Dodadi 3 - Ma Jou ai Demo-demo o Totobelohoka

Hokokia o nyawa ma dodihiraka ko iwihingounua Ma Jou

¹ Naa o aewani o fuhuku mata-mataika abe Ma Jou o Yawe watulaadauku ma ka o dodihahi isawaro ibudi. De ma moiuku o dodiha ato o ngofeka imibudi ho iboa munangino de imileha ato, “Igoungu, o gota mata-mata ma hofoko o redioka naa Ma Jou ko winihigunoaua ngini niaolomo?”

² De muna mopaluhu o dodihaika mato, “Koua, hokogenangua wotemo, o gota mata-mata ma hofoko o redioka naa ka idadi miaolomo.

³ Masara igoungu Ma Jou womihibehehongo wato, ‘Bowahu naga o gota moi dika imatotogoronaiye iwango o redioka naa, abe ngini ko idadiua to ena ma hofoko niaolomo done nihonenge. De ngaro niaso ma, ufa done nihonenge.’”

⁴ De o dodiha gea imipaluhu de o budi ma demo munangika ato, “Masara koua, niaolomo dika angamoi ngaro ma hofoko gea niaolomo ka idadi de ngini ko nihonengua.

⁵ Ma Jou ko woigoua ngini niaolomo angamoi wohiorikoka ka de niaolomo ma hofoko gea, de inihitararono ti ngini nia hiningaka hiadono nginioo nidadioka nimakadaene hoka Unangoli, ho gea nginioo nihioriki o kia ma owa de o kia ma dorou.” Hokogea o dodiha ma budi ma demo.

⁶ Ho muna gea moihenoka de angamoi mamake ma hofoko gea duru irahai ho duru moigo maolomo hiadono doka ami hiningaka mato, “O hofoko gea nako taolomo marai duru imutiti de gea igoungu inahidadi hososawaro ho duru toigo taolomo.” Ho ma hofoko gea momadofi de maolomo. De utu mihidoaka ami rokatika, angamoi una naga wominiikika, ho unangoo waolomo.

⁷ Ho ka de ona ma hofoko gea yaolomoka de manga kokihiningaka ipuda ato, “Adoo, ngohi naa ka ahi bululunoka!” Abe yahinooto gea homoi-homoiika yomahioriki, ona ka manga bululunokahi, ho ona yamao kiani yomahitatoko. De naga o gota moi ma romanga o gogilioro de ona yomale to ena ma hoka de manga dadatoko yomaguriti de yomahitatokoko.

⁸ De o wange ilobioka ona iwigihene Ma Jou o Yawe wotagi-tagi ma redioka gea. Ho yahinooto yomagogonika o gota-gotaka ma redi ma goronaka la ato ufa Ma Jou o Yawe wamake.

⁹ Masara Ma Jou o Yawe wiahoko o naurika wato, “Adama, o kiaka ngona naika?”

¹⁰ De una wipaluhu Ma Jouika wato, “Angamoi ngomi minigihene nokokaraaha noboa o redino naa de minimodongo ho mimagogonika angamoi ka mia bululunokahi.”

¹¹ De Ma Jou wibole ma goa-goa wato, “Ka onagona inihingahu abe ngini ka nia bululunoka? Maraioka niaolomoka o gota ma hofoko gea abe Ngohi ko tinihigunoaua niaolomo e?”

¹² De o nauru gea wipaluhu Ma Jouika wato, “Muna gea abe Ngona nohihidodiawoino, muna gea maleino de mohihidoaka ngohino o gota ma hofoko gea hiadono taolomo.”

¹³ De ahao Ma Jou o Yawe womileha o ngofekaika wato, “Adodoa ho ngona nodiaioka hokogea?” De muna gea mipaluhu Ma Jouika mato, “Masara o dodiha gea ihibudi ho hiadono ma hofoko gea taolomo.”

¹⁴ De ahao Ma Jou o Yawe wotemo o dodihaika wato, “Angamoi muna gea nomibudioka ho Ngohi tonihohowono hokonaa. Ngaro o aewani mata-mata ma ka ngona dika namake o hohowono naa: ngona nomalia-liara de ani pokoro ho nako notagi-tagi nahohohurudaka o tonaka ma kafo, ka hiado-adonika ani wowango.

