2 Tawari 20 - Ma Jou ai Demo-demo o Totobelohoka

O Yosafata wohikoano irahai o Yehuda ma tonakoka

¹ De ipahaino de ahao naga o homoa ma nyawa abe yomaputuhu ato iwiparangi o Yosafatika. Abe naga o Moaba ma nyawa de o Amono ma nyawa manga tentara yatoomuino de nagaoo o tentara ma hononga abe o Seiri ma lokuino de yodadi o tentara ma doomu ma amoko. De hokogea yomakuduhunu la utuohi yoputurungu iwiparangi o Yosafatika.

² De naga o nau-nauru yoboa o Yosafatino de ma abari gea, ato, “Mia koano, naa naga o tentara duru ko manga ngoe yomatoomuino de manga dumutu yoboa la inaparangi. Ona yoboa o Edomo ma tonakino abe doka o gahi ma honenge ma honongaka de ma oraha naa ona yomahiadonoka o Hasesono-Tamarino. Ma ngi gea naga ma romanga hinooto abe o nyawa utu ihiromanga ato o Ene-Gedi.” Hokogea iwihingahu manga koano o Yosafatika.

³ Ka de o Yosafata manga hingahu gea woihene de ai hawana ipuda de womaputuhu abe duru ihira wodiai kiani womaniata Ma Jou o Yaweika la wamake to Una ai ngekomo. De kiani ai kokawaaha to onangoo manga hininga ma dumutu moi dika de gea la ona mata-mataika iwiniiki yomagahoko Ma Jouika. Ho o Yosafata wahibehehongo la ona o Yehuda ma tonakoka mata-mataika ufa yolomo ka hiadono yamake Ma Jou ai hininga onangika.

⁴ De ahao o Yehuda ma nyawa duru ko manga ngoe yoboa o Yerusaleemino. De igoungu, ona ka hiadono naga manga kota mata-mataino yoboa yomatoomuino manga koanoino la iwiniiki yomagahoko o duduhunu abe Ma Jou o Yaweino.

⁵ De abe Ma Jou o Yawe ai Tauoka naga to ena ma loa ma hungi, de genangoka yomatoomuino de ahao o Yosafata womaokoino manga doomu ma himangoka.

⁶ De una womulaenge womaniata la ona mata-mata ka idadi yoihene ai niniata ma demo, wato, “Ma Jou o Yawe, Ngona abe mia totofora yomahijou Ngonaika, Ngona ma Jou abe nogogere daku o Horogaka. Ngona nopoputurungu hiadono o nyawa mata-mataika nahipareta de ani kuaha hiadono o tonaka homoi-homoiika o dunia ma lokuoka to Ngona ani kuahaka. Ho ngaro ona naga de manga koanoka eko manga popareta utu abe yahihira-hira masara ona mata-mata to Ngona ani giamoka! Ho ko moiua naga o nyawa abe ka idadi inilawana de hiadono yolaku.

⁷ To ngomi mia Jou, ngomi naa duru mimahihohininga ma titi mia tonaka naa abe Ngona nomihidailakoino. Abe gea Ngona ma dihiraino de naduhu o tonaka ma dutu abe yogogere nenangoka hiadono nahihupu ani tonakino naa. Hokogea nomihidailako mia tonaka abe ena mata-mataika nomihidoakoka ngomino o Isiraele ma nyawaino abe nomihidadi to Ngona ani nyawa. Ngona duru ma dodihiraka nihibehehongoka ani dodiawo o Abarahaamika nato o tonaka naa idadi to una ai totoforauku manga tonaka ka hiado-adonika.

