Dodadi 15 - Ma Jou ai Demo-demo o Totobelohoka

Ma Jou ai behehongo o Abaraamika ma titi ai totoforauku

¹ Mata-mata gea ipaha de ahao naga moi o himatoko Ma Jou o Yaweoka de aino abe wihimatoko o Abaraamika. De ai himatoko gea imaketero hoka duru yomarihimangino, de Ma Jou wihingahu wato, “Abaraama, ngaro o kia dika naga ma ufa nohawana, Ngaro naga ani musu ma Ngohi todadi ani dadatoko, De ani utumu o kiahonangino abe Ngohino ahao namake kohaamoko, Mangale ngona nosanangi nohiniiki Ngohi naa.”

^2-3 De o Abaraama wipaluhu Ma Jouika wato, “Ahi Baluhu, Ngona Ma Jou o Yawe abe mata-mataika naga ani kuahaka. Masara parahaja utuohi ma ngoe nohihidoakino abe ahi ngofaka ko iwa. Ho onagona ahao yapareta ahi kiahonanga ma oraha tohonengoka? Abe Ngona ahi Baluhu ko nohihidoakuahi ahi ngofaka idodutu ho marai o Eliesere, abe una o Damasiki ma kotaino de wohileleani ahi tau ma goronaka, marai una dika ahao wamake ahi kiahonanga ma oraha ngohi tohonenge ho mata-mata idadi to una dika ai oara.” Hokogea o Abaraama ai hininga ma huha womahingahu Ma Jouika.

⁴ De ahao Ma Jou o Yawe wopaluhu o Abaraamika, wato, “Ko o Elieserua abe ahao wamake ai oara ma amoko ngonaino ma oraha nohonenge masara womatengoli, abe to ngona ani ngofaka idodutu, ahao una dika wamake.”

⁵ Hokogea wihingahu o Abaraamika ipaha de ahao Ma Jou wihihupu ma hoanika de gea duru o futuoka. De ahao wihidumutu o Abaraamika wato, “Abaraama, abeika nomalega daku o dihangiye, o murumu gea kohangoe e? Sarakia, ngona ka napoa naetongo? De ahao to ngona ani totoforaukuoo hokogenangoli manga ngoe.” Hokogea Ma Jou wihibehehongo o Abaraamika.

⁶ Gea ai behehongo woihene de o Abaraama duru wingaku Ma Jouika. De ai ngongaku gea ma titi hiadono Ma Jou wato, “O Abaraama wotiai ahi himangoka.”

⁷ De Ma Jou ka wihingahuohi o Abaraamika wato, “Ngohi naa Ma Jou o Yawe abe tohiaturu la ma dihira o Uru-Kasidimi ma tonaka gea nanoaka de hiadono nomaturuuru nenangino o Kanani ma tonakino naa. Hokogea tohiaturu la o tonaka naa tonihidoaka ngonaika la idadi to ngona ani tonaka. De ani totoforaukuoo idadi to onangoo manga tonaka la duru nenangoka ahao onangoo yogogere.” Hokogea Ma Jou wihibehehongo o Abaraamika.

⁸ De o Abaraama wopaluhu Ma Jouika wato, “Masara ahi Baluhu, hokokia ka idadi ahao nodiai la duru tohioriki igoungu o Kanani ma tonaka naa idadioka to ngohi? Ngona Ma Jou o Yawe abe mata-mataika naga ani kuahaka. Masara abe Ngona kangano nohihingahu, gea ngohi ko tamakeuahi abe ihitunguu itaana ani behehongo ngohino gea ahao idadi.” Hokogea o Abaraama womahingahu.

⁹ Ho Ma Jou o Yawe wipaluhu unangika wato, “Abaraama, naa kiani nohidodiai la nodiai duru imaketero hoka Ngohi naa tonihuloko la o dodunguu moi todiai. De ma dodunguu gea hiadono duru nohioriki o tonaka naa tonihidoaka ngonaika hoka tonihibehehongokau. Ngona naleino ani aewani o dofo hange ma baluhu abe mata-mataika adonoka ma taongo ahohange ma ngumuru. De ani dofo hange gea kiani moi o hapi ma beka, moi o kabingi ma beka, de moi o domba ma nauru. De naleinoli o namodaara moi de o kuumu-kuumu moi ka ma goohi.” Hokogea Ma Jou wihuloko o Abaraamika.

