2 Tawari 6 - Ma Jou ai Demo-demo o Totobelohoka

O Saloomo ai hiowa ma demo ai kokawaahaika

¹ De ahao o Saloomo womaniata, wato, “Ngona Ma Jou o Yawe, abe nomangiriki la nomanoa daku o lobi-lobioka ngaro o fufutu ma goronaka.

² De naa ngohi tonihidiai to Ngona ani tau abe duru ma rorahaiholi, ho ngohi tonganono idadi to Ngona ani ngi abe ka hiado-adonika ka idadi nomanoa ma goronaka.”

³ De ahao o Saloomo womadogilioro onangika gea abe wahikoano la wahimanga o Isiraele ma nyawa manga doomu ma amokika abe yomakokiokoino de ona wahiowa de ai demo hokonaa, wato,

⁴ “Ngone kiani hihigiriiri Ma Jou o Yawe, o Isiraele ma nyawa nanga Jou, abe ai behehongo ahi babaika gea wohingodumu o wange naa. Hokonaa abe nanga Jou ai behehongo ma dihira ahi babaika, wato,

⁵ ‘Dautu, hokonaa tonihingahu, ka de o wange gea ahi nyawa tahihupu o Mesiiri ma tonakino masara Ngohi ko tolingirua o kota moi o Isiraele ma nyawa manga dutu-dutu ma hidogoronaka abe ka idadi ma kota gea tomadingaka Ngohino. Abe ma titi o kota gea tomangiriki la ona ihigoko o tau moi la yomahuba-huba Ngohino genangoka de ahi romanga yagorakiye de manga horomati Ngohino, ma kota gea ko tomangirikuahi. De ngaro o nauru abe tihidoaka ma kuaha unangika la wahihira ahi nyawa o Isiraele ma nyawa, ma, Ngohi ko moiua tiiriki ka hiadono ma oraha naa.

⁶ Masara naa Ngohi tomaputuhoka abe o Yerusaleeme ma kota tairikoka la idadi ahi gogere ma ngi de Ngohi toniiriki ngona, o Dautu, la nodadi o Isiraele ma nyawa manga koano.’” Hokogea Ma Jou ai behehongo ahi baba o Dautika.

⁷ “De igoungu, ahi baba o Dautu duru woigo de ai hininga ma gahumu la wodiai o tau moi abe widingakoka Ma Jou o Yaweika la ka ihikaika genangoka to Una ai nyawa, o Isiraele ma nyawa, ai romanga yagorakiye.

⁸ Masara Ma Jou o Yawe wihingahu ahi babaika, wato, ‘Angamoi ngona duru ani hininga ma igo la ahi tau nodiai la ahi romanga o nyawa yagorakiye genangoka, Ngohioo tosanangi ani hininga gea abe ihititi ma owaka dika de aino.

⁹ De ngaro ani igo hokogea ma rahai ma, ko ngonaua abe itiai nodiai ma tau gea. Masara naga ani ngofaka idodutu de Ngohi tiiriki una la wohigoko ahi tau gea la ahi romanga o nyawa yagorakiye o tauoka gea.’” Hokogea Ma Jou wihibehehongo ahi babaika.

¹⁰ “De abeika! Naa ngone hamakeoka abe Ma Jou o Yawe duru wohingodumoka ai behehongo gea. Ngohi naa todadioka ahi baba, o Dautu, ai duruuru hiadono ngohi togogere o Isiraele ma nyawa manga koano ma kaderaka. De ngohi tohigoko o Isiraele ma nyawa manga Jou ai tau la genangoka ka ihikaika Ma Jou o Yawe ai romanga o nyawa yagorakiye. Ho igoungu, naa idadioka duru imaketero abe hoka Ma Jou o Yawe ai behehongo abe ma dihira wahibehehongo o Isiraele ma nyawaika.

¹¹ De genangoka to Una ai tau ma goronaka tohiaturu la Ma Jou ai Behehongo ma Peti ihingohamoka. De o Behehongo ma Peti ma goronaka naga Ma Jou o Yawe ai behehongo ma hakaru hinooto abe gea ena ma titi Una de o Isiraele ma nyawa ma dihira de yomahiketehibehehongokau.” Hokogea o Saloomo ai hiowa ma demo o Isiraele ma nyawa manga doomu ma amokika gea.

⁴⁰ De ahao o Saloomo womagahokohi Ma Jou o Yaweika, wato, “De naa, ahi Jou duru togahoko la ka ihikaika nomilega-lega ngomiuku de nomigihene ma oraha ngomi naga ani tau naa ma goronaka de mimaniata Ngonaiye.”