2 Timotiusu 4 - Ma Jou ai Demo-demo o Totobelohoka

O Paulusu wihigaro wato kiani ka ihikaika wahingahu-ngahu Ma Jou ai Abari o nyawaika

¹ De naa ngohi duru tonihibehehongo ngonaika Ma Jou ai himangoka de o Yesusu Kristusoo ai himangoka. De tonihihohininga abe o Yesusu Kristusu Una gea ahao woboali de Una ahao wonatailako ngone homoi-homoiika nanga datoro, de gea ngaro ngone hohonengoka eko ngaro ka howangohi ma oraha gea, masara gea ngone mata-mata ahao wonatailako nanga datoro. De gea woboali de ahao o dunia mata-mataika wahikoano. Ho gea ma titi hiadono ngona kiani naniiki ahi behehongo ma demo naa ngonaika. De hokonaa ahi behehongo.

² Ngona kiani ka ihikaika Ma Jou ai Abari nahingahu-ngahu o nyawaika, done nako nomahoa-hoana nomahidiai de hiadono naga ma oraha abe ngona ko nomahidiaiuahi de done ko nakunua ai abari gea nahingahu onangika. Abe ngaro o nyawa yosanangi dika yotoihene ani demoino eko ngaro ona ko yamagaweua, ma kiani nahingahu dika onangika. De gea kiani o nyawa manga howono nahitobadaere onangika de duru nahitiari done ahao yogila-gila dika yorehene manga howonika gea. De ngona kiani o nyawa mata-mataika nahigaro onangika gea la ona yaniiki ma totiai de ufa yomahipidili genangino. De ngaro hokokia naduhunu o nyawaika ma titi ani demo-demoino, ma gea kiani nohidodiai nadotoko de ani hininga nabole-bole onangika.

^3-4 De gea ma oraha naa naga kiani ngona nodiai la naduhunu o nyawaika o totiai ma dodotokino, angamoi nako ma oraha naa o nyawa manga ngoe nagahi manga magawe la o totiai ma dodotokino ihigihene. Masara ahao naga ma oraha nanga himangoka abe o nyawa ka yodogo-dogo yowoe abe ko ihigihenokaua o totiai ma dodotokino gea. Masara ma oraha gea ka de yoihene ma totiai de o nyawa gea manga ngauku ajumuoka done yoihene ma totiaiino. De masara nako naga yadotoko onangika o ade-ade eko o totoade o fara moi abe duru ko igou-goungua, gea ma demo abe ona duru yosanangi yototoihene enangika. De hiadono ona yototoihene gea yalingiri ona utuoli abe yatobadoto-dotoko hiadono marai ka ihikaika yomatoturuuru yahigihene ona yatobadoto-dotokika, masara manga dodotoko gea iti imakadaene de to ona yototoihene manga hininga ma dorou. De nako ma dodotoko gea imakiniiki de manga hininga ma dorou, gea ahao manga ngauku isanangioka de ka idadi yototoihene de manga hininga iuwinoka. De hokogea ahao idadi ma oraha gea.

⁵ Masara ngona o Timotiusu, ufa ani hininga irehene o rerehene ma dodotokika gea masara kiani ka ihikaika ani hininga noogoana la ngaro o kia dika nohimanga ma ka idadi nomatongohono ma dorouino. De gea ngaro naga inihikangelaoo ma kiani nomatongohono. De gea kiani nohigila-gila ani karajaanga abe o Abari ma Rorahai nahingahu-ngahu o nyawa utuika. De abe ani karajaanga ma tagongo utu mata-mata wonihidoakoka Ma Jou, enangoo ma kiani nodiai la ani karajaanga Unangoka ingodumu.

⁶ De hokogea tonihibehehongoka ngonaika angamoi ngohi naa duru itigioka ahi oraha abe o dunia naa tanoaka. De ahi hohonenge gea tohiketero tato ahao idadi to ngohi ahi wowango ma huhuba duru ma baha Ma Jouika. Abe naa ma dekanino ahi wowango ma karajaanga tomahihubaka Unangiye, de naa ahao ahi badangoo tomahihuba de tomahidoaka Unangika.

