Dodadi 13 - Ma Jou ai Demo-demo o Totobelohoka

O Abaraama de o Loti yomakitingaka

¹ Ho o Abaraama o Mesiiri ma tonaka wanoaka de wolio doka o Negebe ma tonakika, una de ngoi fekata de o Loti de to ona manga nyawa de manga kiahonanga mata-mata yaoka.

² De ma oraha naa o Abaraama duru wodadiokau o kaya ma nyawa, abe to una ai domba, de ai kabingi, de ai unta, de ai hapi duru ma ngoe, de nagaoo ai gurasi de ai haaka.

^3-4 De ipahaino o Negebe ma tonaka yanoaka ho yosobo yoiki yotulu-tulu moduku hiadono yoboa o Betelino. De genangoka yolio manga dingiika abe naga o Betele ma kota de o Ai ma kota ma hidogoronaka. Abe genangoka ma dihira o Abaraama wogogere de manga huhuba ma ngi wodiai. De genangoka o Abaraama womahubali Ma Jou o Yaweiye.

⁵ De naa o Loti, abe ka ihikaika winiiki ai ama o Abaraama, unangoo naga to una ai domba, de ai kabingi, de ai unta, de ai hapi ma ngoe hiadono de ma duduonoka. De to unangoo ai nyawa naga manga tau ma ngoe o ngoerino.

⁶ Masara angamoi o Loti de o Abaraama manga aewani o dofo duru kohangoe ho o ruruubu, abe manga aewani ma inomo, ko imakegetongua nako ka ihikaika yomakiniiki.

⁷ De gea ma titi hiadono idadi o Abaraama ai aewani ma duduono ma gogoana de o Loti ai aewani ma duduono ma gogoana yomakangamo. De o gangamo gea mangale yokadatoro manga aewani ma inomo. De o tonakoka gea naga o nyawa yogogerikaka abe ona utu o Kanani ma nyawa de utu o Ferisi ma nyawa.

⁸ De o Abaraama wotemo o Lotika wato, “Mia ngofaka, ani baba de ngohi, ngomi o ria-dodoto ma dutu ho ufa hiadono homakangamo, ngohi de ngona. De ahi nyawa de to ngona ani nyawa abe yogoa-goana nanga aewani ma duduono, ufa hiadono yomakangamo.

⁹ Abeika o tonaka naa ma amoko nanga himangoka, sarakia, ko inawedonua? Koua, ka inawedono masara irahai ngona nomangiriki dika o tonaka abe ka enangohi noigo. De nako ngona nomadumutu ma tonaka o gubadioka, to ngohi tale o tonaka o nirakoka. Masara nako to ngona nomadumutu o nirakoka, to ngohi o gubadioka.” Hokogea o Abaraama wihidumutu o Lotika.

¹⁰ De ma oraha gea ona naga o lokuoka yomaokoino, ho o Loti wolega-lega o Yorodani ma tonaka ma dola mata-mataika, ka hiadono Soara ma kotaika. De ma dola gea wamake duru irahai abe naga o akere de ma ngairi ma ngoe imaketero hoka ma dodihiraka naga Ma Jou o Yawe ai redioka. Ngade-ngade o tonaka gea ma rahai imaketero hoka hamake o Mesiiroka. De ka irahaiohi o tonaka gea angamoi Ma Jou o Yawe ko wohibinaahauahi o kota hinooto genangoka ma romanga o Sodomo de o Gomora.

¹¹ Ho o Loti womalegaika abe ma tonakika gea de ma gutufuroka ho gea ena womangiriki. De una wato, “Ama, nako hokogea ani hininga ngohioo tosanangi la ngomi mimaturuuru daena o tonaka ma dolauku.” Ho o Loti de ai nyawa de ai duduono mata-mata yosobo o wange ma hiwaroko ho naa o Loti de o Abaraama yomakitingakoka.

¹² Abe o Abaraama wogogere o Kanani ma tonaka ma gupakahi, masara o Loti wogogere o kota-kota ma hidogoronaka abe naga o Yorodani ma dolaka. De naga o kota moi ma romanga o Sodomo de duru o kota gea ma datekoka, o Loti de ai nyawa genangoka ihigoko manga tau o ngoerino.

¹³ De o nyawa abe yogogere o Sodomo ma kotaka gea, duru itagi manga hafini o dorouika dika ho duru yotobadiai o howono Ma Jou o Yawe ai himangoka.

¹⁴ De gea o Loti wopahaka abe womatingakoka ai amaino, de ahao Ma Jou o Yawe wihidumutu o Abaraamika wato, “Abaraama, abeika o tonaka ma amoko naa, nomalega arihonongaika abe o wange ma hiwaroko de o wange ma dumuniha nomalega, de o koremiyeuku de o koleharaiye nomalega.

¹⁵ O tonaka mata-mataika abe namake naa ahao Ngohi tonihidoaka ngonaika, de ani totoforaukuikaoo tahidoaka ho hiadono ona ahao yogogere manga tonakoka naa ka hiado-adonika.

¹⁶ De to ngona ani totoforauku tahidadi la yolape-lapeuku hiadono duru ko manga ngoe-ngoeuku. Abe hiadono ona hoka o tonaka ma kafo manga ngoe, ho ko moiua yapoa yaetongo ani totoforauku manga ngoe.

¹⁷ Ho, hokonaa tonihibehehongo de idadioka ani tonaka mata-mataika, ho ngaro ma oraha naa o tonaka ma amokika nakilolitoka nogogere ma ka idadi, angamoi Ngohi tonihidoakoka ngonaika.” Hokogea Ma Jou wihibehehongo o Abaraamika.

¹⁸ Ho gea o Abaraama ai tau mata-mata wakiliangoli de woikoli hiadono o Heborono ma tonakika, de naga genangoka o ngi moioka o gota abe ma ago-agomo. De o gota gea de ma dutuoka de ma dutu gea ai romanga o Mamere, ho ma ngioo ihitoomuika ma dutuika ai romangika ho ma ngi gea ma romanga o Mamere. De o Abaraama wato una de ai nyawa yogogere o Mameroka gea ho ona ihigokokali manga tau o ngoerino mata-mataika. De genangokali o Abaraama wodiai manga huhuba ma ngi la ka idadi o aewani yaleino la yomahihuba Ma Jou o Yaweiye.