2 Tawari 11 - Ma Jou ai Demo-demo o Totobelohoka

Ma Jou ai hidemo ma nyawa de o Lewi ma nyawa mata-mata yolio o Yerusaleeme ma kotaika

¹³ De ma oraha gea o hidemo ma nyawa mata-mata de manga gogianongoru abe onangoo o Lewi ma nyawa, ona mata-mata ko yosanangiokaua yogogere o Yerobeama ai kuahaka ho hiadono yokokiloiki o Yehuda ma tonakika la yomahikoanoli o Rehabeamikali.

¹⁴ De o Lewi ma nyawa utu manga tau de manga tonaka yanoaika la yomaturuuru dika o Yerusaleeme ma kotaika de o Yehuda ma tonakika. De hokogea yodiai angamoi manga koano o Yerobeama de to una ai ngofa-ngofaka ko yahigunoakaua o Lewi ma nyawa iwileleani Ma Jou o Yaweika ka hiadono ona ko idadiokaua manga gogianongoru yahidemo Unangika.

¹⁵ De o Yerobeama una ai kokawaaha manga hidemo wairiki o nyawa biahaino de ona gea wahidadi o hidemo manga popangaoika abe yoleleani o popangao ma huhuba ma ngi-ngioka. De ona yomahuba-huba o popangaoika abe o Yerobeama wodiai abe ma rupa hoka o kabingi de o hapi ma ngofaka.

¹⁶ Ho o nyawa abe de manga hininga ma gou-goungu ato yomahuba o Isiraele manga Jouika dika, Una Ma Jou o Yawe, ona gea yaniiki o Lewi ma nyawa abe yomaturuuruoka daku o Yerusaleeme ma kotaiye. De genangoka ka idadi manga huhuba yahihuba Ma Jou o Yaweika imaketero hoka ma dihira manga totofora yomahuba-huba manga Jouika.

¹⁷ De o Isiraele ma nyawa manga ngoe yomaturuuru o Yehuda ma tonakiye hiadono utuohi yowoe abe yomahikoano o Rehabeamika, ho to una ai kuaha ma buturungu idogo ilamoko. De o taongo hange ma dekanino manga hininga isanangi o Saloomo ai ngofakika abe manga koano o Rehabeamika. De duru ai kokawaaha yoigo iwihingounu Ma Jou o Yaweika abe hoka ma dihirali manga gogianongoru Ma Jou iwiniiki ma oraha o Dautu de o Saloomo yahikoano.