2 Timotiusu 1 - Ma Jou ai Demo-demo o Totobelohoka

O Paulusu ai demo ihira-hira o Timotiusika

¹ Ahi gianongoru o Timotiusu, ngohi naa o Paulusu, abe Ma Jou wohiirikoka ngohi la todadi o hidingoto ma nyawa abe tahingahu-ngahu o nyawaika ma titi o Yesusu Kristusu nanga Koano abe Ma Jou wonahibehehongoka. De gea ngohi wohihidingoto la tohingahu-ngahu ma titi o wowango ma ngango abe gea ma wowango Ma Jou wohibehehongoka. De gea wonahingahu wato iti ngone naga de o Yesusu Kristusu de gea ai wowango hamakeoka.

² De naa ngona o Timotiusu tonihurata ngonaika, abe ngona ahi ngofaka ma titi o ngongakuoka de duru tonidora ngonaika. De naa tonigahoko nanga Baba Ma Jou de nanga Baluhu idodutu o Yesusu Kristusika. De gea tonigahoko la Una ahao wonihiowa ngonaika, de woniao de ai hininga de ma dora ngonaika, de ahao wonihidoakoo to Una ai hininga ma miriidi.

O Paulusu wotarimakase Ma Jouiye ma titi o Timotiusu

³ Ahi ngofaka o Timotiusu, ngohi duru totarimakase Ma Jouiye ma titi ngona ani ngongaku iahumu Unangika. De ngohi o futu-futuiye de o wange-wangeiye tonihohininga ngona de hiadono totarimakase Unangika ma titi ngona abe ma oraha ahi biaha o nyawa tatobagaho-gahoko, ho gea ngaro ngonaoo ma tonitobagahoko. De igoungu ngohi tomaniata de tileleani Ma Jouiye abe imaketero hoka ma dihiraino ahi totofora onangoo yomaniata de iwileleani Unangiye. De gea ngohi tileleani de ahi hininga ma debi-debinino tapake abe tohioriki hokogea itiai tileleani.

⁴ De ma oraha ahi gogiriaka tomaniata de totarimakase Unangika ma titi ngona, de gea ma ngoe tohininga abe ma wange gea ngona de ngohi homakitingaka de gea ngona ani koongo itifa. Ho gea ma titi hiadono ngohi duru toigo la ngone ka idadi homakamakeoli, de gea de ahao ahi hiningaka duru igarago.

⁵ De naa duru totarimakase Unangika angamoi tomahohininga ma titi ani ngongaku iahumu Unangika. De ani ngongaku gea ka imakadaene dika abe hoka ma dodihiraka to ngona ngoni be o ngo Lois ami ngongaku de ngoni memeoo o ngo Yunike ami ngongaku, abe onangoo duru iwingaku nanga Baluhika. De hiadono ma oraha naa naga duru tonganono abe ani ngongaku naga imanoa ngonaka imaketero hoka ma dihira imanoa onangokaoo, de gea ma titi ho duru totarimakase Unangiye ma titi ngona.

O Paulusu ai higaro ma demo o Timotiusika

⁶ De mangale ma titi ani ngongaku gea ho hiadono naa tonihigaro de tonihihohininga ma titi ani hiakunu. Abe ani hiakunu gea nengokadau ngona namakeoka Ma Jouoka de aino abe ma oraha gea ngohi tonifokumu. Ngohi tato irahai ani hiakunu de ani tagongo gea nafae hiadono to ena ma buturungu ngonaika idadiokali idogo abe hoka ma dihirali ani hiakunu gea duru kohagiria ngonaika.

⁷ De ufa hiadono nohawana de done ani hiakunu gea ko napakeokaua de gea done ko nileleaniokaua Unangika. Gea ufa nodiai hokogea, angamoi Ma Jou wonahidoakoka Ma Jou o Womaha ngoneino, de o hawana gea ko ihititiua Ma Jou o Womahoka. Abe ko o hawanua wonahidoaka, masara abe Una wonahidoaka ngoneino gea o hiakunu de ma buturungoka, de o dora, de wonahiakunoo la ka idadi hakunu homatongohono ma dorouino.

O Paulusu wihigaro la wato ufa o Timotiusu iwimaleke ma titi o Abari ma Rorahai

⁸ Ho naa ahi ngofaka, ufa hiadono inimaleke ma titi o Yesusu Kristusu nanga Baluhu idodutu abe to Una gea ai abari ngone hahingahu-ngahu o nyawaika. De ufa inimaleke ma titi ngohi, ngaro igoungu ngohi ma oraha naa naga ihibuikahi nenangoka angamoi tileleani Una. Masara koaho ngona ani tagongo gea ka nohidagiohi de ani hininga de ma domoroinoka la o Abari ma Rorahai ka nahingahu-ngahuohi o nyawaika. De ngaro ahao idadi abe o nyawa inihikangela hiadono ngonaoo ani kangela naga abe imaketero hoka to ngohioli ahi kangela, masara gea de ahao Ma Jou wonihiputurungu ani hiningaka de ka napoa.

⁹ Abe Ma Jou Una gea wonaduhunoka de wonaahokoka Unangino la ka idadi nanga wowango hao itiai la itebini ai himangoka. De gea wonaahoko, gea duru ko ma titiua nanga wowango ma datoroka naga moi abe homahitaana hototiai hiadono wonaduhunu. Duru ko iwa ma titi ngoneoka, masara ka Una ai hiningaka dika de aino abe wato wonaduhunu ngone. Abe Una duru ma dodihiraka ma oraha o dunia ko wotulaadauahi de ai hininga ma owa ngoneino wonahideeokau wato ahao ai Ngofaka o Yesusu Kristusu wihidingoto o duniauku naa la ka idadi wonaduhunu ngoneino. De hokogea idadioka ai hidee ma dodihiraino abe ai hidoaka ma owa gea ka wonahidoaka dika ngoneino ma titi o Yesusu Kristusino. Ho mangale ma titi ai duduhunu ma amoko ngoneino gea, ho ufa hiadono ngone hapidili nanga karajaanga masara kiani hohidagiohi abe o Abari ma Rorahai ka hahingahu-ngahuohi o nyawaika.

