Dodadi 27 - Ma Jou ai Demo-demo o Totobelohoka

O Yakubu wibudi ai baba o Isaka

¹ De ipaha o Isaka iwiperekioka de ai lako ko iwaka ma buturungu hiadono ko womahiorikokaua ho worafi. De o wange moiuku ai ngofaka o riaka wiahokino ho o Esau woboaino de o Isaka wato, “Ahi ngofaka.” De o Esau wopaluhu wato, “Iya baba, ngohi naga.”

² De o Isaka wato, “Abeika, ngohi naa ihiperekioka de ko tohiorikua hokokia ahi dekanohi de ahao tohonenge.

³ Ho naa togahoko la ngona ani toimi nale de ma doto la nomahidiai nolimoro o tonaka ma gupaika nolingiri o luadana.

⁴ O luadana natomaka de ahao ngona nohihakai ahi inomo ma rahai abe duru nohiorikokau ena gea duru taolomo. Ho gea nohihakai ibooto de ahi inomo gea nohidotakino la ka idadi taolomo. Hokogea de ahao ahi hininga la tosanangi tonihiowa de ani oara ma behehongo.”

⁵ Ho o Esau wosoboka o tonaka ma gupaika la wolimoro wato ai baba ai behehongo wale.

⁶ Masara ma oraha o Isaka wihibehehongo o Esauika de ngoi fekata o ngo Ribeka momahidutukika matotoihene. Ho ka de o Esau wosoboka de muna mihingahu ami ngofaka o dodotika mato, “Ahi ngofaka, kangano toihene ani baba ai demo ani riakika.

⁷ To una ai gogahoko hokonaa wato, ‘Ngofaka, togahoko o luadana ma roehe nohihakai o inomo ma rahai gea abe duru ka enangohi taolomo. Ngohi ko tohonenguahi de hokogea toigo taolomokahi de ahao Ma Jou o Yawe ai himangoka tonigahoko ma owa de ani oara ma behehongo.’ Hokogea ani baba ai demo o Esauika.

⁸ Ho ngona nohihigihene ngoni meme naa abe tonihuloko kiani nodiai.

⁹ Ngona noiki o duduonika de nairiki o kabingi ka ma goohi hinooto la ani baba tihakai o inomo ma rorahai gea abe duru ka enangohi waolomo.

¹⁰ Gea ngohi tihakai ibooto de ahao ma inomo gea ka idadi ngona nidotaka ani babaika la waolomo de ahao ngona dika wonihiowa. De angamoi ufa o Esau wamake o oara ma behehongo abe wato ko wohonenguahi de kiani ihira wotemohi ma behehongo gea.” Hokogea ngoi meme mihigaro o Yakubika.

¹¹ De o Yakubu wopaluhu ngoi memeika wato, “Masara ele, abeika, o Esau duru wogoo-gogo de to ngohi ahi kai ma ofi-ofi.

¹² Ho ngaro o baba worafioka ma done wohiso de wohihioriki? Gea de ahao duru itararono unangika abe tibudi de ko wohihiowaua masara wohigahoko ma dorou dika abe duru wohihitubuho.”

¹³ Masara ngoi meme mato, “Ahi ngofaka, ngaro ngohino dika ai demo ma dorou ihidaene. Ngona kiani nohihigihene ho noikoka naoino ngohino abe tonihibehehongoka.”

¹⁴ Ho o Yakubu wosoboka ma kabingi hinooto wale de watoma de watetoro ibooto de ahao womihidoaka ngoi memeika. Ho o ngo Ribeka mohakai o inomo ma rorahai abe o Isaka duru gea waolomo.

¹⁵ De ahao o Esau ai baju duru ma rorahai magoraka ai kiahonangino abe naga ami tauoka de mihuloko o Yakubika la ai riaka ai pakeanga gea womahinoauku.

¹⁶ De o kabingi abe kanganoino o Yakubu watoma gea ena ma kai mohiduguriti ai giama ma hahawo. Ho gea ai giama arihononga mohinoa la ma gogo ma poretoka. De o kabingi ma kai ma dobiki moioli makelenga ai tomarino de mapakiti mohigilolitino la ai rupa hoka o Esau abe hoka ai tomarino de ma gogoka.

¹⁷ Ami ngofaka o Yakubu ai budi ma hidiai mata-mataika gea yabootoka de ahao mihidoaka o inomo ma rorahai gea de o roti abe ahao gea maharonguku.

