Dodadi 30 - Ma Jou ai Demo-demo o Totobelohoka

¹ De angamoi o ngo Rahele ami ngofaka ko iwa de ngomi riaka ami ngofaka naga ho ka ihikaika momitaleana ngomi riakika. De motemo de ami huha ami rokatika mato, “Yakubu, kiani ngohioo nohihidoaka o ngofaka ngohino, nako ko nohihidoakua de ahao ngohi tohonenge dika!”

² Ka de hokogea motemo de o Yakubu wongamo munangika wato, “Ho ngona nato bote ngohi naa Ma Jou? Nako o ngofaka hatoli gea to Una ai kuahaka, ho gea ani ngofaka ko namakeuahi ma titi to Una ai hiaturu ko to ngohiua!”

³ Masara o ngo Rahele mihigaro mato, “Abeika, naga ahi duduhunu o ngo Bilaha ho muna ka idadi mohituruuru la ngohi tamake o ngofaka munangino. Ho gea kiani nomaidu munangoka la muna ahao de ami badangoka de ami ngofaka abe momagerewoto idadi to ngohi ahi ngofaka la to ngomioo mia tauoka naga mia ngofaka.”

⁴ Hokogea o ngo Rahele ami hininga ho o ngo Bilaha momihidoaka ami rokatika de o Yakubu womihigihene ho yomaidu de o ngo Bilaha.

⁵ De muna ahao de ami badangoka de momagerewoto womatengoli o Yakubu ai ngofaka.

⁶ Ho ka de o ngofaka gea womaboaka de o ngo Rahele duru mosanangi de motemo mato, “Ngaro o nyawa ihihiade-ade ato ahi ngofaka ko iwahi angamoi tahowonoka, masara naa abeika Ma Jou wohiduhunoka! Ho gea ihihitaana abe ko iwa ahi howono angamoi ahi ngofaka naa wohihidoakoka!” Hokogea ami hininga hiadono o ngofaka gea mihiromanga, “o Hitaanua,” abe to ona manga demo, “o Daana.”

⁷ De ahao o ngo Rahele ami duduhunu o ngo Bilaha gea de ami badangokali de naa ma hinooto momagerewoto o Yakubu ai ngofaka o nauru.

⁸ De o ngo Rahele motemo mato, “Ngohi de ngohi riaka mimaketejojoba abe munangohi moputurungu eko ngohi. De naa igoungu ngohi tolaku de muna o riaka mokala.” Hokogea o ngo Rahele ami hininga hiadono o ngofaka gea mihiromanga, “o Jojoba” abe to ona manga demo, “o Nafatali.”

⁹ De o ngo Lea mato bote o ngofaka ko momamakeokaua ho munangoo mato modiai imaketero hoka ngomi dodotoli ho ami duduhunu o ngo Sipa mihidoaka o Yakubika la munangoo modadi ngoi fekata momatengoli.

¹⁰ De o ngo Sipa ahao munangoo momagerewoto o Yakubu ai ngofaka o nauru moioli.

¹¹ De o ngo Lea motemo mato, “Irahai ahi utumu naa!” Hokogea ami hininga ho o ngofaka gea mihiromanga “o Hiutumu” abe to ona manga demo, “o Gaada.”

¹² De ahao o ngo Sipa, abe muna o ngo Lea ami duduhunu, momagerewotoli o Yakubu ai ngofaka womatengoli.

¹³ De o ngo Lea motemo mato, “Ngohi duru tososanangi naa! De o ngo-ngofeka utu ahao ka ihikaika ihihidaere ngohino ato, ‘Muna duru mososanangi.’” Hokogea ami hininga o ngo Lea hiadono o ngofaka gea mihiromanga, “o Sosanangi” abe to ona manga demo, “o Asere.”