⁷ De naa adonoka ahi wowango ma batingi, ho naa ka idadi tomahohininga de ahi wowango tatailako. De gea ngohi ka idadi tomahingahu tato abe ma karajaanga ma rorahai abe ma dihira Ma Jou wohihitagongino ngohino, gea ma karajaanga ngaro kohadubuho, masara ena gea tabootoka. De ma dodihirainohi de Ma Jou ai ngekomo taniikoka de itiai, de gea tatobagou-goungu abe ahi ngongaku ibitumoka ka hiadono naa ahi wowango ma baha adonoka.

⁸ De naa ahi lalaku ma hadia naga ihidodamaa mangale ma titi ahi wowangoino de towango itiai Ma Jou ai himangoka. De ahao ma wange gea abe nanga Baluhu idodutu wonatailako ngone homoi-homoiika, de gea ahao wohihidoaka ahi hadia ngohino. De gea ngone hohioriki abe ma oraha wonatailako nanga datoroka de gea duru woputuhu itiai. Masara gea ka tomatengoua dika abe tamake ahi hadia o wange gea, masara o nyawa onagona dika abe duru de manga magaweoka iwidodamaa de iwingano-nganono ai gahe ma wange abe woboali, ona gea mata-mata ahao manga hadia yamake Unangino imaketero hoka ngohioli ahao tamake Ma Jou ai giamino.

O Paulusu wibehehongo la o Timotiusu womataiti woboaino witutumu

⁹ De naa ngona o Timotiusu, ngohi duru tonibehehongo ngonaika la nomataiti noboa nohitutumu nenangino.

¹⁰ Angamoi nako ahi dodiawo ma dihiraino nenangoka, ona gea ngade-ngade ko moiokaua. Abe nako o Demasa abe una naa ma duru wohidodiawoino ngohi nenangoka, naa una wohinoaka wosoboka wato o Tesalonika ma kotaika woiki ma titi duru woigo de wolegaika o duniaka naa ma wowango ma perelu, hiadono ko wolegaikakaua Ma Jou ai karajaangika. De nako nanga gogianongoru o Kresekes de o Titusu, ona gea yosoboka la ato iwileleani Ma Jou o ngi-ngi utuikali. Abe o Kresekes una gea o Galatia ma tonakika woikoka, de o Titusu unangoo woikoka o Dalamatia ma tonakika.

¹¹ Ho nenangoka ahi duduhunu ka womatengokahi dika, de gea o Lukasa una gea nagahi ngohioka ka wohiduhunohi. De gea ngohi togahokoo la ka idadi ngona nidulu o Maruku la unangoo woboa ngohino, ho ngini inihinooto ka idadi nimakutuono niboa ngohino. Abe o Maruku una ahao ka idadi duru wohiduhunu ahi karajaanga ma goronaka nenangoka.

¹² De naga womatengoli nanga gianongoru o Tikiku, una gea tihulokoka la woiki woboa wonilega ani ngiika o Efesusu ma kotaka gea la ahao unangoo ka idadi wileleani Ma Jou genangoka.

¹³ De naa moioli togahoko la ma oraha noboa ngohino de ahi baju ma gogurutuku naoino de ahi buku gea abe ihipali-palino. De gea ahi baju nengokadau tanoaika o Karpus ai tauoka abe una wogogere o Toroasa ma kotaka. Ho togahoko la ngona ahao noiki de nodulu ai tauoka de ahi baju ma gogurutuku gea nale de nao ngohino. De abe ahi buku genangoo kiani nao ngohino, masara gea abe duru toperelu, ma buku gea ihipali-palino abe o aewani ma kaiino yodiai.