¹⁵ Ho ngona de muna, o ngofeka gea, ahao ka tinihikokadohatika, muna de ngona, de to ngona ani ngofaka de ani danonguku, de to muna ami ngofaka de ami danonguku, ona ka ihikaika yomakumusu. De gea yomakumusu ka hiadono ahao woboa womatengo to muna ami toforauku, de Una gea ahao ani pea wawedere, de ngonaoo ahao ai bobooika natuduku.” Hokogea Ma Jou o Yawe ai hohowono o dodihaika.

¹⁶ De ahao Ma Jou wotemoli o ngofekaika wato, “De to ngona ani hohowono hokonaa: abe ma oraha de ani badangoka de ani odiri naga, de hongoli abe ani gahe adono de ani odiri duru namao. Masara ngaro hokogea ani kangela ma, ani rokatika ka niigohi, de una gea ahao wonihiaturu de kiani nihigihene.” Hokogea Ma Jou o Yawe ai hohowono munangika.

¹⁷ De ahao Ma Jou wotemo o naurikali wato, “Ho naa to ngonaoo ani hohowono naga angamoi gea tonihingahuoka tato, ‘Ufa ma hofoko gea naolomo,’ masara ko nohihigihenua. De mangale ka nomihigihene ngoni fekatika ho hiadono naolomo ma hofoko gea abe ko tonihigunoaua ho ani hohowono hokonaa: Ngohi o tonaka tohipoha de o hohowono ho hiadono kiani duru nomapoputurungu nomakarajaanga la hiadono o tonakino ma hasili namake. De o tonaka ma hasili ani redino gea ti ngini nia inomo ho ka ihikaika hokogea nia wowango.

¹⁸ De ahao iwangoiye irupa-rupa de ma hihikaka de inihikangela abe adeho-dehoro ani datomika. De ti ngini nia inomo utu kiani nimalingiri o fonganika.

¹⁹ De ngona ahao nomakarajaanga hiadono ani gahauku ma amoko de duru nokangelaka de ahao ani inomo namake. Ho ka ihikaika hokogea hiadono nohonenge de gea nolio o tonakuku, angamoi ngona nodadi o tonakino de ahao o tonakukuoli nolio.” Hokogea Ma Jou ai hohowono o nyawaika.

²⁰ De o nauru wohira gea ai romanga o Adama, de womihiromanga ngoi fekatika o ngo Hawa, mangale o nyawa mata-mata abe ahao yowango, muna gea modadi manga meme.

²¹ De ma oraha gea Ma Jou o Yawe wodiai manga pakeanga o aewani ma kaiino de wahinoauku o Adama de ngoi fekatuku.

²² De Ma Jou o Yawe wotemo wato, “Abeika, o nyawa naa ihiorikoka o kia ma owa de o kia ma dorou, ho ona yodadioka hoka Ngoneoli, de ufa hiadono yomadofioli o wowango ma gota ma hofoko de yaolomo done manga wowango ko ihonengua.”

²³ Ho Ma Jou o Yawe wihuloko o Adamika la ona yohupu o Edene ma redino gea. De abe ma dihira o tonakino wihidadi de naa Ma Jou wapake o tonaka la o Adama wihohowono, abe o tonaka gea kiani womadumule.

²⁴ Ho ka de ai redino ona wahihupuoka de o Edene ma redi gea ma honongaka abe o wange ma hiwariha, genangoka Ma Jou wohigogere ai gogoana muruono naga. De ma gogoana gea ai gilaongo abe ma romanga o kerubu, ho ma ngekomo abe o wowango ma gotaika yogoana la ko idadiokaua o nyawa yoboa genangika. De nagali o dia de ma ukuoka itoka-tokara akaika akaino iloo-loliti la ko idadiokaua o nyawa yowohama Ma Jou ai redika. De gea angamoi Ma Jou ko wahigunoakaua o nyawa yoiki o wowango ma gotaika ho ma ngekomo wotatokoka.