2 Samuele 7 - Ma Jou ai Demo-demo o Totobelohoka

Ma Jou o Yawe wihibehehongo o Dautika

¹ De Ma Jou o Yawe ka ihikaika o Dautu widatoko o kangela manga musu mata-mataino ho wososanangi dika o koano ma tauoka abe duru ma rorahai genangoka wogogere.

² De o wange moiuku Ma Jou ai uru ma dodofanga o Natana una naga o Dautu ai datekoka de o Dautu witemo o Natanika, wato, “Abeika, ngohi naa togogere o tau duru ma rorahaioka naa. De ahi tau yodiai o gota o semaraino abe ka enangohi duru iumuru de duru irahai masara abe Ma Jou o Yawe ai Behehongo ma Peti, ena ka igogerohi o tau ma goronaka abe ka o ngoerino dika.” Hokogea o Dautu ai hininga womahingahu.

³ De o Natana wipaluhu o koanoika wato, “Ahi koano, Ma Jou o Yawe naga de de ngona ho ngaro ani hidee abe ani hiningaka nato nodiai, gea nodiai dika.”

⁴ De ahao duru o wange gea ma futuku de Ma Jou o Yawe witemo o Natanika, wato,

⁵ “Ngona kiani noikoli ahi gilaongo o Dautika de hokonaa ahi hingahu abe kiani nadofanga unangika, nato, ‘Hokonaa Ngohi Ma Jou o Yawe ahi hingahu ngonaika. Marai ngona Dautu nato nodiai o tau moi abe utuohi irahai la ka idadi Ngohi togogere genangoka e?

⁶ Masara Ngohi hokonaa. Ngaro abe ma dihira o Isiraele ma nyawa tahihupu o Mesiiri ma tonakino de ka hiadono o wange naa masara Ngohi ma ngoe tomaturuuru ho ko ma moiuahi tomanoa o tau ma gou-goungu ma goronaka. Hokogea ma dekana Ngohi o tau o ngoerino dika ma goronaka abe togogere ti ngini nia hidogoronaka.

⁷ Abe o Isiraele ma nyawa Ngohi ka ihikaika naga onangoka ho ka de Ngohi tomaturuuru de onangoo yomaturuuru. De ngona Dautu ahi ade-ade gea ngonaoo nohiorikoka. Ho naa tonileha, Ngohi mode naga ma oraha abe tahibehehongo o Isiraele ma nyawa manga hidimonika, abe tahikarajaanga la yahihira-hira ahi nyawa, la ona yodiai ahi tau abe o gota o semaraino? Koua. Ko ma moiuahi hokogea Ngohi Ma Jou o Yawe tahibehehongo onangika.’”

⁸ “Hokogea Natana kiani ngona nihihohininga ahi gilaongo o Dautika de ahao nadofanga ahi hingahu ma demo nenangoo unangika, nato, ‘Dautu, hokonaa Ma Jou o Yawe Wokokurutiye wonihitararono, wato, “Ngona ma dihira o domba ma duduono napaliara de nohihira-hira o ruruubu ma ngiika o tonaka ma hoanoka. De genangoka Ngohi Ma Jou tonile de ani tagongo o dombaika gea taturuuru la to Ngohioli ahi nyawa nahihira-hira. Ho naa ngona nodadioka o Isiraele ma nyawa manga koano.

⁹ Ho naa ma dekanino Ngohi naga de de ngona ho ngaro o kiaka dika naika masara Ngohi toniniiki la toniduhunu abe ani musu mata-mata tahikalaka. De naa Ngohi tonigorakiye ka hiadono ani romanga ahao o dunia ma amokika o nyawa inihioriki. De gea hiadono ani romanga o nyawa yafetongo de ihidotoomuino de o nyawa o duniaka abe to onangoo manga romanga yokokurutiye.

¹⁰ De Ngohi tahidailakoka o Isiraele ma nyawa manga tonaka la abe ahi nyawa gea ka idadi yogogere yoriidi genangoka de o nyawa utu ko yaruwaeokaua. De manga tonaka gea duru ka to ona dika manga tonaka abe o dualono ma nyawa ko yahikangelakaua hoka yahikangela ma dihirali.

