2 Samuele 8 - Ma Jou ai Demo-demo o Totobelohoka

O Pasala 8 ko atailakouahi O Dautu wahikala o Isiraele manga musu manga ngoeika

¹ De ipahaino de o Dautu de ai tentara ma nyawa yoiki de yomaketeparangi de o Filistina ma nyawa hiadono yahikala onangika. De gea o Dautu wataokino de wahipareta to ona manga kota ma mayo, ho ka idadi wahipareta o Filistina ma nyawaika.

² De ahao o Isiraele ma nyawa manga musu o Moaba ma nyawa, onangoo o Dautu wahikala. Wahikala ipahaino de wahuloko la manga musu gea yomatatatorika yomaidu dau ma tonakuku la ka idadi watuga manga ngoe yamuruono. De gea watuga manga ngoe de o tali moi abe hatoli ikurutu la wahikeregu hiadono naga manga doomu hangeika. De ahao manga doomu hinooto yahohonenge dika onangika, ho manga doomu moi dika abe yahigunoa la ka yowangohi. De o Moaba ma nyawa gea abe yowango-wangohi kiani iwihingounu o Dautika de ka ihikaika naga manga nagimi unangika abe kiani yotobafangu.

³ De nagali o Soba ma nyawa abe o Dautu wahikala onangika. Abe ona gea manga koano ai romanga o Hadadesere de to una ai baba o Rehobo. De ma dihiraino gea o Soba manga koano wahipareta ma tonaka abe o Efaraata ma akere ma ngigorino masara to una ai hidee la utuohi womahipoputurungu ai pareta ma tonakoka gea. Ho una wohupu wahihira-hira ai tentara ma nyawa genangika, masara ma oraha gea de yomaketeparangi de o Dautu ai nyawa.

⁴ De manga parangi ma gogiriaka de o Dautu de ai nyawa yataokino manga tentara ma nyawa yasana moi de yaratuhu tumidi abe yotobafarene o kudauku. De nagali manga nyawa abe yotobalou-lou dika yasana monaoko abe o Dautu wataokino. De abe manga kuda yatobaao-ao o goroba parangi, to ena iwoe-woe ma dedeli yaoto la ko idadiokaua imapopaata. Masara naga manga kuda o ratuhu moi abe ma dedeli ko yaotoua.

⁵ De ma oraha yomaketeparangiohi gea de o Siria ma nyawa abe yogogere o Damasikoka ona yoboaino la ato yaduhunu o Soba manga koano gea. Ho yomahidogo o Soba ma nyawaika masara o Dautu de ai tentara yahohonenge o Siria ma nyawa yasana monaoko de yasana hinooto manga ngoe.

⁶ De o Dautu wahikalaka de ahao wahidingoto ai tentara ma nyawa utu la yomanoa o Siria ma nyawa manga kapo-kapongoka de yagoa-goana manga musu gea de ufa hiadono yomaketeparangioli de o Isiraele ma nyawa. Ho o Siria ma nyawa onangoo kiani iwihingounu o Dautika de ka ihikaika naga manga nagimi unangika abe kiani yotobafangu. De gea duru igoungu abe o kiaika dika o Dautu woiki la yomaketeparangi de manga musu de Ma Jou o Yawe duru widuhunu unangika ho ka ihikaika wotobalaku-laku.

⁷ De o Soba manga tentara ma hohidimono, to ona manga alu ma dadatoko duru ma rorahai angamoi yodiai o gurasino. Ho o Dautu wataokino ma dadatoko gea de ai nyawa yatotaka o Yerusaleemika.

⁸ De nagali o tabaaga ma amoko o Soba manga kotaka abe o Beta de o Berotaioka, de enangoo o Dautu womahitouna de wao o Yerusaleemika.

⁹ De ma oraha gea naga o kota moi ihiromanga o Hamata, de to ona gea manga koano ai romanga o Toi. De ipahaino o Toi gea woihene ma titi o Dautu duru wahikalaka o Hadadesere ai tentara ma nyawa mata-mataika.

¹⁰ De ma koano gea ma dihirainohi de ma ngoe yomaketeparangi de o Hadadesere gea, ho una duru wosanangi woihene ma abari gea. Ho o Toi wihidingoto ai ngofaka o Yorama la widofanga ai hininga ma garago ma demo o Dautika. De nagali o hadia muruono naga abe o Toi wohidingoto de ai ngofaka, ho o Yorama gea wohidoaka ma hadia ma ngoe o Dautika abe yodiai o gurasino de o haakaino de o tabaagaino.

¹¹ De ma hadia gea mata-mata o Dautu wodafongo de ahao wahikatingaka Ma Jou o Yaweika. Ai datoro gea duru imakadaene abe hoka ma dihiraino wodiaioka de o haaka de o gurasi abe ona yamake manga musuino ma oraha yahikala ona homoi-homoiika. Abe ma titi o gora ma kiahonanga ma hali-hali gea, enangoo wahikatingaka Ma Jou o Yaweika dika.

¹² De ma kiahonanga ma hali gea yamake o Edomo ma nyawaino de o Moaba ma nyawaino de o Amono ma nyawaino de o Filistina ma nyawaino de o Amaleke ma nyawaino. De nagali o gora ma kiahonanga abe yamake o Soba manga koano o Hadadeserino.

¹³ De ipahaino de o Dautu de ai tentara ona yoiki o Tonaka ma Magahi ma Dola la yomaketeparangi de o Edomo ma nyawa genangoka. De manga parangi ma gogiriaka de o Dautu de ai nyawa yahohonenge o Edomo ma nyawa yasana ngimoi de tufange manga ngoe, ho o Dautu ai romanga idadi utuohi ilamoko o nyawa mata-mata manga hiningaka.

¹⁴ De o Dautu wahikalaka de ahao wahidingoto ai tentara ma nyawa utu la yomanoa o Edomo ma nyawa manga kapo-kapongoka de yagoa-goana manga musu gea de ufa hiadono yomaketeparangioli de o Isiraele ma nyawa. Ho o Siria ma nyawa onangoo kiani iwihingounu o Dautika. De gea duru igoungu abe o kiaika dika o Dautu woiki la yomaketeparangi de manga musu de Ma Jou o Yawe duru widuhunu unangika ho ka ihikaika wotobalaku-laku.

O Dautu ai popareta ma nyawa

¹⁵ De ma oraha gea o Dautu wahikoano o Isiraele ma tonaka mata-mataika, de wahipareta duru irahai hiadono ona mata-mata yomakao irahai.

¹⁶ De hokonaa o Dautu ai nyawa manga roma-romanga abe yahihira-hira de yaleleani ai kokawaahaika. Abe nako o Yoaba o Seruya ai ngofaka, una gea manga tentara ma nyawa manga hidimono wokokurutiye. De o Yosafata o Ahiludu ai ngofaka, una gea wohiaturu o popareta manga buku-buku.

¹⁷ De nagali o Sadoko o Ahitubu ai ngofaka de o Ahimeleke o Abiatara ai ngofaka, de ona yahinooto gea yodadi manga hidemo ma nyawa Ma Jouiye. De o Seraya una gea o Dautu ai duduhunu womatengo abe ka ihikaika wohikodoku ai hiowa ma demo o Dautika.

¹⁸ De nagali o Benaya o Yoyada ai ngofaka, una gea o Dautu ai gogoana ma nyawa manga hidimono. De nako o Dautu ai ngofa-ngofaka o nauru onangoo yodadi manga hidemo ma nyawa Ma Jouiye.