2 Timotiusu 3 - Ma Jou ai Demo-demo o Totobelohoka

Ahao o nyawa manga dorou ka idogo-dogo

¹ De naa moi tonihingahu ngonaika la nohioriki abe hokokia ahao idadi ma oraha nanga Baluhu ai gahe ma wange hatoli itigioka. De ma oraha gea o nyawa manga dorou ka idogo-dogo, ho hiadono ngone hingaku-ngakuoka duru hokangela haniiki Ma Jou ai hininga ngoneino ma oraha gea.

² Angamoi ahao ma oraha gea de o nyawa manga ngoe yomadora ka ona ma hirete dika ho o nyawa utuika ko yadorakaua, de ona gea duru yodoraoo manga tiwika. Ona gea ahao duru yomagoraka hiadono yomahitobahigiriiri, de nagali abe yatobangelo o nyawaika de Ma Jouikaoo iwitobangelo, de ona ma oraha gea ko yahigihenokaua manga meme de manga babaika. De abe ngaro Ma Jou eko ngaro o nyawa utu yaduhu-duhunu onangika masara ona gea duru ko iwaka manga tarimakase onangika eko Ma Jouika. De ma oraha gea o nyawa manga ngoe duru ko iwaka manga horomati Ma Jouika eko ngaro ai dodotokika hiadono duru iwiporetoka.

³ De nagali ma ngoe idadi ma oraha gea abe o nyawa manga dora ko itagiokaua manga dutu-dutuika, de nako hiadono yomaketeloliliara de o nyawa utu, genangoka de imahikaika naga manga hininga kuranga onangika gea. De idadi ma ngoe abe o nyawa yadoa-doana manga date-datekoka la ato ihipeseke manga romanga, de hokogea yomaaduru hoka o Ibilihi ma haekoli ma datoro. De ona manga ngoe ma oraha gea ko yomahiparetakaua ho hiadono manga hininga ma hafini ma dorou o kia dika ipuda de gea ka yaniiki dika. De manga ngoe ma oraha gea duru yototualono, de manga ngoe ona ngaro ma rorahai dika ma ka yodohata genangika.

⁴ De nagali abe o nyawa yabudi manga dodiawoika ho ihira duru yadodiawo onangika masara ma bahauku de ahao ona gea yahidoaka manga dodiawoika la yahikangela. De nako naga manga hiningaka moi ipuda, de gea ko yafikirua abe ahao ma bahaika de to ena ma hasili hokokia, ma gea ena ka yodiai dika. De naga utu marai duru yomasadeokaholi, ho nako manga sosanangi de Ma Jou ai mau, ma ka to onangohi manga sosanangika yoodora.

⁵ De ona gea igoungu yomadokangelukino dika abe manga datoro ngade-ngade hoka iwingaku Ma Jouika masara ona gea ko yomahigunoaua Ma Jou la de ai kuaha wahitiai manga wowangoka. Hokogea ahao idadi abe ma oraha nanga Baluhu ai gahe itigioka de gea o nyawa yodogo-dogo abe manga hiningaka itobarehene ma dorouika. De gea tato koaho ma oraha ko idadiuahi de tonihingahuoka la nohioriki abe hokokia ahao idadi. Masara ngaro ma oraha naa ma naga o nyawa utu yorehenoka. Ho o nyawa onagona dika abe manga hininga hokogea ma dorou, gea ngona kiani nadokaowaroka dika de ufa nadodiawo onangika.

⁶ Ona gea kiani nadokaowara angamoi ona gea utu naga yososawaro yahitobahirehene o nyawa Ma Jouoka de aino. Abe hoka ona utu yosawaro yabudi o nyawa la ka idadi yowoha-wohama manga tau-tauika la gea yadotoko onangika de o rerehene ma dodotoko. De ma titi manga dodotokino gea hiadono o ngo-ngofeka utu duru yangaku de yomahinganono onangika. Abe ma ngo-ngofeka utu gea duru igapanga yabudi angamoi ona duru yatobahowo-howono Ma Jouika ma titi yahiraramaka de manga hafini ma dorou ho hiadono manga hiningaka ko iriidokaua. Ho ma titi gea ho igapanga dika ona yatobadotoko gea yabudi onangika.

⁷ De igoungu ma ngo-ngofeka gea ka ihikaika yamagawe yomadotoko o dodotoko ma hungi masara nako to ngone nanga dodotoko ma gou-goungu gea ko yakunua ihioriki ma titi manga hafini ma dorou, ho ma gou-goungika ko yodafongua.

⁸ De ona gea abe o rerehene ma dodotoko yatobadotoko o nyawaika, ona gea manga hininga itagi ka ma dorouika dika. De ona gea Ma Jou waolukoka angamoi manga ngongaku ma dumutu gea ko Unangikaua. De ona gea duru yalawana nanga dodotoko ma gou-goungika abe imaketero hoka ma dodihiraka abe ma oraha Ma Jou ai uru ma dodofanga o Musa. Abe naga ma oraha gea ona yahinooto o Yanese de o Yamberese, de ona gea iwilawana o Musaika.