¹¹ Abe ngaro ma dihira abe Ngohi ma oraha tomulaenge tahidoaka onangika manga hihira, abe yototuruuru yahihira-hira o Isiraele ma nyawa, de naga manga musu ka ihikaika yahikangela. Masara ngona o Dautu ani musu ahao ko hokogenangokaua inihihuha hoka ma dihira de ma dubuho inihihuha.”’ ‘“De nenangoo Ngohi, Ma Jou o Yawe tonihibehehongo abe ma titi to ngona ani tauika. Ngohi ahao tohiaturu la to ngona ani ngofakoka de imahikauku naga o nauru manga ngoe abe tahidadi o koano abe inituruuruoli.

¹² Ho ma oraha ngona nohonengoka de inihitoomuika de ani totofora manga lungunoka de ahao naga ani ngofaka womatengo wodadi ani duruuru o koano abe una duru de ai kuahaka. De Ngohi todiai la una de ona abe wahikoano duru de manga buturungoka.

¹³ De ahao o koano, abe ani ngofaka gea, una wodiai o tau moi abe duru tomahitongohi la genangoka o nyawa manga ngoe to Ngohi ahi romanga yagorakiye. De ani ngofaka gea wodadi o koano abe duru de ai kuahaka. Ho ahi nyawa wahikoano de ai kuaha abe duru ko iwa ma bobaha ka hiado-adonika.

¹⁴ De Ngohi Ma Jou todadi ai baba de una wodadi ahi ngofaka. De ma oraha una naga ai howono Ngohi ahao utu o nyawa tapake la iwihohowono abe ona ahao yodadi to Ngohi ahi boboha.

¹⁵ Nako o Saulu de Ngohi tihigutioka o koano ma kaderaino la ngona ka idadi nituruuru, ma oraha gea abe ahi dora ko itagiokaua unangika. Masara to ngona ani ngofaka, abe to una ai kuaha ko iwa ma bobaha, Ngohi tohibehehongo duru ko iwa ma oraha abe ahi dora ko itagiokaua unangika.

¹⁶ De ka hiadono naga ani totoforauku abe yomanoa ahi dora ma goronaka ka hiado-adonika. De genangino ma titi ko iwa ma bobaha abe ani totoforauku yogogere ani kaderaka de yahikoano o Isiraele ma nyawaika.”’”

¹⁷ Hokogea Ma Jou o Yawe ai uru ma dodofanga o Natana mata-mata wihingahu o Dautika abe Ma Jou wihingahuoka unangika.

O Dautu womaniata abe womahingahu ai hininga de ai tarimakase Ma Jouika

¹⁸ De Ma Jou ai hingahu mata-mata gea woihenoka de ahao o Dautu woiki Ma Jou ai Tau o Ngoerino de wogogeruku Ma Jou o Yawe ai himangoka. De womaniata Ma Jouiye wato, “Ngona Ma Jou o Yawe abe mata-mataika igogere ani kuaha ma goronaka! De ngaro ngohi naa ko kia-kiaua ihidaene abe naga ngohioka masara Ngona nomalega ngohino de nohiduhunoka de nohihiowaka. De ona ahi tauoka onangoo ko kia-kiaua abe naga onangoka masara Ngona ma dihira de ka hiadono ma oraha naa nomiduhunoka ma ngoe.

¹⁹ De ngaro hokogea masara ani behehongo ngohi de ahi tauino naga utuohi ma hohailoa abe ahao iboa ahi tauino dokengika to ngomi mia himangika. Abeika Ngona Ma Jou o Yawe abe mata-mataika igogere ani kuaha ma goronaka de nohihibehehongoka abe ahao idadi irahai ahi totoforauku abe yolape-lapeuku ka hiado-adonika. De toheranga abe ngaro ngohi o nyawa biaha dika de nohihimatoko ngohino to Ngona ani hidee ma behehongo gea!