¹⁴ De ma moiuku abe ma oraha o gandumu youtuku de o ngo Lea ami ngofaka o Rubene wotagi-tagi o redi-redioka de wamake o dudaimi de ma hofokoka ho gea ma hofoko wale de watofi de ahao womihidoaka ngoi memeika. De o ngo Rahele ahao mamake ma hofoko gea de mogahoko o ngo Leaika mato, “Ka idadi utu ngohi togahoko ani dudaimi ma hofoko abe ani ngofaka wonihidoakika?”

¹⁵ Masara o ngo Lea momipaluhu o ngo Rahelika mato, “Ho ngona marai ko iniwedonuahi abe ahi rokata nohioraka? Ho naa ahi ngofaka ai hofoko enangoo nato nohiora e?” De o ngo Rahele mopaluhu mato, “Nako hokogea ani hininga iti ngona o futu naa de nomaidu de nanga rokata iti ani ngofaka ai dudaimi ma hofoko utu nohihidoaka ngohino.”

¹⁶ Ho o bobimaowaka ka de o Yakubu manga redi-redino woboa de o ngo Lea mibuhuku de mihingahu mato, “O futu naa kiani nomaidu ngohioka angamoi tonihewakau de ahi ngofaka ai dudaimi ma hofoko.” De ngoi fekata manga hiaturu gea waniiki o Yakubu ho o futu gea womaidu de o ngo Lea.

¹⁷ De Ma Jou o ngo Lea womihigihene abe to muna ami hininga ho muna de ami badangokali de ami ngofaka momamake ma motoa de ami ngofaka gea o nauroli.

¹⁸ De o ngo Lea motemo mato, “Naa Ma Jou wohibalaha irahai angamoi tihisanangi ma oraha ahi duduhunu o ngo Sipa tihidoaka ahi rokatika.” Ho ami ngofaka mihiromanga, “o Hibalaha ma Rahai” abe to ona manga demo, “o Isakara.”

¹⁹ De ahao o ngo Lea de ami badangokali de momagerewotoli o Yakubu ai ngofaka o nauroli abe naa to muna ami ngofaka o nauru yadonoka yabutaanga.

²⁰ De motemo mato, “Abeika, Ma Jou ai hidoaka ma rahai ngohino hiadono ahi rokata wamake ai ngofaka yabutaanga ngohino. Ho marai naa ahi rokata duru wohihoromati ngohino.” Hokogea ami hininga ho o ngofaka gea mihiromanga, “o Horomati” abe to ona manga demo, “o Sebulono.”

²¹ De ahao o ngo Lea mamakeoli o ngofaka o ngofeka de momihiromanga o ngo Dina.

²² Gea de ahao Ma Jou womiduhunu o ngo Rahele abe ami gogahoko womihigihene ho womihiakunu la ka idadi munangoo o ngofaka mamake.

²³ Ho ahao muna de ami badangoka de ma oraha momagerewoto o ngofaka o nauru de motemo mato, “Ma Jou wagorakoka ahi maleke abe ma titi ma dihiraino ko iwa ahi ngofaka.”

²⁴ De ami ngofaka gea mihiromanga, “o Hidogo” abe to ona manga demo, “o Yusupu.” Una gea mihiromanga ibooto de o ngo Rahele mato, “De duru tomahinganono Ma Jou wohidogo ahi ngofaka o nauru womatengoli.”

²⁵ Gea o ngo Rahele momagerewoto ami ngofaka o Yusupu de ipaha o Yakubu ai hininga womahingahu o Labanika wato, “Toroa, ngohi naa tato ahi tonakika tolio.

²⁶ Ho togahoko la nomihigunoa miloiki, ngohi de ngohi feka-fekata de ahi ngofa-ngofaka angamoi iwedonoka ahi karajaanga ngonaka hiadono itiai totemo tato ona mata-mata duru yodadioka to ngohi. Ngona nohioriki ma dekana tonileleani de ahi karajaanga ma titi la ona ngohi feka-fekata de ahi ngofa-ngofaka tamake. Ho naa togahoko nomihigunoa la misobo.” Hokogea o Yakubu ai demo ai toroaika.