¹⁰ Ho o aewani mata-mata gea o Abaraama waoino Ma Jouino de ahao Ma Jou ai hiaturu waniiki ho wakokitoma de amomoiika wakokipelaka la ma bela-belaka ma hohononga imaketero. Mata-mata wakokitoma de wapelaka ahohinootoka ibooto de ahao wohiliporetino o hapi ma belaka de hokogenangoli o kabingi ma belaka wohiliporetino. De ai domba ma belaka enangoo wohiliporetino abe watatorika de wohiagu-agurika la ma hidogoronaka naga ma hoana. De ma totaleo hinooto gea enangoo watoma masara ko wapelakua. De ahao o namodaara de o kuumu-kuumu gea enangoo wakelengauku abe enangoo watatorika o aewani ma bela-belakoka.

¹¹ De ahao naga o totaleo muruono naga iboa abe to ena ma inomo o aewani ma honenge. De o totaleo gea ikokitangi o aewani ma honenguku gea la aolomo masara o Abaraama wogoana, ho o totaleo mata-mata gea wakiniiki la iloara.

¹² De adonoka o wange ngade-ngade itumunu de o Abaraama duru iwikiookoka de ka itodokanino wamao hoka iwihidutufutukuholi. De gea wamao ma fufutu o fara moi hiadono ai hawana iboa abe duru ko wapoaua.

¹³ De ahao Ma Jou o Yawe wihitararono o Abaraamika wato, “Hokonaa todiai la ngona ka idadi nohioriki igoungu hokokia manga kangela ma amoko yamake ani totoforauku. Abe ona ahao yodadi o homoa ma nyawa o tonaka moiokali. De o nyawa abe yogogere genangoka ahao ani totoforauku gea yahidadi manga huhuloko abe yahitipokouku de yahikarajaanga de o karajaanga kohadubuho. De hokogea duru yahikangela manga taongo o ratuhu iata manga dekanino.

¹⁴ Masara ona genangoka ma nyawa ahao Ngohi tahohowono abe ma titi ka de ani totoforauku gea yahidadi manga huhuloko gea de yahowono Ngohino. Ho ona gea tahohowono ibooto de ahao ani totoforauku ka idadi yohupu o tonakino gea de manga kiahonanga duru kohangoe.

¹⁵ Masara ngona ma hirete o kangela hokogenangua namake, ngona ahao iniperekioka de ani hininga duru de ma dameoka ma oraha ani ngomaha itoaka. Ho to ngona ani wowango o duniaka ma dekanino de ahao adono ma oraha nohonenge de inilungunu.

¹⁶ Ho ani totofora yalape iatuku o tonakoka gea de ahao o Kanani ma tonakino naa yokokiboa ani totoforauku. De hokogea ma dekanino de ahao ona tahigogere nenangoka angamoi o Amori ma nyawa, abe ma oraha naa yogogere nenangoka, to ona manga howono Ngohino ko ilamokuahi. Ho Ngohi todamaa ka hiadono manga dualono ilamoko hiadono ko tomatongohonokaua de ahao totemo tato, ‘Ibooto!’ De ma oraha gea ona taturuuru abe ani totoforauku tahigogere o tonakoka naa.” Hokogea Ma Jou wihingahu o Abaraamika.

¹⁷ De ipaha o wange itumunoka de yofutuoka de ahao o Abaraama wamake iboaino o uku ma ngi hoka o haharongo. De ma ngi ma goronaka naga ma uku ho de ma nofoka. De daku ma ngi ma lokuino naga ma hapongo, de genangino o uku ma dokara ihupu hoka o oboro idadi. De o uku ma ngi gea ena dika ma hirete ahao itagi o aewani ma bela-belaka ma hidogoronaino.

¹⁸ De duru ma oraha gea Ma Jou o Yawe wihibehehongo o Abaraamika wato, “Hokonaa tohitunguu itaana igoungu ahi behehongo abe o tonaka naa tahidoaka ani totoforaukuika. De manga tonaka ma batingi moi o akere ma amoko doka o Mesiiri ma tonakoka, de ma batingi ma honongaka gea o akere duru ma amoko ma romanga o Efaraata ma akere.

^19-21 Abe ma oraha naa yogogerika o tonakoka gea o Keni ma nyawa, o Kenasa ma nyawa, o Kadomono ma nyawa, o Hete ma nyawa, o Ferisi ma nyawa, o Refaimi ma nyawa, o Amori ma nyawa, o Kanani ma nyawa, o Giragasi ma nyawa de o Yebusi ma nyawa. Ho naga ma oraha abe to ona gea manga tonaka ahao idadi to ngona ani totoforaukuoli to onangoli manga tonaka.” Hokogea Ma Jou wihibehehongo o Abaraamika.