Dodadi 11 - Ma Jou ai Demo-demo o Totobelohoka

O Babele ma nyawa ihigoko manga tau kohagurutiye

¹ De ma dodihirainohi gea o dunia ma nyawa mata-mataika manga demo ka moi abe manga demo ka imakokadaenohi ma titi.

² De ka de o nyawa yofaa-faatuku de ka ihikaika yomatoturuuru o wange ma botokaiha hidutu yomahiadono o Sineara ma tonakoka. De genangoka yamake o tonaka ma dola ma amoko, ho yokokigogere ma dolaka gea.

³ De yomulaenge yomakoketemo ato, “Nako nanga tau ngaro ufa o hakaru hapake, ka idadi haleino o tonaka ma tau-taulu abe naga naangoka de hohisapuru o akere de ahao haharongo hiadono itogowini la gea naga idadi o tela. De nanga tau mata-mataika hodiai nanga telaino. De gea ka idadi nanga tela hohiketehitataulika de o aspala abe enangoo naga nenangoka.”

⁴ Hokogea manga hidee de hokogea yodiai. De ahao yomakoketemoli ato, “Abeika, koaho howoe homatoomuino de nanga tau homadiai hiadono nanga kota idadi. De irahai moi ma tau hodiai duru kohagurutiye hiadono imahitigi-tigiye o dihangiye. Abe nako hokogea homadiai de ka ihikaika o nyawa mata-mataika inahioriki hiadono inahigiriiri ma titi nanga tau gea abe kohagurutiye! De ngone gea ahao duru homaketerimoi abe homatoomuino dika la ufa hiadono ngone homahikokabarihika o dunia ma amokika.”

^5-6 De Ma Jou o Yawe womatemo wato, “Kiani tagutiohi dau o duniauku la talega ona abe yokarajaanga naa. Ona naa yodiai manga kota de manga tau ma gurutiye kiani tamakeohi. Abeika, ona naa duru yodadi o doomu moioka dika de mata-mataika manga demo ka moi. De naa duru ihititi ma rupa ma ngoe abe ahao ato yodiai. Ho ko itedekanokaua de ngaro o kia dika onangoka ato yodiai, ma gea ka yodiai dika angamoi to ona manga demo ka moi dika.”

⁷ De Ma Jou ka womatemohi wato, “Ho naa koaho Ngone haguti onanguku la manga demo hohikapusakoka la imakokohowonoka. Hokogea hodiai la manga demo idadi o demo ma ngoe imaketemomomoi, la ngaro yomakoketemo ma ko yomaketemangaratiiokaua.” Hokogea Ma Jou wotemo.

⁸ Ho Ma Jou o Yawe wouti de wohikokohowonoka to ona manga demoika hiadono wohidadi manga demo ma ngoe. Hokogea ona genangoka wahikokabarihika mata-mataika o duniaka. De angamoi ona yomaketeliliara hiadono yomatogumoka yodiai manga kota gea.

⁹ Gea ho hiadono manga kota gea ihiromanga o Babele, mangale genangino Ma Jou o Yawe o nyawa manga demo wohikokohowonoka hiadono manga demo kohangoe. De angamoi manga demo imaketemomoioka ho genangino ma titi hiadono ona gea Ma Jou o Yawe wahiaturu la hiadono wahikabarihi o dunia ma amokika.

O Seeme ai totoforauku hiadono o Abaraamuku

¹⁰ Naa o Seeme de ai totoforauku manga ade-ade abe ma titi hokokia yolape-lapeuku. O nguihi ma amoko ipahaka ma dekanino o taongo hinootoino de o Seeme ai ngumuru adonoka ai taongo o ratuhu moi. De ahao wamake ai ngofaka o Apa-kasada.

¹¹ De o Apa-kasada womaboaka de ai baba o Seeme gea ka wowangohi ai taongo o ratuhu motoahi, de nagali to una ai ngofa-ngofaka utuoli o nau-nauru de o ngo-ngofeka.

¹² De o Apa-kasada wowango ai taongo moruange de motoa ai dekana de ahao wamake ai ngofaka o Sela.

¹³ De o Sela womaboaka de ai baba o Apa-kasada gea ka wowangohi ai taongo o ratuhu iata de hangeohi, de nagali to una ai ngofa-ngofaka utuoli o nau-nauru de o ngo-ngofeka.

