Dodadi 16 - Ma Jou ai Demo-demo o Totobelohoka

O ngo Hagara de o Isimaele manga ade-ade

^1-3 De ipaha o Abaraama wogogere o Kanani ma tonakoka ai dekana ai taongo ngimoi. De o ngo Sarai ami ngofaka ko iwa ho o Abaraama ko wamakeuahi o ngofaka ngoi fekatino. Masara o ngo Sarai ami duduhunu o moholehe momatengo naga abe o Mesiiri ma nyawa de ami romanga o ngo Hagara. De o ngo Sarai mitemo ami rokatika mato, “Ma Jou ko wohihiakunua la o ngofaka tomamake, ho naa ngohi tato kiani tonihidoaka ahi duduhunu o ngo Hagara la munangoo modadi ngoni fekata. Kiani ngona nomaidu de muna gea la marai ahi ngofa-ngofaka ahao ka idadi tamake munangino.” Hokogea ami higaro ami rokatika. De o Abaraama womihigihene ho ahao o ngo Sarai momingotaka o ngo Hagara unangika.

⁴ De o Abaraama womaidu de o ngo Hagara de hiadono muna ahao de ami badangoka. Masara ka de o ngo Hagara de ami badangoka de muna momahigiriiri mato, “Ngohi dika o ngofaka tomamake. Muna ko mamakeua!” Hokogea momihohedu o ngo Saraiika abe duru momihitipokouku.

⁵ De o ngo Sarai ami huha gea momahingahu ami rokatika mato, “Ma titi ngona ho abe naa ahi huha tamake. Muna gea ngohi tomihidoaka ngonaika de abeika, ka de muna de ami badangoka de mohidohata ngohino. De gea ma titi to ngona ani howono. Marai Ma Jou unangoo wato nako ngona de ngohi ma ka ngonahi de ani howonoka.” Hokogea o ngo Sarai ami howono midaparihi ami rokatika.

⁶ De o Abaraama womipaluhu wato, “Muna gea to ngona ani duduhunu ho to ngona ani giamoka. O kia dika nato itiai nodiai munangika, gea nodiai dika.” Ho o ngo Sarai duru momihikangela o ngo Hagarika hiadono ngo Hagara momatemo ami hiningaka mato, “Ngohi ko tapoaua ahi kangela naa ho koaho tomidogunoaika.” Ho gea ahao moara o ngo Hagara.

⁷ De moiki o tonaka ma kakaahaika hiadono mamake o akere abe ipooteke o tonakino. Abe ma dihira o nyawa yobaakino ho gea idadi hoka o humu. De ma akere gea duru ma ngekomo ma datekoka abe o nyawa yaniiki nako yoiki o Siurika. Ho muna naga o akere gea ma datekoka momahiainuku de naga Ma Jou o Yawe ai malaekata womatengo munangino woboa.

⁸ De womileha munangika wato, “O ngo Sarai ami gilaongo o ngo Hagara, ngona naa o kiaino noboa? De nato o kiaika noiki?” De muna mopaluhu mato, “Naa igoungu, ngohi toara, ahi dutu o ngo Sarai gea tomidogunoaika.”

⁹ De o malaekata gea Ma Jou ai demo munangika womidotaka ho wato, “Ngona kiani nolio munangika de o kia dika monihuloko nodiai gea nomihingounu.

¹⁰ De Ngohi todiai la to ngona ani totoforauku duru yowoe-woeuku hiadono ko idadiua o nyawa yaetongo manga ngoe.”

¹¹ De ahao Ma Jou o Yawe ai malaekata womihingahuohi wato, “Ngona naa igoungu de ani badangoka, De ahao nomagerewoto ani ngofaka o nauru. De una gea kiani nihiromanga o Isimaele, Angamoi Ma Jou o Yawe wonigihene ani kangela.

¹² De o Isimaele ahao una hoka o fuhuku ma kaho ai pea ma dogowini, Una gea ahao o nyawa mata-mataika duru walawana, De onangoo mata-mataika iwilawana unangika, De una ngaro ai gogianongoruika ma ko wadosanangiua mata-mataika, Hiadono womatingaka onangino de ko wogogerokaua onangoka.”

¹³ Hokogea Ma Jou o Yawe womihingahu o ngo Hagarika ma titi ami ngofaka o Isimaele. Ho muna motemo Ma Jouika mato, “Ngohi timakeoka Ma Jou. Abe Ngona Ma Jou abe nohilega ngohino! De ngaro ngohi tonimakeoka de ahi lako ma ka towangohi.”

¹⁴ De ami demo gea ma titi hiadono o akere ipooteke genangoka o nyawa ihiromanga o Beeri Lahai-Roi abe ma titi, “To Una Wowango-wango de Womalega ngohino ai humu.” De o akere gea naga o Kadese ma kapongo de o Berede ma kapongo ma hidogoronaka.

^15-16 De o Abaraama ai ngumuru adonoka ai taongo moritufange de butaanga ma oraha o ngo Hagara momagerewoto de wamake ai ngofaka o nauru. De ai ngofaka gea abe wamake o ngo Hagarino gea wihiromanga o Isimaele.