Dodadi 1 - Ma Jou ai Demo-demo o Totobelohoka

Ma Jou ai ade-ade abe hokokia wotulaada O wange ma dodihiraka wotulaada o dawange

¹ Duru ma dodihiraka Ma Jou womulaenge wotulaada o dunia de o dihanga mata-mataika.

² De o dunia ena gea ihira ko iwahi ma rupa, abe hoka ma oraha naa, de ko iwahi ma kiahonanga abe hoka ma oraha naa iwangoiye o dunia ma lokuoka. De mata-mataika ka o akere ma ngootohi abe ka ikapusakohi. De ma ngooto gea atamunokahi de o fufutuohi hiadono mata-mataika duru ka ihidofufutuokahi. Masara Ma Jou ai Womaha de ai kuahaka naga womawooto o akere ma ngooto ma lokuino gea.

³ De Ma Jou womatemo wato, “Ngohi toigo la o dawange naga.” Ka de wotemo hokogea de idadioka o dawange.

⁴ De ma dawange gea Ma Jou wamake duru irahai de wosanangi enangika. De wohiaturu la o dawange naga de ma oraha, de ma fufutuoo enangoo de ma oraholi ho hokogea wohikatingaka o fufutu de o dawange.

⁵ De abe ma titi ma dawange gea Una wato, “Naa tohiromanga o wange-wange de ma fufutu gea tohiromanga o futu-futu.” Hokogenangohi aika wotulaada ho naga o futu de ahao iboa o dawange de gea duru o wange ma dodihiraka.

O wange ma hinooto: o dihanga wotulaada

^6-7 De ahao Ma Jou womatemoli wato, “Ngohi toigo la o akere ma ngooto naa idadioka o regu hinooto abe imakitingaka la ma hidogoronaka naga ma hoana.” Hokogea Ma Jou waregu la o ngooto ma akere ma regu moi atumungu daku ma hoana ma lokuiye de ma akere ma regu moioli gea dau ma hoana ma timiuku. Hokogea wotemo de hokogea idadi.

⁸ De abe ma hoana daku Ma Jou wato, “Naa tohiromanga o dihanga.” Hokogenangohi aika wotulaada ho ahao naga o futu de ahao iboali o dawange de gea o wange ma hinooto ipahaika.

O wange ma hange: Mata-mata abe o tonakino iwangoiye wotulaada

⁹ De ahao o wange ma hangeokali Ma Jou womatemoli wato, “Ngohi toigo la o dihanga ma timiuku o ngooto ma akere gea kiani ihahuru o doomu moiika dika, la o tonaka ma dudungu naga.” Hokogea wotemo de hokogea idadi.

¹⁰ Ka de o akere iowahoka de ahao o tonaka ma dudungu naga de Ma Jou wato, “Naa tohiromanga o dunia ma tonaka de ma ngooto abe itoomuinoka gea tohiromanga o gahi.” De mata-mata gea Ma Jou wamake duru irahai de wosanangi enangika.

¹¹ De ahao Ma Jou womatemoli wato, “Ngohi toigo la iwangoiye o tonakino irupa-rupa abe naga ma hoka de enangoo de ma hofokoka. Ho iwangoiye o tonakino o joro, de o lubengana, de o gota irupa-rupa, de enangoo ikokihofoko abe de ma muioka la ka idadi iwangoiyeoli de ma rupa imakadaene hoka ma ayoli.” Hokogea Ma Jou wotemo de hokogea idadi.

¹² Ho gea naga o tonakino iwangoiye ma rupa ma ngoe hoka o pine abe de ma hofokoka de nagali o joro, de o lubengana, de o gota irupa-rupa. De ena gea mata-mataika naga ma hofoko de ma muioka la ka idadi iwangoiyeoli de ma rupa imakadaene hoka ma ayoli. De mata-mata gea Ma Jou wamake duru irahai de wosanangi enangika.

¹³ Hokogenangohi aika wotulaada ho ahao naga o futu de ahao iboali o dawange de gea o wange ma hange ipahaika.

O wange ma iata: Ma Jou wotulaada mata-mata abe de ma dararonoka o dihangoka

^14-15 De ahao o wange ma iatokali Ma Jou womatemoli wato, “Ngohi toigo la naga ma kiahonanga igogere daku o dihangoka abe ihitararonuku o duniauku la ihikatingaka o fufutu de ma dawange, de ena gea ihiaturu o wange de o taongo abe to ena ma hoana ma dekana. De gea ena o dihangoka ahao ihitunguu o popariamiye, de mata-mata abe de ma orahoka abe ena gea o dihangoka ihitunguu ma gahe. De Ngohi toigo la ena gea ihitararonuku o duniauku la ngaro o wange-wangeoka eko o futu-futuoka ma naga ma dararono.” Hokogea Ma Jou wotemo de hokogea idadi.

¹⁶ Ho gea Ma Jou wohidadi o wange de o mede de ka o wangeohi ilamoko ho ena gea ihitotararono o wange-wangeoka. De o mede ena gea hatoli ieteteke, de ena gea ihitotararono o futu-futuoka, de nagali Ma Jou wohidadi o muru-murumoli.