⁹ Masara ona gea abe ma gou-goungika yalawana, ona gea ko yometedekanuahi de manga hidee iwederoka, angamoi o nyawa yowoe-woe duru itararono yamake abe ona yatobadotoko manga bodo. Ho gea ma titi manga bodo hiadono ngohi tato ahao ani dodiawo genangoka ko yahigihenokaua ona yatobadoto-dotokika gea, de gea ona duru yomaketero hoka ma dodihiraka o Yanese de o Yamberesika onangika gea o nyawa ko yahigihenokaua.

Ufa horehene ma gou-goungino, ma kiani ka hohigila-gilahi Ma Jou ai Demo-demo

¹⁰ Masara ngona o Timotiusu, ngona de ona gea abe o rerehene ma dodotoko yotobadotoko, gea ngona de ona duru nimakohowono. Masara nako ngona de ngohi, gea ngone hatoli homaketero nanga hininga. Angamoi ka nengokadauinohi de ngona duru nohihioriki to ngohi ahi hininga de ahi dodotoko. De gea ahi hininga ma dumutu de ahi wowango ma datoro, de ahi ngongaku Ma Jouika, de ahi hininga ma mobole de ahi dora o nyawaika, gea ahi hininga ma dola mata-mata duru nohihioriki ngohi angamoi ma dodihirainohi de ngone duru homahikoriki. De gea ngaro nengokadau abe ma oraha o nyawa ihihikangela ngohino, ma gea nohihioriki abe ngohi tomatongohono de ka tohidagiohi ahi karajaanga Ma Jouoka de aino.

¹¹ De gea marai ngona ka nohiningahi abe ma ngoe idadi o nyawa duru ihilawana ngohino de gea hiadono ihipoha-poha hiadono ahi badanga ma odiri. De abe hoka ma dihira ma oraha ngohi naga o Antiokia ma kotaka de o Ikoniumu ma kotaka de ahao o Lisitiraoo ma kotaka de ma nyawa genangoka utu ihikiniiki ma hoanika de hiadono o nyawa utu genangoka duru ihihikangela ma ngoe. Masara gea ma getongo ihihikangela de gea nanga Baluhu idodutu wohiduhunu done genangoka dika de tohonenge.

¹² De gea ngaro ufa hoheranga ma titi ihihikangela ma oraha gea, angamoi igoungu onagona dika abe manga hininga ato iwihisanangi Ma Jouika ho duru iwinii-niiki o Yesusu Kristusu, onangoo gea ahao o nyawa yalawana de yahikangela onangika.

¹³ Angamoi naga manga ngoe o nyawa ma dorou de nagali o nyawa manga ngoe abe yomadokangeluku la gea ato o nyawa utuika yatobabudi, de gea ona ka ihikaika manga hininga idogo-dogo ka ma dorouika dika. Ho ona gea ka ihikaika yatobabudi o nyawaika de ngaro o nyawa ma dorouikaoo ma yabudioka. Ho igoungu ona mata-mata manga hininga idogo-dogo itorou.

¹⁴ Masara ngona o Timotiusu, gea ngona kiani ka ihikaika naniiki ma dodotoko gea abe nengokadau ngohi de nanga gogianongoru utu minidotokoka ngonaika, abe ngona ma hirete nohioriki gea ma dodotoko duru itaana de itiai. De gea ka idadi nangaku ma dodotokika gea angamoi ka idadioo nomingaku ngomi minidoto-dotokino naa abe mia wowango imakiniiki de Ma Jou ai mau.

¹⁵ De igoungu ngona ani etetekinohi de notobatoihene Ma Jou ai Demo-demoino, ho gea duru nohioriki abe to ngomi mia dodotoko gea duru itaana de to Una ai Demo-demoka de aino ho hiadono ka idadi nangaku mia dodotokika gea. De ai Demo-demo ena gea inahisawaro la hohioriki hokokia ka idadi Ma Jou wonaduhunu nanga howo-howonino. De gea inahingahu ato kiani ngone hingaku o Yesusu Kristusika de gea ahao nanga howono Una waofi.

¹⁶ De Ma Jou ai Demo-demo mata-mataika gea ihitulihukuoka la wato ena gea ka idadi duru inaduhunu ngoneino. De gea ma titi o kia? Gea ma titi abe Ma Jou Una ma hirete ma dihiraino de ai Demo-demo mata-mataika ka wabawilika wahingahu ai nyawa utu manga hiningaika la wato gea ka idadi atulihuku. Ho mangale ma titi ai Demo-demo gea Una ma hirete ai hiningaka de aino iboa, ho gea hohiorikoka abe ena gea ka idadi duru inaduhunu ngoneino. Abe ai Demo-demo gea ka idadi inadotoko de ma gou-goungu, de ka idadi inataere ma titi nanga howonino, de ka idadi inahitiai la inahigilio ma totiaiino, de gea ka idadioo inahimatoko o totiai ma ngekomo la hiadono ka gea dika haniiki.

¹⁷ De gea Ma Jou ai Demo-demo dika ikarajaanga de aturuuru nanga hiningaika la hiadono ngone abe nanga hiningaka hato hileleani Unangika, gea ka idadi hakunu hodiai Ma Jou ai karajaanga. Abe ma titi Ma Jou ai Demo-demoino dika Una wonahiakunu la ngaro ai karajaanga ma rorahai o kia dika wonahitagongo ngoneino ma gea ka idadi hakunu hokarajaanga.