2 Tawari 9 - Ma Jou ai Demo-demo o Totobelohoka

O ngo koano o Siebaino moboa la o Saloomo mirekata

¹ De naga momatengo o koano abe o Sieba ma nyawa manga tonakoka mahikoano de muna moihene o Saloomo ai ade-ade abe duru o nyawa yahiheranga de itagi o tonaka mata-mataika ai ade-ade. De ma oraha muna gea moihene o Saloomo ai ade-ade de muna momaputuhu mato kiani mitutumu. Ho muna ahao moboa o Yerusaleeme ma kotaino de muna mato o Saloomo mitaili de ami leleha ma ngoe abe duru ihuha o nyawa yapaluhu. De ami nyawa duru ko manga ngoe iminiiki ami dodagioka de naga manga unta ma ngoe abe to ena ma gina o rampa-rampa, de o gurasi ma dutu kohaamoko, de o hakaru kohangoe ma hohailoa abe o fara ma ngoe naga ma leto-letongo ena gea abe duru ihali ma ija. De o ngo koano gea de o Saloomo ma oraha yomarihimanga de mihingahu unangika abe naga ami hininga momahidiaioka ami leleha unangika.

² De o Saloomo ami leleha mata-mata wapaluhu de ko iwa moi abe ko wataanua angamoi wososawaro womihitararono de ma titi o kia dika abe genangika ami leleha.

³ De gea o ngo koano o Siebaino ka de mamake o Saloomo ai sosawaro de hokokia ma rorahai ai koano ma tau abe womadiai, de muna duru moheranga.

⁴ De mamakeoo manga inomo ma hidiai o Saloomo ai mejaka, de ai popareta ma nyawaika manga gogogere ma ngi-ngi de manga seragama homoi-homoiika duru ma rorahai, de mamake abe ai leleani ma nyawa manga karajaanga duru itiai. De ona abe manga tagongo o Saloomo ai ngokere to ona manga baju ma gogurutuku abe duru ma rorahai. De muna naga miniiki o Saloomo ma oraha wahihuba ai huhuba iharo-harongo Ma Jou o Yawe ai Tauoka. Ho mata-mataika gea o ngo koano o Siebaino duru moherangaholi ka hiadono ami hiningaka ngade-ngade ililifangoka.

⁵ De muna mihidaere o Saloomoika mato, “Ma dihira ani ade-ade toihenoka to ngohi ahi tonakoka abe ma titi ani karajaanga ma hasili de ani sosawaro de duru igoungu ma ade-ade gea mata-mata abe naa ngohi tamakeoka.

⁶ Masara tomangaku ma dihira ngohi ko tongakuahi o nyawaino ma abari ma titi ngona, ma ka de ngohi toboaino de ahi lako hinooto tamake de duru igoungu mata-mata. Abeika ngaro ani sosawaro de ani karajaanga ma hasili ma hononga dika de o nyawa ko yangodumuahi yoade-ade. Utuohi to ngona natilakurika ma rorahai abe ona ihihingahu ngohino.

⁷ De abeika ani duduhunu manga ngoe de ona gea abe initobaleleani ani tauoka, abe ona duru youtumu de yamake ma hiowa ma amoko angamoi ona o wange-wangeiye naga ngonaka de ka ihikaika yoihene ani sosawaro ma demo.

⁸ De Ma Jou o Yawe, abe to ngona ani Jou, Una igoungu duru wopoputurungu! Una duru wonisanangi ngonaika de wonihigogere o koano ma kaderaka la ngona wonipake ai nyawa nahipareta. De angamoi Ma Jou duru wadora o Isiraele ma nyawaika hiadono Una wahiaturu la manga kokoano ka ihikaika ani baba de to una ai totoforauku. Una wonihidadi manga koano la ngona nahikoano de o totiai de abe naurusu enangoo duru itiai.” Hokogea o ngo koano o Siebaino ami horomati de ami higiriiri ma demo o Saloomoika.

⁹ De ahao muna ami hadia mihidoaka o Saloomoika duru ilamoko abe o gurasi ma dutu o kilo o sana iata ifoloi ma dubuho. De ami hidoaka utu o rampa-rampa naga o fara ma ngoe abe utu ma bounu duru ma rorahai abe genangino o manyanyi o nyawa yodiai. De nagaoo o hakaru kohangoe ma hohailoa abe o fara ma ngoe naga duru ileto-letongo mata-mata. De abe ma titi ami hadia ma rampa-rampa ko ma moiuahi ona o Isiraele ma nyawa yamake manga tonakoka abe ena gea irorahai imakadaene abe hoka ena gea o ngo koano o Siebaino mihidoaka unangika.

