Dodadi 21 - Ma Jou ai Demo-demo o Totobelohoka

O Isaka womaboa

¹ Ma dihira Ma Jou o Yawe womihingahuoka o ngo Saraika wato womihiowa hiadono o ngofaka momamake. De ma oraha adonoka abe ma dihira womihibehehongoka ho naa idadioka Ma Jou o Yawe ai behehongo munangika.

² Ho o ngo Sara igoungu de ami badangoka. De muna ahao momagerewoto de ami ngofaka o nauru. De gea momagerewoto duru ma oraha abe ma dodihiraka de Ma Jou wohiaturoka de abe wihingahuoka o Abarahaamika. De una duru iwiperekioka ma oraha gea ai ngofaka o nauru gea wimake.

³ De ai ngofaka o ngo Saraino gea wihiromanga o Isaka.

⁴ De o Isaka ai wange tufange adonoka ai ngumuru de ahao o Abarahaama wihuna imaketero abe hoka ma dihira Ma Jou wihibehehongoka wato kiani wodiai.

⁵ De o Abarahaama gea ai ngumuru adonoka ai taongo o ratuhu moi ma oraha ai ngofaka o Isaka womaboa.

⁶ De o ngo Sara mato, “Abeika, naa Ma Jou wodiai la ngohi duru toiete de ahi garago. De o nyawa mata-mata abe ahao yoihene ahi ade-ade naa de onangoo yoiete hoka ngohioli naa.

⁷ Sarakia, ma dihira naga o nyawa iwilaru o Abarahaamika ato, ‘O ngo Sara ahao naga ami ngofaka abe muna ma hirete ka idadi mihuhu.’ Duru ko moiua ka idadi yofikiri ahao idadi hokonaa! Masara abeika, ahi rokata naa iwiperekioka de ngohi ma hirete ka idadi tihidoaka ai ngofaka abe tihuhu naa.” Hokogea o ngo Sara ami garago ma demo.

O ngo Hagara de o Isimaele wahihupuoka o Abarahaama

⁸ De o ngofaka gea wolamoko hiadono ko mihuhuokaua. De ma titi wolamokoka gea o Abarahaama wohirame-rame ho wahuloko ai nyawaika la o inomo duru kohaamoko yohakai. Abe o wange gea o Isaka o ngo Sara mitingakoka.

⁹ Masara o ngo Sara ikuranga ami garago o rame-rameoka gea angamoi muna mimake o Isimaele widumu o Isakika de ko mapoaua mimake wigiete ami ngofaka o Isaka. O Isimaele gea o Abarahaama ai ngofaka o riaka abe wimake o Mesiiri ma nyawaino, abe una o ngo Hagara ami ngofaka.

¹⁰ De o ngo Sara mitemo ami rokatika mato, “Kiani muna o gilaongo gea de ami ngofaka nahuloko la yoiki yohupuoka ngoneoka naa, angamoi duru toluku unangoo wamake ani oara ma oraha nohonenge. To ngona ani oara mata-mata gea ahao kiani to ngone nanga ngofaka o Isaka dika wamake.” Hokogea o ngo Sara ami hininga.

¹¹ Masara o Abarahaama ai hininga ihuha ma titi ami demo gea angamoi o Isimaele unangoo ai ngofaka.

¹² De ahao Ma Jou wihingahu o Abarahaamika wato, “Ngaro ufa ani hininga ihuha, de ngaro ufa nato gea duru itorou abe ngoni fekata monihuloko nodiai ani ngofaka o goduuruika gea de ngoi memeika. Ngona nomihigihene dika o ngo Sara ami demoika, abe muna mato ani gilaongo o ngofeka gea de ani ngofaka munangino kiani yahinooto nahihupu nginioka. Angamoi ngona ahao o Isakino dika namake ani dano-danonguku abe tahiromanga ani totoforauku idodutu.

¹³ De angamoi ani gilaongo ami ngofaka o Isimaele gea, unangoo to ngona ani ngofaka, ho ahao unangoo tihidadi o nyawa utu ko manga ngoe manga dutu.” Hokogea Ma Jou wihigaro o Abarahaamika la waniiki o ngo Sara ami hininga.

¹⁴ Ho duru o ngoru-ngorumino o Abarahaama womomiki de wahidiai manga bilaono de manga akere ma ngi o aewani ma kaiino, ho o ngo Hagara ami belekauku wohilaketuku. Hokogea wahibilaono onangika de ahao wahingahu wato, “Kiani naa ngini niloiki.” Ho yosoboka o ngo Hagara de o Isimaele de ahao manga dodagi ma goronaka yaino yaika o tonaka ma kakaahaka abe ihiromanga o Bereseba ma tonaka ma kakaahaka.

Ma Jou waduhunu o ngo Hagara de o Isimaelika

¹⁵ Ka de manga akere yamataka de duru o ngo Hagara ami hininga ihuha de o Isimaele mifofongo o ruruubu moi ma timiuku.

¹⁶ De ahao momatingaka unangino abe hoka o hihiipi dika ma dodagi ma gurutika de genangoka mogogeruku. Hokogea ami gurutika angamoi momatemo mato, “Ngohi duru ko tapoaua timake ma oraha wohonenge ahi ngofaka.” De ahao momulaenge moari.

¹⁷ De o Isimaele ai hininga ma huha hiadono unangoo woari de Ma Jou wigihene de Ma Jou ai malaekata daku o dihangoka de auku womitemo o ngo Hagaruku wato, “Hagara, hokokia ani huha? Nako ma titi naga abeika nohihingahu. Ngaro ufa nohawana angamoi ani ngofaka abe doka womaiduoka, to una ai kangela Ma Jou wohiorikoka.

