de ai aewani o dofo mata-mata abe wamake o Mesopotamia ma tonakoka gea wakokitoomuino ka ma moi. Masara ko yosobouahi de o ngo Rahele mowohama ami baba ai tau ma goronaika de naga ai pangao muruono naga de ena gea makokitohiki la ma oraha yosobo de mao. Ho gea yomahidiai ibootoka de ahao o Yakubu ngoi feka-fekata de ai ngofa-ngofaka wahibarene o unta ma poretuku de ahao yokokisobo. De yoiki o Kananika manga dumutu ai baba o Isaka ai tonakika.

²⁰ Hokogea o Yakubu ai budi ma hiaturu ho yomatohiki la ngaro ufa de wahioriki o Labana.

²¹ De mata-mata ma kiahonanga abe idadioka to ona, gea o Yakubu wakokiaoka. De yotobongo o Efaraata ma akerika de ahao yogila-gila abe manga dumutu o Gileada ma tonakika, abe ma tonaka gea naga de ma loku-lokuoka.

O Labana winiiki o Yakubu la wato widaene

²² De o Yakubu de ona ai tauoka yopahaika o wange hange ma dekana de ahao o nyawa iwihingahu o Labanika abe ona yoikoka.

^23-24 Ho ka de woihene yoikoka de o Labana watoomuino ai dutu-dutu o nau-nauru la ato iwinii-niiki o Yakubu de kiani ato iwidaene. De ngade-ngade iwidaene de yofutuku de Ma Jou womahimatoko o Labanika ai buluhara ma goronaka de wihitiari wato, “O Labana, ngona nohidodiai abe hokokia notemo o Yakubika, ngaro ma lifunoka hiadono ma dekarika ma ngaro ufa nitaere.” Hokogea Ma Jou witemo. De ahao ma dawangeino abe adonoka manga wange tumidi iwinii-niiki de ngade-ngade o Yakubu iwidaene o loku-lokuoka abe naga imakadateke o Gileada ma tonakoka.

²⁵ De ma oraha gea ngade-ngade iwiadonoka de o Yakubu de ai doomu mata-mata nagahi manga hiaini ma ngiokahi. Ho ka de o Labana wamake ona ko yokurutikakaua de unangoo wato womahiainohi ho manga hijai-jai ma tau wohigokoiye genangoka la una de ona yomakitingaka ko ikurutikaua.

²⁶ De ahao o Labana woiki witutumu ai toroaika de witaere wato, “O kia ma titi ho nohibudi ho hiadono nomatohiki ko nomahilooaikaua ngohino? Ho mode ngona nato ngohi ora-ora naa o parangi ma goronaka nataokino ho hiadono nahiloara hokonaa?

²⁷ Adodoa ho nimatohiki? Nako ngini nihihingahu ngohino, gea ko nisobouahi de todiai o rame-rame abe duru honya-nyanyi de hokuti-kuti de hapake o gogereenge gea la duru ngone mata-mata hogogarago.

²⁸ De ko tomahidaenua ngohi ora tabounu de ahi danongoo ma toigo takokibounokahi de ahao ka idadi tinihigunoa niloiki. De ngaro ngohi tahibehehongo yomahidodiai o ngekomika ma, ngona ko nohihigunoaua. Ngona nodiai itorou imakadaene abe hoka ko nososawarouahi!

²⁹ Ngohi de ahi kuahaka ho nako tato tonihikangela ka idadi! Masara Ma Jou abe ani baba womahijou Unangika, gea o futu Una wohihitiari wato, ‘Ngona nohidodiai abe hokokia notemo o Yakubika.’ Ho Ma Jou ai demo gea dika ma titi hiadono ko tonihikangelaua.

³⁰ Ngohi naa tonihioriki duru ani tonaka nohininga ho kiani namao nolio ani babaika. Masara, abe duru ko tomangaratiiua, adodoa ho ahi tauoka ahi pangao nakokitohikoka?” Hokogea o Labana ai demo o Yakubika.

³¹ De o Yakubu wipaluhu wato, “Toroa, tanu tomahilooa masara ngohi ko tonihingahua angamoi tohawana tato done ngoni ora-ora nahigilio de ko nohihigunoaua la ngohi feka-fekata tao.

³² De abe ma titi ani pangao nako naga o nyawa nenangoka abe inidohiki ani pangao gea, ngaro onagona dika ma kiani yohonenge. Ahi nyawa mata-mataika ka idadi natailako de nako o kia dika namake naga onangoka abe nato to ngona ani kiahonanga, gea nohigilio dika. De gea nodiai nanga gogianongoru mata-mata duru manga hima-himangoka.” Hokogea o Yakubu wotemo angamoi ko wohiorikua gea ngoi fekata o ngo Rahele abe magoraka ami baba ai popangao gea.