¹⁰ De ma dihiraino abe ma oraha Ma Jou o Yawe ai Tau ko ihigokuahi de ma koano o Hurama de o Saloomo manga huhuloko ma nyawa manga kapa ahidete. De manga kapa gea yapake la Ma Jou ai Tau ma hidiai ma kiahonanga ona ihibarene de yaoino o Ofiri ma tonakoka de aino, de gea yaoino o gurasi ma dutu. De utuoli abe yaoino o hakaru ma leto-letongo de o sendana ma gota.

¹¹ De o Saloomo una ahao o sendana ma gota gea wapake ma nguteoka abe to una ai tauoka de abe Ma Jou o Yawe ai Tau ma himangoka. De ma gota gea utu wapake la yodiai o totabua biaha de o totabua ma amoko abe ma tali kohangoeoko de adingakoka o musikika. De ngaro ma dihiraino ka hiadono ma oraha gea masara ko ma moiuahi naga o totabua ma rorahai hokogea o Yehuda ma tonakoka.

¹² De naa ma oraha o ngo koano o Siebaino naga o Saloomo ai tauoka de o kia dika momagahoko una womihidoaka. De nako to una ai hadia munangika de ami hadia abe mihidoaka unangika hohikohowono de o Saloomo to unangohi ai hadia munangika abe ilamoko de ihali. De ipaha muna de ami kokawaaha yokokilio to ona manga tonakika.

O Saloomo ai kaya ma ade-ade

¹³ De o tao-taongiye o Saloomo wamake o gurasi ma dutu hiadono ma biaha o kilo o sana monaoko de hange o gurasi ma dubuho abe wamake o taongo amomoiino.

¹⁴ De utuohi o Saloomo ai utumu ka ihikaika wamake abe naga ona yotobafuku-fukunu de ona ihiketehituruuru manga kiahonanga kiani manga utumino ma hidoku moi iwihidoaka unangika. De o Arabino manga kokoano homoi-homoiika de o tonaka manga gubernuuru homoi-homoiika ona mata-mata o tao-taongiye naga manga hidoaka o gurasi de o haaka yoboa iwidotaka o Saloomoika.

¹⁵ De nagali abe o Saloomo wodiai o parangi ma dadatoko o ratuhu hinooto ma ago-agomo abe yodutuku o gurasino ho amomoi ma dadatoko gea yapake o gurasi ngade-ngade o kilo tumidi ma dubuho.

¹⁶ De yodutukoli o gurasino ma rupa o parangi ma dadatoko ma hohumuduru ma gahumu o ratuhu hange abe homoi-homoiika yapake o gurasi ngade-ngade o kilo hange ma dubuho. De o dadatoko mata-mata gea wadide o koano ai tau moi ma goronaka abe ihiromanga o Libanono ma fongana ma tau.

¹⁷ De ahao o koano womadiai ai kadera duru ma amoko o aewani o gaja ma hihipatino de ahao ihilape ma poretino de o gurasi ma dutu.

¹⁸ De ai kadera gea naga o ngute ma dodoko butaangaiye de daku ma bareniye naga ai lou ma dederu abe ka ihidatahumika de ma kadera. De o kadera arihonongaka naga ai giama ma dederu de naga imaokoino o kadera arihononga ma rupa o boki o singa.

¹⁹ Abe ma rupa o singa gea naga ma gahumu ngimoi de hinootohi abe o kadera ma ngute ma dodoko ihietongo abe amomoiiye o dodoko arihonongaka naga o singa ma rupa moi imaokoino. Ho ngaro o dunia ma amokika ko iwa o kadera utu ma rahai hoka o Saloomo ai kadera ma hohailoa.

²⁰ De o Saloomo ai mangko mata-mataika yodiai o gurasino de to una ai dodai mata-mata abe yapake o koano ai tau ma goronaka ma romanga o Libanono ma fongana ma tau, enangoo yokokidiai o gurasino. De abeika ngaro o haaka ena ihali masara ma oraha o Saloomo de ngade-ngade o haaka ko iwa ma ija angamoi iwoeholi o Yerusaleeme ma kotaka.