¹⁴ De o Sela wowango ai taongo moruange ai dekana de ahao wamake ai ngofaka o Ebere.

¹⁵ De o Ebere womaboaka de ai baba o Sela gea ka wowangohi ai taongo o ratuhu iata de hangeohi, de nagali to una ai ngofa-ngofaka utuoli o nau-nauru de o ngo-ngofeka.

¹⁶ De o Ebere wowango ai taongo moruange de iata ai dekana de ahao wamake ai ngofaka o Pelege.

¹⁷ De o Pelege womaboaka de ai baba o Ebere gea ka wowangohi ai taongo o ratuhu iata de moruangeohi, de nagali to una ai ngofa-ngofaka utuoli o nau-nauru de o ngo-ngofeka.

¹⁸ De o Pelege wowango ai taongo moruange ai dekana de ahao wamake ai ngofaka o Reu.

¹⁹ De o Reu womaboaka de ai baba o Pelege gea ka wowangohi ai taongo o ratuhu hinooto de hiwohi, de nagali to una ai ngofa-ngofaka utuoli o nau-nauru de o ngo-ngofeka.

²⁰ De o Reu wowango ai taongo moruange de hinooto ai dekana de ahao wamake ai ngofaka o Serugu.

²¹ De o Serugu womaboaka de ai baba o Reu gea ka wowangohi ai taongo o ratuhu hinooto de tumidohi, de nagali to una ai ngofa-ngofaka utuoli o nau-nauru de o ngo-ngofeka.

²² De o Serugu wowango ai taongo moruange ai dekana de ahao wamake ai ngofaka o Nahoro.

²³ De o Nahoro womaboaka de ai baba o Serugu gea ka wowangohi ai taongo o ratuhu hinootohi, de nagali to una ai ngofa-ngofaka utuoli o nau-nauru de o ngo-ngofeka.

²⁴ De o Nahoro wowango ai taongo monaoko de hiwo ai dekana de ahao wamake ai ngofaka o Tera.

²⁵ De o Tera womaboaka de ai baba o Nahoro gea ka wowangohi ai taongo o ratuhu moi de ngimoi de hiwohi, de nagali to una ai ngofa-ngofaka utuoli o nau-nauru de o ngo-ngofeka.

²⁶ De o Tera wowango ai taongo moritumidi ai dekana de ahao wamake ai ngofaka o Abaraama, de ahao wamake ai ngofaka womatengoli o Nahoro abe wihitoomuika ai eteika, de ahao ai ngofaka womatengoli o Harana.

O Abaraama ai tofora

²⁷ Naa o Tera de ai totoforauku manga ade-ade: o Tera ai ngofaka o nauru yahange, ona gea manga romanga o Abaraama, o Nahoro, de o Harana. De ahao o Harana to una ai ngofaka naga yahange. Abe ai ngofaka yaruangeino gea de o nauru ka womatengo dika de ai romanga o Loti.

^28-30 De ai ngofaka o ngofeka yahinooto manga romanga o ngo Milika de o ngo Isika. De yomakokiboa manga kapongoka abe ma romanga o Uru-Kasidimi. De o Tera una ko wohonenguahi de ai ngofaka o Harana gea una wohira wohonenge. Abe ona o Uru-Kasidimokahi yogogere de o Harana wohonengoka. De o Abaraama de ai dodoto o Nahoro ona yoboriilakoka, de o Abaraama to una ngoi fekata ami romanga o ngo Sarai. Masara o ngo Sarai ko idadiua modami ho ami ngofaka ko iwa. De o Nahoro ngoi fekata ami romanga o ngo Milika, muna gea to Harana ngoi ora.

³¹ De o Tera ai kapongo o Uru-Kasidimi gea wanoa de wato woiki o Kanani ma tonakika. De wiao ai ngofaka o Abaraama de to una ngoi fekata o ngo Sarai, de wiaooli ai danongo o Loti, to Harana ai ngofaka, ho ona gea yoiki yomakokiniiki. Masara yomahiadonika ma tonakoka abe ahao ihiromanga o Harana de ka genangokahi yogogere. De ko yogila-gilauahi o Kanani ma tonakika, ho o Harana ma tonakokahi yogogere.

³² De genangoka o Tera wohonenge, abe ai ngumuru ai taongo o ratuhu hinooto de motoa adonoka de wohonenge o Harana ma tonakoka gea.