Dodadi 25 - Ma Jou ai Demo-demo o Totobelohoka

O Abarahaama woilakoli

¹ De ahao o Abarahaama woilakokali de ngoi fekata ma hungi abe womile ami romanga o ngo Ketura.

² De ona ahao yamake manga ngofaka yabutaanga o nauru mata-mata de manga romanga o Simarana, o Yokasana, o Medana, o Midiana, o Isibaka, de o Sua.

³ De o Abarahaama ai ngofaka o Yokasana ahao una wamake ai ngofaka o Sieba de o Dedana. De o Dedana gea ahao wodadi manga tofora abe yomahiromanga o Asuru ma nyawa, o Letusi ma nyawa, de o Leumu ma nyawa.

⁴ De o Abarahaama ai ngofaka o Midiana una wamake ai ngofaka yamotoa manga romanga o Efa, o Efere, o Henoko, o Abida, de o Eladaa. Ona mata-mata gea o ngo Ketura ami dano-danonguku de ami totoforauku.

^5-6 De o Abarahaama ka wowangohi de wato ai ngofa-ngofaka abe ngoi fekata utu manga ngofaka kiani wahikatingaka de o Isaka. De ngaro ai kiahonanga mata-mata idadioka o Isaka ai oara masara naga ai hidoaka abe wahidoaka ai ngofa-ngofakika homoi-homoiika. De ahao wahuloko la yomaturuuru o tonakika o wange ma botokaiha la ufa yomahisapuru de o Isaka ai ngofa-ngofakuku.

O Abarahaama wohonenge

⁷ De o Abarahaama ai wowango ma dekana o duniaka adonoka ai ngumuru ai taongo o ratuhu moi de moritumidi de motoa.

⁸ Hokogea ai wowango ma dekana de ahao o Abarahaama wohonenge ho gea duru iwiperekioka ma oraha wohonenge.

^9-10 De o Isaka de o Isimaele ai ngofaka yahinooto gea ahao manga baba ai honenge iwingotaka o Makapela ma arukika abe imakitingaka ko ikurutikaua de o Mamere ma ngi. Ma dihiraka o Abarahaama womaijaka o aruku gea. Abe ma oraha o ngo Sara mohonenge de womaija o Hete ma nyawaino abe ma tonaka gea ma dihira o Sohara ai ngofaka o Eforono ai redi. Ho o aruku ma goronaka gea o Abarahaama iwilungunu duru yomahingi moi de ngoi fekata o ngo Sara.

¹¹ De gea o Abarahaama wohonengoka de Ma Jou wihiowa ai ngofaka o Isaka. Ma oraha gea o Abarahaama wohonenge de o Isaka wogogere o ngi moiokali abe naga itigino de o humu gea ihiromanga o Lahai-Roi.

O Isimaele ai ngofa-ngofaka

¹² De hokonaa o Isimaele ai ade-ade abe ai ngofa-ngofakuku hokokia yolape-lapeuku. O Isimaele una abe to Abarahaama de o ngo Hagara manga ngofaka. O ngo Hagara o Mesiiri ma nyawa abe muna ma dihira o ngo Sara ami duduhunu.

¹³ O Isimaele ai ngofaka o nauru yangimoi de yahinooto de naa manga roma-romanga abe una o riakoka de yomakadatekuku hiadono ai doo-dodotuku. Ho o Isimaele ai ngofaka o riaka o Nebayoto, de ahao widateke o Kedara, de ukuoli o Adabeele, de ahao o Mibasama.

¹⁴ De una ahao widateke o Misima, de ahao o Duma, de ahao o Masa.

¹⁵ De una ahao widateke o Hadada, de ahao o Tema, de ahao o Yeturu, de ahao o Nafisi, de una ai ngofaka ma baha o Kedama.

¹⁶ De o Isimaele ai ngofa-ngofaka gea yodadi homoi-homoiika o nyawa manga dutu. Abe ai ngofaka o riaka o Nebayoto ahao to una ai totoforauku yomahiromanga o Nebayoto ma nyawa de manga tonaka enangoo ihiromangika o Nebayoto ma tonaka. De imaketero hokogea o Isimaele ai ngofaka ona homoi-homoiika manga totoforauku yomahitoomu-toomuika de manga dutu ai romangika hiadono manga ngi-ngioka genangoka abe onangoo yogogere ihiromanga de manga dutu ai romangika.

¹⁷ O Isimaele ai wowango ma dekana o duniaka adonoka ai ngumuru ai taongo o ratuhu moi de moruange de tumidi de ahao wohonenge.

¹⁸ De to una ai totoforauku yogogere o Hawila ma tonakoka de hiadono o Siurika abe nako o nyawa yoiki o Asurika de gea manga tonaka imahikitigino de o Mesiiri ma tonaka ma batingoka. De ona mata-mata yogogere yomakokitingakika de o Abarahaama ai totoforauku utu. Abe ko yomakigoua hiadono ko yomahikasapurua de manga gogianongoru.