O Yakubu de o Labana manga duduono yomakeregu

²⁷ Masara o Labana wopaluhu wato, “Ahi ngofaka nako noigo nohihisanangi ufa nomatingaka ngohino. Abeika, wohihiowaka Ma Jou o Yawe ma titi ngona naga ngohioka abe ma oraha tomamaihi de naga ma dodunguu abe itaana hokogea.

²⁸ Ho irahai ngona notemo abe ani hewa hokokia noigo de ngohi tonihidoaka dika.”

^29-30 De o Yakubu wipaluhu o Labanika wato, “Toroa, ngona nagoungu abe Ma Jou o Yawe duru wonihiowa ahi karajaangino. Abe ka de ngohi toboaino hiadono o wange naa de ko iwa ma dogumu tokarajaanga ma titi tonihidailako hiadono ani aewani ma duduono mata-mata duru ifaa-faatuku. Igoungu, ma oraha gea abe ngohi ko ihiwainohi de ani kiahonanga duru ko kia-kiauahi. Ma, ka de ngohi togogere ngonaka de ngaro o kiaika dika toiki Ma Jou wapake mata-mata ngohi todiai la wonihiowa ngona! Masara to ngohi ahi utumu ahi karajaangino gea o kiaka? Abe ngohi feka-fekata de ahi ngofa-ngofaka to onangoo manga perelu kiani ngohi tahidailako ho marai adonoka ma oraha ahi karajaanga ma hasili idadi to onangoo manga utumu eko sarakia?” Hokogea o Yakubu ai demo.

³¹ Ho o Labana wilehali o Yakubika wato, “Nako hokogea ani hininga, marai naga abe ngona noigo tonihidoaka?” De o Yakubu wipaluhu wato, “Toroa, nako to ngona ani kiahonangino ko togahokua. Masara ma oraha naa adonoka ahi karajaanga ma hewa gea ani aewani ma ngofakino la utu idadi to ngohi. De nako homahikaaturu la idadi hokogea, ka tosanangiohi togoana ani duduono de tao-ao la imakegetongo o ruruubu ma rorahaiika.

³² De hokonaa ahi hewa nako nosanangi: ani duduonoka abe duru iwoe gea o domba ma gare-garehe de o kabingi ma gogo iahumu ma hengo-hengo eko ma doka-dokara masara naga ko iwoeua abe o domba ma baa-baanga de o kabingi ma dodigiiri. Ho o wange naa togahoko la nohihigunoa toiki takokitailako ani domba de ani kabingi de tatinga-tingakika la ani aewani ma rupa amomoi. Abe o kabingi ma dodigiiri de o domba ma baa-baanga de o domba ma ngofaka ma hengo-hengo mata-mata abe tamake ka idadi tohikatingaka ani duduonino la ena gea idadi to ngohi ahi duduono. De o duduono abe o domba ma gogo ma gare-garehe de o kabingi ma doka-dokara eko ma hengo-hengo gea to ngona la ma rupa imaketemomoi to ngonaoo ani duduono de to ngohioo ahi duduono ma gogo ma rupa. De ahao ani domba de ani kabingi abe ma oraha ingofaka abe ma rupa ma baa-baanga eko ma dodigiiri eko o domba ma hengo-hengo, enangoo ma ngofaka idadi to ngohi ahi hewa ngonaka de aino.

³³ Hokogea todiai la ngona nohihioriki ngohi abe ko totobatohikua. Abe ahao to ngohi ahi duduono de to ngona ani duduono ma gogo ko imakadaenokaua. Ho nako ngona ahao noiki natailako to ngohi ahi duduono de namake o domba ma gare-garehe eko o kabingi abe ko ma dodigiiriua gea duru ihihitaana abe ngohi tonidohikoka.” Hokogea o Yakubu womahingahu ai toroaika ma titi manga duduono ma hiaturu.

