Dodadi 26 - Ma Jou ai Demo-demo o Totobelohoka

O Isaka de o Koano o Abimeleke

¹ Naa idadiokali naga o hiwara ma dekanino o tonakoka abe o Isaka wogogere genangoka ho naga o hafini imaketero hoka ma dihirali abe ma oraha ka o Abarahaamohi. De ma titi o hafini gea hiadono o Isaka woiki doka o Gerara ma tonakika abe genangoka o Abimeleke wahikoano o Filistina ma nyawa.

² De genangoka Ma Jou o Yawe womahimatoko o Isakika de wihingahu unangika wato, “Isaka, ngaro ufa nogila-gila o Mesiiri ma tonakika, ma, o kiaka abe tonihidumutu, genangoka dika nogogere.

³ De Ngohi toigo la nenangoka dika nogogere de Ngohi toniniiki de tonihiowa o tonakoka naa. Angamoi o Kanani ma tonaka mata-mataika naa ahao tonihidoaka ngonaika de ani totoforaukuikaoo tahidoaka abe ahi behehongo ani baba o Abarahaamika kiani idadi imaketero abe hoka ma dodihiraka tihibehehongoka de o dodunguu ma gou-goungu.

⁴ Ho to ngona ani totoforauku ahao tahidadi duru yowoe-woeuku hiadono hoka o murumu o dihangoka manga ngoe de onangika tahidoaka ma tonaka mata-mata naa. De ani totoforaukuino ahao o nyawa utu ma owa yakokimake ngaro o dunia ma amokika.

⁵ De ma owa gea yamake angamoi ani baba o Abarahaama wohihingounu Ngohi. Abe ngaro ahi hiaturu, de ahi huhuloko, de ahi behehongo unangika, de ahi pareta mata-mataika ma una woigo waniiki abe iti to Ngohi ahi demo mata-mata de una ka wohihigihene.” Hokogea Ma Jou ai demo o Isakika.

⁶ Ho o Isaka ko wogila-gilaua o Mesiiri ma tonakika masara wogogere o Gerara ma tonakoka dika.

⁷ De ma oraha o nyawa genangoka imimake o Isaka ngoi fekata de iwileha ato, “Ho naa muna o ngo kia?” De una wopaluhu onangika wato, “Muna gea ngohi firanga o ngo Ribeka.” Hokogea o Isaka ai demo angamoi wohawana womahingahu abe muna ngoi fekata. Abe una womatemo doka ai hiningaka wato, “O ngo Ribeka duru mohailoaholi ho marai ahao o nau-nauru nenangoka duru imihafini ho done ahao ihitoma ngohi la ka idadi imile nako tahingahu muna gea ngohi fekata.”

⁸ De manga dekanoka genangoka de ma moiuku o koano o Abimeleke naga ai tau ma goronaka de una o jendelaka wolega-lega daukuku ai timiuku abe genangoka o Isaka wogogere de wimake o Isaka womigagaoika o ngo Ribekaika.

⁹ Ho o Abimeleke o Isaka wiahoko de duru witaere unangika wato, “Ho muna gea igoungu, ngoni fekata! Adodoa ho nomieluku nato muna gea ngoni firanga?” De o Isaka wipaluhu wato, “O koano, tomangaku marai hokogea ahi demo de angamoi tohawana. Ngohi tato bote o nau-nauru nenangoka ihitoma ngohi la ka idadi ngohi fekata ihiora.”

¹⁰ De ahao o Abimeleke wipaluhu wato, “Masara abeika ngona nodiai, duru igapanga miahowono munangika nako naga o nauru ngomioka yomahigelenga de muna. De nako o howono hokogea idadi marai o kangela ma amoko imidaene ngomi nenangoka.”

¹¹ Ho ahao o Abimeleke duru wataere ai kokawaahaika abe hokonaa ai demo ona mata-mataika wato, “Onagona dika iwihikangela una abe wonadionikino naa eko ngaro ngoi fekata imihikangela ma gea ahao ona tahohonenge abe yahowono onangika de gea tagou-goungu tahohonenge.” Hokogea o koano wapareta la o Isaka de o ngo Ribeka wadatoko la ufa ai kokawaaha yaruwae.