O Isaka ai ngofaka o Yakubu de o Esau

¹⁹ De naa o Abarahaama ai ngofaka o Isaka ai ade-ade.

²⁰ Una gea ahao ai ngumuru adonoka ai taongo moruata ma oraha woilaka de o ngo Ribeka, abe muna to Betuele ngoi ora de to Labana ngoi firanga. Ona o Arama ma nyawa abe yogogere o Padana-Arama ma tonakoka.

²¹ Masara ngaro yoilaka ma dekanoka ma o ngo Ribeka ami ngofaka ko iwa. Ho o Isaka womigahoko Ma Jou o Yaweiye la ka idadi o ngofaka mamake. De Ma Jou o Yawe wihigihene o Isaka ho ahao o ngo Ribeka ka idadi o ngofaka mamake ho muna de ami badangoka.

²² De to muna ami ngofaka yohago ho ami pokoroka duru yomakelu-kelu ma ko mohiorikua ma titi ami pokoroka hiadono ihikelu-kelu hiadono duru mokangela. Ho momatemo ami hiningaka mato, “Adodoa ho hiadono hokonaa ihihikangela ahi pokoro ma goronaka?”

²³ Ho momaniata Ma Jou o Yaweiye de Una womipaluhu wato, “O ngo Ribeka, ani ngofaka ma ngioka naga o nyawa manga dutu yahinooto, De ani totoforauku o doomu hinooto gea ahao yomakokitingakika, De o doomu hinooto gea naga moi abe onangohi duru de manga buturungoka, Abe o riaka to una ai totoforauku ahao o dodoto ai totoforauku yaleleani.”

²⁴ Ka de o ngo Ribeka ami gahe adonoka de igoungu ami ngofaka yohago o nauru mata-mata.

²⁵ Ho gea momangakunu de ami ngofaka wohira womaboa duru ai doka-dokara de ai badanga ma amokika ai gogo kohabirini ho ahao iwihiromanga o Esau.

²⁶ De yohago gea yomaboa yomakutuono de o Esau wohira womaboa de ai dodoto womahiso-soika ai riaka ai bobooika de ma titi gea hiadono iwihiromanga o Yakubu. De ma oraha o ngo Ribeka momagerewoto de manga ngofaka yohago de o Isaka ai ngumuru adonoka ai taongo moributaanga.

²⁷ De manga ngofaka ma oraha yobaluhiyeoka de o Esau duru woigo wotobalimoro ho ko woriidua ho una ai biaha o tonaka ma gupaka dika. Masara o Yakubu una duru woriidi ho woigo womagoo-gogere manga dodogumoka dika.

²⁸ De angamoi manga baba o Isaka duru waolomo o fuhuku ma aewani ma roehe ho nako o Yakubu de o Esau, ka o Esauohi duru widora. Masara ngoi fekata o ngo Ribeka muna duru midora manga ngofaka o Yakubika.

²⁹ De ma moiuku o Yakubu womahakai o bosi ma doka-dokara de ai riaka o Esau woboa o tonaka ma gupaino de ko watomaua ho duru iwihafini.

³⁰ Ka de woboa de duru wiboaka ai dodotika wato, “Yakubu, nomataiti etohonenge! Ho ngona nomataiti nohihidoaka ani inomo ma doka-dokara gea!”

³¹ Masara o Yakubu ko wihidoakuahi de wato, “Ahao tonihidoaka masara naa ahi inomo de ma ijaka. Abe ma oraha o baba ahao wohonenge de gea abe idadi o riaka ai oara, gea kiani nohihidoaka ngohino.”

³² De o Esau wato, “Abeika, ngohi naa ngade-ngade tohonenge ho ko iwa ahi utumu ahi oarino gea nako tohonengoka. Ho ani inomo gea nohihidoakoka dika!” Hokogea o Esau ai hafini ma demo.

³³ Masara o Yakubu ka wotemohi wato, “Kiani ani demo nagou-goungu nohihibehehongo ngohino nato, ‘Ngohi o Esau o riaka tonihibehehongo ahi dodotika abe to ngohi ahi oara ma oraha o baba wohonenge, naa tihidoakoka o Yakubika ahi dodotika.’ Kiani hokogea notemohi de ahao tonihidoaka.” Ho o Esau duru o demo gea waniiki itiai wihibehehongo o Yakubika de gea to una ai oara wafukunoka.

³⁴ Ho gea wihibehehongo ibooto de ahao o Yakubu ai bosi de o roti wihidoaka o Esauika. Ho gea o Esau wolomo ibooto de o akere wokere ibooto de ka dau de womaokoiye de wosoboka. Hokogea o Esau ai hininga abe ko womalegaikaua ai oarika, abe kiani o riaka yamake ma oraha manga baba wohonenge, gea ko wopusingua.