¹⁰ De ahao naa ma duru abe ma oraha nanga Duduhunu o Yesusu Kristusu woboa ngoneuku, gea ma oraha abe Ma Jou womahimatoko ai hininga ma owa ngoneino abe hokokia wonaduhunu. De abe ma titi o Yesusu Kristusu ai hohonenge de hiadono ai momomiki, de gea o honenge ma kuaha ngoneino wawederoka. De o dunia ma amokika wohimatokoka abe ngone hongaku-ngakuoka o Abari ma Rorahaiika ahao homomiki nanga honengino de ahao howango ka hiado-adonika Ma Jouoka.

¹¹ De duru o Abari ma Rorahai gea abe Ma Jou wohihitagongino ngohino la hiadono ngohi totagi-tagi de tahingahu-ngahu o nyawa utuika de hiadono tadoto-dotoko onangika ma titi ai Abari ma Rorahai gea.

¹² De igoungu duru ena gea ma titi hiadono ahi kangela naa tamake abe ihibuioka. Masara ngaro ahi kangela naa ma goronaka ma gea ko ihimalekua, angamoi tingakuoka o Kristusika, de Una gea duru tihioriki abe watobagou-goungu ma titi ai behehongo o kia dika wohibehehongoka. Ho naa duru tonganono de duru tongaku abe Una gea ahao wahitagongo o nyawa utuikali ahi tagongo gea la ahao onangoli yagoraka ma karajaanga gea abe ma dodihiraka wohihidoakoka ngohino. De gea duru tonganono Una ahao woogoana ma karajaanga gea ka hiadono ai gahe ma wange gea o Yesusu Kristusu woboali. Abe ma titi ngaro etohonenge, masara duru tongaku abe Una ahao ka ihikaika woogoana ai Abari ma Rorahai gea la ufa ihihanga ma ka idadi ka ihikaika itagiohi o nyawa utuika ka hiadono Una woboali. Ho ngonaoo kiani ani nganganono duru iputurungu Unangika de hiadono ufa inimaleke ma ka nohidagiohi ani karajaanga abe o Abari ma Rorahai o nyawaika ka nahingahu-ngahuohi.

O Abari ma Rorahai gea kiani duru hoogoana angamoi done aturuuru

¹³ De naa tonihibehehongo ngonaika abe ma titi ahi dodotoko ma gou-goungu abe nengokadau tonidotokoka. Tonihibehehongo tato kiani nomaaduru abe hoka ngohioli. Abe imaketero hoka ma dihira de tonidotokoka ngonaika ma dodotoko gea abe duru igoungu de itiai, ho naa ngonali kiani nadoto-dotoko o nyawaika ma dodotoko gea abe namakeoka ngohino. De kiani ka ihikaika ningaku Ma Jouika de ani doraoo kiani itagi Unangika de o nyawaikaoo mangale ma titi wonahiketerimoioka o Yesusu Kristusoka.

¹⁴ De ufa nahigunoa o nyawa la yaturuuru o demo ma rorahai gea abe Ma Jou wonihitagongoka ngonaika, masara kiani ma demo gea duru noogoana de gea napake de Ma Jou o Womaha ai kuahaino. Abe Una gea wogogere ngone homoi-homoioka, ho Una ka idadi woniduhunu de ai kuaha la ufa ma demo gea aturuuru.

O Paulusu ai dodiawo iwiporetoka

¹⁵ De abe hoka ngona ma hirete nohiorikoka, ahi gogianongoru o Asia ma tonakoka ona genangoka mata-mata ihiporetoka ngohino ho duru ko moiokaua abe naa ahi kangela ma goronaka de ihidodiawo de ihiduhunu. Abe ngaro o Figelusu de o Hermogenese, ma onangoo ihiporetoka.

^16-17 Masara nako o Onesiforusu, una ma dihiraino de duru ma ngoe wohilaru ngohino. De ngaro ngohi o bui ma tauoka de ihipakiti ma una ko iwimalekua, masara una ma oraha woboa o Roma ma kotaino naa de gea duru wohilingiri hiadono wohimake la ka idadi wohirekata ngohino de hiadono ahi hininga duru iuwini. Ho naa ngohi duru toigo de tonganono la ahao Ma Jou wabole-bole o Onesiforusu ona o tau moi mangale ma titi abe naa ma duru una ai duduhunu ngohino.

¹⁸ De tonganonoo abe ahao ma wange gea abe nanga Baluhu watailako nanga datoro de genangoka tonganono o Onesiforusu wamake to nanga Baluhu ai hininga ma dora unangika ma wange gea. De ngohi tigahoko hokogea mangale ma dihira ma oraha una naga o Efesusu ma kotaka de ai leleani duru irahai abe ai gogianongoruika. De gea o Onesiforusu ai datoro ma oraha gea, ngaro ngonaoo ma duru nihioriki de nihininga, angamoi ngonaoo naga o Efesusoka ma oraha gea ho ngona ma hirete nimake ai leleani de ai duduhunu, ho gea ma titi ho ngohi tigahoko la ahao nanga Baluhu wibole-bole unangika.