³⁴ De o Labana wosanangi ai demo gea wato, “Hokogea itiai, ngaro ahao idadi abe hoka ngona notemoka!”

³⁵ Masara una ko woigoua o Yakubu dika wohiaturu ho duru o wange gea de o Labana woiki ai duduonika de una dika wolingiri o kabingi mata-mata abe ma dodigiiri ai duduonoka. Ho ngaro ma beka eko ma nauru iti abe gea o kabingi ma dodigiiri mata-mata wohihupu ai duduonino. De ngaro ai domba ma gogo iahumu ma hengo-hengo eko ma baa-baanga ma enangoo wohihupu ai duduonino de gea wahitagongo to una ai ngofa-ngofakika la ona dika yotobagoa-goana.

³⁶ De o Labana de ai ngofa-ngofaka ma duduono gea yaoika, abe ona yoiki yomatingaka o Yakubino o wange hange ma dodagi ma gurutika la o duduono hinooto gea ihikatingaka kohagurutika la ibootohi imahikasapuru. Ho o Yakubu ka wagoa-goana o Labana ai duduono ma hou dika abe o Labana ko watingakikaua.

³⁷ De ahao o Yakubu waleino o gota ma dori o fara muruono naga abe ma roma-romanga o hawara, o badama, de o baa-baanga. De gea ma dori-dori wale ibooto de homoi-homoiika ma kai wakorioka la ihikokatoakika ma bunga ma ngoe.

³⁸ Hokogea wodiai la ma oraha iboaino ikokiokere ai domba de ai kabingi de ka idadi akokimake ma bunga. Ho ma dori mata-mata gea wohibelohuku o akere ma ngi ma datekoka la ma oraha ikokiboa ma ngongokerino la iokere de yakokimake ma domba de ma kabingi la ma ngofakoo ka idadi yoduru hoka ma gotali ma bunga. Wohidiai hokogea angamoi ma domba de ma kabingi nako ma oraha iboa iokere gea iniiki.

³⁹ De o Labana ai kabingi de ai domba mata-mata abe imalega o gotaika gea ma oraha iniiki de ahao ma ngofaka idadi hoka ma gotali abe ma baa-baanga de ma dodigiiri ma ngofaka.

⁴⁰ Hokogea o Yakubu wogoana wohimoloka ma naurika abe ma baa-baanga de ma dodigiiri ma oraha imulaenge iniiki. Angamoi nagahi o Labana ai duduonoka ai domba de ai kabingi ma nauru abe ma hengo-hengo de ma hohigilere. Ho o domba de o kabingi ma ngofaka abe enangoo ma baa-baanga de ma dodigiiri gea wohidogoli to Yakubu ai duduonika.

⁴¹ De o duduonoka naga ma beka ilamoko ma badanga de utu ieteteke ho ikuranga iputurungu. Ho o Yakubu wairiki gea abe duru ilamoko la ma oraha iniiki de ma gota gea abe wohidiaioka de ma bungaka wakelenga ma himangoka.

⁴² Masara ma beka abe ihumuduru ena gea ma himangoka ko wakelengaua o gota de ma bungaka gea. De ma ayo ipoputurungoka ma ngofaka ma dodigiiri de ma ayo abe ko iputurungua ma ngofaka ma gare-garehe eko ma doka-dokara eko ma hengo-hengo iahumika. Ho yoduru to ena ma ngofaka abe ma buturungu hoka ma ayoli. Ho abe ma ngofaka de ma buturungoka gea to Yakubu de ma ngofaka abe ko iputurungua gea to Labana. Angamoi o domba ma ngofaka ma gare-garehe de o kabingi ma ngofaka abe ko atotigiiriua gea to Labana.

⁴³ Ka ihikaika hokogea o Yakubu wodiai hiadono to una ai aewani duru itaiti idogo iwoe ho hiadono ika-ika una duru wokaya de ko manga ngoe ai nyawa abe iwiduhunu, de nagali ai keledai de ai unta kohangoe.