¹⁸ Ho o inomo gea o Yakubu widotaka ai babaika ho wowohama ai baba ai tau ma goronaika abe genangoka o Isaka womaiduoka de wato, “Ahi baba.” De angamoi o Isaka ko womahiorikua ho wopaluhu wato, “Iya, ahi ngofaka, naa ngona onaguna?”

¹⁹ De o Yakubu wipaluhu ai babaika wato, “Ngohi naa ani ngofaka o riaka, o Esau. De ngohi todiai ibooto mata-mata abe nohihibehehongoka ho naa baba nomomikiye la ka idadi nolomo naa abe tonidomaka. Nolomo ibooto de ahao ka idadi nohihibehehongo ngohino ani oara ma demo abe nato noigo nohihiowa.”

²⁰ Masara o Isaka wato, “Ahi ngofaka, ngohi duru toheranga ka itaitiholi namake, done sarakia de namake ma inomo naa ma hiapoto?” De o Yakubu wopaluhu wato, “Ani Jou, Ma Jou o Yawe duru wohiaturu wakelenga ahi himangoka hiadono ka de ino de tatoma.” Hokogea ai baba wibudi.

²¹ Masara o Isaka wato, “Ahi ngofaka, nainohi la toniso. Ngohi toigo tonihioriki nako ngona igoungu o Esau eko o Yakubu.”

²² Ho o Yakubu woboaino ai babaino de o Isaka wiso de wikuruuru ai giamuku de ahao womatemo doka ai hiningaka wato, “To una ai ilingi hoka o Yakubu ai ilingi, masara ai giama duru igoungu o Esau ai giama.”

²³ Hokogea o Yakubu ai giama de ma gogoka ho ko wihiorikua abe una o Yakubu, masara naa wikuruuru de wato bote una o Esau ho wato wihiowa.

²⁴ Ma, wilehahi unangika wato, “Ngona igoungu ahi ngofaka o Esau?” De o Yakubu wipaluhu ai babaika wato, “Nagoungu, ngohi naa.”

²⁵ Ho ai baba wato, “Ahi ngofaka, abe ngona nohidomaka nohihidoakoka la ka idadi taolomo. Gea tolomo ibooto de ahao ma owa tonihidoaka abe ani oara ma behehongo ma demo.” Ho ai inomo gea o Yakubu wihidoakoka de o Isaka wolomo. De wihidoakoli o angguru ma teongo ho gea waokere.

²⁶ Ho gea wolomo de wokere ibooto de ahao o Isaka wogahoko wato, “Ngofaka naino de nohibounu.”

²⁷ Ho o Yakubu wibounu ai baba ai gotoakino de o Isaka duru wihohobounu ai bajuika de igoungu ma bounu duru o Esau ai bounu. De ahao wigahoko ma owa wato, “Ahi ngofaka ai bounu duru toigo, Abe imaketero hoka o tonaka ma gupa ma rorahai ma bounu, Hoka o tonaka Ma Jou o Yawe wohiowa ma bounu.

²⁸ Tonigahoko la Ma Jou wonihidoaka o awana, De o tonaka de ma gutufuroka abe ka idadi nomaredi, Hiadono ani gandumu duru de ma bunuhoka, De ani angguru duru itohofoko, tonigahoko.

²⁹ De Ma Jou wonihigunoa la o nyawa manga ngoe, Ona duru de manga horomati ngonaika, Abe ngaro o kiaka dika manga dutu yogogere, Ma ona yoigo inileleani ngona. De Ma Jou wonihidadi ani gogianongoru manga baluhu, Hiadono ngoni meme ami ngofa-ngofakuku ngona nakokipareta, De onagona dika abe ahao iniao itorou, De ahao onangoo duru yamake ma dorou. De onagona dika abe ahao iniao irahai, De ahao onangoo duru yamake ma owa.”

³⁰ Hokogea o Isaka ai oara ma demo wihibehehongo ai ngofakika ibooto de ahao o Yakubu wohupu. Ka de wohupuoka de o Esau woboa.

³¹ De o Esau unangoo o inomo ma rorahai gea wihakai wabootoka ho naa widotaka ai babaika. De witemo ai babaika wato, “Baba, nako noigo de nomomikiyeohi de ka idadi naolomo naa abe tonidomaka. Naolomo ibooto de ahao ka idadi nohihibehehongo ngohino ani oara ma demo abe nato noigo nohihiowa.”