¹² De duru o taongo gea o Isaka o redi ma amoko womadiai de wodatomo o tonakoka gea. De ai datomo ma hasili duru kohaamoko abe nako o bibiti wodatomo o kilo moi de ahao wogutuku genangino o kilo o ratuhu moi. Hokogea ai redi ma hasili angamoi Ma Jou o Yawe duru wihiowa.

¹³ De ko itedekanua de o Isaka duru wokaya. De ngaro wokayaka ma ka ihikaika ai kiahonanga idogo ho hiadono utuohi wokaya.

¹⁴ De to una ai aewani o dofo ma duduono abe hoka ai domba, de ai hapi, de ai unta enangoo ka ihikaika ifaa-faatuku. Hokogea ai aewani ma duduono idogo-dogo hiadono o Isaka ai duduono, de ai gogilaongo, de ai duduhunu yowoeholi ho hiadono o Filistina ma nyawa iwitaleana.

¹⁵ De ma titi iwitaleana hiadono o humu mata-mata abe ma dihira ai baba o Abarahaama wofaiti ahao o Filistina ma nyawa yokokipohukoka de o tonaka.

¹⁶ De o Abimeleke o Isakika witemo wato, “Hobata, to ngona ani buturungu kohaamoko ho marai gea kiani nomaturuuru. Kalioli ngona nomahitigino ngomino.”

¹⁷ Hokogea o Abimeleke wahidemo ona o Filistina ma nyawa genangoka manga hininga ho o Isaka womaturuuru woiki o Gerara ma dolaika de genangoka una de ai nyawa yomahidodogumu.

¹⁸ De genangoka naga o humu utuohi abe ma dihira ai baba o Abarahaama wofaiti ma ka de una wohonengoka de ai humu mata-mata gea yokokipohukoka o Filistina ma nyawa. Ho naa o Isaka womahidodogumoka o Gerara ma dolaka gea de o humu abe ma dihira yopohukuku gea wakokifaitoli. De o humu mata-mata gea ma dihira o Abarahaama wohiromangoka homoi-homoi ho o Isaka ka de wofaitoli de abe ma dihira ma romanga abe hokokia ai baba wohiromanga, hokogenangoo de imaketero o Isaka wohiromangoli.

¹⁹ De ai gogilaongo ahao o humu moioli yofaiti o Gerara ma dolaka gea de yamake o akere ibubungu duru irahai ma akere.

²⁰ Masara ahao o Filistina ma nyawa abe onangoo naga manga duduono yogoa-goana genangoka, ona yoboa de ato, “Naa to ngomi mia tonaka ho nenangoli to ngomi mia akere.” Ho angamoi yokadatoro o humu gea hiadono o Isaka wohiromanga o humu gea o Eseke abe ma titi o kadatoro.

²¹ Ho o Isaka ai gilaongo moioli yofaiti o humu de ka yamakeokali o akere masara ka de yamakeoli de o Filistina ma nyawa ato enangoo yale hiadono yokadatoro ma humu gea ho o Isaka wohiromanga o Sitana abe ma titi inalawana.

²² Ho yomaturuuruoli o Isaka, de ai nyawa, de ai duduono mata-mata yomaturuuru. Ho ahao o humu moioli yofaiti de ma moioli o akere yamake. Masara ko yaiwa ma nyawa genangoka abe yahikangela ma titi manga humu gea ho o Isaka wohiromanga o Rehoboto ma humu abe ma titi o gupa kohaamokika. Abe wotemo wato, “Nenangoka Ma Jou o Yawe wonahidailakoka o tonaka naa abe inawedono hiadono nanga kuranga ko iwa de ka idadi nanga datomo de nanga dofo de ma hasiloka.”

