Dodadi 17 - Ma Jou ai Demo-demo o Totobelohoka

O Abaraama Ma Jou wihiromangoli o Abarahaama

¹ De o taongo ngimoi de hange ipahaika de o Abaraama ai ngumuru adonoka ai taongo morihiwo de hiwo. De ahao Ma Jou o Yawe womahimatokoli unangika de wihingahu wato, “Abaraama, Ngohi naa Ma Jou Tokokurutiye abe o kia dika tato todiai gea ka idadi todiai. Ngona ahi himangoka kiani nowango itiai la ko iwa moi tamake ani datoroka abe ka idadi tonitaere.

² De abe ma dodihiraino Ngohi tonihibehehongo tato todiai, de ma oraha naa tomulaenge todiai. Ho ahao idadi abe to ngona ani totoforauku duru ko manga ngoe-ngoeuku.”

³ Ka de Ma Jou ai demo gea woihene de o Abaraama duru ai horomati itagi Ma Jouika hiadono womatilabukuku hiadono ma tonakuku itiki ai pea la gea wohitunguu de ai hininga ma gahumu Ma Jouika wihingounu. De ahao Ma Jou wotemoli o Abaraamika.

⁴ De wato, “Hokonaa to Ngohi ahi behehongo ngonaika. Ahao ani totoforauku onangoli homoi-homoi yodadi o nyawa yowoe-woe manga dutu. Ho ika-ika de ahao ngaro o nyawa abe yomahikabarihoka ho yogogere o tonaka ma ngoeoka masara ona ko manga ngoe yobaba ngonaika.

⁵ De ani romanga ko o Abaraamokaua masara ani romanga taturuuru ho naa ani romangoli o Abarahaama. Hokogea tonihiromangoli mangale tonihidadi o kapongo ma ngoe manga baba abe ngaro o nyawa yomakokitingaka o nuuhu homoi-homoioka hiadono manga demo imalolihowono, ma, yobaba ngonaika.

⁶ Ngohi tonihiketero hoka o gota abe duru itotohofoko angamoi hokogenangoo ani totofora ahao duru ko manga ngoe de manga gogeroo o tonaka ma ngoeoka. De hiadono naga utu ani totoforaukuino abe ahao yodadi o kokoano ma nyawa.

⁷ De gea abe Ngohi tonihibehehongokau ngonaika ahao ka ihikaika tahibehehongoli onangika abe ani totoforaukuika. Ho ngaro hokokia dika yolape-lapeuku masara hokogea ahi behehongo de duru ko itogu-togumua. Hokogea ahi hininga la Ngohi todadi to ngona ani Jou de to onangoo manga Jou ka hiado-adonika.

⁸ Abarahaama, naa tonihingahu abe ma oraha naa ngini hoka o homoa ma nyawa dika o Kanani ma tonakoka naa. Masara o tonaka naa idadioka ahi hidoaka ngonaika de ani totoforaukuika la idadi to ona manga tonaka ka hiado-adonika. De Ngohi to ona manga Jou.” Hokogea Ma Jou ai hingahu.

Ma Jou ai behehongo ma dodunguu o huhuna

⁹ De Ma Jou wihitararonohi o Abarahaamika wato, “De naa tonihingahu ahi behehongo ma dodunguu abe ahao kiani ngona nodiai de ani totoforauku onangoo kiani ka ihikaika yodiai. De gea ngini mata-mata ahi behehongo naa nianiiki niagou-goungu la nimahitunguu Ngohino abe ahi hininga nianiiki.

¹⁰ Hokonaa ahi behehongo ma dodunguu abe ngona de ani totoforauku de imahikauku nimaadiai nia badangoka la nimahitunguu nianiiki ahi behehongo: o nau-nauru mata-mata nginioka kiani yomahuna.

¹¹ Kiani ngini o nau-nauru nimahuna la gea homahiketehibehehongoka, de ma dodunguu gea nia badangoka homoi-homoiika abe nihitunguu nioigo nianiiki ahi behehongo.

¹² De ka imahikauku to ngona ani totofora kiani manga ngofa-ngofaka o nauru yahuna abe ngaro ti ngini nia ngofaka idodutu de ti ngini nia ngofaka ko idodutua ma kiani onangoo niahuna. De ngaro o ngofaka yomaboa onangino abe yokarajaanga nginioka, abe ona gea niaijaino o homoa ma nyawaino ma, to onangoo manga ngofa-ngofaka kiani niahuna. O ngofa-ngofaka o nau-nauru gea nako adonoka manga ngumuru manga wange tufange de duru o wange gea kiani niahuna.” Hokogea Ma Jou o huhuna ma titi wihitararono o Abarahaamika.