³² De o Isaka wileha wato, “Ngona naa onaguna?” De o Esau wopaluhu wato, “Ngohi naa ani ngofaka o riaka, o Esau.”

³³ Ka de woihene de o Isaka duru wofafara de wileha, wato, “Nako ngona igoungu ho done onaguna kangano abe unangoo wohilimoro de wohidotaka? Kangano ngade-ngade noboa gea de ahao tolomo ibootino abe una watoma. De una tihiowaka de igoungu una ahao wamake ma owa abe tihibehehongoka!”

³⁴ Gea o Esau ka de woihene ai baba ai demo gea de duru wopoaka hiadono wohigari-gari de ahao witemo ai babaika wato, “Ahi baba nohihiowa, ngohioo duru togahoko nohihibehehongo ma owa!”

³⁵ De ai baba wipaluhu wato, “Masara ani dodoto woboa wohibudi ho ani oara ma behehongo wonioraka.”

³⁶ De o Esau wato, “Itiaioka niwihiromanga ahi dodoto o Yakubu! Duru wotobabudi una! Abeika, naa ma hinooto ibooto ngohi wohiora de o budi. Ihira o riaka ai oara abe to ngohi gea wohioraka de naa ani oara ma behehongo enangoo wohiorakali! Ho sarakia ahi baba, nagahi ma owa abe ka idadi nohihibehehongo ngohino?”

³⁷ De o Isaka wipaluhu wato, “Ahi ngofaka, marai ani dodoto tihidadioka ani baluhu de ai dutu mata-mataika tahidadioka ai gogilaongo. De utuohi tihibehehongo ai hidailako la ilamoko ai hasili o gandumu de o angguru ma hofoko.”

³⁸ De o Esau duru ai hininga ihuha de wato, “Masara, ahi baba, iti naga moi ma owa abe ka idadi nohihibehehongo ngohinoo. Duru togahoko la ngohioo nohihiowa!” Hokogea wogahoko de duru woari de hiadono iwihowo-howo o Esau.

³⁹ De ai baba hokonaa wipaluhu, “Ngona ahao nomatingaka o tonaka ma gogutufurino, De ikuranga o awana inidaene ngona, Hokogea to ngona de ani dutu nia gogere.

⁴⁰ De ngini nimadatoko o kangelaino de nia dia, La gea ngini nimaduhunu la niwango. De ani dodoto ahao winikokipareta. Masara ika-ika de ma dubuho gea ko niapoakaua, De ahao ka idadi nimahihupu ai giamino.” Hokogea dika o behehongo ma demo abe o Esau wamake ai babaino.

O Esau wato womahibalaha

⁴¹ De o Esau ai hininga-kuranga naga o Yakubika hiadono wato womahibalaha angamoi wato, “Ikuranga irahai o baba ai behehongo ngohino. Marai ko itedekanua de o baba wohonenge ho ka de ngomi wiwigari ibooto de ahao ahi dodoto o Yakubu titoma.”

⁴² Masara naga o nyawa yoihene o Esau ai demo gea de imihingahu o ngo Ribekaika ho muna o Yakubu miahokino de mihingahu mato, “Ahi ngofaka, marai o Esau womahilaru de ai hidee ngonaika abe wato wonitoma.

⁴³ Ho naa ahi ngofaka kiani nohihigihene, ngona kiani itaiti noara ahi irangika. Ani pepe o Labana gea wogogere o Harana ma tonakoka ho genangika noara.

⁴⁴ Unangoka nomanoa hiadono ani riaka ai dohata ipahaka.

⁴⁵ Abe naa wato ngona nihikangela, gea kiani wawohangoka de ahao ngohi o nyawa tahidingoto la inihingahu. Angamoi ngohi naa duru toluku abe ahi ngofaka inihinooto nihihanga ka ma moi.”

⁴⁶ De ahao o ngo Ribeka mihingahu o Isakika mato, “Ngohi naa duru ahi hininga ka ihikaika ihuha ma titi nanga hunungu yahinooto naa abe o Hete ma nyawa. Nako o Yakuboo o Hete ma tonakoka womalingiri ngoi fekata ngohi tato ahi huha itubuhoholi ho ngaro ngohi ka tohonengoka dika.” Hokogea ami gurubungu ma demo ami rokatika.