⁸ De ka hiadono ma oraha naa ngomi, ani nyawa, migogere o tonakoka naa. De ma dihira mia totofora ihigoko to Ngona ani tau naa la to Ngona Ma Jou o Yawe ani romanga ka ihikaika miagorakiye de mia horomati ilamoko Ngonaika de mimahinganono Ngonaika miato,

⁹ ‘Nako ahao naga o kokangela imidaene ngomino ngaro gea o hohowono abe de o parangi ma dae, eko de o panyake duru ikiriakaholi, eko de o hiwara hiadono mia inomo ko iwaka, masara ngomi miboa nenangino mimahinganono ka Ngonaika dika. Ngaro mia kangela o kia dika naga ahao ngomi duru to Ngona ani himangoka abe ani tau ma himangoka naa mimahidoaka mia huha Ngonaika de mingaku Ngona ahao nomihigihene de nomihihupu mia huhaino.’ Hokogea mia gogahoko ma demo Ngonaika.”

¹⁰ De o Yosafata wogila-gila womaniata wato, “De abeika mia kangela ma oraha naa! Naga o Amono manga tentara, de o Moaba manga tentara, de o Seiri ma lokuino manga tentara abe ato imiparangi. O nyawa abe imingino naa, ona gea abe ma dihira mia totofora o Isiraele ma nyawa ko nahigunoaua yangohama o nyawa gea manga tonakika ma oraha yohupu o Mesiiri ma tonakino. Ho o nyawa abe ma tona-tonakoka gea duru youtumu angamoi mia totofora gea yarehene de ko yahibinaahaua onangika.

¹¹ Masara abeika to ona manga hininga ngomino ma oraha naa. To ngomi mia datoro ma owa masara ona imihibalaha de manga datoro ma dorou. Abe ona yoboa naa de manga tentara la imihihupu mia tonakino abe Ngona Ma Jou nomihidoaka la idadi to ngomi mia oara.

¹² Ho to ngomi mia Jou, nako hokogea yodiai ngomino de mode Ngona ko iwa ani hohowono onangika? Angamoi to ngomi mia buturungu duru ko iwa ka hiadono ka idadi ngomi mimarihimanga de o tentara ma doomu ma amoko gea abe manga dumutu imingino imiparangi. Mia Jou ngomi ko mihiorikua o kia kiani midiai masara mia nganganono ma dumutu duru ka Ngonaika dika.” Hokogea o Yosafata wagahoko ai nyawa mata-mataika.

¹³ De gea nagahi o Yehuda ma nyawa manga nau-nauru mata-mata yomaokoino genangoka ka ma moi de manga feka-fekata de manga ngofa-ngofaka, de ona mata-mata duru yoriidi Ma Jou o Yawe ai himangoka.

¹⁴ De ahao Ma Jou o Yawe ai Womaha wingohama o baluhu womatengo abe womaokoino manga doomu ma goronaka, una gea ai romanga o Yahasiele, abe to una ai baba o Sakaria, de to unangoli ai baba o Benaya, de to unangoli ai baba o Jeiele, de to unangoli ai baba o Matania, de una gea o Lewi ma nyawa. De ona mata-mata gea yomahidutu manga tofora o Asafika. De naa o Yahasiele gea Ma Jou o Yawe ai Womaha wingohama de wihiakunu la wotemo-temo de Ma Jou ai demo.

¹⁵ De o Yahasiele wotemo waamo-amokiye wato, “Mia koano o Yosafata de ngini mata-mata abe nigogere o Yerusaleeme ma kotaka de ka hiadono o Yehuda ma tonaka mata-mataika nigogere kiani nitotoihene! Hokonaa Ma Jou o Yawe ai hingahu ngone mata-mataino, Una Ma Jou wonahibehehongo wato, ‘Ngini ufa niamodongo de ufa nia hininga ieteke ma titi o tentara ma doomu kohaamoko gea. O parangi abe ahao idadi naa ko nginiua niaparangi o tentara ma amokika gea masara Ngohi Ma Jou taparangi onangika.

¹⁶ Itebini o ngorumino ngini abe o tentara nimakutuono nitagi la manga tentara niabuhukika. Ona ahao gea yoboa iningino yaniiki o loku ma goruangino abe nihiromanga o Sisi ma goruanga ho ngini ahao niamake yoboa o bilatu ma bionino abe ma biono gea yohimangika o Yeruele ma tonaka ma kakaahaika.