³³ Ho to Yakubu ai tau o ngoerino duru ihira genangika o Labana woiki wolingiri, de ahao o ngo Lea ami tau de ngoi feka-fekata utu to onangoo manga tau wakokitailako masara moioo de ko wamakeua ai pangao. De ka de o ngo Lea ami tauoka wohupu de ahao wolingiroli o ngo Rahelika ho gea wowohama ami tauika.

³⁴ De igoungu gea muna abe ai popangao magoraka de magogono ami unta ma gogogeroka abe mapake ami unta ma poretoka. De naa ka de ami baba wowohama de muna naga mogogeruku duru ami unta ma gogogeroka gea. Ho ngaro o Labana ami tau ma goronaka duru watotailako mata-mataika ma ko wamakeua.

³⁵ De o ngo Rahele momahilooa mato, “Baba, tonganono la ufa nohingamo ngohino abe ma oraha nowohama de ko tomaokoua mangale ahi mede tamake ho tokangela tomaoko.” Ho gea ngaro o Labana duru ai popangao wolingiri ma ko wamakeua.

³⁶ Ho wolingiri ibooto de o Yakubu wongamo ho duru ai demo de ma buturungu ai toroaika wato, “Ho namakeoka? Ahi howono ngonaika o kia? De done adodoa ho nohikiniiki? Gea ngona nato ngohi naa duru tatobahowono! Hokogea ani hininga ngohino.

³⁷ De ngaro hokokia natolokini ahi kiahonanga nolingi-lingiri abe nako naga to ngona genangoka, masara namake o kiaka? O kiaka ani kiahonanga, abeika nohihimatoko! Abeika nakelenga nenangoka, kiani nanga himangoka nakelengauku la ngone hamake o gogianongoru ngone mata-mata. De ahao ona yaputuhu nako ma kiahonanga gea to ngona eko to ngohi!”

³⁸ De o Yakubu wogila-gila womademo o Labanika la o nyawa mata-mata genangoka ka idadi yoihene wato, “Naa adonoka ahi taongo monaoko togogere ngonaka. Hokogea ma dekana to ngona ani domba de ani kabingi mata-mata togoana de gea tapaliara hiadono ko ma moiuahi naga ma ayo ma ngofaka iotaka. De ngaro tohafini ma ko ma moiuahi ani domba eko ani kabingi ma naurino tale moi la tomadoma.

³⁹ De nako naga o fuhuku ma aewani abe yatomaka, sarakia, ani dofo ma honenge gea tonihimatoko de tonihuloko la gea nakuranga ani bukuoka abe genangoka naetongo ani aewani ma ngoe? Koua, ani dofo moioo de ko norugiua angamoi ani hiaturu la kiani ngohi tofangu ani aewani mata-mata abe ihihangoka ngaro o aewani o fuhuku yagoli ekola o nyawa yatohiki ma ngohi tatagongo. Ho ngohi dika torugi ngaro ani aewani ihihanga ko ma titiua to ngohi ahi howono.”

⁴⁰ De o Yakubu ai hininga ma huha ka womahingahuohi wato, “Ahi toroa naa moioli totemo la noihene, ngohi ngaro duru o wange ihidihiwara de ihidahauku de ngaro hiadono ihihidufutuku ho ihimaata hiadono ko idadiua ihikiooko ma ka tokarajaangohi de ko tokurubungua.

⁴¹ Igoungu, ahi taongo monaokino ahi dekana tokarajaanga ngonaka, abe de ahi taongo ngimoi de iata tokarajaanga tomahifangu ngoni ora yahinooto. De ahao tokarajaanga ahi taongo butaangohi la ka idadi to ngohi ahi duduono tamake. De ngaro o taongo butaanga gea masara de ma ngimoi ahi hewa nakura-kuranga.

⁴² Masara ngohi naga Ma Jou wohiniiki de gea Una abe ahi ete, o Abarahaama womahuba-huba Unangika. De ahi babaoo o Isaka, unangoo duru de ai horomati Ma Jouika. Ho duru Ma Jou Una gea abe ka ihikaika naga ngohioka angamoi nako ka ngona dika, toroa, de nohihiaturu ka hiadono ngaro ahi kiahonanga moioo de ko iwa ma, ko nopusingua. Abe ngaro tohupu de ka tomahomoa dika ma ngona ka nohihigunoa dika. Masara Ma Jou womalega ngohiuku de wamake ahi karajaanga de wamakeoo hokokia ngona nohihitubuho ho hiadono o futuika ngonaika Ma Jou wohidemo ngohi.” Hokogea o Yakubu wihiree-reeika o Labanika.

