Dodadi 22 - Ma Jou ai Demo-demo o Totobelohoka

Ma Jou o Abarahaama ai ngongaku wataili

¹ De ipahaika Ma Jou o Abarahaama ai ngongaku wataili. De hokonaa ma ade-ade: Ma Jou wiahoko wato, “Abarahaama!” De o Abarahaama wopaluhu wato, “Ngohi naga nenangoka.”

² De Ma Jou wihibehehongo wato, “Abarahaama, Ngohi togahoko la ngona nile ani ngofaka o Isaka, ani ngofaka o goduuru ka womatengo dika, abe ngona duru nidora. De ahao ngona dika niao o Moria ma tonakika, de naga o loku moi genangoka ahao tonihidumutu. De o lokuoka gea niaika de ahao ma tubuoka ani ngofaka nihihuba Ngohiye iharo-harongo.” Hokogea Ma Jou ai behehongo o Abarahaamika.

³ De ma dawangeino ka o ngoru-ngoruminohi o Abarahaama womomiki de ai keledai wohidiai la ka idadi o huhuba ma gota wohibarene ma poretuku. De ai gilaongo yahinooto de ai ngofaka o Isaka wahokino. De ahao o gota wapelaka abe ahao wapake la ai huhuba wohiharongo. Ho mata-mata gea wodiai ibooto de ahao yosobo, o Abarahaama, o Isaka, de ai gilaongo yahinooto gea. De yoiki genangika abe Ma Jou wihingahuoka wato kiani genangoka womahihuba ai ngofaka.

⁴ Ho yoikoka de yomaidu o homoaka manga futu hinooto ho o wange hangeino manga dodagi. De o Abarahaama wolega-lega kohagurutikahi de o loku wohidotelega, de wamakeoka ma loku gea abe Ma Jou wihingahuoka unangika.

⁵ De o Abarahaama wahuloko ai gilaongika wato, “Ngini inihinooto de o keledai naa, nimahiainohi nenangoka. Ngohi de ahi ngofaka miloikohi dokea o lokuika gea, la ngomi mimahubahi Ma Jouiye. Mimahuba ibooto de ahao milioli nginino.”

⁶ Wotemo ibooto de o Abarahaama wagoraka o gota o keledai ma poretoka abe ahao yapake la yomahidaulu manga huhuba. De manga gota gea wihimoku o Isakika, masara o Abarahaama una ma hirete wao o uku de o gakana. Ho yoiki yotagi-tagi yomakiniiki ai ngofaka de ai baba.

⁷ De manga gogiriaka yotagi-tagi de o Isaka wileha ai babaika wato, “Baba?” De o Abarahaama wopaluhu wato, “O kia ahi ngofaka?” De o Isaka woleha wato, “Naga o uku de o gota, masara ko iwa o domba ma ngofaka ngoneoka, ho o kiaka ahao hamake nanga domba la gea homahihuba Ma Jouiye?”

⁸ De o Abarahaama wopaluhu wato, “Ahi ngofaka, Ma Jou ahao Una dika wonahidailako o domba ma ngofaka abe ka idadi homahihuba Unangiye.” De yogila-gila yomakiniikoli.

⁹ De yomahiadonoka ma ngiika abe Ma Jou wihingahuoka de o Abarahaama genangoka o hakaru watoomuino de ai huhuba ma ngi wodiai. O huhuba ma ngi wodiai ibooto de ahao o gota o huhuba ma ngi ma lokuoka wafafoino. De ma gota ibooto, de ai ngofaka wipakiti de wihideruiye o gota ma lokuoka.

¹⁰ De ahao o Abarahaama wale ai gakana de wagorakiye de doka ai hiningaka womatemo wato, “Ngohi naa kiani titoma ahi ngofaka o Isaka.”

¹¹ Masara ka de o Abarahaama ai gakana wagorakiyeoka de itodokanino naga o dihanguku Ma Jou o Yawe ai malaekata womatengo waamokiye wiahoko wato, “Abarahaama, Abarahaama!” De una wopaluhu wato, “Ngohi naga nenangoka.”

