2 Tawari 1 - Ma Jou ai Demo-demo o Totobelohoka

O Saloomo womaniata abe womagahoko o sosawaro Ma Jouino

¹ De naa o Saloomo, abe ai baba o koano o Dautu, una naa wodadi o Isiraele ma nyawa manga koano de una wapake de ai kuaha la wahipareta irahai ona mata-mataika de ka hiadono duru ko moiua iwilawana. De hokogea duru ka idadi angamoi womahijou Ma Jou o Yaweika ho Una ka ihikaika winiiki o Saloomo de Una wihidadi o koano abe duru de ai buturungoka.

² Ka de uku de o Saloomo wahokino o Isiraele ma nyawa manga hidimono mata-mata. Ho gea o tentara ma hohidimono abe yahipareta manga doomuino yasana amomoi de nagali abe yahipareta manga doomuino yaratuhu amomoi, de ona manga hohidimono mata-mata yokokiboaino. De ona abe manga karajaanga o Isiraele ma nyawa yatobauru-urusu abe manga howono yatailako, onangoo yokokiboaino manga koano o Saloomoino. De ona abe yahibaluhu o Isiraele ma nyawa manga dutu homoi-homoiika ka hiadono abe yahibaluhu manga fam ma doomu homoi-homoiika, onangoo yokokiboaino. Ho duru yongodumu o Isiraele ma nyawa manga hohidimono genangoka.

³ De ona mata-mata abe o Saloomo watoomuino de ahao ona wao o Gibeono ma lokuika abe genangoka naga Ma Jou ai Tau o Ngoerino. De Ma Jou ai Tau o Ngoerino naa ena abe ma dihira o Musa wodiai o tonaka ma kakaahaka.

⁴ Masara Ma Jou ai Behehongo ma Peti ma oraha gea ko yanoakaua Ma Jou ai Tau o Ngoerino ma goronaka gea abe naga o Kiriata-Jearioka angamoi naa ma dekanoka abe o Dautu waoka o Yerusaleeme ma kotaika. Abe genangokali Ma Jou ai Behehongo ma Peti wohingohama o tau o ngoerino moiikali abe o Dautu widingakoka Ma Jouika.

⁵ Masara nagahi Ma Jou ai Tauoka o Gibeono ma lokuoka o huhuba ma ngi ma amoko abe ena gea ma dihirainohi ka o Musahi. O huhuba iharo-harongo ma ngi gea abe ma oraha ka o Musahi gea o Besalee wodiai o tabaagaino abe ihikasapuru de o hori. De o Besalee una gea abe ai baba o Uri de ai ete o Huuru. Ho naa ona yoboa mata-mata abe o Saloomo wao o Gibeono ma lokuino de yomatoomuino o huhuba ma ngi o tabaagaino gea abe naga Ma Jou ai Tau o Ngoerino ma himangoka.

⁶ De o Saloomo wodoa hiadono ma huhuba ma amoko ma ngiiye gea de genangoka Ma Jou o Yawe ai himangoka wahihuba o huhuba iharo-harongo o sana moi o huhuba ma ngi ma lokuoka Ma Jou ai Tau o Ngoerino gea ma himangoka.

⁷ De o Isiraele ma nyawa manga hihira manga doomu ibooto de o Saloomo womatengokahi genangoka. De o futu gea Ma Jou womahimatoko o Saloomoika de wihingahu unangika wato, “Ngona, Saloomo ka idadi nomagahoko o kia dika Ngohino abe duru noigo de ena gea ahao tonihidoaka.”

⁸ De o Saloomo wopaluhu Ma Jouika, wato, “Ngona Ma Jou nihimatoko ahi baba o Dautika ani dora kohaamoko abe ko itoa-toakua. De naa Ngona nohihidadi to una ai duruuru abe ngohi nohiirikoka la ani nyawa tahikoano.

⁹ Ngona Ma Jou o Yawe ho ani behehongo ahi baba o Dautika marai naa Ngona nohingodumu abe nohihidadi o koano la ngohi ahi tagongo naga o nyawa ko manga ngoeika abe ona manga ngoe imaketero hoka o tonakoli ma kafo ma ngoe.

¹⁰ Ho ngohi naa duru tomagahoko o sosawaro de o tobahioriki la ka idadi ona tahipareta itiai. De hokogea tomagahoko angamoi to Ngona ani nyawa yodadioka o doomu moi abe duru de manga buturungoka ho hiadono done onagona yakunu yahipareta?” Hokogea o Saloomo ai gogahoko ma demo Ma Jouika.

