Dodadi 19 - Ma Jou ai Demo-demo o Totobelohoka

O Sodomo de o Gomora Ma Jou wahibinaaha

¹ Duru o wange ilobioka de ahao o malaekata yahinooto gea yomahiadono o Sodomo ma kotaika. De o Sodomo ma kota yakurungaka abe ma dadaduhu yodiai o hakaruino la ihigilolitino. Ho ona yahinooto yoboa o kota ma dadaduhu ma ngoranino. De o Loti naga wogogeruku o ngoranoka gea ma datekoka abe genangoka o kota ma dimo-dimono biaha yogogeruku. Ho o Loti wamake o malaekata yahinooto gea yoboaino. De womaokoino de wabuhuku de ai horomati abe womaponuku hiadono ma tonakuku itiki ai pea.

² De watumungu onangika wato, “Ahi Baluhu, marai ma gurutoka de niaino ho tinidafongo duru de ahi hininga ma hohailoa. Ho o futu naa ka idadi nimahidodogumu ahi tauoka. Genangoka ka idadi nimaihoro de nimaidu de ahao itebini o ngoru-ngorumino ka idadi nigila-gila nia dodagioka.” Hokogea o Loti ai hininga wahingahu onangika. Masara o malaekata yahinooto gea yopaluhu ato, “Tarimakase hobata, ma ngaro ufa hokogea, ngomi marai mimaidu o loaka dika abe ma kota ma hidogoronaka.”

³ Masara manga demo gea o Loti ko wosanangiua ho ona waribuutu wato, “Duru ko idadiua nimaidu o loaka. Ngini kiani nihiniiki ngohi la nimaidu ahi tauoka.” Ho ona ahao iwiniiki o Loti ai tauika de genangoka ai nyawa wahuloko la o roti ko iwa ma ragi yahinaanga de o inomo utu yahakai. Ho naga manga inomo duru ma ngoe wahidiaiuku de ahao yolomo.

⁴ Gea yolomo ibooto ma ko yomaiduahi de o Sodomoka ma nau-nauru o kota ma amokino yokokiboaino abe o balu-baluhu de o goo-goduuru, de o Loti ai tau ihigilolitoka.

⁵ De manga kalilu itagi o nau-naurika abe yowohamika o Lotioka ho hiadono yoigo ona yapake hoka o ngo-ngofekali. Ho iwiahoko o Lotika ato, “O futu naa ani tauoka abe ngonaka yomahidodogumu, ona yahinooto o kiaka? Kiani ona gea nahihupuino la ngomi mimahigelenga de ona.” Hokogea iwihuloko o Lotika.

⁶ Masara o Loti wabuhuku o nau-nauru gea ai tau ma himangoka, de ma ngorana ai poretoka wahidatatokoka.

⁷ De wataere onangika wato, “Ahi dodiawo, ngone duru homahikogogere moi nenangoka, ho ngohi togahoko ufa ngini niahidee duru itorou onangika hokogea!

⁸ Abeika, to ngohi ngohi ora yahinooto abe yomoholehoka naga o tau ma goronaka, de ona ko ma moiuahi yomakitigi de o nauru. Ho sarakia nako ona tahihupuino de nidiai iti ka ti ngini dika nia mau, iti ufa o nauru yahinooto gea niaruwae. Ona ihirekatino ahi tauoka naa ho kiani ngohi tagoana itiai.”

⁹ Ka de watatoko manga mau hokogea de o nau-nauru gea ka iwibanarata o Lotika ato, “Mode ngona! Ngona noiki, nomatitokoka, la ona miangohama! Ngona naa ka o nyawa ma homoaino noboa la nogogere nenangoka, de done sarakia nato ka idadi nomitaere ngomi? Ngona naa nomahirehenoka! Nako ngona ko nomahirehenua done de ahao ngona de ona ka ngonaikahi midiai itorou!” De ahao o Loti ka iwitila de ato ai tau ma ngorana yakilianga.

¹⁰ Masara doka o tau ma goronaka o malaekata yahinooto gea ma ngorana yafelenga jai-jai de yomataiti o Loti iwiliara la iwihingohamoka de ahao ma ngorana akusioka.

