Dodadi 14 - Ma Jou ai Demo-demo o Totobelohoka

O Kokoano yomaketeparangi

^1-2 De ahao naga o parangi o Kanani ma tonakoka. Naga o kokoano yaiata o homoaino abe yaparangi o kokoano yamotoaika abe manga kota-kota imanoa o tonaka ma dolaka abe genangoka o Loti wogogere. De ma kokoano o homoaino gea, manga romanga de manga tonaka eko manga gogere hokonaa: O Kedoro-Lomere una o koano o Elamoka, O Amapeele una o koano o Babeloka, O Arioko una o koano o Elasaroka, de o Tidala una o koano o Goyimoka. De o koano yamotoa abe yahikoano o nyawa abe yogogere o Yorodani ma dolaka, abe genangoka o Loti wogogere, to ona manga romanga de manga kota hokonaa: O Bera una o koano o Sodomoka, O Birisa una o koano o Gomoraka, O Sinaba una o koano o Adimaka, O Semebe una o koano o Seboimoka, De naga womatengoli una o koano o Bela ma kotaka abe ahao ihiromangoli o Soara ma kota.

^3-4 De ma dihira o Kedoro-Lomere de o kokoano utu ka unangohi ai kuaha ikurutiye ho hiadono o taongo ngimoi de hinooto ma dekanino o Kedoro-Lomere wapareta ona mata-mataika. De ngaro o nyawa utu to onangoo naga manga koano ma kiani o Kedoro-Lomere ka unangohi iwihigihene. Masara o kokoano yamotoa abe yogogere o Yorodani ma dolaka de manga kokawaaha, ona duru ko yoigokaua wahiparetahi o Kedoro-Lomere gea. Masara o koano yamotoa gea yomatongohono ngade-ngade o taongo moiino de ahao ona ato, “Ibooto hihigunoa wonapareta o Kedoro-Lomere gea!” Hokogea yomulaenge iwilawana. Ho o koano yamotoa gea abe manga kota-kota o Yorodani ma dolaka ahao manga tentara mata-mata yatoomuino yahiketehirimoi la ka idadi yomakuduhunu. Abe ona ato ma oraha o Kedoro-Lomere de ai tentara yoboa de ka idadi yaparangi onangika. De manga hininga la yaparangi o Sidimi ma dolaka abe naga o gahi ma datekoka abe ihiromanga o Gahi ma Honenge. De duru genangoka yadamaa o Kedoro-Lomere de ai tentara yoboa.

^5-6 Masara doka to ona manga tonakoka o koano o Kedoro-Lomere gea woihenoka abe ma titi iwioluku ho wahokino ai dodiawo o koano abe yomakokadateke. Ho ona yomatoomuino de wahigaro onangika wato, “Ahi dodiawo naa, abeika ona o Kananioka inaoluku. Ho kiani ngone naa nanga tentara mata-mata hatoomuino de hoiki haparangi hiadono o nyawa gea ko inalawanokaua.” Masara ona abe o Kedoro-Lomere iwioluku ngade-ngade adonoka o taongo moiino ma dekana de ahao o Kedoro-Lomere de ai dodiawo de manga tentara yomahidiai la yoiki yaparangi. Ho ona o koano yaiata yosoboka de manga tentara ato o koano yamotoa yaparangi. Masara manga tentara ma doomu ma amoko gea ko yomahiadonuahi o Kanani ma tonakika de o nyawa mata-mata abe yomakamake manga dodagi ma goronaka de gea onangikahi yaparangi. De ka ihikaika o Kedoro-Lomere de ai dodiawo yolaku. Ho yahikala o Refaimi ma nyawa abe yogogere o Asitorete-Kanaimi ma tonakoka, de ahao o Susimi ma nyawaoo yahikalali abe yogogere o Haama ma tonakoka. De ahao o Emimi ma nyawaoo yahikalali abe yogogere o Sawe-Kirataimi ma tonakoka, de ahao o Hori ma nyawaoo yahikalali mata-mataika abe ona yogogere o Seiri ma loku-lokuoka. Abe o Hori ma nyawa gea manga ngi o Ela-Paranoka abe o tonaka ma kakaaha ma datekoka.

⁷ Ka de o Kedoro-Lomere de ai tentara o Hori ma nyawa gea yahikokikala ibooto de ahao manga poretino yolio abe manga ngekomo ma marihapongoka aino de ahao yagila-gila o koano yamotoaika yoiki. Masara manga dodagioka naga o nyawa utuohi yaparangi. Abe ka de yomahiadono o Ene-Misipa ma tonakika de yahibinaaha o Amaleke ma nyawa abe yogogere genangoka. De ahao yogila-gila de o Amori ma nyawaoo abe yogogere o Hasesono-Tamara ma tonakoka onangoli yahibinaaha. Ka ihikaika o nyawa yaparangi ho o Kedoro-Lomere de ai dodiawo o koano yahange gea, ona manga taongo moi manga dekanino yotagi-tagi yopoparangi moduku. De ona ika-ika ahao yomahiadonika o Sidimi ma dolaka abe genangoka o Kananioka ma koano yamotoa ato o Kedoro-Lomere iwibuhukino la iwiparangi.

