2 Tesalonika 2 - Ma Jou ai Demo-demo o Totobelohoka

Abe ma titi nanga Baluhu ai Gahe ma wange gea ko adonuahi, de abe ma titi womatengo gea ai wowango itotorou de duru witobalawana Ma Jouika

¹ De naa, mia gogianongoru, moioli minihibehehongo abe ma titi ma oraha nanga Baluhu idodutu o Yesusu Kristusu woboali de Unangoka wonatoomuino.

² De gea minihibehehongo nginika miato done o nyawa inibudi ma titi nanga Baluhu ai Gahe ma wange gea adonokau. Ho gea miato, “Ufa hiadono o nyawa inihipusingi doka nia hiningaka eko iniruwae ma titi o abari ngomino.” Angamoi bote ahao naga o nyawa utu inihingahu nginika ato, “O Paulusu de ai dodiawo ona imihingahuokau ngomino ato nanga Baluhu idodutu ai Gahe ma wange adonokau de masara ngone naa ko wonagorakua.” Ho nako hokogea ahao inihingahu, ma gea borotaua de niangaku manga ngeluku ma demoika gea, angamoi gea ko to ngominoua mia demo. Abe ngaro o nyawa initemo ato, “Gea igoungu, angamoi naga ma hingahu ma demo abe miihene onangino.” Eko marai o nyawa gea yotemo ato, “Ma Jou wahimatoko o Paulusu de ai dodiawoika abe ai Gahe ma wange adonoka, de gea imidotoko ngomino, ho naa ngomioli minihingahu nginika.” Eko ngaro naga ma hurata moi de inihingahu abe gea ma hurata bari ato ngomino, ma gea ufa hiadono iniruwae nia hiningaka, angamoi ena gea ko igoungua de ko to ngominoua mia hurata.

³ Ho ngaro hokokia dika yotemo ma, gea ufa hiadono o nyawa inibudi ma titi ai Gahe ma wange woboa abe adonokau. Angamoi hohioriki ai Gahe ma wange gea ko adonuahi de naga ma titi muruono kiani idadiokau. Abe gea kiani o nyawa duru ko manga ngoe iwilawana Ma Jouika, de nagaoo kiani idadioka abe una gea womahimatokokau abe ai wowango itotorou de duru witobalawana Ma Jouika. Abe gea Ma Jou wihideeoka wato una gea ahao duru wihibinaaha o Narakaika.

⁴ De ngaro o pangao eko naga o jou utu eko naga o kia dika abe o nyawa yomahijou enangika, ma, gea mata-mataika una gea ai wowango itotorou duru watobalawana de wahitipokouku de gea wato ka unangohi ma hirete wokurutiye. De gea una duru womagorakiye hiadono wogogere Ma Jou ai Tau ma goronaka de ahao o nyawaika womahingahu-ngahu wato, “Ngohi naa Ma Jou.” Ho nako hokogea una womahimatokoka de nagali abe o nyawa ko manga ngoe duru iwilawana Ma Jouika, gea kiani idadiokau de ahao ka idadi nanga Baluhu idodutu ai Gahe ma wange iboa.

⁵ Abeika nimahohiningahi. De mode gea ahi demo ngini niawohangoka abe ma oraha ngohi nginiokahi abe tinidotoko ma demo gea?

⁶ De abe ma titi una gea ai wowango itotorou, ma oraha naa de una gea ka iwitumungohi, done ai oraha ko adonuahi de una gea womahimatokoka. De ma titi gea ngini duru nihiorikoka.

⁷ Abe igoungu o tobalawana ma kuaha ngaro ma oraha naa ena imulaengokau ikarajaanga o duniaka, masara ena gea ka imatohi-tohikohi dika ikarajaanga. De hokogenangohi dika ikarajaanga angamoi ma oraha naa naga womatengo abe ka watumungohi o tobalawana ma kuaha gea. De Una gea ka wogila-gilahi watumungu ka hiadono Ma Jou wigoraka Una abe watobatumungu. Ho nako hiadono Ma Jou wigorakoka, de ahao o tobalawana ma kuaha gea ko imatohikokaua ikarajaanga o duniaka, ma gea ka idadi itagi-tagi o kiaika dika abe genangika yoigo.

⁸ De gea wigoraka ipaha de ahao una abe ai wowango itotorou de witobalawana Ma Jouika, ma oraha gea ahao ka idadi womahimatoko. Masara ipahaika de ahao ma oraha nanga Baluhu idodutu woboali de una gea wihihohonenge de ai demo o doaka moi dika. Abe gea ka de o Yesusoli womahimatoko de wihibinaahaka una gea de ai medebini ma dararono.