¹¹ De o malaekata gea yodiai o nau-naurika o ngorana ma poretoka gea la ka itodokanino manga lako ikokihomuoka. Abe ngaro yatimonoka eko ka o goduuruohi ma yohorioka ho ko amakeokaua o tau ma ngorana.

¹² De ipaha o nau-nauru gea yahikangela ibooto de o malaekata ahao iwileha o Lotika ato, “Sarakia, naga ani toroa eko ani ngofa-ngofaka eko ani dutu abe yogogere o kota ma goronaka naa? Nako naga ngona noiki nahingahu kiani yomataiti yohupu nenangino la o kota naa yodogunoaika.

¹³ Abe ibootino dika de o kota naa ngomi miahibinaaha. Angamoi Ma Jou o Yawe wagihenoka ona abe yomaniata Unangiye ato kiani o nyawa nenangoka wahohowono ma titi o dorou abe ikiriakaholi naangoka. De ma titi gea hiadono Una womihuloko la o nyawa o kotaka naa ngomi kiani miahibinaaha.”

¹⁴ Ho o Loti womataiti wohupu de wahingahu ngoi ora manga darunu yahinootoika wato, “Ahi totoroa kiani nimataiti o kotaino naa nikokihupuoka! Ngade-ngade Ma Jou o Yawe wohibinaaha o kota naa de ma nyawa ka ma moi! Ho nimataiti!” Masara ona ato bote o Loti hoka wahawaliti dika ho ko yoikua.

¹⁵ Ahao ma ngoru-ngorumino abe ngade-ngade o wange ipotokaiha, de o malaekata gea o Lotika iwitataiti ato, “Nimataiti o kotaino naa ngini nihupuoka ngona de ngoni fekata de ngoni ora, done inihidotadaene de ka ma moi inihibinaaha de o kota naa abe bootino ihibobaha.”

¹⁶ Masara o Loti ka wokapaangohi ho o malaekata yomataiti o Loti de ngoi fekata de ngoi ora manga gia-giamika yaso de yaliara hiadono yahihupu ma kota ma poretika. De gea yahihupu angamoi Ma Jou ka wadorahi o Loti de ona ai tauoka.

¹⁷ Ho ona yahihupuoka ma kotaino de o malaekata womatengo witemo o Lotika wato, “Naa ngini niloara done nihonenge! De ufa nimadogilioro! Nimataiti nimapopaata hiadono nidoa dakena ma loku-lokuiye de ufa nimatogu-togumu o kiaka dika ma dolaka naa la ufa nginioo nihonenge.”

¹⁸ De o Loti wopaluhu wato, “Ahi balu-baluhu, ufa nihihuloko hokogea!

¹⁹ Ngini ma ngoeoka nia dora itagi ngohino de nihiduhunu hiadono ka towangohi. Masara ngohi naa ko taboaikaua tomapopaata hiadono o loku-lokuika gea. Done ahao o bobinaaha ihidaene de tohonenge.

²⁰ De abeika naga o kapongo ma eteteke ko ikurutikaua de ngohi ka taboaika. De duru ma eteteke ma kapongo gea e? Ho togahoko nihihigunoa genangika toara la tomahirehene o bobinaahaino.”

²¹ De o Loti ai demo gea o malaekata iwigihene ho womatengo wipaluhu o Lotika wato, “Nako hokogea ka idadi! Nenangoli tonihigunoa nodiai ho o kapongo gea ahao ko tohibinaahaua.

²² Masara kiani nimataiti nimapopaata genangika angamoi kiani o kapongika nikokiwohamoka de ahao ka idadi o Sodomo tohibinaaha.” Hokogea o Loti woodemo ma kapongo gea. De manga kapongo gea ihiromanga o Soara angamoi ma romanga gea ma titi ma eteteke.

²³ De ka de o Loti womahiadono o Soarika gea de o wange ipotokaihaka.

²⁴ De gea o dihangino Ma Jou o Yawe wapurarahuku o uba itoka-tokara dau o Sodomo de o Gomora ma kota-kotauku.