^8-9 Ho ka de yoihene o Kedoro-Lomere wotigioka de o koano yamotoa abe o Sodomino, de o Gomoraino, de o Adimaino, de o Seboimino, de o Belaino abe ihiromangoli o Soara ma kota, ona gea yokokiboa de manga tentara mata-mata. Ona mata-mata gea yokokiboaka o Sidimi ma dolaino de yomatatorika genangoka. Hokogea yomahidiai ato, “Naa nanga musu haparangi.” De o Kedoro-Lomere de ai dodiawo o koano yahange de to ona manga tentara onangoo yomahidiaioka yaparangi. Ho naa o koano yamotoa abe yahikoano o kota motoa o dolaka abe genangoka o Loti wogogere, ona yalawana o homoaino ma koano yaiata gea abe manga gogere o Elamoka, de o Goyimoka, de o Babeloka, de o Elasaroka.

¹⁰ De gea yomaketeparangi de marai o Kedoro-Lomere wolakuokali, de o Kanani ma nyawa yokala ho hiadono o Sodomo de o Gomora manga kokoano de manga tentara ato yoara o loku-lokuiye. Ma naa o Sidimi ma dolaka, abe genangoka yomaketeparangi, naga genangoka abe ihupu o tonakiye o aspala. De o aspala gea ihikokaika iguhu-guhu. De ma oraha o koano yamotoaino manga tentara yokokiloara de ko manga ngoe yaotaka o aspala ma guhuku gea. Masara abe ko yaotakua ona yoara yogila-gila hiadono o loku-lokuiye.

^11-12 De o Kedoro-Lomere de ai dodiawo o koano yahange de manga tentara yangohamika o Sodomo de o Gomora ma kota-kota ma goronaika la ona abe yahikalaka ka idadi manga kiahonanga yaora. Ho yangohamika de manga kiahonanga de manga inomo yomagoraka hiadono yamata-mataka. De naga o Sodomo ma nyawa utu yataoko. De o Loti, abe woama o Abaraamika, una de ona ai tauoka ka ma moi yataoko ho hiadono yaoka. De manga kiahonangoo ma yaoka abe ma oraha naa o Loti wogogere o Sodomo ma kota ma goronaka. Ho o homoaino ma koano yaiata gea ka de yahikala o Sodomo de o Gomora ma nyawa de manga kiahonanga yakokigorakoka, de manga nyawaoo manga ngoe yataokoka, de ahao yosobo.

^13-14 De ahao naga womatengo onangino abe woara o loku-lokuiye, de una wato woiki wihingahu o Abaraamika ma titi hokokia manga musu yoboa de yahikangela. O Abaraama una abe ahao iwihiromangoli o Ibarani ma nyawa, de naa una abe woa-oara gea woboa o Abaraamino. De ma titi o parangi gea wiade-ade o Abaraamika de wato, “De ani ngofaka o Loti unangoo iwiaoka!” De naa o Abaraama wogogerohi to Mamere ai gota ma ago-agomo ma datekoka. O Mamere una o Amori ma nyawa de ai ria-dodoto o Esekolo de o Anere. De o ria-dodoto yahange gea duru yomaketedodiawo de o Abaraama hiadono ona iwihingahu ato, “Ani dodiawo naa imihange misanangi miniduhunu nako naga ani musu hokogea inihikangela.” Ka de o Abaraama woihene o Loti iwitaokoka de wihuloko ai duduhunika wato, “O nau-nauru abe yomakokiboa to ngohi ahi tau ma doomuoka de ona gea abe hadotokokau la yososawaro yoparangi kiani nakokiahokino mata-mata. Ona yaratuhu hange de yangimoi de yatufange ho ona mata-mata gea nakokitoomuino. Naa ngone hoiki la ahi ngofaka o Loti hihihupu nanga musu manga giamino.” Ka de hokogea wotemo de ai duduhunu woikoka de manga dodiawo gea wakokitoomu. De ipaha ona mata-mata yomahidiai ibooto de ahao yosobo ato o Kedoro-Lomere de ai dodiawo yahiduru ka hiadono yadaene. Ho yoiki yahiduru hiadono o Daana ma tonakika.