²¹ De o Saloomo naga ai kapa yahidete o duduono moi abe homoi-homoiika naga o nau-nauru yatobaao de ona gea yoboa ma koano o Huramoka de yaino. De ona yohidete ihidulu-dulu moduku o nuu-nuuhika yomaketeturuuru o kiahonanga de o taongo hange ma moi yolio o Isiraele ma tonakino. De manga kiahonanga ihibare-barene ma hali-hali dika, abe o gurasi, o haaka, o gaja ma hihipata, o mia ma amoko abe yotobapaliara, de o totaleo duru ma rorahai abe ona yokaya-kaya dika yotobapaliara abe ma ija kohahali, de ena gea mata-mata idadi o Saloomo ai kiahonanga.

²² Ho o Saloomo ka ihikaika ai kaya de ai sosawaro ka idogo-dogo hiadono ngaro o dunia ma amokika ko iwa o koano utu abe manga kaya eko manga sosawaro imakadaene hoka to unangoli.

²³ De o kokoano o tonaka mata-mataino yoboa iwitutumu la ka idadi youtumu ai sosawaro ma demoino abe ai sosawaro gea Ma Jou wihiakunu unangika.

²⁴ De o tao-taongiye ka ihikaika naga o nyawa yoboaino la iwitutumu o Saloomoika. De ngaro onagona dika naga yoboa iwitutumu ma kiani de manga hadia abe yoigo iwihidoaka unangika. Ho manga hidoaka hoka o haaka, de o gurasi, de o pakeanga duru ma rorahai, de o parangi ma dae, de o rampa-rampa, de o kuda, de o keledai, ho gea ena mata-mata naga abe iwihihadia o Saloomoika.

²⁵ De o Saloomo ai kuda ma kurunga yokokabatingi hiadono naga o kuda ma ngi o sana iata abe genangoka yakurunga ai kuda amomoiika abe yatobatauru o goroba ma rorahai. De nako ai kuda mata-mata ma ngoe gea o sana ngimoi de hinooto. Naga ai tonakoka o kota utu ihiromanga o parangi ma goroba ma kota de ai kuda ma ngoe wohiregu la naga utu yapaliara o goroba ma kota-kotaika de utu yapaliara ai kuda ma ngioka abe imahitigika o Yerusaleeme ma kotaika.

²⁶ De o Saloomo wahipareta o kokoano mata-mata abe ihikoano o tonaka o Efaraata ma akeroka ka hiadono o Filistina ma nyawa manga tonakika de imahikaiyeoli ka hiadono o Mesiiri ma tonaka ma batingika. Ho ai kuaha ko o Isiraele ma nyawaikaua dika masara o nyawa abe yogogere manga datekoka ai kuaha yadaene onangikaoo.

²⁷ De ma oraha o Saloomo wohikoano naga o haaka o Yerusaleeme ma kotaka duru kohangoe hiadono ngade-ngade hoka o hakaru dika ma ngoe ho ko iwa ma ija ngaro o dunia ma amokika o haaka ma biaha to ena ma ija ihali. De o semara ma gota abe ma dihiraino duru ihali ma ija masara ma oraha o Saloomo enangoo kohangoe o Yerusaleeme ma kotaka hiadono yapake imaketero hoka o gota biaha abe iwango o Yehuda ma tonaka ma loku-lokuoka.

²⁸ De abe o Saloomo ai kuda gea ma ngoe yaijaino o Mesiiri ma tonakino de o tonaka utuino.

O Saloomo ai wowango ma baha ma ade-ade

²⁹ De naga utuohi iwoe ma ade-ade abe idadi ma oraha o Saloomo wohikoano de ena mata-mata naga ihitulihukuoka o buku hangeoka abe ma romanga, “O Ade-ade abe Ma Jou ai uru ma dodofanga o Natana wohitulihi,” de ma buku moioli, “O Himatoko Ma Jouino abe o Ahia wotulihuku,” abe o Ahia gea una o Siloino ma nyawa. De o buku ma hange ma romanga, “O Himatoko o Idoika,” abe una wotobahioriki abe ahao idadi de wohitulihi ma titi o Nebata ai ngofaka o Yerobeama.

³⁰ De o Saloomo wogogere o Yerusaleeme ma kotaka ai taongo moruatino ma dekana de hokogenangoo ma dekana abe wahikoano o Isiraele ma nyawa mata-mataika.

³¹ De ma oraha una wohonenge iwilungunu ai baba o Dautu ai kotaka. De ahao o Saloomo ai ngofaka o Rehabeama unangoli wituruuru wodadi o koano.