^25-26 De abe ma oraha o uba itoka-tokara ipurarahuku de o Loti ngoi fekata momadogilioro. De ka de momalega manga poretika gea de imihidogoo o gahi. Ho o kota hinooto gea Ma Jou wohikokibinaaha ka ma moi de mata-mata abe iwango ma datekoka ngaro o nyawa, de o aewani, de ngaro ena abe o tonakino iwangoiye. Hokogea ma bobinaaha hiadono ko moiokaua abe ka iwangohi o Yorodani ma dolaka gea.

²⁷ De ma dawangeino duru o ngoru-ngorumino de o Abarahaama womomiki de woiki manga dingiika abe kanugono una de Ma Jou o Yawe yomakoketemo genangoka.

²⁸ Ho womahiadonika genangoka de womalega daena o kiaka o Sodomo de o Gomora naga o Yorodani ma dolauku. De wamake o uku ma nofo kohabirini idoaiye hoka o fongana youku ma nofo.

²⁹ Hokogea Ma Jou wohibinaaha o kota-kota gea o Yorodani ma dolaka. Masara wahohininga ona abe o Abarahaama wademo. Abe gea o Loti Ma Jou wihihupu o bobinaahaino la ka idadi wowangohi ngaro ai kota Ma Jou wohibinaahaka.

O Loti de ngoi ora yahinooto gea manga ade-ade

³⁰ De ipaha o Loti wohawana wogogerohi o Soara ma kapongoka, ho una de ngoi ora yahinooto gea yomaturuuru o loku-lokuiye de yogogere o aruku moioka.

^31-32 De o wange moiuku ngoi ora o riaka ami hininga momahingahu ngomi dodotika mato, “Ngaro o dunia ma amokika ma o nyawa manga biaha yoilaka de yamake manga ngofa-ngofakuku de manga dano-danonguku naga. Masara hiokoo ngone! To ngone nanga baba iwiperekioka de ko iwa ai danongo. Nako ngona de ngohi, igoungu hoigo la nanga ngofaka naga. Masara o kiaino hamake nanga rokata? O nyawa utu ko yaiwa abe yogogere o loku-lokuoka naa. Ho naa ma ngekomo hodiai: Abeika, nanga baba hihiokere o angguru ma gohaka la duru iwidalukoka hiadono ai hininga wawohangoka, de ahao ka idadi homakitigi de una la nanga ngofaka hamake. Hokogea hodiai la nanga totoforauku naga nanga babaino.”

³³ Hokogea manga hidee de o futu gea manga baba iwihiokere o angguru ma teongo ma gohaka hiadono duru iwidaluku de ahao ngoi ora o riaka yomahigelenga de ami baba. Masara o Loti gea ko womimaoua ngaro ma oraha momaidu unangoka eko ma oraha momomiki ma ko womihiorikua.

³⁴ De ahao ma dawangeino ngoi ora o riaka motemo ngomi dodotika mato, “O futu ngohi mimahigelenga de o baba. Ho abeika o futu naa de o angguru hihiokeroli hiadono iwidalukoli la ngonaoo ka idadi nimahigelenga de una. Hokogea o baba kiani hipake la nanga ngofaka ka idadi hamake la ka imahikauku naga to una ai totoforauku.”

³⁵ Ma riaka ami demo gea ngomi dodoto momihigihene, ho o futu gea de ihiaturu la o Loti iwidalukoli. De ahao ngoi ora o dodotoli munangoo yomahigelenga de manga baba. De ma moioli o Loti duru ko womihiorikua abe ngaro ma oraha momaidu unangoka de momomiki ma ko womimaoua.

³⁶ Hokogea hiadono idadi o Loti ngoi ora yahinooto gea homoi-homoiika de manga badangoka de manga ngofa-ngofaka to manga baba ai ngofaka.

³⁷ De ipaha muna o riaka momagerewoto o ngofaka o nauru de mihiromanga o Moaba. Ho una gea wodadi to ona manga tofora abe ma oraha naa ona nagahi de yomahiromanga o Moaba ma nyawa.

³⁸ De ngoi ora o dodoto munangoo momagerewoto o ngofaka o nauru de mihiromanga o Ben-Ami. De una gea wodadi to ona manga tofora abe ma oraha naa yomahiromanga o Amono ma nyawa.