Dodadi 2 - Ma Jou ai Demo-demo o Totobelohoka

O wange ma tumidi: Ma Jou womahiaini wotulaada

¹ Ho gea Ma Jou wabootoka wotulaada o dunia de ma dola irupa-rupa de o dihanga de ma kiahonanga irupa-rupa, gea ena mata-mataika wotulaada ibootokau.

² De gea ma wange butaanga dika de wabootoka ai karajaanga wotulaada ho ahao o wange ma tumidi de Ma Jou womahiaini wotulaada angamoi wakokibootokau mata-mata abe wotulaada.

³ Ho mangale gea o wange ma tumidi Ma Jou wohiowa abe womadingakoka la o minggu-mingguiye o wange ma tumidi gea o nyawaoo yomahiaini manga karajaangino. De gea ma ade-ade abe hokokia ai dulaada mata-mata idadi.

Hokokia Ma Jou watulaada o nauru de o ngofeka

^4-5 De abe ma oraha Ma Jou o Yawe wotulaada o dunia de o dihanga mata-mataika de ko kia-kiauahi iwangoiye o tonakino. De hokogea ko iwahi mangale Ma Jou ko wohigutiuahi o awana de ko watulaadauahi o nyawa abe ahao yomakarajaanga o tonakoka gea.

⁶ Masara naga o akere o tonakino hoka o gagini abe ka ihikaika o dunia ma tonaka yapehaka mata-mataika.

⁷ De ahao o wange ma butaanga de ipaha Ma Jou o Yawe o tonakino wihidadi o nyawa moi o nauru. De Ma Jou o nauru gea ai ngunungiye widuwuwu la gea wihiwango de to Una ai womaha, ho o nauru gea ka idadi wowomaha hiadono wowango.

⁸ De naga o redi moi duru ma hohailoa abe Ma Jou o Yawe wodiaiokau de genangoka wihigogere o nauru gea. De Ma Jou ai redi gea o Edenoka wodiai abe o wange ma hiwariha ma honongaka ma tonaka.

⁹ De genangoka Ma Jou wohiwangoiye o gota irupa-rupa abe duru ma hohailoa holega-lega. De o gota mata-mataika naga ma hofoko de gea ena mata-mata o inomo ma rorahai. De wohiwangoiyeoli ai redi ma gogoronaka o wowango ma gota abe to ena ma hofoko nako yaolomo o nyawa manga wowango ko ihonengua. De wohiwangoiyeoli genangoka o gota moioli abe nako ma hofoko o nyawa yaolomo de ihioriki ma owa de ma dorou.

¹⁰ De o redi o Edenoka gea naga o akere abe ihahuru genangino, ho yahiihi ma tonaka o redioka gea. De o akere gea naga ma jaga iata.

^11-12 Ma jaga moi o Pisono ma romanga abe ihahuru ijiko-jiko o Hawila ma tonakika, genangoka naga o gurasi ma owa de naga o hilo duru irahai ma bounu abe biaha ihuha hamake. De nagali o tonakoka gea o hakaru irahai abe ma goronaka duru iletongo.

¹³ De o akere ma jaga moioli o Gihono ma romanga, de gea ena abe ihahuru ijiko-jiko o Kusi ma tonakika.

¹⁴ De o akere ma jaga hangeoka gea o Tigirisi ma romanga, de gea ena abe ihahuru o Asuru ma tonakika o wange ma hiwaroko. De o akere ma jaga iatoka ma romanga o Efaraata. Hokogea ma jaga o akere gea abe ihahuru ma utuoka o Edenoka de aino.

¹⁵ Ho ka de o nauru gea Ma Jou o Yawe wihidadi ibooto de wiao ai redika gea de genangoka wihigogere la ka idadi o redi gea wogoana de wokarajaanga genangoka.

¹⁶ De Ma Jou wihibehehongo o naurika abe wihiahoko o Adama, wato, “O gota ma hofoko mata-mataika o redioka naa ka idadi naolomo.

¹⁷ Masara naga o gota moi dika imatotogoronauku o redioka naa ufa naolomo ma hofoko, angamoi genangino nohioriki ma owa de ma dorou. De hokogea tonihingahuoka angamoi ka de o wange gea abe ko nohihingounua de naolomo, ka ma wange gea dika de nohonenge.” Hokogea Ma Jou o Yawe ai hitiari o Adamika.

¹⁸ Gea ibooto de ahao Ma Jou o Yawe womatemo wato, “Koaho o nauru naa ko womatengokaua, ho ngohi todiai ai dodiawo hoka unangoli la naga ai duduhunu.”

¹⁹ Abe ma dihira Ma Jou o Yawe wodiaiokau o tonakino, o aewani mata-mata de o totaleo daku ma hoanino. De ai dulaada mata-mata gea homoi-homoiino wohikokiboaino o Adamino la wamake abe de ma roma-romanga o kia o Adama gea wohiromanga o fara homoi-homoiika. De o kia dika o Adama gea wohiromanga o aewani irupa-rupa gea, ahao idadi to ena ma romanga.

²⁰ Ho ipaha o Adama wohiroma-romangoka o aewani o dofo, de o fuhuku, de o totaleo daku ma hoanino hiadono mata-mataika wabootoka wohiromanga. Masara ko moiua naga ai dodiawo irahai ho abe o Adama ai duduhunoo ko iwahi.

²¹ Ho o Adama Ma Jou o Yawe wihidoaka o honenge ma ngidu de ahao wafelenga o Adama ai kai de wagoraka moi ai kobongo ai gumurukino de ahao wohitamunikali de ai roehe.

²² De ai gumuruku ma kobongino gea Ma Jou o Yawe womihidadi o ngofeka moi, de ahao womiao o naurika gea.

²³ Ka de o Adama womimake de wotemo wato, “Oo, naa duru tosanangi, muna naa hoka ngohioli, Ami kobongo idadi to ngohi ahi kobongino, De ami roehoo idadi to ngohi ahi roehino, Ho muna naa tomihiromanga o ngofeka, Angamoi muna naa Ma Jou womihidadi o naurino.” Hokogea o Adama ai demo.

²⁴ De Ma Jou o nauru de o ngofeka wahidadi o dodadi moiino la gea yomakuduhunu, de gea ma titi ho hiadono o nauru yomatingaka manga baba de manga memeino la gea yogogere moi de manga fekata la ona yodadioka moi.

²⁵ De ma oraha gea o nauru de o ngofeka yahinooto gea ka manga bululunokahi, ma ko yamalekua.