Dodadi 18 - Ma Jou ai Demo-demo o Totobelohoka

Yahange iwitutumu o Abarahaama

¹ De ipaha Ma Jou o Yawe womahimatokoli o Abarahaamika. Ma oraha gea o Abarahaama ka wogogerohi ai ngioka abe ma romanga o Mamere. De duru o wange ikorona o Abarahaama naga ai tau o ngoerino ma himangoka womafofongika o gota ma ago-agomo ma timiuku abe naga o Mameroka gea.

² De o Abarahaama womaboaiye de iwitodokana abe naga ko yokurutikaua Ma Jou o Yawe de o malaekata yahinooto masara manga rupa duru hoka o nyawa o nauru yahange yomaokoino genangoka. Ka de yahange gea wamake de o Abarahaama ai ngoranoka wosoboka la womataiti wabuhuku. De gea wabuhuku de ai horomati ho manga himangoka de womaponuku hiadono ai pea itiki ma tonakuku.

³ De wotemo unangika abe wahihira-hira wato, “Ahi Baluhu, naa nomahiadonoka ahi tauino ho nako nosanangi duru toigo nenangoka ngona de ani dodiawo naa tinitumungohi, wahiohi ngini nigila-gila.

⁴ De ahi duduhunu womatengo tiahokino de o akere la ka idadi nia lou waihoro, de ahao kiani nimahiainohi o gota ma fofongoka naa.

⁵ De ngohi duru toigo nihihigunoa la tinihidiai la niolomohi. Abe ngohi tato ngaro ahi inomo ma hohutulu dika, ma iti niolomokahi la ka idadi inihiputurungoli. Ho gea togahoko la nimahiaini ibootino de ahao ka idadi nigila-gila. Duru tosanangi niboa ngohino ho hokogea toigo tinidafongo.” De ona yopaluhu unangika ato, “Tarimakase. Gea ngona nodiai abe ngomino irahai.”

⁶ Ho gea o Abarahaama womataiti wowohama ai tau ma goronaika de womitemo o ngo Saraika wato, “Nomataiti o tarigu irahai nale ngaro o litere monaoko de ahao nadedetahi de nohisapuru la gea ka idadi o roti nahinaanga.”

⁷ Hokogea womihingahu ibooto de ahao o Abarahaama womapopaata ai hapi ma duduonika de wairikino o hapi ma ngofaka ka ma goohi abe duru ma roehe ibole. De wairiki ipaha de ma hapi gea wohidoaka womatengoika ai duduhunika. De ai duduhunu gea unangoo womataiti wokarajaanga abe ma hapi gea watoma de watetoroka de ma roehe walui-luituku la ka idadi itaiti yahakai.

⁸ Ho ko itedekanua de o inomo wahidiaioka de o Abarahaama ma hirete waleleani ona iwireka-rekatino gea. Ho waoino o hapi ma roehe ma gohaka, de o susu, de o susu ma haki abe itogowinoka la de o inomo gea wahiolomo. Ho ona o gota ma timiuku yolomo de o Abarahaama womaokoino manga datekoka la ka idadi waleleani.

⁹ De ona iwileha o Abarahaamika ato, “Ho ngoni fekata o ngo Sara, muna o kiaka?” De o Abarahaama wapaluhu wato, “Muna naga o tau ma goronaka.”

¹⁰ De ahao Ma Jou o Yawe wihingahu o Abarahaamika wato, “O taongo moiohi ipahaika de ahao Ngohi toboali ngonaino. De ma oraha tonitutumoli de ngoni fekata momangakunokau de ami ngofaka o nauru.” De ma oraha Ma Jou wotemo hokogea de o ngo Sara naga ai poretoka, abe ona yopore-poretika o Abarahaama ai tau de muna naga o tau ma goronaka. Abe duru o tau ma ngorana ma datekoka muna momahidutukika matotoihene manga demo.

¹¹ Masara o Abarahaama de o ngo Sara ma oraha gea de duru yaboriperekioka, ho o ngo Sara mootanoka.

