Dodadi 12 - Ma Jou ai Demo-demo o Totobelohoka

Ma Jou wihibehehongo o Abaraamika

¹ De Ma Jou o Yawe wihibehehongokau o Abaraamika wato, “Abaraama ngona naa kiani ani baba ai tauoka nohupuoka de ani gogianongoru utu onangoo nakokinoaika. De ani tonakoo nanoaika de noiki o tonaka utuikali o kiaka ahao tonihidumutu ngonaika.

² Ngohi ahao tonihidadi la ngona o nyawa manga ngoe manga dutu, Ho ani totoforauku duru yowoe-woeuku, De tonihidoaka ma owa ngonaika. Todiai la o nyawa manga ngoe inihioriki de inihigiriiri, De ngonaino o nyawa utu ahao yamake ma owa.

³ De nako naga o nyawa iniao irahai, De ahao Ngohioli tahiowa onangika, De nako naga o nyawa utu iniao itorou, De ahao Ngohi onangika tahikangela. De mangale ma titi Ngohi tonihiowa ngonaika hiadono o nyawa utu ma owa yakokimake Ngohino o dunia ma amokika, Abe ngaro o kiaka dika manga dutu yogogere, De ma owa gea yamake.”

⁴ De angamoi o Abaraama wihigihene Ma Jou o Yawe ai behehongika gea ho wosobo. De o Loti, abe una o Abaraama ai dodoto o Harana ai ngofaka, unangoo ai ama winiikoka. De ma oraha manga ngi yanoaika abe ma romanga ihitoomuika de ai dodoto o Harana ai romangika, de o Abaraama ai ngumuru adonoka ai taongo moritumidi de motoa.

⁵ De woiki o Kanani ma tonakika de womiao ngoi fekata o ngo Sarai de o Loti gea. De ona o tau hinooto gea manga kiahonanga mata-mata yaoka, de nagali manga nyawa abe yaoka. Abe ma dihirainohi de naga o Haranoka ma nyawa utu abe o Abaraama de o Loti yahidadi manga duduhunu de manga huhuloko ma oraha yogogerohi genangoka, ho naa onangoo yaoka. De gea yokokiloiki de ika-ika yomahiadonika o Kanani ma tonakoka.

⁶ De ma oraha gea nagau o Kanani ma nyawa yogogere genangoka. O Abaraama de ona abe yomakutuono de una yomahiadonino o Kanani ma tonakino masara ona ka yogila-gila yowohama ho ka yotagi-tagiohi hiadono yoboa o Sikeme ma kapongo ma datekino. Abe genangoka naga o gota moi duru ma amoko de ma ngi gea ihiromanga o More, de yomahidodogumikahi o Moreoka.

⁷ De genangoka Ma Jou o Yawe womahimatoko o Abaraamika de ma moioli wihibehehongo unangika wato, “Abaraama, o Kanani ma tonaka abe ngona naa naga nenangoka ahao tahidoaka to ngona ani totoforaukuika.” Hokogea Ma Jou wihibehehongo, ho o Abaraama manga huhuba ma ngi wodiai la ka idadi o aewani yomahihuba Ma Jou o Yaweika, angamoi Una womahimatoko o Abaraamika genangoka o Sikeme ma kapongo ma datekoka.

⁸ De ma oraha o Sikemoka yosobo de o Abaraama de ai dodiawo mata-mata yoikoli manga dumutu o loku-lokuika abe naga o Betele ma kota ma honongaka o wange ma botokaiha. De yotuluikahi ho genangokali to ona manga tau o ngoerino ihigokoiyeoli. De ma ngi gea o Betele ma kota de o Ai ma kota ma hidogoronaka abe o Betele naga ma honongaka o wange ma dumuniha de o Ai ma kota naga ma honongaka o wange ma botokaiha. De manga huhuba ma ngi moioli genangoka o Abaraama wodiai Ma Jou o Yaweika la ka idadi manga aewani yomahihuba Unangiye. De o Abaraama duru ai hininga ka ihikaika womahuba Ma Jou o Yaweika.

⁹ De ma oraha yosoboli de o Abaraama ai dumutu o Negebe ma tonakika.

O Abaraama woiki o Mesiiri ma tonakika de wolioli ai behehongo ma ngiika

¹⁰ De gea yogogere o Negebe ma tonakoka, ma, ipaha naga o hiwara ma dekanino hiadono o hafini idadi o Negebe ma tonakoka. Ho o Abaraama womaputuhu wato yoiki doka o Mesiiri ma tonakika la ka idadi yogogere jai-jai genangoka angamoi o hafini duru kohagiria.