²⁰ Ho ngohi duru ihitomomonoka abe ko tohiorikua de o kiali tonitemo. Ngona ahi Baluhu Ma Jou de duru nohihioriki mata-mata abe ma titi ngohi ani gilaongo naa.

²¹ De gea abe nomihibehehongoka ngomino gea duru imakiniiki de ani mau de ani hingahu ma demo. De mata-mata Ngona nodiai duru ma rorahai la genangino nohidotoko ngohino.”

²² “Ho Ngona igoungu Ma Jou o Yawe abe duru nokokurutiye angamoi duru ko iwa utu abe imaketero hoka Ngonali. De ko iwa utu Ma Jou angamoi ka Ngona dika nomatengoka. Abe ma dihiraino de ngomi o Isiraele ma nyawa minihiorikoka abe ka Ngona dika Ma Jou.

²³ De ko yaiwa o nyawa o tonaka utuino abe Ngona Ma Jou nomalega onangika de naduhunu hoka nomiduhunu ngomi o Isiraele ma nyawa. Abe ma dihira to ngomi mia totofora yodadi o nyawa utu manga huhuloko masara Ngona nahihupu manga kokangelaino ma oraha nahihupu o Mesiiri ma tonakino. De mia totofora gea nahidadi duru to Ngona ma hirete ani nyawa. Masara duru ko moiua o tonaka utuoka abe ma nyawa genangoka naduhunu imaketero hoka ngomioli nomiduhunu. De gea Ngona nodiai mangale ma titi ngomi dika nomadingakoka Ngonaino. Hokogea nodiai de o heheranga ma ngoe hiadono o nyawa abe ani ade-ade gea yoihene de ani romanga yagorakiye de manga heranga. De ngaro naga o nyawa utu yadatoko ani nyawaika manga dodagi ma goronaka masara ona abe yahikangela ani nyawa Ngona nahihupu ka ma moi de manga popangao la ka idadi ani nyawa yogogere manga tonakoka.

²⁴ Ngona o Isiraele ma nyawa nahidadi to Ngona ani nyawa ka hiado-adonika de ona yomahijou duru ka Ngona Ma Jou o Yaweika dika.”

²⁵ “De naa ahi Baluhu Ma Jou o Yawe, abe nohihibehehongoka ngohino de ahi tauikaoo, ngaro nodiai duru imaketero de ani behehongo ma demo gea. Tomagahoko la ani behehongo gea nohiaturu la ilaku ka hiado-adonika.

²⁶ De ngohi duru tonganono la ani romanga o nyawa yagorakiye de ka ihikaika manga horomati idogo-dogo Ngonaika! De ngaro ka hiadono o dunia ma amokika o nyawa inihiromanga Ma Jou o Yawe Nokokurutiye abe o Isiraele ma nyawa manga Jou. De ngaro ngohi ani gilaongo o Dautu ahi totoforauku ka hiado-adonika yahikoano ani nyawaika.”

²⁷ “De hokogea ngohi ihimoroini tomagahoko Ngona Ma Jou o Yaweika, o Isiraele ma nyawa manga Jouika, angamoi hokogea Ngona nohihimatokoka ngohi ani gilaongino. Ngona nohihimatokoka ani behehongino abe to ngohi ahi tau nairikoka la ka hiado-adonika naga ahi totoforauku abe wohikoano.

²⁸ De Ngona Ma Jou, to ngohi ahi Baluhu Ma Jou o Yawe Nokokurutiye de ani demo mata-mata ma gou-goungu de Ngona nohihibehehongoka ma ngoe ngohino ani gilaongino abe duru ma rorahai.

²⁹ Ho naa ngaro duru nososanangi dika nohihiowa ngohi ani gilaongika naa de nahiowa ahi tauikaoo la ka hiado-adonika ahi totoforauku naga ani himangoka. De angamoi Ngona Ma Jou o Yawe ho ma oraha de o hiowa ma behehongo nohihiowa ani gilaongino naa de gea idadi o hiowa abe imahilaku ka hiado-adonika.”