¹⁸ Ngona naika de nitauriye mangale ngohi tagoungu tihidadi o nyawa manga ngoe manga dutu.” Hokogea Ma Jou womihigaro o ngo Hagarika.

¹⁹ De ahao Ma Jou womihimatoko munangika o humu moi abe ko ikurutikaua. De o ngo Hagara maika de manga akere ma ngi maoma-omangiye de midotaka o Isimaelika de mihiokere.

^20-21 De o Isimaele gea Ma Jou wigoana de una ahao wobaluhiye o tonaka ma kakaahaka dika abe ihiromanga o Parana ma tonaka ma kakaahaka. De genangoka una duru wotobatoimi. De ipaha de ngoi meme moiki o Mesiiri ma tonakika, de genangoka o ngofeka moi momimake abe ka idadi migao ami ngofakika. Ho ma ngofeka gea modadi o Isimaele ngoi fekata.

O Abarahaama de o Abimeleke yomahiketehibehehongo

²² De ma oraha gea naga iwitutumu o Abarahaamika o Gerara manga koano o Abimeleke de ai tentara manga hidimono o Pikolo. De ona yotemo o Abarahaamika ato, “Hobata, duru itararono, Ma Jou ka ihikaika woniniiki hiadono mata-mata ngona nodiai Una wohiowa.”

²³ De o Abimeleke wotemo wohigila-gila wato, “Hobata, ngona nomanoa ahi tonakoka naa hoka o homoaino ma nyawa de ngomi miniao irahai. Ho ngohi togahoko la ngona nohihibehehongo ngohino, de kiani Ma Jouikaoo nihibehehongo. Abe ani demo hokonaa nato, ‘Ngohi o Abarahaama tagou-goungu tihibehehongo o Abimelekika tato una de ai ngofa-ngofaka hiadono ai totoforauku ka ihikaika ko tabudiua de tao irahai abe imaketero hoka onangoo ma dihirainohi de ihiao irahai ngohi naa.’” Hokogea o Abimeleke ai demo o Abarahaamika.

²⁴ De o Abarahaama wipaluhu wato, “Ngohi ani behehongo hokogea tohimoteke todiai.”

²⁵ De ma oraha yomakoketemo ma titi o behehongo gea de o Abarahaama ai hininga ma huha wihingahu o Abimelekika wato, “Gea ngohi duru tosanangi ngona noigo la ngone homakao irahai, masara naga moi toigo tonihingahu abe naga ani nyawa imihikangela ngomi naa. Naga to ngomi mia humu abe mimaabaiti nenangoka. Masara ani nyawa yoboaino de mia humu gea yomahitoona ato ona dika yapake, de ahi nyawa ko yahigunoakaua o humuino gea yomahionoko.” Hokogea o Abarahaama wihingahu.

²⁶ De o Abimeleke wohuha woihene o Abarahaama ai demo gea ho wato, “Masara hobata, ngohi duru ko tahiorikua abe ahi nyawa gea inihikangela. Hobata, ahao o wange naa toihene ani demo ma titi naa. Adodoa ho ngona ko nohihingahua ngohino? Tomahilooa ma, kiani ngona itaiti nohihingahu la tahioriki nako naga ahi nyawa inihikangela hokogea.” Hokogea ai hilooa o Abarahaamika.

²⁷ Ho gea o koano o Abimeleke de o Abarahaama yomahiketehibehehongo la yomakao irahai de o dame. De o Abarahaama wahuloko ai nyawaika la yairikino muruono naga ai hapi ai duduonino de ai dombaoo ai duduonino de ahao ena gea wihidoaka o Abimelekika. De o Abarahaama ai hidoaka gea idadi manga behehongo ma dodunguu yagou-goungu.

²⁸ De ahao o Abarahaama watingaka ai domba utuohi abe o domba ma ngofaka ma beka o gahumu tumidi. De ma domba tumidi gea ko wohisapurua de ai hidoaka utu.

²⁹ De ahao o koano o Abimeleke wileha o Abarahaamika wato, “O kia ma titi o domba ma ngofaka tumidi naa abe natingakino? Kiani nohihitararono la tohioriki ma titi.”

³⁰ De o Abarahaama wipaluhu wato, “Ma titi ahi humu. Abe ngohi toigo o domba tumidi naa idadi o dodunguu abe ngona nohingaku tagoungu o humu naa ngohi tofaiti. Ho o domba tumidi naa kiani nomale la gea ahi demo nohitunguu ma gou-goungu. Hokogea todiai angamoi toigo la ngona nohingaku de nosanangi ngohino de ahi nyawaika nato itiai o humuino naa ngomi mimahionoko.” Hokogea o Abarahaama ai hininga womahingahu.

³¹ Ho o Abimeleke wodafongo ma domba tumidi gea de ahao una de o Abarahaama yomahiketehibehehongoka la ko yomaketeruwaeokaua. Ho gea ma titi ma ngi gea ihiromanga o Bereseba angamoi ma romanga gea ma titi o demo ma gou-goungu abe de ma dodunguuoka.

³² Ho gea yomahiketehibehehongo ibooto de ahao yosobo o koano o Abimeleke de o Pikolo, una abe wahidimono ai koano ai tentara. Ona yolio manga tonakika abe yogogere genangoka o Filistina ma nyawa.

³³ De genangoka o Beresebaka o Abarahaama wodatomo o gota moi ma romanga o Tamarisi la wohitunguu ma ngi genangoka wihigiriiri Ma Jou o Yaweiye, abe ma titi Una Ma Jou Wowango ka Hiado-adonika.

³⁴ De o Abarahaama ahao wogogere o Filistina ma nyawa manga tonakoka gea duru ma dekanohi.