¹⁷ De mata-mataika ma kiahonanga abe o dihangoka gea ihitotararono o duniauku.

¹⁸ Hokogea Ma Jou wotulaada ena abe de ma dararonoka la ihikaaturu o wange-wange de o futu-futu. De wohidadi la hiadono o wange ihitotararono ma wange-wangeoka, de o medeoli ihitotararono o futu-futuoka la ihikatingaka o futu de o wange. De mata-mata gea Ma Jou wamake duru irahai de wosanangi enangika.

¹⁹ Hokogenangohi aika wotulaada ho ahao naga o futu de ahao iboali o dawange de gea o wange ma iata ipahaika.

O wange ma motoa: Ma Jou wotulaada o nawoko de o totaleo

²⁰ De ahao o wange ma motoakali Ma Jou womatemoli wato, “Ngohi toigo la naga iwango o akeroka de o gahioka ena de ma rupa ma ngoe la igogere genangoka. De toigo la naga o totaleo ma rupa ma ngoe ihoo-hoho daku o dunia ma lokuino.”

²¹ Hokogea Ma Jou wotulaada mata-mata abe iwango o akeroka de o gahioka hiadono naga o aewani ma ago-agomo, de o nawoko ma rupa ma ngoe, de nagali iwango ma hohumuduru enangoo abe ma rupa ma ngoe. De wotulaadali o totaleo enangoo ma rupa imaketemomoi. De mata-mata gea Ma Jou wamake duru irahai de wosanangi enangika.

²² Ho ai dulaadaika gea Ma Jou wohiowa wato, “Ngohi naa toigo la ngini abe niwango o akeroka de o gahioka nifaa-faatuku la nidogo-dogo nia ngoe. De nginioo o totaleo toigo la nifaa-faatuku hiadono ko nia ngoe nihoo-hoho o dunia ma lokuino.”

²³ Hokogenangohi aika wotulaada ho ahao naga o futu de ahao iboali o dawange de gea o wange ma motoa ipahaika.

O wange ma butaanga: Ma Jou wotulaada o aewani de o nyawa

²⁴ De ahao o wange ma butaangakali Ma Jou womatemoli wato, “Ngohi toigo la naga iwango o dunia ma tonakoka o aewani irupa-rupa abe o dofo, de o fuhuku, de abe imalia-liara o tonakoka, la hiadono naga o aewani ma ago-agomo de ma hohumuduru.” Hokogea Ma Jou wotemo de hokogea idadi.

²⁵ Ho o aewani mata-mata abe Ma Jou wotulaada la iwango o duniaka naga imakokohowono abe o dofo, de o fuhuku, de abe imalia-liara o tonakoka. De mata-mata gea Ma Jou wamake duru irahai de wosanangi enangika.

²⁶ De Ma Jou wotemoli o wange ma butaanga gea wato, “Naa, Ngone hodiai o nyawa, de hahidadi la ona ngade-ngade hoka Ngoneoli. De ona ahao de manga kuahaka hiadono ka idadi yapareta o dunia ma aewani mata-mataika. Ho ngaro o nawoko mata-mata de o kia dika de ma womahoka o akeroka de o gahioka ma ka idadi yapareta. De o dunia ma amokika o totaleo de o aewani mata-mataika o nyawa manga kuahaka, ho ngaro o dofo eko o fuhuku, de ngaro ma ago-agomo eko ma hohumuduru, masara, mata-mataika o nyawa manga kuahaka.”

²⁷ Hokogea ma titi Ma Jou watulaada o nyawa la ona ngade-ngade hoka Unangoli, de ona gea watulaada moi o nauru de moi o ngofeka.

²⁸ De ona gea wahiowa wato, “Ngohi toigo la ngini ningofa-ngofakuku de nidano-danonguku la duru ko nia ngoe nigogere o dunia ma amokika la o dunia de ma dola mata-mataika niapareta. Ho o nawoko o gahioka de o akeroka, de o totaleo ihoo-hoho, de o aewani mata-mataika ngaro o dofo, de o fuhuku, de imalia-liara, ma, gea mata-mata tinihidoaka nginika la ti ngini nia kuahaka la ka idadi nihiaturu.”

²⁹ De Ma Jou ka wotemohi onangika wato, “Abeika ahi dodiawo, ti ngini nia inomo. Naa ena tinihidoaka nginika mata-mataika abe de ma hofokoka o dunia ma lokuoka, abe naga o joro irupa-rupa hoka o pine, de nagali o lubengana, de o joro utu hiadono o gota-gota ma hofoko abe de ma muioka la mata-mata gea idadi nia inomo.

³⁰ De o aewani mata-mataika to enangoo ma inomoli naga, ho ngaro o nawoko, de o totaleo, de o aewani o dofo, de o fuhuku, de imalia-liara, masara mata-mataika tohidoaka o ruruubu de mata-mata iwangoiye o tonakino abe de ma hokaka, la gea idadi to ena ma inomo.” Hokogea Ma Jou wahingahu o Adama de o ngo Hawaika.

³¹ De ai dulaada mata-mata Ma Jou wotulaadauku ibooto de wamake duru irahai de wosanangi enangika. De ahao naga o futu de ahao iboali o dawange de gea o wange ma butaanga ipahaika.