Dodadi 23 - Ma Jou ai Demo-demo o Totobelohoka

O ngo Sara mohonenge

¹ De ipahaino o ngo Sara ami ngumuru adonoka ami taongo o ratuhu moi de monaoko de tumidi de ahao mohonenge.

² Ma oraha mohonenge ona yogogere o Kanani ma tonakoka o Hete ma nyawa manga hidogoronaka. Abe manga ngi o Kiriata-Aba ma kapongoka, de ma kapongo gea ma romanga hinooto, ho moioli o Heborono. De o Abarahaama ko iwiwa ma oraha mohonenge ho gea woboaino de iwihingahu. De wowohama munangika ami honenge wolega de duru o ngo Sara womigari de wohitunguu ai huha de ai horomati munangika.

³ Gea o Abarahaama womigari ibooto de ahao womaokoiyeoka ami honenge ma datekoka de ahao wohupu woiki watutumu o Hete ma nyawaika abe yomatoomuinoka o kota ma ngoranoka la ka idadi wotemo onangika.

⁴ De wahingahu wato, “Hobata, ngohi naa ko o Kanani ma nyawaua de togogere nginioka hoka o homoa ma nyawa de ko toriidua o ngi moioka, masara ngohi togahoko o tonaka ma hohutulu nginioka abe ka idadi tomaija la genangoka tomilungunu ngohi fekata.”

⁵ De o Hete ma nyawa gea ona ahao iwipaluhu o Abarahaamika.

⁶ Abe naga womatengo wahidemo wato, “Hobata, mia demo naa mioigo nodafongo. Ngomi misanangi ngona nogogere mia hidogoronaka abe minihioriki Ma Jou wonigorakiye hoka o baluhu ai himangoka. Ho ngona nomangiriki dika to ngomi mia lungu-lungunu ma ngi abe nosanangi genangoka ngoni fekata nomilungunu, de ko moiua ngomioka miaoluku ani gogahoko gea.”

⁷ De o Abarahaama duru wosanangi manga demoika gea de womaponuku manga himangoka la wohitunguu ai horomati onangika.

⁸ De wato, “Ahi dodiawo, nako hokogea nisanangi nihihigunoa ahi nyawa talungunu naangoka de ngohi tonganono ahi demo moioli nisanangi niodafongo abe togahoko la nihihidemo o Sohara ai ngofakika o Eforonika.

⁹ Abe o Eforono ai redi ma batingoka naga o aruku moi ma romanga o Makapela ma aruku. De o aruku gea ngohi toigo tomaija. Ho gea togahoko la ngohi nihihidemo unangika niato, ‘O Abarahaama woigo o Makapela ma aruku womaija de wofangu abe ma ija itiai ngonaika nanga dimo-dimono manga himangoka. Hokogea o Abarahaama ai gogahoko ngona o Eforonika la ani aruku idadi to una ai ngi abe ka idadi ngoi fekata ami honenge wohingohama o aruku gea ma goronaika.’ Hokogea ahi gogahoko ma demo o Eforonika.”

¹⁰ Masara o Eforono naga onangoka manga doomu ma ngioka o kota ma ngoranoka gea. Ho ka de o Abarahaama wogahoko hokogea de unangoo wigihene, ho naa una dika wopaluhu o Abarahaamika. De ka idadi o Hete ma nyawa genangoka mata-mataika ai demo yoihene hiadono manga dimo-dimonoo ma, yokokiihene.

¹¹ Abe o Eforono wato, “Ahi baluhu, ngohi naa toigo la to ngohioo ahi demo nodafongo. Ihira tato ngaro ufa nofangu, ahi redi gea tonihidoaka dika ka ma moi de ma aruku abe naga genangoka. Naa totemo ahi gogianongoru manga himangoka la ona mata-mata ihioriki ma tonaka gea idadioka to ngona. De gea toigo tonihidoaka la ka idadi ahao ani nyawa manga honenge nahingohamika genangika.”

¹² O Eforono wotemo ibooto de ma moioli o Abarahaama womaponuku manga himangoka abe yogogere o kotaka gea.

¹³ De wipaluhu o Eforonika gea la ona mata-mataika o doomuoka gea ka idadi yoihene wato, “Ahi dodiawo, togahoko la ahi demo moioli nodafongo nako nosanangi. Ngohi tato tofangu ani tonaka gea ma ija. Ho ngohi togahoko la nodafongo ahi tiwi la nohihisanangi ngohino. Hokogea de ahao ngohi fekata genangoka tomikelenga.”

¹⁴ Gea de ahao o Eforono iwimoroini wofetongo ma ija o Abarahaamika.

¹⁵ Ho wipaluhu unangika wato, “Ahi baluhu, ufa ani hininga tonihihuha de ahi demo naa ma ka nodafongo dika. Abe nako o tonaka gea ma ija igoungu o haaka ise-senge o ratuhu iata masara abeika, ngona de ngohi ngaro ufa hopusingi ma tiwi gea iti ngoni fekata naga ami ngi abe ka idadi nomihingohama genangika.”

¹⁶ De o Abarahaama wosanangi o Eforono ai demoika gea ho ai haaka wakilo hoka ona yotobafuku-fukunu manga biaha yodiai la ma dubuho imaketero de o haaka ise-senge o ratuhu iata. Hokogea una waniiki abe o Eforono wofetongoka ai gogianongoru manga himangoka, de ma ija o haaka gea o Abarahaama wohidoaka unangika.

¹⁷ De o Eforono ai redi o Makapela ma ngioka imakitingaka ko ikurutikaua de o Mamere ma ngi. Ho ma ngi gea idadioka to Abarahaamoli ai tonaka ka ma moi de ma aruku de ma gota mata-mataika abe naga o redioka gea.

¹⁸ De o tonaka ma hurata moi yodiai o Hete ma nyawa manga dimo-dimono manga himangoka.

¹⁹ De ahao o Abarahaama ngoi fekata ami honenge womingotaka o Makapela ma arukika, de womikelengauku o aruku ma goronaka. De ma aruku gea naga o Kanani ma tonakoka abe imahitigi-tigino o Heborono ma kapongo de ko ikurutikaua de manga ngi abe ihiromanga o Mamere.

²⁰ Hokogea o redi de o aruku gea duru itaana de ma hurata abe o Hete ma nyawa iwihidoaka o Abarahaamika la idadioka to unangoli ai lungunu ma ngi.