2 Tawari 12 - Ma Jou ai Demo-demo o Totobelohoka

O Mesiiri ma nyawa manga koano o Sisaka waparangi o Yerusaleeme ma kotaika

¹ De igoungu ma oraha gea o Saloomo ai ngofaka o Rehabeama ai kokawaaha duru yomahikoano unangika de una wahikoano de ai buturungoka. Masara gea ko itedekanua de o Rehabeama ahao Ma Jou o Yawe ai pareta ko wolegaikakaua. De o Isiraele ma nyawa, abe iwiniiki o Rehabeama, onangoo ko yolegaikakaua Ma Jou ai paretaika.

² De angamoi manga hininga ma dumutu ko Ma Jou o Yaweikaua itagi ho manga hohowono Ma Jouino adaene onangika. Abe ma oraha o Rehabeama wohikoano ngade-ngade ai taongo motoa ma dekanino de o Mesiiri ma nyawa manga koano o Sisaka una de ai tentara yoboa o Yehuda ma tonakino de yaparangi o Yerusaleeme ma kotaika.

³ Ho ma koano o Sisaka gea woboa waparangi de o parangi ma gogoroba o sana moi de o ratuhu hinooto de naga o tentara abe o kuda ma poretoka yobarene manga ngoe yasana moributaanga. De naga abe o Sisaka iwiduhunu o tentara o tonaka utuino abe o Libia ma tonakino, de o Suki ma tonakino, de o Etiopia ma tonakino hiadono o tentara gea ko idadiokaua yaetongo manga ngoe.

⁴ De o Sisaka ka de wangohama o Yehuda ma tonakino de manga kota-kota waparangi hiadono ngaro manga kota de ma dadaduhu ma bobuturungoka masara yahikala de wogila-gila o Yerusaleeme ma kotaika.

⁵ De o Yehuda ma nyawa manga dimo-dimono duru yohawana hiadono yokokiloara o Yerusaleeme ma kotaika de yomadatoko genangoka done o Sisaka wahohonenge. De ahao Ma Jou ai uru ma dodofanga womatengo ai romanga o Semaya woboa o Rehabeamino de naga o Yehuda ma nyawa manga hohidimono onangoo yatoomuino manga koano o Rehabeamoka o Yerusaleeme ma kotaka. De o Semaya wahingahu onangika gea wato, “Hokonaa Ma Jou o Yawe ai demo nginika, wato, ‘Ngini nihinoaikaka Ngohi ti ngini nia Jou ho naa Ngohioo tininoaikaka de tinihidoaka ma koano o Sisaka ai kuahaika.’” Hokogea Ma Jou ai hohowono ma demo abe o Semaya wadofanga o Yehuda ma nyawa manga dimo-dimonika.

⁶ De o Isiraele ma nyawa manga hohidimono de manga koano o Rehabeama yoihene Ma Jou ai hohowono ma hingahu gea de manga hiningaka duru yomahitipokouku hiadono yomahingahu ato, “Abe Ma Jou o Yawe wonahohowono de gea Una wodiai abe itotiai dika.”

⁷ Ho ka de Ma Jou o Yawe ona wamake abe yomahitipokouku de ai demo moioli wihidoaka o Semayaika wato, “Abe de ma titi ona yomahitipokouku, ho Ngohi ko tadadiuali tahibinaaha ho ko itedekanua de tahihupu manga kangelaino naa. Abe ahi ngamo ma gahumu ko takopoaua o Yerusaleeme ma kotauku abe de o Sisaka Ngohi tipake ma oraha naa.

⁸ Masara o Yerusaleeme ma nyawa ahao yogogere ma koano o Sisaka ai kuahaka. De hokogea tahigunoa la ona ka idadi ihikohowono abe hokokia manga baliara manga wowangoino nako Ngohino ihileleani de hokokia manga baliara manga wowangoino nako o koano o tonaka ma homoaino iwileleani.” Hokogea Ma Jou o Yawe wato wadotoko ai nyawaika.

⁹ De o Mesiiri ma nyawa manga koano o Sisaka gea wangika o Yerusaleeme ma kotaika hiadono wangohama manga kota ma goronaika, de una wongohama Ma Jou o Yawe ai Tauoo de wale ma kiahonanga abe duru de ma ijaka. De hokogenangoo wodiai o koano o Rehabeama ai tau ma goronaka abe womale ma kiahonanga mata-mata abe duru ma hali-hali ka hiadono o parangi ma dadatoko abe o Saloomo wodiai o gurasino enangoo waleoka.

¹⁰ Ho ahao o Rehabeama o parangi ma dadatoko gea waturuuru de o parangi ma dadatoko abe yodutuku o tabaagaino abe ihikasapuru de o hori. De manga dadatoko gea wahidoaka o gogoana ma nau-naurika abe yogoana o koano ai tau ma ngoranoka.

¹¹ De ma oraha ma getongo abe o koano woiki Ma Jou o Yawe ai Tauika de o gogoana gea iwiniiki de manga dadatokoka abe ma oraha wotagi. De ma oraha wolio onangoo iwiniiki de ahao manga parangi ma dadatoko gea ihigilio o gogoana manga ngioka o koano ai tau ma goronaka.

¹² De angamoi o Rehabeama womahitipokouku hiadono Ma Jou o Yawe ai ngamo ko idadiuali unangika ho o Mesiiri ma nyawa ko iwidaenua iwihibinaaha. De igoungu ma oraha gea nagahi o Yehuda ma tonakoka abe ka idadi Ma Jou waetongo ma owa.

¹³ De o Rehabeama womahiputurungokali o Yerusaleeme ma kotaka ho wogila-gila ai nyawa wahikoano. Una ma oraha wodadioka o koano de ai ngumuru adonoka ai taongo moruata de moi de una wohikoano ai taongo ngimoi de tumidi ma dekanino o Yerusaleeme ma kotaka. Abe o Yerusaleeme ma kota gea ma dihiraino de Ma Jou wairikoka o kota mata-mataino abe naga o Isiraele manga dutu-dutu manga tonakoka. De gea wairiki o Yerusaleeme la Ma Jou o Yawe ai romanga o nyawa yagorakiye genangoka. De o Rehabeama ngoi meme ami romanga o ngo Naama abe muna o Amono ma nyawa.

¹⁴ De una wodiai itotorou angamoi ai hininga ko wagou-goungua wahidumutu Ma Jou o Yaweika ho ko ihikaikaua wolingiri Ma Jou ai mau unangika.

¹⁵ De mata-mata utu abe idadi ma oraha o Rehabeama wahikoano o Yehuda ma tonakoka, abe ma oraha ahao womulaenge wahikoano ka hiadono ma bahaika, de ma ade-ade gea mata-mata o Semaya wohitulihukuoka ai bukuoka. De naga ma buku moioli abe o Ido wohitulihuku de gea ma titi hokokia manga totofora yolape-lapeuku de gea wohitulihi o bukuoka, de genangokaoo naga utu ma ade-ade abe hokokia idadi ma oraha o Rehabeama wahikoano o Yehuda ma tonakoka. De o Ido gea una abe Ma Jou wihiakunu la wotobahioriki abe ngaro moi ko idadiuahi masara una wohiorikokau abe ahao idadi.

¹⁶ De ma oraha o Rehabeama wohonenge de unangoo iwilungunu o kokoano manga lungunu ma ngioka o Dautu ai kota ma goronaka. De ahao o Rehabeama ai ngofaka o Abia wituruuru ho unangoli wodadi ona yogogere o Yehuda ma tonakoka manga koano.