¹² De o malaekata wihingahu wato, “Abarahaama, ufa nitoma ani ngofaka gea, de ufa nidodoaika naga angamoi naa de tonihiorikoka abe ani horomati naga Ma Jouika hiadono duru nihingounu. Abe ngaro ani ngofaka ka womatengo dika, masara ko nitumungua nato nohihidoaka dika Ngohino.”

¹³ Ka de o malaekata wotemo ibooto de o Abarahaama womadogilioro ai poretoko de wamake o domba ma nauru o takeoka, ma tataduku ilaketika. Ho waleino ma domba gea de ahao womahihuba, angamoi ai ngofaka ai duruuru o domba gea.

¹⁴ De o Abarahaama wato, “O ngi naa tohiromanga Ma Jou o Yawe Wohidodailako.” Ho gea ma titi hiadono ma oraha naa o nyawa ka ihiromangohi ato, “Ma Jou o Yawe ai lokuoka ahao ka wohidodailakokali.”

Ma Jou ai behehongo o Abarahaamika wohigalioli

¹⁵ De Ma Jou o Yawe ai malaekata daku o dihanguku wiahokoli o Abarahaamuku abe naa ma hinooto wiahoko.

¹⁶ De wato, “Abarahaama, Ngohi naa tagou-goungu ahi demoino abe Ngohi naa tomafetongo Ngohi Ma Jou o Yawe de ahi kuaha naga mata-mataika. Ho ahi behehongo ngonaika naa duru tagou-goungu mangale ani ngofaka ko nomadumungua ngaro ka womatengo dika, masara nato nohihidoaka dika Ngohino.

¹⁷ Ho naa tonihiowa ngonaika de ma gou-goungu abe ani totoforauku tahidadi yowoe-woeuku hiadono ona hoka o murumu o dihangoka manga ngoe, de hoka o dowongi imui-muiuku duru kohangoe o gahi ma ngigoroka, hokogenangoo manga ngoe to ngona ani totoforauku. De ona ahao yaparangi manga musuika hiadono yahikala de yaturuuru manga kota-kotaka. Hokogea taduhunu hiadono to ngona ani totoforaukuoli yogogere manga musu manga kota-kotaka.

¹⁸ De to ngona ani totoforaukuino o nyawa mata-mataika o dunia ma amokika yamake ma owa. Abe ngaro o kiaka dika yogogere manga dutu masara ma owa yakokimake. De ma owa gea yamake angamoi ngona naa nohihingounu Ngohi Ma Jou o Yawe.” Hokogea Ma Jou ai behehongo de ai hiowa ma demo abe o malaekata wihingahu o Abarahaamika.

¹⁹ De ipaha o Abarahaama de o Isaka yolio manga gilaongika de ahao yosoboli yaiata gea yolio manga tauika o Bereseba ma tonakika de genangoka yogogerohi ma dekana.

O Nahoro ai ngofa-ngofaka

²⁰ De ipahaika naga o nyawa iwihingahu o Abarahaamika ato, “Abeika, ani dodoto o Nahoro to una ai ngofaka manga ngoe. Abe ngoi fekata o ngo Milikaino de una wamake ai ngofaka o nauru naga yatufange.

²¹ Manga ngofaka o riaka ai romanga o Usu, de yomadatekuku ahao o Busu, de ahao ukuoli o Kemuele abe una o Arama ai baba.

^22-24 O Kemuele ibooto de ahao manga doo-dodoto o Kesede, o Haso, o Piladasa, o Yitalafa, de ahao o Betuele manga baha. Hokogea ai ngofa-ngofaka abe wamake ngoi fekata o ngo Milikaino. De ahao naga ai gilaongo momatengo ami romanga o ngo Reuma abe munangoo womihidadi ngoi fekata. De munangino wamake ai ngofaka o nauru yaiata de manga romanga o Teba, o Gahama, o Tahasi, de o Maaka.” Hokogea iwihingahu o Abarahaamika ma titi ai dodoto ai ngofa-ngofaka manga ngoe. De o Nahoro gea ai ngofaka duru o dodoto o ngo Milikaino o Betuele, gea una abe ahao wamake ngoi ora momatengo ami romanga o ngo Ribeka.