O Paulusu wihitiari la womahidodiai ma titi o Alesandere

^14-15 De naa moi tonihitiari ma titi o Alesandere, abe una gea wotobadiai o kiahonanga o tabaagaino. Angamoi una gea nengokadauinohi duru walawana nanga dodotokika de gea hiadono ai datoro ma dorou naga ma ngoe wodiaioka ngohino la wato ahi karajaanga wohikapusaka. Ho ngonaoo kiani nomahidodiai done ahao ngonaoo ani karajaanga wohitaili wohibinaaha. Masara ngaro hokogea ai hininga, ma ngone hohioriki abe una gea ahao Ma Jou wohibalaha unangika, de ai hohowono gea duru imakiniiki abe hoka ai datoro ma dorou abe una wodiaioka o Alesandere.

Abe hokokia nanga Baluhu widuhunu o Paulusika

¹⁶ De naa ma duruika abe ma oraha yotobauru-urusu manga himangoka de tomademo, de gea ahi gogianongoru duru moioo de ko yoboaua la ihiduhunu de ihidemo yotobauru-urusika, masara ona mata-mata gea ko yoboaua ho kiani ngohi tomatengo dika tomademo ma oraha gea. De ngaro ahi gogianongoru gea ko yoboaua, masara ngohi tagahoko Ma Jouika la ufa wahohowono onangika ma titi manga howono gea ngohino, masara ona gea tagahoko Unangika la ahao waofi dika manga howono gea.

¹⁷ Ma masara ma oraha gea ihiurusu de nanga Baluhu idodutu Una gea naga ngohioka de wohihitomoroini ngohino hiadono yotobauru-urusu manga himangoka de ka idadi takunu tahingahu onangika o Abari ma Rorahai de duru itararono. De genangoka naga manga ngoe abe ona ko o Yahudi ma nyawaua, ho utuohi togarago angamoi hokogea wohihitagongino la onangika gea tahingahu-ngahu o Abari ma Rorahai. Ho ona mata-mata ma abari gea yoihene ma oraha tomademo. De gea tomademo ipaha de ahi hiningaka tato marai naa yaputuhu ato ihihohonenge. Masara nanga Baluhu wohiduhunu hiadono ahi bodito gea ko tamakeuahi.

¹⁸ De genangoka ho hiadono ngohi duru tonganono abe nanga Baluhu idodutu ahao wohiduhunoli done o nyawa manga hidee ma dorou ngohino idadi de ngohi ko tileleaniokaua Unangika. De duru tonganonoo abe nako ahi gahe adonoka de gea ahao Una wohiao ngohi daku o Horogaiye abe genangoka duru wahikoano mata-mataika. Ho gea duru itaana abe ngone hihigiriiri Unangiye naa de ka hiado-adonika. De duru hokogea igoungu. Amin.

O Paulusu de ai dodiawo manga tabea ihidingoto onangika

¹⁹ De naa ngohi togahoko la to ngohi ahi tabea nadofanga nanga gogianongoruika genangoka abe ngaro o ngo Pirisikila de ami rokata o Akilaika, de ngaro o Onesiforusu ona o tau moi, ma, ona mata-mataika gea ka idadi ahi tabea nadofanga onangika.

²⁰ De naa o Eratusu, una gea womagoo-gogerohi o Korintusu ma kotaka. De nako nanga gianongoru womatengoli o Torofimusu, una gea tinoaika o Miletusu ma kotaka angamoi wopanyake.

²¹ De naa tonihibehehongo ngonaika tato kiani duru nohitaili la ko adonuahi ma mede muruono gea miato ma maata de ngona nomahiadonokau ngohino. De nanga gogianongoru nenangoka ona manga tabea ihidingoto ngonaika. Abe ona gea o Ebulusu de o Pudese de o Linusu de o ngo Kalaudia, de nanga gogianongoru utu mata-mata nenangoka, ona gea mata-mata manga tabea ihidingoto ngonaika.

²² De naa ngona o Timotiusu tonigahoko la nanga Baluhu idodutu ahao naga ani datekoka wonidodiawo de woniduhunu. De ngini genangoka o doomu moi ngohi tinigahoko la to Una ai owa winihidoaka ngini mata-mataika.