2 Tesalonika 3 - Ma Jou ai Demo-demo o Totobelohoka

O Paulusu ona yogahoko onangika la yaniata Ma Jouiye la hiadono o nyawa utu yodogo-dogo iwingaku Unangika

¹ De naa, mia gogianongoru, nagahi utu ma titi minihingahu de migahoko nginika. De ngomi migahoko nginika la niminiata ngomi nenangoka. De gea nia niniata ma goronaka de nimigahoko la nanga Baluhu idodutu ai ade-ade itaiti imahora-hora o nyawa utu manga ngoe-ngoeika abe ma titi to ngomi naa mia uruino. De gea hiadono onangoo ai ade-ade yodafongo de yohoromati enangika abe imaketero hoka ma dihira nginioli niodafongo de niohoromati ai ade-adeika gea.

² De gea nimigahokoo la Una ahao womidatoko o nyawaino abe manga hininga itorou de ko imakataanua de Ma Jou ai mau, done ona gea manga hidee ahao ilaku de gea ngomi ahao mibodito. Angamoi igoungu o nyawa ko mata-mataikaua yangaku o Abari ma Rorahaiika masara o nyawa naga utu imihidee itorou ngomino.

³ Masara nako nanga Baluhu idodutuika, Unangika gea duru ka idadi hingaku de homahinganono Unangika. De nako ngini, ngohi duru tonganono abe Una ahao nia hiningaka winihiputurungu de winidatoko o Ibilihi ma haekino done ena gea inihikala.

⁴ De gea ngomi duru mionganono de mingaku abe ngini ma dodihirainohi de duru nianiikoka to ngomi mia behehongo nginika, angamoi ngomi minihioriki nia gogao nanga Baluhika. Ho mangale ma titi nia gogao nanga Baluhika gea ho hiadono ngomi duru mihioriki abe ngaro mia demo abe nengokadau minihibehehongoka nginika, ma gea duru nianiikoka. Eko ngaro mia demo abe nenangoli mia huratoka de minihibehehongo, ma gea mionganono abe mia behehongo nginika mata-mataika gea ahao ngini duru nianiiki.

⁵ De naa minigahoko la nanga Baluhu idodutu winiduhunu homoi-homoiika nia kokihiningaka la utuohi niataoko itiai Ma Jou ai dora ngini homoi-homoiika. De minigahokoo la nanga Baluhu idodutu ahao winihiakunu la ka idadi ma oraha nia kangela niaohana de nginioo ka idadi niakunu nimatongohono abe gea imaketero hoka o Kristusoli ma dihira abe Unangoo womatongohono abe ai kangela ma goronaka.

O Paulusu ona yahitiari onangika ma titi ona gea abe yodebeturu manga karajaangika

⁶ De naa mia gogianongoru, ngomi minihibehehongo nginika, de gea duru minihibehehongo de nanga Baluhu idodutu o Yesusu Kristusu ai romangino miapake. De gea minihibehehongo miato onagona dika nia gogianongoru abe yodebeturu manga karajaangika, ona gea ngini kiani niadokaowaroka angamoi ona manga debeturu ilaku manga wowangoka. De angamoi ona gea yorehenoka mia dodotokino abe nengokadau minidotoko la gea miadofanga nginika.

⁷ Abe gea ngini marai ka niohiningahi to ngomi mia magawe mia karajaangika ma oraha gea migogere ka nginiokahi. De marai nihiorikoo abe tanu nginioo kiani nimaaduru abe hoka ngomioli mia wowango ma magawe, de genangino ma titi hiadono hokogea minihibehehongo nginika.

⁸ De ma oraha gea ka nginiokahi de ngomi ko ma moiuahi miodafongo o inomo nginioka de aino abe nako ka nimihidoaka dika masara gea mia inomo mata-mata mimaija nginino. De gea ngomi duru ka ihikaika mikarajaanga o futu de o wange done ngomi minihitubuho ma titi to ngomi mia perelu.

⁹ Masara gea tanu naga mia kuaha Ma Jouoka la ka idadi mimagahoko mia inomo nginino, angamoi ngomi naa mihingahu-ngahu o Abari ma Rorahai nginika. Masara mia kuaha gea ko miapakeua abe ma titi nia inomo ko mimagahokua nginino la ahao mia hininga gea idadi o dodotoko moi nginika. De naa ngomi mioigo la nginioo nimaaduru abe hoka ngomioli ma titi mia magawe mia karajaangika.

¹⁰ De gea ma oraha ngomi ka nginiokahi de ma ngoe minihibehehongoka nginika miato, “Onagona dika nia gogianongoru abe yoluku yokarajaanga, ona gea ngaro ufa dika de niahidailako to ona manga inomo.” Hokogea mia behehongo ma dihiraino nginika.

¹¹ Masara ngomi miihenoka abe utu nginioka nia debeturu ilaku nia wowangoka hiadono ngini nioluku nikarajaanga. De gea ngaro ti ngini ma hirete nia karajaanga niapidiloka, ma ngini ka nioigohi la o nyawa utu manga wowangoka niato niaruwae de to ona manga karajaangoo ma niato nihikaaturu.

¹² Ho naa ngomi duru minihibehehongo de minihigaro de nanga Baluhu idodutu o Yesusu Kristusu ai himangoka abe ngini ko nitobakokarajaangua. De hokonaa mia behehongo nginika. De ngini kiani nia hininga iriidoka, de kiani nia karajaanga nimulaengoli niagoraka, de ngini homoi-homoi kiani nimahidailakoli nia inomo. Hokogea minihibehehongo nginika.

¹³ Masara ngini mia gogianongoru utu abe nagahi nia magawe nia karajaangika, nginika minihigaro miato ufa niodebeturu abe o datoro ma rorahaiika, masara gea ena kiani nigila-gila dika niatobaduhunu o nyawaika.

¹⁴ Masara nako nginioka abe yoluku yaniiki mia behehongo ma demo mia hurata ma goronaka naa, de ona gea kiani niatunguuoka nia kokihiningaka. De ona gea kiani ngini o gareja moi niadokaowara la niahimaleke ma titi manga datorino hiadono genangino ahao ona yotoba.

¹⁵ Masara abe niadokaowara, gea kiani nimahidodiai la ufa niaetongo ona gea niato nia musu. Ho gea ufa niato nia musu, masara ona gea kiani niahitiari abe imaketero hoka nia ria-dodoto idodutuika niahitiari. Hokogea mia behehongo ma demo nginika ma titi ona gea.

O Paulusu ai hurata wohibobaha

¹⁶ De naa ngomi minigahoko nanga Baluhu idodutuika ma titi ngini, abe Una gea nanga hininga ma miriidi ma titi. De gea minigahoko la ahao ngaro o kia dika niohimanga masara Una ka ihikaika winihidoaka nginika o hininga ma miriidi. De minigahokoo la nanga Baluhu idodutu Una gea ka ihikaika naga nginioka mata-mata.

¹⁷ De ngohi naa o Paulusu tohibobaha ahi hurata naa de to ngohi ma hirete ahi giama. De abe hokonaa ahi romanga ma getongo tohitulihi abe ahi huratoka de tohitunguu abe igoungu ngohi naa totulihi nginika de ko o nyawa utuinoua iboa. De hokogea tohitunguu la gea ka idadi ngini niangaku naa ma huratika abe ngohioka de aino iboa.

¹⁸ De naa ngomi minigahoko la ahao nanga Baluhu idodutu o Yesusu Kristusu winihiowa ngini mata-mataika.