¹³ De ahao ma hitararono Ma Jou wodogo wato, “De o huhuna ma pareta naa kiani o nau-nauru mata-mataika nginioka yaniiki ngaro yomaboa nginioka eko naga abe yobaluhoka ma oraha niaijaino, ma kiani ona mata-mata niahuna la naga ti ngini o nau-nauru nia kokibadangoka nimahitunguu ahi behehongo nginika ka hiado-adonika.

¹⁴ Nako naga o nauru nginioka abe ma dihira ko iwihunaua de woluku womahuna, gea ahao ko idadiua iwietongo to Ngohi ahi nyawaka angamoi waoluku wohingounu ho itoaka unangika ahi behehongo.” Hokogea Ma Jou wihingahu o Abarahaamika.

¹⁵ De ahao Ma Jou wotemoli o Abarahaamika wato, “De naa tonihingahu abe ahao idadi ngoni fekatika. Ibootohi nomihiromanga o ngo Sarai, ami romanga naa taturuuruoka ho ami romangoli o ngo Sara.

¹⁶ De Ngohi ahao tomihiakunu la muna de ami badangoka la gea Ngohi tonihidoaka ani ngofaka o nauru munangino. Hokogea o ngo Sara Ngohi tomihiowa la hiadono muna tomihidadi o kapongo ma ngoe manga meme. De ngaro o nyawa yomakokitingakika o nuuhu homoi-homoioka hiadono manga demo imalolihowono de manga gogeroo o tonaka ma ngoeoka, ma, yomeme munangika. De naga utu yodadi o kokoano abe ami totofora ahao yomaregu-regu hiadono o dutu homoi-homoiika de manga kokoanoka.” Hokogea Ma Jou ai behehongo abe ma titi o ngo Sarai.

¹⁷ Ka de gea woihene de o Abarahaama womaponuku hiadono ai pea itiki ma tonakuku de woiete de ai garago. Masara nagali abe wohidemo de ai heranga wato, “Gea mode ka idadi ahi ngumuru adonoka ahi taongo o ratuhu moi de ahi ngofaka ka tamakeohi? De mode o ngo Sara abe munangoo ami ngumuru adonoka ami taongo morihiwo, de ahao ngomi miamake to ngomi mia ngofaka munangino?”

¹⁸ De ahao o Abarahaama wihininga ai ngofaka o ngo Hagarino de wogahoko Ma Jouika, wato, “Ahi Jou, duru ahi ngofaka o Isimaele tigahoko la wonihisanangi hiadono unangoo nihiowa.”

¹⁹ De Ma Jou wopaluhu o Abarahaamika wato, “Ani gogahoko todafongo masara ngoni fekata o ngo Sara ahao munangino ngona nimake ani ngofaka abe tonihibehehongoka, tato ani ngofaka ahao namake, de una gea kiani nihiromanga o Isaka. De abe tonihibehehongo ngonaika gea idadi ahi behehongo o Isakikali, de itagi to una ai totoforauku mata-mataikali abe gea o behehongo ka hiado-adonika onangoka.

²⁰ De naa tonihingahu abe ma titi ani ngofaka o Isimaele. Abe ani gogahoko kangano tonigihenoka de igoungu ahao unangoo tihiowa abe tihidadi la ai ngofaka manga ngoe de ka ihikaika yowoe-woeuku. To una ai ngofa-ngofaka o nau-nauru yangimoi de yahinooto de ona yodadi o nyawa manga dutu homoi-homoiika. De yomahiromanga de o romanga moi dika ngaro manga dutu yangimoi de yahinooto o Isimaele ai totoforauku gea.

²¹ Masara abe ngona de Ngohi homahiketehibehehongoka, ahi behehongo gea tangodumu o Isakika abe o taongo doka nanga himangoka de womaboa o ngo Saraino.”

²² Hokogea wihingahu o Abarahaamika ibooto de ahao Ma Jou wosoboka genangoka.

²³ De duru o wange gea de o Abarahaama ai ngofaka o Isimaele wiahokino, de ai duduhunu o nau-nauru mata-mata watoomuino ngaro yomaboa unangoka eko waijaino ma, onangoo watoomuino. De ahao ai ngofaka de o nau-nauru mata-mata gea abe yogogere unangoka wakokihunaka, duru imaketero hoka Ma Jou wihuloko wato, “Kiani hokogea nodiai.”

²⁴ De o Abarahaamoo womahuna ho to una ai ngumuru adonoka ai taongo morihiwo de hiwo ma oraha womahuna.

²⁵ De ai ngofaka o Isimaele ai ngumuru adonoka ai taongo ngimoi de hange ma oraha gea wihuna.

²⁶ Abe ona ma giangofaka duru ka ma wange gea dika de yomaborihunaka.

²⁷ De o nau-nauru mata-mataika abe yogogere o Abarahaamoka ngaro yomaboa genangoka eko yobaluhiyeoka ma oraha waijaino o homoa ma nyawaino masara yomakokihunaka ka ma moi de o Abarahaama.