⁹ De masara abe ma oraha o Yesusu ko woboauahi de womatengo gea ai wowango itotorou una gea woboa. De woboaino de gea duru wapake o Ibilihi ma kuaha la hiadono o nyawaika wahihera-heranga de ai dodunguu de ai heheranga irupa-rupa. Masara abe wahihera-heranga, gea una wato wahibudioo abe ai dodunguu de ai heheranga gea o ngelu-ngelukino dika.

¹⁰ Abe gea una ai budi ma dorou mata-mata wapake la ka idadi wahibudi o nyawaika abe ahao Ma Jou wahibinaaha ona gea. Angamoi ona gea yaolukoka Ma Jou ai gou-goungu ka hiadono ko yoodoraua enangika. Masara nako hoka ma dodihiraka de yoodora ai gou-goungika, ona gea ahao ka idadi Ma Jou waduhunu manga hohowonino gea, masara ona ka yaoluku dika ai gou-goungu ho ko idadiua waduhunu.

¹¹ Ho mangale ma titi ona gea yaolukoka ma gou-goungu ho hiadono Ma Jou wahidiai manga hiningaka la duru igapanga yongaku o nyawa manga budi ma demoika. De gea ipahaika de ahao ona angaku una ai wowango itotorou ai hingahu ma demoika, abe ai demo gea duru o ngeluku moi.

¹² De hokogea Ma Jou wahidiai la wato ma bahaika de ona mata-mataika abe ko yangakua ma gou-goungika masara duru yoigo ma dorou yodiai, ona gea ma bahaika de Ma Jou wahohowono.

Abe ma titi ngone hingaku-ngakuoka ahao ko wonahibinaahakaua masara wonahideeoka wato ahao hamake ai medebini ma dararono

^13-14 De naa, mia gogianongoru abe duru nanga Baluhu idodutu winidora, ngomi naa ka ihikaika mitarimakase Unangika ma titi ngini. De gea ngomi miato mia tarimakase ma demo itaana angamoi ma dihiraino ngini winiirikoka la wato ka idadi ngini ngaro ufa dika de nginioo niamake ma hohowono abe hoka ona gea ko yangaku-ngakua ma gou-goungika ona gea ahao kiani yamake. Ma nako ngini, winiirikoka la ahao nia baha adonoka de ka idadi winihidoaka nia utumu nginika. Abe nia utumu gea ngini homoi-homoi ahao o hidoku niaborimake ma titi to nanga Baluhu idodutu o Yesusu Kristusu ai medebini ma dararonino niamake. Ho gea ma titi ho hiadono ma dodihiraino de Una winiahoko nia ngongakuino, la gea ahao nia baha adonoka de gea ena ahao niamake. De gea winiahoko o Abari ma Rorahaiino abe ngomi ma dihira minihingahuoka genangoka. Abe ma oraha gea ngini niodafongoka o Abari ma Rorahai de gea Ma Jou waputuhoka wato ma titi Ma Jou o Womahino winitingakino la gea nidadi to Una ai nyawa de niwileleani ka Unangika dika. Ho mangale ma titi nia leleanino de nia ngongaku abe ma gou-goungino hiadono ahao ka idadi nginioo niamake ai medebini ma dararono angamoi ahao ma wange gea de ngini naga nanga Baluhu idodutuoka.

O Paulusu ona yahigaro onangika la ato kiani yomatongohono manga ngongakuoka

¹⁵ Ho naa mia gogianongoru, minihibehehongo nginika kiani ka ihikaika nimatongohono nia ngongakuoka de ufa nimahipipidili mia dodotokino. Abe ngaro ma dihira mia uruoka de aino niamake mia demo eko ngaro abe mia huratino, masara gea mia demo mata-mata kiani ka ihikaika nimahigagaoika genangika la inihiputurungu.

O Paulusu ona yagahoko Ma Jouika la ahao Una walaru de wahiputurungu onangika

^16-17 De naa minigahoko nanga Baluhu idodutu ma hirete o Yesusu Kristusu de nanga Baba Ma Jouiye. De minigahoko la Una winilaru de winihiputurungu nia kokihiningaka la hiadono nia datoro de nia demo mata-mata gea ena ka ma rorahai dika. De gea mininiata de mihioriki Ma Jou ai hininga ma owa ngoneuku, abe gea ka ma dodihirainohi de Una wonadora ngoneino. De wonahidoakoka o higaro ma totiaiika abe ko ihoa-hoanua, de wonahidoakoo nanga nganganono abe ngone ahao hamake o Horoga. De nanga nganganono gea ahao ko ikelu-kelua. Hokogea mia hininga de mia gogahoko Unangiye ma titi ngini.