¹⁷ De ngini ahao nimatatorika imaketero hoka nimahidiai la duru niaparangi onangika masara ngaro ufa ngini niangika de niaparangi angamoi Ngohi Ma Jou o Yawe ahao todiai moi manga hidogoronaka la hiadono tinihihupu manga giamino. Ho itebini ka idadi nisobo dika o tentara gea niahimanga de Ngohi Ma Jou o Yawe naga nginioka.’” Hokogea Ma Jou ai demo abe wahitomoroini ai nyawaika abe o Yahasiele wadofanga ona mata-mataika.

¹⁸ De gea yoihene ibooto de o Yosafata watilabukuku hiadono ai himanga itiki o tonakuku de duru womahuba Ma Jou o Yaweika. De o Yehuda ma nyawa de ona abe yogogere o Yerusaleeme ma kota ma goronaka ka ma moi ona manga doomu mata-mataika onangoo yatilabukuku yomahuba Ma Jou o Yaweika.

¹⁹ De ahao naga manga hidogoronaka yamuruono naga o Lewi ma nyawa abe o Kehata ma doomuino de o Kora ma doomuino abe yomaokoinoli de duru de manga ilingi duru kohaamokiye iwihigiriiri Ma Jou o Yawe, o Isiraele ma nyawa manga Jou.

²⁰ Ho ma dawangeino duru o ngoru-ngorumino o Yehuda ma nyawa manga ngoe yomakiniiki de manga tentara de yokokisobo yoiki o Tekoa ma tonaka ma kakaahaika. De ahao o Yosafata womatogumu de waboaka ona mata-mataika, wato, “Ahi gogianongoru abe nigogere o Yerusaleeme ma kota ma goronaka de o Yehuda ma tonaka mata-mataika, ahi demo naa ngini mata-mata nitotoihene! Kiani ngone mata-mata duru hingaku nanga Jouika, Ma Jou o Yaweika! De ahao nanga ngongakuino de ka idadi hakokimake nanga buturungu la duru homatongohono. De kiani hangaku Ma Jou o Yawe ai uru ma dodofangikaoo de ahao ngone hamake o lolaku abe duru de ma hasiloka.”

²¹ De ahao yomakoketemo o Yosafata de ai kokawaaha de ato irahai manga dodagi ma goronaka de yonyanyi Ma Jouika. Ho o Yosafata wahibehehongo o nau-nauru yamuruono naga la ona yohiraika manga tentara manga himangoka de iwihigiriiri Ma Jou o Yaweika ma titi ai medebini ma dararono. De hokogea ai behehongo yaniiki de manga higiriiri ma demo abe ihinyanyi hokonaa: “Ngone kiani ka ihikaika hotarimakase Ma Jou o Yaweika, angamoi to Una ai dora ngoneino ko itoa-toakua ka hiado-adonika.”

²² Ka de ona yomulaenge yonyanyi hokogea de Ma Jou o Yawe womulaenge womahisapuru manga musu manga hidogoronaka abe ona yangika o Yehuda ma nyawaika la yaparangi. Ka de Ma Jou womahisapuru de manga tentara abe o Amono ma nyawa, de o Moaba ma nyawa, de o nau-nauru gea abe o Seiri ma lokuino, ona mata-mata ka yomahikokoona dika de yomulaenge yomaketegogataheke. De gea hiadono yomaketebaatika de yomakotoma yomahikokoona.

²³ Abe o nau-nauru o Amonino de o Moabino yomakuduhunu la ato yatoma o nau-nauru o Seiri ma lokuino. De hokogea yodiai ka hiadono ona o Seiri ma lokuino yakokimataka! Masara ona gea yakokitoma ibooto de ahao o tentara o Moabino de o tentara o Amono ma nyawaino onangoli yomahiketehibinaahaka ona de ona dika.

²⁴ De igoungu, ma oraha o tentara o Yehuda ma nyawaino yomahiadono ma ngioka abe ka idadi yomalega dau o tonaka ma kakaaha ma dolauku de duru yadamaanuku manga tentarauku de yamake ka o nyawa manga hone-honenge dika ko manga ngoe abe yomahikabarihika o tonakoka. Ko moiua onangoka abe yadaene yoara.