¹¹ Ngade-ngade yomahiadono o Mesiiri ma tonakika de o Abaraama womihingahu ngoi fekatika wato, “O ngo Sarai, tohioriki o nyawa mata-mata inihigiriiri ma titi ani hailoa angamoi ngona duru norahai.

¹² De ngohi tohawana abe ka de o Mesiiri ma nyawa inimake de duru inihafini ma titi nohailoaholi. Masara angamoi yato bote ngona to ngohi ngohi fekata ho ahao ona ihitoma ngohi masara ngona inihigunoa nowango la ka idadi inile.

¹³ Ho ngona nahingahu onangika nato, ‘O Abaraama, una ahi iranga.’ Hokogea notemo onangika la gea ahao ngohi ko ihitomaua masara ihiao irahai dika la ato inisanangi ngonaika.” Hokogea o Abaraama ai hininga womidotoko ngoi fekatika.

¹⁴ De duru hokogea ahao idadi, abe ka de yomahiadonoka o Mesiiri ma tonakika de naga o Mesiiri ma nyawa o ngo Sarai ka de imimake de ato, “Abeika, muna gea ami rahai!”

¹⁵ De naga iwitutumu o Abaraama o Mesiiri ma nyawa yamuruono naga abe manga koano iwitobaduhunu una abe iwihiromangoli o Firaunu. Ho o koano ai nyawa gea yaino de onangoo o ngo Sarai imimake de imihigiriiri ami hailoa. De ahao ona iwihingahu o Firaunika ato, “Naga momatengo o ngofeka o homoaino duru morahai.” Ho ahao o koano gea wahuloko ai huhulokika wato, “Nako gea niloiki nimile la ngohioli tomimake abe nako niagoungu muna morahai eko koua. De nako ngohi tomiigo de ahao tomihidadi ngohi fekata.” Ho ona ahao yoboa o Abaraamino de iwioraka abe o ngo Sarai imiao o Firaunu ai tauika de igoungu o koano gea womihidadi ngoi fekata.

¹⁶ De angamoi o Firaunu gea wofikiri o Abaraama wodadioka ai geri ho woigo wiao irahai ho naga ai hidoaka ilamoko o Abaraamika. Abe wahuloko ai huhulokika yamuruono naga o ngo-ngofeka de o nau-nauru wato, “Ngini naa ngohioka ibooto nikarajaanga la ahi geriokali nikarajaanga.” De naga ai hidoaka utuohi o Abaraamika o aewani ma ngoe ma beka de ma nauru abe naga o domba, o hapi, o keledai de o unta ma ngoe. De hokogea o Firaunu wihidoaka mata-mata gea o Abaraamika la unangoli ma aewani gea wapaliara.

¹⁷ Masara gea o Firaunu wahowono Ma Jou o Yaweikaoo ho duru ko wosanangiua Ma Jou abe ma titi o koano gea womile o Abaraama ngoi fekata. Ho ma titi gea hiadono Ma Jou wihipoha o Firaunika de o panyake muruono naga abe duru itorou. De gea hiadono ona mata-mataika abe yomahidogogere moi o Firaunu ai tau ma goronaka, onangoo yokokipanyake hoka unangoli iwidaene.

¹⁸ Ho ahao o Firaunu womamao de wohioriki manga panyake ma ngoe ma titi marai o ngo Sarai gea to Abaraama ngoi fekata. Ho o Firaunu o Abaraama wibehehongo abe ai nyawa wahidingoto la iwiaoino. De ma oraha o Abaraama woboa o Firaunu ai himangino de o Firaunu wahiaturoka la o ngo Sarai munangoo naga genangoka. De o Firaunu wileha o Abaraamika wato, “Done sarakia ngohino nohibudi hokonaa? Adodoa ho ko nohihingahua muna naa ngoni fekata?

¹⁹ Ngona nato muna naa ngoni firanga. Adodoa ho nohihingahu hokogea? Ma titi ani demo gea hiadono tomile tato tomihidadi ngohi fekata. Ho ibooto, ko idadiokaua nogogere ahi tonakoka. Naa muna tomihigilio ho nomiaoka.

²⁰ Naga ahi nyawa naa ka idadi iningotaka ahi tonaka ma batingika.” Hokogea o Firaunu ai demo o Abaraamika. Ho o Firaunu ai duduhunu ma nyawa o Abaraama iwihihupu ka ma moi de ngoi fekata, de ai nyawa, de ai aewani ma duduono, de ai kiahonanga mata-mata, ho ka ma moi yahihupu o Mesiiri ma tonakino.