¹⁵ Ka de yadaene genangoka de yofutuoka. De o Abaraama ai nyawa yaratuhu hange de yangimoi de yatufange waregu la naga manga doomu muruono naga. Waregu ibooto de ahao yahigiloliti o koano yamotoa gea de yakokingohama o futu-futuoka de yaparangi onangika hiadono manga musu gea yoara. Masara o Abaraama de ai dodiawo ka yaniikohi yaparangi hiadono o Damasiki ma kota yahitilakurika de yogila-gila hiadono o Hobaa ma kotaikali yadono.

¹⁶ De o Abaraama de ai dodiawo gea duru yolaku ho o Loti gea iwihihupuoka manga musu manga giamino ka ma moi de ai kiahonanga. De o nyawa utu abe ma dihira yatao-taokino onangoo yahikokihupuoka. Ho naga o Loti, de o ngo-ngofeka mata-mata abe yatao-taokino, de nagali o nyawa utuoli abe yatao-taokino onangoo yahikokihupuoka manga musu manga giamino. De manga musu manga kiahonanga abe yomagorakika ma oraha yaparangi de ena gea o Abaraama de to una ai nyawa yakokigorakoka de ihigilio manga tonakika.

^17-18 Hokogea o Abaraama wahikalaka o koano yaiata abe o Kedoro-Lomere de ai dodiawo gea. De ma oraha woboa ai tonakino o Abaraama de naga o koano yahinooto iwibuhuku. Yahinooto gea o Sodomo manga koano de o koano womatengoli, o Mekisedeke, abe una o Saleme ma kota manga koano. Ona o Abaraama iwibuhuku o tonaka ma dola moiino ma romanga o Sawe ma dola, abe ma romanga gea ma titi o Kokoano manga tonaka ma dola. De o Mekisedeke una o Salemoka manga koano de unangoo wileleani Ma Jou Wokokurutiye. Abe una gea o nyawa wahidemo Ma Jouika hiadono iwihiromanga manga hidemo Ma Jouiye. Ho o Mekisedeke woboa wibuhuku o Abaraama de waoino o roti de o angguru ma teongo la ka idadi wahiolomo de wahiokere o Abaraama de ona abe yomakutuono de una.

¹⁹ De ahao o Abaraama o Mekisedeke wigahoko Ma Jouika wato, “Ma Jou Nokokurutiye ngohi tigahoko o Abaraama naa la nihiowa, Ngona abe o Horoga de o dunia natulaada de togahoko la nihiowa.

²⁰ Ngomi naa mihiboa o higiriiri Ngonaiye, Mia Jou Nokokurutiye, Abe manga musu gea Ngona nihidoaka o Abaraama ai giamika.” Hokogea o Mekisedeke wigahoko ipaha de ahao o Abaraama wihidoaka o Mekisedekika o hidoku moi ma kiahonanga mata-mataino abe yale manga musuino. Ho nagahi o kiahonanga ma hou ilamoko abe o hidoku hiwohi.

²¹ De ahao o Sodomoka manga koano wotemo o Abaraamika wato, “Iti o nyawa mata-mata naa nahigilio ngohino de gea ma kiahonanga ma hou ngona dika nomahitongona mata-mata.” Hokogea wodiai la o nyawa utu ato bote una abe wihidadi o Abaraama wokaya.

²² Masara o Abaraama wipaluhu o Sodomoka manga koanoika wato, “Ngohi naa kanganoinohi tihibehehongokau ahi Baluhu o Yaweika, Una Ma Jou Wokokurutiye, Una abe o Horoga de o dunia wotulaada, gea Unangika ahi giama tagorakiyeoka la tohitunguu ahi behehongo ma gou-goungu naa.

²³ Ngohi tihibehehongoka tato, ‘Ahi Jou, ngaro o dobiki moioo ma kiahonangino naa ma ko todafongua o Sodomoka manga koanoino. Ngaro ma eteteke abe ko kia-kiaua adaene ma ngohi ko tomagorakua done o nyawa utu ahao yoade-ade ato ko Ma Jouinoua hiadono o Abaraama wokaya masara o Sodomoka manga koanoino ai hidoaka la hiadono o Abaraama wokaya.’

²⁴ Hokogea ahi behehongo ma demo Ma Jou o Yaweika ho, tarimakase o Sodomo ma Koano, masara abe ngohi todafongo ngonaino gea ma inomo dika abe ahi nyawa yaolomokau. De togahoko la ahi dodiawo yahange abe ihiniiki de ihiduhunu, abe o Mamere, o Eskolo, de o Anere, iti ona naa tagahoko la nahikodoku itiai onangika ma kiahonangino naa.” Hokogea o Abaraama ai demo o Sodomo manga koanoika.