²⁵ Ho o Yosafata de ai tentara youti manga musu manga kiahonanga yomagoraka abe ihiromanga o parangi ma lolaku ma kiahonanga. De ona yamake manga aewani hoka o hapi enangoo duru kohangoe. De abeika manga parangi ma dae-dae duru ma ngoe de manga parangi ma pakeangoo yomagoraka. De manga hone-honengoka nagaoo ma rupa hoka o gogoli, de o gule, de o rante de ma haeke ileto-letongo, ho manga kiahonanga ihali-hali enangoo kohangoe. Hokogea ma ngoe o parangi ma lolaku ma kiahonanga hiadono o wange hangeino ena gea yakokitoomuino de ahao yolio de ena gea yomagao iti abe yapoa yomagao masara naga ma hou kohangoeohi abe kiani yanoaika dika.

²⁶ De o wange ma iatuku o Yehuda ma nau-nauru mata-mata gea yomahiadono o dola moioka de ipaha o Yehuda ma nyawa o tonaka ma dola gea ihiromanga o Higiriiri ma dola angamoi genangoka yomahiaini de duru iwihigiriiri Ma Jou o Yaweiye ma titi ai lolaku manga musuika. De o tonaka ma dola gea ma romanga o Higiriiri ma dola ka hiadono ma oraha abe ma ade-ade naa ihitulihuku.

²⁷ De o nau-nauru o Yerusaleeme ma kotaino de o Yehuda ma tonakino gea ona yomahiaini ibooto ma dolaka gea de ahao manga koano o Yosafata wahihira-hira o Yerusaleeme ma kotaika yogila-gila. De yotagi-tagi duru de manga garagoka de manga higiriiri mangale ma titi Ma Jou o Yawe wahidoaka o lolaku.

²⁸ De yowohama o Yerusaleeme ma kota ma goronaika de yawuwu manga guguli de nagali manga arababu yaluiti de manga totabua yarago-ragoho de hokogea yogila-gila ka hiadono yoboa Ma Jou o Yawe ai Tauika.

²⁹ De ahao o homoa ma nyawa abe yogogere ma tonaka manga date-datekino abe onangoo de manga koanoka ka de yoihene ma ade-ade gea abe hokokia Ma Jou o Yawe waparangi o Isiraele ma nyawa manga musuika de duru yalufungoka de manga heranga ma hawana.

³⁰ De hokogea Ma Jou wihidoaka o Yosafatika de ai kokawaahaika manga hiaini o parangino abe ngaro o tonaka mata-mataika ma ko iwaka abe yoboaino yaparangi ho o dame duru ilaku o Yehuda ma tonakoka.

O Yosafata ai wowango ma baha

³¹ Hokogea irahai o Yosafata wahikoano ona abe yogogere o Yehuda ma tonakoka. Ho una wadonoka ai ngumuru ai taongo moruange de motoa ma oraha wodadi manga koano de wohikoano o taongo monaoko de motoa ma dekanino o Yerusaleeme ma kotaka. O Yosafata ngoi meme ami romanga o ngo Asuba abe ami baba o Silihi.

³² De o Yosafata ai wowangoka waniiki hoka o Asa ai babali ai datoro de ko worehe-rehenua. Una wodiai Ma Jou o Yawe ai himangoka abe Una wamake itiai.

³³ Masara nagahi ma ngi-ngi o tonaka itotoporonoka abe genangoka o nyawa yomahuba o popangaoika abe ko wamataua wohiofi. De ai kokawaaha manga ngoeohi manga hininga ma dumutu Ma Jouika ko itiaiuahi.

³⁴ De mata-mata utu abe o Yosafata wodiai abe ka de ma oraha womulaenge wohikoano hiadono ma bahaika, gea mata-mata ihitulihuku. Abe naga womatengo ai romanga o Yehu abe ai baba o Hanani, de una gea abe wohitulihuku ma ade-ade gea mata-mata o buku moioka ma romanga, “O Kokoano abe Yahikoano o Isiraele ma Nyawaika manga Ade-ade.”