3 Yohanese 1 - Ma Jou ai Demo-demo o Totobelohoka

O Yohanese ai tabea ma demo abe ai gianongoru o Gayusika

¹ Ahi gianongoru o Gayusu. Ngohi naa ti ngini nia dimono nanga ngongakuoka, de ngohi duru tagou-goungu tonidora ngonaika.

² Ahi dodiawo, ngohi duru tonganono ani wowangoka mata-mata itagi ma rorahai dika de ani badanga isosanangi dika ho ko ipanyakeua. Angamoi ngohi tohiorikoka abe ani ngongaku de ani gogao duru iputurungu Ma Jouika. Ho ngohi tonganono abe ani badangoo isosanangi, la gea ma rorahai imaketero dika abe ngaro ani badanga eko ngaro ani ngongaku ma wowango.

³ De gea tohiorikoka ma titi ani ngongaku ma wowangoino angamoi naa ma duruika nanga gogianongoru yamuruono naga yolioka ngonaka de aino ngohino, de ona homoi-homoi yoade-ade abe ngona duru ma gou-goungoka nomanoa. Ho mangale manga demo gea ho ngohi duru tonidogarago ma titi ngona. De ma dihiraino de ngohi ma hirete tamake de ahi lako abe ngona nanii-niiki ma gou-goungu. Ho gea manga demo imakiniiki abe hoka ngohi ma dihiraino tamake ani wowangoka, abe igoungu ngona duru ma gou-goungika natobaniiki.

⁴ De nako o hingahu mata-mataika abe ngohi toihenino, gea ka nenangohi duru ihihigarago, la nako toihene ahi ngofa-ngofaka o ngongakuoka abe ona ma gou-goungu yatobaniiki manga wowangoka. Ho mangale ma titi ngonaoo ani wowango hokogea, ho hiadono ngohi naa duru togaragoholi ma titi ngona ani wowangoka.

O Yohanese wihigaro o Gayusika

⁵ Ahi dodiawo, ngohi tonihiorikoka to ngona ani datoro abe ma ngoeoka naduhunu de naleleani nanga gogianongoru utuika abe ona yotagi-tagi la Ma Jou ai Demo-demo yatobadotoko o nyawaika. De ngaro nanga gogianongoru utu abe ma dodihirainohi de ko ma moiuahi nimakamake de ona, ma onangoo naduhunu abe ma oraha yoboa ngonaino. De gea ngohi tato tonidosanangi ngonaika ma titi ani duduhunu onangika, de gea duru imakiniiki abe nanga ngongaku ma hidumutu.

⁶ De gea tonihiorikoka ani duduhunu onangika mangale ona gea ma oraha yolioino nenangino de yoade-ade mia doomu ma goronaka de gea imihingahu ma titi to ngona ani hininga ma dora onangika. De naa ngohi tonihigaro ngonaika tato tosanangi abe nako ngona nogila-gila dika naduhunu onangika abe hokogea Ma Jou wahitagongo, la ma oraha ngonaka de yosobo de gea manga dodagi ma perelu nolegaika done ahao manga dodagi ma goronaka de naga manga kuranga. De nako ona gea naduhunu, ngohi tato gea duru itaana angamoi Ma Jou ai karajaanga ona yotobadiai.

⁷ De ona gea yotagi-tagi ma titi o Kristusu ai romanga de ai ade-adeoo yahingahu-ngahu o nyawaika, ho duru ko iwa manga nganganono abe ahao yamake o duduhunu onangino abe ko iwahi manga ngongaku Unangika.

⁸ Ho gea ngohi tato ngone abe hingaku-ngakuoka kiani ngone haduhunu onangika gea yoiki yahingahu-ngahu, la hiadono ngone mata-mata homakokuduhunu hiadono ma dodotoko ma gou-goungu utuohi ihikabarihi o nyawa yowoe-woeika.

Abe ma titi ona yahinooto o Dioterefese de o Demetiriusu

⁹ De nengokadauino ngohi o hurata moi totulihi de gea tinihidingoto abe ngini nia doomuika, masara una abe naga nia doomuoka o Dioterefese, una gea duru ko wodafongua to ngohi ahi demo. De una gea ai hininga tohiorikoka, abe una duru wosanangi womagorakiye la ti ngini nia doomuoka, de gea wato ka unangohi ai kuaha ilamoko.

¹⁰ Ho gea nako hiadono ngohi tomahiadonoka nginika, de gea ngohi ahao tinihingahu nginika abe hokokia to una ai wowango ma datoro tamakeoka abe una wotobadiai. Abe una gea womihiade-ade hiadono duru womiwewederoka ngomi nenangoka, masara ai demo gea duru ko iwa ma titi. De ngaro ai demo hokogea ma una wamao ko iwiwedonuahi, de nagali abe una ko wadafongua nanga gogianongoru gea abe yoiki yotobadotoko Ma Jou ai Demo-demo o nyawaika. Ho ma oraha ona yoboa nginika la ato inidotoko de gea una ko wadafongua. De hongoli nako nanga gogianongoru utu genangoka abe yosanangi yadafongo ona yotobadotoko, masara una gea wata-tatoko de ko wahigunoaua. De nako ngini genangoka ko niwihigihenua o Dioterefesika de ka niadafongo dika abe ona yotobadotoko, de gea una ahao winihihupu nanga gogianongoru gea ti ngini nia doomuoka de aino ma hoanika. Ho gea ngohi tato ahao ma oraha toboa nginika de ahao tinihingahu ngini mata-mataika ma titi una gea o Dioterefese ai datoro ma dorou wotobadiai.

¹¹ Ho ahi dodiawo, naa ngohi tonihitiari ngonaika tato ufa nomaaduru hoka onangoli manga datoro ma dorou, masara kiani natobaniiki ma rorahai dika ani wowangoka. Angamoi onagona dika ma rorahai yotobadiai, ona gea manga wowango ma titi Ma Jouoka de aino iboa. Masara abe onagona dika yotobadiai itorou, ona gea tanu imaketero hoka ona ko iwihiorikua Ma Jouika.

¹² De nako nanga gianongoru naa o Demetiriusu, una ai wowango ma datoro imaniiki de o dodotoko ma gou-goungu, de o nyawa mata-mata duru iwiigo unangika, de gea ato ai hininga duru irahai. De ngaro ngomi nenangoka, ma ngomioo wiwihigiriiri o Demetiriusika angamoi wiwihioriki una gea ai hininga duru ma rorahai. De marai ngona nomihiorikoka ngomi naa hiadono mia demoika gea abe ma titi o Demetiriusu gea ka idadi ngona nangaku mia demoika. Ho gea ngohi tonganono abe naa o Demetiriusu ka idadi ngona nidafongo de niduhunu unangika.

O Yohanese ai tabea ma demo

¹³ De naa tanu ma titi ma ngoeohi naga abe toigo tonihingahu ngonaika, masara ahi hiningaka tato koaho ufa o hurata ma goronaka dika de ahi hininga gea tohitulihuku.

¹⁴ De gea ngohi tonganono abe duru ko itedekanokaua de ahao ka idadi homakamakeoli ngona de ngohi, de gea ahao ka idadi homarihimanga de homakoketemo.

¹⁵ De naa ngohi tonganono la Ma Jou wonihidoaka ngonaika ai hininga ma miriidi. De naa nanga gogianongoru abe naga nenangoka, ona manga tabea ihidingoto ngonaika. De ngohioo togahoko ngonaika la ahi tabea nadofanga abe ahi gogianongoru homoi-homoiika genangoka.