Dodadi 28 - Ma Jou ai Demo-demo o Totobelohoka

O Yakubu woara o Mesopotamia ma tonakika

¹ De angamoi manga dimono manga huha ma titi o Esau ngoi feka-fekata ho o Isaka wiahokino o Yakubu la ka idadi wihibehehongo wato, “Ahi ngofaka, toigo ma owa namake ho ko idadiua nomale ngoni fekata o Kanani ma nyawaino abe naga nanga datekoka.

² Ho kiani ma oraha naa nomaoko de nosobo la noiki doka ngoni meme ami baba o Betuele ai tauika o Padana-Arama ma tonakoka. Ngoni meme ami iranga o Labana naga genangoka wogogere de ka idadi momatengo ngoi ora nomaagao la modadi ngoni fekata. Ho naa nomataiti nomahidiai noiki!

³ De naa tonigahoko la ahao Ma Jou Wopoputurungu wonihiowa hiadono duru nifaa-faatuku hiadono wonihidadi o nyawa manga ngoe manga dutu ho ani totoforauku duru yowoe-woeuku.

⁴ De ngaro Ma Jou ai behehongo abe ani ete o Abarahaamika, de naa ai behehongo gea ngonaikali wonihidoakoli de ani totoforaukuikali wahidoaka. Abe ngaro ngona hoka o homoa ma nyawa o tonakoka naa masara mangale Ma Jou wihidoakoka o Abarahaamika ho ahao ma tonaka naa ngini nimahitingini ngona de ani totoforauku.”

⁵ Hokogea o Isaka wigahoko ibooto de ahao o Yakubu wihidingoto o Mesopotamia ma tonakika wato naga genangoka o Betuele ai ngofaka o Labana abe una gea o Esau de o Yakubu manga meme ami iranga. Ho o Yakubu woiki witutumu ai pepe o Labana o Mesopotamia ma nyawa gea.

⁶ Naa o Esau wohioriki abe ai dodoto manga baba wihiowa de wihidingoto o Mesopotamia ma tonakika la ka idadi womale ngoi fekata manga dutuino abe yogogere genangoka. Angamoi ai baba ai demo gea o nyawa utu iwihingahu unangika abe ma titi manga baba wihitiari o Yakubika wato, “Yakubu, ko idadiua nomale ngoni fekata o Kanani ma nyawaino abe naga nanga datekoka.”

⁷ De o Esau wohioriki manga baba de manga meme o Yakubu wahingounu angamoi woikoka o Mesopotamia ma tonakika.

⁸ Ho ka de o Esau wohioriki ai baba o Isaka ai huha ma titi ko waigoua o ngo-ngofeka o Kanani ma nyawa de wato, “Ngohioo ngohi fekata tomale moioli abe nanga dutuino la o baba tihisanangi.”

⁹ Ho gea woiki o Isimaele ma nyawaika de womile o ngo Mahalata, ho gea ngoi fekata yahange angamoi ma dihiraino nagau ngoi fekata o Kanani ma nyawa yahinooto. O ngo Mahalata gea o Abarahaama ai ngofaka o Isimaele ngoi ora abe ami iranga idodutu ai romanga o Nebayoto. Hokogea o Esau wodiai la wato ai dimono wahisanangi.

O Yakubu ai buluhara o ngute o Horogaiye

¹⁰ Naa o Yakubu nagahi ai dodagi ma goronaka de ai gogere o Beresebaka gea wosoboka woiki o Harana ma tonakika.

¹¹ De o wange moiuku womahiadono o ngi moiika abe wato, “Naa o wange itumunoka ho ngade-ngade yofutu de koaho naangoka dika tomaidu.” Ho womaleino o hakaru abe naga genangoka de womahipangini. Ho de ahao womaidu o ngioka gea.

¹² De o Yakubu iwikiookoka de wobuluhara, de naga moi o ngute o tonakoka de aiye abe hiadono itikiye o Horogaiye. De naga Ma Jou ai malaekata yamuruono naga youti-doa o nguteoka gea.

¹³ De wimake naga daku o ngute ma barenoka Ma Jou o Yawe womahigokoino genangoka de wihingahu o Yakubika wato, “Ngohi Ma Jou o Yawe, abe Ngohino yomahuba-huba ani ete o Abarahaama de o Isaka ani baba. De abe ma tonaka naa ngona nomaidu-iduoka ahao tahidoaka ngonaika de ani totoforaikaoo tahidoaka.

¹⁴ De to ngona ani totoforauku tahidadi yowoe-woeuku hiadono manga ngoe hoka o tonaka ma kafo o duniaka. De o tonaka naa mata-mataika tahidoaka onangika hiadono manga gogere kohangoatika abe o wange ma hiwaroka hiadono o wange ma dumunika, de o koremiyeuku hiadono o koleharaiye ma ngoatika. De ahao o nyawa utu ngaro ko ani dutua adaene ma onangoo yakokimake ma owa ma titi ahi behehongo ngonaika naa. Abe ona ngaro manga dutu mata-mataika o dunia ma amokika ma, ahao yakokimake ma owa ngonaino de to ngona ani totoforaukuino.

¹⁵ De abeika Ngohi naa naga ngonaka de ka ihikaika toniniiki, tonigoana de tonidatoko o kangelaino. Ngaro o kiaika dika noiki ma ko tonitinga-tingakua hiadono tonihigilio o tonakino naa de tabooto todiai mata-mataika abe tonihibehehongoka tato todiai.” Hokogea Ma Jou womahimatoko o Yakubu ai buluhara ma goronaka.

¹⁶ De ahao o Yakubu womomikino de womatemo wato, “Igoungu, Ma Jou o Yawe naga nenangoka de ngohi kangano ko tohiorikua.”

¹⁷ Hokogea womatemo de ai hawanoka abe wogila-gila womatemo wato, “O ngi naa duru ka inaporohono hiadono inatodokana! Ngaro ma hoanoka masara ma ngi naa imaketero hoka Ma Jou ai tauoka angamoi Ma Jou naga nenangoka. Ho marai naa ma ngorana o Horogaiye!” Hokogea o Yakubu wotemo.

¹⁸ De una duru o ngoru-ngorumino wagoraka ma hakaru abe gea una womahipangi-pangini de waokoiye la idadi o hohininga ma liate de ahao o minya wale de wogopoa o hakaru ma lokuku la wohitunguu ma hakaru gea watingakoka Ma Jouika.

¹⁹ De ma ngi gea wohiromangoli, “Ma Jou ai Tau,” abe to ona manga demo o Betele. Hokogea wohiromanga ngaro ma dihiraino de ma kota gea nagau moi ma romanga o Luusu.

²⁰ Gea wodiai ibooto de o Yakubu womatemo wato, “Naa duru tagoungu ahi behehongo, nako Ma Jou wohiniiki de wohigoana ahi dodagi ma goronaka naa, de gea wohihidailako ahi inomo de ahi pakeanga.

²¹ De iti Una wohiaturu de ai dame la hiadono ka tolioli ahi baba ai tauika de ko kia-kiaua idadi ngohino, gea ma titi ngohi tomahijou Ma Jou o Yaweika dika.”

²² Gea wotemo ibooto de ahao wotemoli ai demo ma dumutu Ma Jouika, wato, “De o hakaru naa abe tomadingakoka Ngonaika Ma Jou, gea tohitunguu ani ngi nenangoka de tonihibehehongo abe ani hidoaka mata-mata ngohino ahao taregu ngimoi de ahao o regu hiwo ngohi tapake de o regu moi gea tonihidoaka Ngonaika.” Hokogea o Yakubu wagou-goungu wohibehehongo.