¹² Ho ka de Ma Jou ai demo gea moihene de doka ami hiningaka muna mogiete de momaleha mato, “Done sarakia ka tamakeohi o sosanangi hokogea? Ngohi ahi roehe iowahoka de ahi rokatoo ka unangohi iwiperekiokau, ho done sarakia ai demo gea?”

¹³ De ahao Ma Jou o Yawe wotemo o Abarahaamika wato, “Adodoa ho o ngo Sara mogiete? De adodoa ho moleha mato, ‘Done sarakia tamakeohi o ngofaka abe ngohi naa ihiperekioka?’

¹⁴ Sarakia, naga moi abe Ma Jou ko wakunua wodiai? Ko iwa moi! Ngohi tagoungu abe o taongo moiohi ipahaika de adonoka ma oraha tohikaaturoka abe Ngohi tinitutumoli de gea o ngo Sara ami ngofaka momamakeokau.” Hokogea Ma Jou ai hitararono o Abarahaamika.

¹⁵ Ka de Ma Jou ai demo gea moihene de o ngo Sara mohawanoka ho momahipongono mato, “Masara ko togietua.” Masara Ma Jou womihiree-reeika wato, “Masara Ngohi tagoungu tato, ngona noietoka.”

O Abarahaama wademo o Sodomo ma nyawa

¹⁶ De ahao yahange gea yomahilooa ato yosobo de yomalega daenanguku abe manga dumutika o Sodomo ma kotaika abe naga daena ma dolaka. De gea yosobo de o Abarahaama ma ngekomika wangotaka.

^17-19 De Ma Jou o Yawe ai hiningaka womatemo wato, “O Abarahaama naa tiirikoka la wodadi ahi dodiawo, de una ahao ai ngofa-ngofakuku wadotoko la to ona manga wowango hoka to unangoli ai wowango itiai. Abe wahidumutu onangika o ngekomo igou-goungu la duru yaniiki to Ngohi ahi totiai. De ai totoforauku gea ahao duru ko manga ngoe-ngoeuku de yomahiromanga moi dika ngaro manga dutu manga ngoe. De ona gea ahao yodadi o doomu moi abe duru de manga buturungoka. De ngaro o nyawa utu manga gogere o nuuhu eko o tonaka o kiaka dika, de ngaro hokokia manga demo imaketemomomoi ma, onangoo mata-mataika o dunia ma lokuoka ka idadi ahao yamake ma owa o Abarahaamino. De hokogea idadi la tihidoaka o Abarahaamika imaketero abe hoka tihibehehongokau. De ma titi mata-mata gea tihingahuoka, ho nenangoli abe ahao ibootino todiai o Sodomo de o Gomora ma kota-kotaika, enangoo kiani tihingahu ahi dodiawoika naa.”

²⁰ Hokogea ai hininga ho Ma Jou o Yawe wihingahu o Abarahaamika wato, “Naga o nyawa manga ngoe yomaniata abe ihihingahu Ngohino ato, ‘O Sodomo de o Gomora ma nyawa duru yodiai itorou ikiriakaholi ho ngomi naa duru migahoko la Ngona Ma Jou nahohowono ona gea.’

²¹ Hokogea o nyawa yomaniata ho hiadono ma oraha naa Ngohi touti o Sodomo de o Gomora ma nyawauku de tatailako la gea tohioriki ma dorou itaana eko ko itaanua abe toihenoka.” Hokogea Ma Jou wihingahu o Abarahaamika.

^22-23 Ho gea Ma Jou wotemo ibooto o Abarahaamika de o malaekata yahinooto gea yomadogilioro de yogila-gila manga dumutika o Sodomo ma kotaika. Masara o Abarahaama duru wihimanga Ma Jou o Yaweika. Ho ona yahinootokahi yomaboriokoino o ngekomoka, de o Abarahaama duru o Sodomo ma nyawa wademo Ma Jouika. Ho ihira wileha Unangika wato, “Ho ona gea abe manga datoro itotiai de ona abe manga datoro itotorou, ona gea ka ma moi nahidohohowono?