¹¹ De Ma Jou wopaluhu o Saloomoika wato, “De angamoi ngona duru nahitihira ani nyawa abe noigo naduhunu onangika de angamoi ko nomagahokua nokaya de o kiahonanga, de ko nomagahokua la ani musu yokokihonenge, ho Ngohi ka idadi tonihigihene ani gogahoko. De itiai ngona ko nomagahokua ani wowango ikurutu o dunia ma lokuoka masara ani nyawa nohitihira naduhunu ho Ngohi ani gogahokika gea duru tosanangi. Abe ngona o sosawaro nomagahoko de o tobahioriki la ka idadi ona nahipareta itiai.

¹² Ho Ngohi tagoungu tonihiowa de ma sosawaro de ma tobahioriki abe nomagahokoka! De Ngohi ahao abe tonihidoakoo ka enangohi o kiahonanga ma hali-hali, de o tiwioo tonihidoaka la duru nokaya ilamoko. De abe o kokoano utu o dunia ma lokuoka ko moiua naga manga kiahonanga hoka ngonali ngaro ona yohira-hiraika, de ngaro o kokoano utu ma oraha naa naga. De ngaro ngini o nyawa ka ihikaika nilape-lapeuku de o nyawa gea naga manga kokoano ka ihikaika yototuruuru masara nako ona de ngona ka ngonahi ani kaya ilamoko de o nyawa manga horomatioo ilamoko ngonaika.” Hokogea Ma Jou ai babaluhu o Saloomo ai gogahokika.

¹³ De ahao o Saloomo wanoa Ma Jou ai Tau o Ngoerino abe o Gibeono ma lokuoka gea de wolio o Yerusaleeme ma kotaika abe genangoka ai gogere la wahipareta o Isiraele ma tonaka mata-mataika.

¹⁴ De ahao o Saloomo ai tentara wahidogo ka hiadono ai tentara duru de manga buturungoka. Abe o parangi ma goroba wohidogo ka hiadono ma ngoe o sana moi de o ratuhu iata. De ai kuda abe o goroba atauru eko o kuda abe yobarene ma poretoka enangoo utuohi ma ngoe wohidogo ka hiadono ai kuda mata-mata o sana ngimoi de hinooto ma ngoe. De ai parangi ma goroba de ai kuda waregu de utu wohingohama o kota-kotaika abe una wairikoka la idadi imaketero hoka o parangi ma dadatoko. De ma kota gea homoi-homoiika ihiromanga o goroba ma kota. De abe ai kuda de ai goroba ma regu moioli gea wakelenga ai datekoka abe o Yerusaleeme ma kotaka.

¹⁵ De ma oraha o Saloomo wohikoano de o gurasi ma dutu de o haaka ma dutu ena kohangoe abe imaketero hoka o hakaru biaha ma ngoe abe naga o Yerusaleeme ma kota ma goronaka. De o gota o semara abe duru irahai de duru ihali enangoo ma ngoe abe imaketero hoka o gota biaha abe iwango o loku-lokuoka o Yehuda ma tonakoka.

¹⁶ De o Saloomo ai kuda gea duru iwoe angamoi yale o tonaka utuino. Abe naga o kuda ma ngoe o Saloomo ai nyawa yomaija o Mesiiri ma tonakoka de yao o Isiraele ma tonakika. De hokogenangoli o kuda ma ngoe yale o Silisia ma tonakino. De o Saloomo ai nyawa abe ona manga tagongo yotobaija ai kiahonanga, ona gea wahuloko la iwiija o kuda. De abe yoiki yoija o Silisia ma tonakoka, de ma kuda gea ma ija ko ihaliua masara yamake ma ija biaha dika abe yotobafukunu o kuda genangoka.

¹⁷ De o Saloomo ai kuda abe yomaija o Mesiiroka gea amomoiika yofangu de o se-senge o haakaino o ratuhu moi de moritoa. De o kuda duru kohangoe yaijaino ka hiadono utu yafukunoli o Hete ma nyawa manga kokoanoika de o kokoanoikali abe ona yapareta o Arama ma tonakoka. De nako o Mesiiri ma nyawa manga goroba abe ka enangohi irahai gea o Saloomo ai nyawa iwiija de amomoiika yofangu de o haakaino ise-senge o ratuhu butaanga.