O Yakubu de o Labana yomakadame

⁴³ De ahao o Labana wopaluhu unangika wato, “Abeika, o ngo-ngofeka naa to ngohi ngohi ora-ora, de manga ngofa-ngofaka naa to ngohi ahi dano-danongo mata-mata. De ngaro ani duduono mata-mataika gea tanu to ngohi, de ani kiahonangoo ma gea to ngohi. Ho mata-mata hamake nenangoka to ngohi. Masara ngohi hokokia todiai la ufa tahikangela ngohi ora-ora de ahi dano-danongo?

⁴⁴ Ho kiani ngone naa homakadame de kiani de nanga behehongo ma dodunguu la gea ko hawohangua abe homahiketehibehehongokau ngaro hokokia ma dekana howango ma ko hawohangua.”

⁴⁵ Ho o Yakubu waleino o hakaru ma guru-gurutu moi de wohigokoiye la wodiai manga behehongo ma dodunguu.

⁴⁶ De wahuloko ai dutu-dutu o nau-nauru la o hakaru utuohi iwoe yatoomuino de ma hakaru yafafo dau de aiye. De ahao o Labana de o Yakubu yogogeruku ma datekoka de o inomo yomakokeregu la yoboriolomo genangoka la ihitunguu yomakadameoka.

⁴⁷ De o hakaru ma doomu gea ihiromanga, “O Hibehehongo ma Doomu,” abe nako o Labana ai demo ma romanga o Yega-Sahaduta de nako o Yakubu ai demo ma romanga o Galeede.

⁴⁸ De o Labana wato, “Itiai hohiromanga hokogea angamoi o hakaru ma doomu naa idadi o hohininga abe hohitunguu nanga dame ma behehongo.

⁴⁹ De ngaro Ma Jou wonagoana ngona de ngohi la ngaro homakitingaka ma gurutika ma ko hatilakurua abe hoka homahiketehibehehongoka nenangoka.” De ma titi ai demo gea hiadono ma ngi gea o nyawa ahao ihiromanga, “o Gogoana ma Dodunguu.”

⁵⁰ De o Labana wihitiari o Yakubika wato, “De ngaro homakitingakoka ma gurutika hiadono ko idadiokaua homakamake masara Ma Jou wonamake. Ho ngaro nodiai abe ko itiaiua ngohi ora-oraika eko ngoni fekata nomadogoli masara ngohi ko tonihiorikikaua masara Ma Jou Una ka idadi wonihioriki.”

^51-52 “Abe o hakaru ma doomu naa de genangokali nohigokoiye gea ikokidadiokali nanga batingi ma dodunguu nanga hidogoronaka. Ho ngohi naa duru tagoungu nanga batingi naa duru ko tatilakurua la ka idadi tonihikangela de ngonaoo ko idadiua natilakuru nanga batingi naa la noboa nohihikangela ngohi.

⁵³ De naa ahi koboto ma demo tapake la tonagahoko o kangela Ma Jouino nako hatilakuru nanga behehongo naa. De Ma Jou gea Una abe to ngona ani ete o Abarahaama de to ngohi ahi ete o Nahoro yomahijou Unangika, gea Una ahao wonahohowono nako hatilakuru nanga batingi.” Hokogea o Labana ai koboto. Ho o Yakubu unangoo wokoboto wato “Ngohioo duru de ahi horomati ahi baba o Isaka ai Jouika ho ngohioo totemo to Una ai himangoka ka idadi wohihohowono nako ngohi nanga batingi naa tatilakuru.”

⁵⁴ Hokogea yomahiketehibehehongoka ibooto de ahao o Yakubu ai huhuba womahihuba Ma Jouika o lokuoka gea de ahao manga nyawa mata-mata wakokiahokino wato, “Naa kiani ngone mata-mata holomo horame-rame.” Ho ona yolomo yorame-rame de o futu gea yomaidu o loku-lokuoka gea.

⁵⁵ De ma dawangeino duru o ngoru-ngorumino de o Labana womomiki de ai dano-danongo de ngoi ora-ora wakokibounokahi de wahiowa. Gea wagahoko ma owa ibooto de ahao womahilooa onangika de wosobo wolio ai tonakika.