2 Tesalonika 1 - Ma Jou ai Demo-demo o Totobelohoka

O Paulusu ona manga demo ihira-hira manga gogianongoru o Tesalonika ma nyawaika

¹ Mia gogianongoru o Yesusu Kristusoka abe nimanoa o Tesalonika ma kotaka. Ngomi naa o Paulusu, o Silasa, de o Timotiusu. De naa mia hurata mihidingoto abe ngini o Tesalonika ma garejaika. De gea ngomi minihiorikoka abe ti ngini nia gogere naga nanga Baba Ma Jouoka de nanga Baluhu idodutu o Yesusoka, abe Una gea nanga Koano abe Ma Jou wonahibehehongoka.

² Ho naa ngomi minigahoko nanga Baba Ma Jouiye de nanga Baluhu o Yesusu Kristusiye la ahao ai owa de ai hininga ma miriidi winihidoaka nginika.

O Paulusu ona yotarimakase Ma Jouiye ma titi o Tesalonika ma nyawa manga ngongaku de manga dora

³ Mia gogianongoru, ngomi nenangoka ka ihikaika mitarimakase Ma Jouiye ma titi ngini, angamoi gea miihenoka abe ngini nia ngongaku Unangika ka idogo-dogo de nagali nia doraoo ma idogo hiadono ngini duru nimakodora. Ho gea ma titi nia ngongaku de nia dora gea hiadono ngomi miato duru itaana abe miato kiani ngomi naa mitarimakase Unangiye ma titi ngini.

⁴ De gea ma titi ngini hiadono ngomi duru mia hininga de ma garagoka miade-ade Ma Jou ai gogareja utuikali ma titi ti ngini nia ngongaku de nia dora gea. De gea miade-adeoo onangika abe nia ngongaku ibitumoka hiadono ngaro o nyawa inihikangela ma titi niwingaku Unangika masara ka nimatongohonohi. Ho gea igoungu naga ma hohangihara de ma kokangela idadioka nginioka masara ka nia dongohonohi ilaku nia hiningaka.

Abe ma titi ahao Ma Jou duru itiai woputuhu de wahibalaha o nyawa manga datoro

⁵ De duru totarimakase Unangika ma titi ngini, abe ma oraha naa de ngini o kokangela niaohana, de gea ma titi abe ngini niwihigunoa la Ma Jou winihikoano nginika. De ahao ma oraha abe Ma Jou wonatailako nanga datorino, de gea ma oraha abe duru itararono o nyawaika abe Una gea ai hibalaha o nyawaika duru imataana de abe manga wowango ma datoro ma dihiraino o dunia ma lokuokahi yodiai. Ho mangale ma titi ngini nia kangela ma goronaka gea de nimatongohono ho duru mionganono Una ahao waputuhu wato ngini naa igoungu nimahitaanoka to Una ai kokawaaha ho ka idadi niwohamika Ma Jou ai ngiika. De ma ngi genangoka, gea wahikoano to Una ai nyawa mata-mataika.

⁶ De ona gea abe ma oraha naa inihikangela nginika, onangoli ahao ma wange gea de Una watailako de waputuhu wato, “Naa ngohi tahibalaha onangika de o kangela,” angamoi Una gea duru itiai waputuhu.

⁷ De masara nako nginikali, gea ahao winihibalaha de o hiaini la gea ibootohi niaohana o kangela, de genangoo iwihitaana abe Ma Jou duru itiai waputuhu ma titi nanga datoro. De gea ngomioo ahao ka idadi mimahiaini mia kangelaino abe imaketero hoka nginioli. De ahao adonoka ma wange gea abe Ma Jou wonahimatoko ngoneino nanga Baluhu idodutu o Yesusu, de genangoka de aino imulaenge nanga hiaini o kangelaino. Abe ma wange gea de nanga Baluhu o Yesusu o Horogaka de wauku woboa de gea iwiniiki ai momalaekata abe ona gea duru ka de manga bobuturungoka,

⁸ de naga onangoka moi o uku abe ma dokara duru kohaamoko abe ona gea yahigilolitino. De ma oraha gea nanga Baluhu woboali de ahao Una wahibalaha de wahohowono onangika abe ona gea iwiporetoka Ma Jouika hiadono ko iwihiorikua. Angamoi ona duru yoluku ihigihene de ihingounu abe o Abari ma Rorahaiika abe ma titi nanga Baluhu idodutu o Yesusu.

⁹ De to ona gea manga hohowono o bobinaahaika abe ko iwa ma baha ka hiado-adonika. De gea ma titi manga hohowono hiadono ka ihikaika yomakitingaka ona de nanga Baluhu. Ho gea duru ko idadiokaua iwimake Una de ko idadiokaua yamake to Una ai buturungu de ai medebini ma dararono. De genangoka de aino ngone o nyawa mata-mata hohioriki de duru itararono abe nanga Baluhu idodutu Una duru itiai waputuhu ma titi wonatailako nanga datoro.

¹⁰ De mia demo abe minihingahuoka nginika, gea mata-mata ahao idadi ma wange gea abe Una woboali. De ma wange gea de ahao ngone ai debi-debini ma nyawa himake abe ma oraha woboa de gea naga to Una ai medebini ma dararono Unangoka. Angamoi igoungu ma wange gea ngone hingaku-ngakuoka mata-mata ahao duru hiheranga de hiadono duru hihigiriiri Unangika. De nginioo ahao naga ngomioka ma oraha gea la homakutuono hihigiriiri Unangika, angamoi ngini nengokadau ningakuoka mia demoino gea abe minihingahuoka nginika ma titi Una. Ho ngomi duru mitarimakase Unangika ma titi abe ti ngini nia ngongaku de nia dora ka iputurungohi hiadono ma oraha naa naga.

O Paulusu ona yagahoko manga gogianongoru o Tesalonikaka

¹¹ Ho mangale ma titi nginioo ahao naga de de ngomi abe ma wange gea woboali de hihigiriiri Unangika, ho hiadono ngomi duru ka ihikaika mininiata Ma Jouiye. De gea minigahoko la ti ngini nia hininga de nia wowango gea imakataana de to Una ai mau nginika la gea ka idadi niwihisanangi Unangika de gea winimake abe nia wowango itaana abe hoka itiai ai nyawa howango. Angamoi Una winiahoko ngini la wato nianiiki to Una ai hininga. De ngomi minihioriki nia hininga, abe nginioka naga nia hininga de nia hidee ma rorahai abe nia ngongakuoka de aino iboa. De gea minigahoko Ma Jouika la Una ahao winihiakunu hiadono ngini ka idadi nidiai de nihingodumu nia hininga ma rorahai mata-mata.

¹² De hokogea minigahoko Unangiye la ahao o nyawa inimake nia wowango de nia hininga de genangino ahao ona iwihigiriiri nanga Baluhu idodutu o Yesusu ai romangika ma titi ngini. De gea nginioo ahao o higiriiri niamake ma titi nia gogao Unangika. De hokogea ngomi mionganono ahao idadi nginika angamoi mihioriki Ma Jou ai hininga nginika abe Una wato winihiowa. Abe gea ai owa ahao iboa nanga Jou de nanga Baluhu idodutu o Yesusu Kristusoka de aino. Hokogea ngomi mininiata Unangiye ma titi ngini.