²⁴ Done bote naga o nyawa yamoritoa yogogere o kotaka gea abe manga datoro hatoli itiai, marai ona gea ko nahibinaahaua e? Ho ma titi yamoritoa gea abe manga datoro itotiai hiadono ka idadi o kota gea ko nohibinaahakauali.

²⁵ Abe done sarakia itiai Ngona Ma Jou nahidobinaaha o totiai ma nyawa de o dorou ma nyawa ka ma moi? Ngona gea ko idadiua! Abe nako hokogea nodiai gea hoka o totiai ma nyawa de o dorou ma nyawa nahidotelega de nato yomaketero dika. Ho gea Ngona ko idadiua! Ngona Ma Jou abe o dunia ma nyawa napareta de nahohowono itiai ho duru igoungu ma totiai dika Ngona naniiki.” Hokogea o Abarahaama wotemo-temo Ma Jouika.

²⁶ De Ma Jou o Yawe wopaluhu wato, “Nako tamake o nyawa yamoritoa o Sodomo ma kotaka abe manga datoro itiai de ahao o kota gea ko tahibinaahakauali mangale ona yamoritoa gea.”

²⁷ Masara o Abarahaama wademoli Ma Jouika wato, “Ngohi ani himangoka naa imaketero hoka o tonaka ma kafo eko o uku ma kafo dika, ho done sarakia de ka ihimoroinohi totemo Ma Jouika?

²⁸ Masara done ona yamoritoa ko adonua abe manga datoro itotiai o kotaka gea, ho naga yamoruata de yamotoa dika manga ngoe? De ahao ma kota gea nahibinaaha ngaro yokuranga yamotoa dika abe manga datoro itotiai?” De Ma Jou wipaluhu wato, “Nako tamake yamoruata de yamotoa genangoka de ahao o kota gea ngaro ufa de tohibinaaha.”

²⁹ Masara wohigalioli wademo Ma Jouika wato, “Ho nako manga hou abe manga datoro itiai yamoruatokahi de ona o kota gea ka nahibinaaha?” De ma moioli Ma Jou wopaluhu wato, “Nako tamake yamoruata genangoka de ahao o kota gea ngaro ufa de tohibinaaha.”

³⁰ De ahao o Abarahaama womahilooa Ma Jouika wato, “Ahi Jou, ufa nohingamo ngohino ma nohihigunoa la ma moioli tonileha. Abe nako manga hou abe manga datoro itiai yamoruangeohi de ona o kota gea ka nahibinaaha?” De Ma Jou wopaluhu imaketero hoka kanganoli wato, “Nako tamake yamoruange genangoka abe manga datoro itiai de gea ko tahibinaahauali.”

³¹ De ahao o Abarahaama womahilooali wato, “Marai ngohi duru ka ihimoroinohi tonileha-leha Ma Jouika, ma done sarakia nako ona abe manga datoro itotiai yamonaoko dika yogogere o kota ma goronaka gea?” De Ma Jou wopaluhu imaketero hoka kanganoli wato, “Nako tamake yamonaoko genangoka abe manga datoro itiai de ahao o kota gea ko tohibinaahauali.”

³² De ahao duru o Abarahaama womahilooa Ma Jouika wato, “Ahi Jou duru togahokoli la ufa nohingamo ngohino, ma togahoko nohihigunoali la tonilehali de ahi leleha ma baha naa. Done namake ona genangoka abe manga datoro itotiai yangimoi dika?” De Ma Jou wipaluhu imaketero hoka kanganoli wato, “Nako Ngohi tamake yangimoi o Sodomo ma kotaka abe manga datoro itiai de ahao o kota gea ko tohibinaahauali.”

³³ Hokogea yomakoketemo ibooto de Ma Jou o Yawe wosoboka. Ho gea o Abarahaama ka wolio ai tauika.