²³ De ipaha yomaturuuruoli o Beresebaika ho yomahiadonoka,

²⁴ de o futu gea Ma Jou o Yawe womahimatoko o Isakika de wihingahu wato, “Ngohi Ma Jou abe ani baba o Abarahaama womahuba Ngohino ho tomahiromanga to Abarahaama to una ai Jou. Ho ngona ngaro ufa nohawana ngaro o kiaka dika naika angamoi Ngohi ka ihikaika toniniiki. De Ngohi ka ihikaika tonihiowa de ahao ani totoforauku tahidadi la yowoe-woeuku mangale ma titi tihohininga ahi gilaongo o Abarahaama.” Hokogea Ma Jou ai behehongo o Isakika.

²⁵ Ho genangoka o Isaka manga huhuba ma ngi wodiai la ka idadi o aewani yomahihuba Ma Jou o Yaweika de iwihigiriiri. De o Isaka ai tau o ngoerino wohigokoiye genangoka de ai gogilaongo manga humu moioli yomabaiti genangoka.

²⁶ De ma oraha gea o koano o Abimeleke o Gerara ma tonakoka wosobo woiki o Isaka witutumu. De naga ai dodiawo yahinooto iwiniiki abe naga womatengo ai romanga o Ahusata una gea ai koano widuhunu de o hitararono. De una womatengoli ai romanga o Pikolo una o tentara manga hidimono.

²⁷ Ho yoboa o Isakika de o Isaka waleha onangika wato, “Ngohi naa toheranga niboa niato nihirekata abe ma dihira ngohi tamao hoka ngini nioigo nihimusu hiadono nihihuloko la tomatingakoka nginino. Ho sarakia, marai naga ma titi ho hiadono ngini naa nihitutumu ngohi?”

²⁸ De ona yopaluhu o Isakika ato, “Hokonaa mia dodiawo, ngaro ma dihiraino ma, duru itararono Ma Jou o Yawe ka ihikaika woniniiki. Ho ngomi naa minitutumu miato kiani ngone homahiketehibehehongo de ma dodunguu abe haborigou-goungu ngomi de ngini la ko iwa ma oraha homaketeruwae la o dame dika hapaliara.

²⁹ Abe kiani ngona nomihibehehongo nato ngini ko nimihikangelaua imaketero hoka ngomioli ngaro ma dihiraino ma, naa ko minihikangelaua, masara miniao irahai dika. De abe ma dihira ngaro ngomi miato koaho nomatingaka ngomino ma, ka de mia hininga ma rorahai dika mitemo ngonaika ma oraha naa. De naa, abeika hokokia Ma Jou winihiowa ngini.” Hokogea o Abimeleke ai demo.

³⁰ Ho o Isaka wahidiai o inomo kohaamoko la yomahidiai abe ahao yomahiketehibehehongo ho yolomo de yokere yomakutuono la ihitunguu ko yomaketehininga-kurangokaua.

³¹ De ma dawangeino duru o ngorumino yomahiketehibehehongo la ihitunguu abe duru de manga demo ma gou-goungu. Gea yomahiketehibehehongo ibooto de ahao o Isaka wahigunoa yosobo abe naa manga gogao duru igou-goungu de ma dameoka.

³² De duru o wange gea dika de o Isaka ai gogilaongo yoboa iwihingahu ma titi manga humu moioli yomabaiti ato, “O akere miamakeoka!”

³³ Ho manga humu gea o Isaka wohiromanga o Seba de hiadono ma oraha naa o kota abe ahao idadi genangoka ihiromanga o Bereseba.

³⁴ De o Isaka ai ngofaka o Esau adonoka ai ngumuru ai taongo moruata de woilaka abe waleino ngoi fekata yahinooto o Hete ma nyawa. Ngoi fekata momatengo ami romanga o ngo Yuditi ami baba o Beri. De ngoi fekata momatengoli o ngo Basemata ami baba o Elono.

³⁵ De o Isaka de o ngo Ribeka manga hininga ma huha ma amoko ka ihikaika naga ma titi manga hunungu yahinooto gea.