2 Samuele 6 - Ma Jou ai Demo-demo o Totobelohoka

Ma Jou ai Behehongo ma Peti yao o Dautu ai kotaika

¹ De ahao ma moioli o Dautu o Isiraele ma nyawa manga tentara manga nau-nauru watoomu abe ona ma dihirainohi yairikokau ma titi ka onangohi yososawaro yoparangi. De ona manga ngoe yasana moruange.

² De o Dautu womahidiaioka la woiki wato una wale Ma Jou ai Behehongo ma Peti la ka idadi yaoino to una ai kotaino. De ahao una de ai nyawa manga ngoe abe wahihira ona yosobo yomakiniiki yotagi-tagi o Baala-Yehuda ma kotaika abe genangoka Ma Jou ai Peti imanoa. De ai peti gea ihiromanga Ma Jou o Yawe duru Wopoputurungu to Una ai Behehongo ma Peti. De Ma Jou ai Peti ma dadamunu ma lokuoka naga o malaekata ma rupa hinooto abe yodiai o gurasino de ihiromanga o kerubu. De o kerubu gea naga aridobiki ai peti ma dadamunoka de duru ma hidogoronaka Ma Jou womahimatoko ai medebini ma dararono.

³ De Ma Jou ai Peti ihihupu o Abinadaba ai tauoka o loku ma geleforoka de naga duru manga goroba ma hungi abe ihibarene Ma Jou ai Peti genanguku. De abe ona yotobagoana Ma Jou ai Peti o nauru yahinooto manga romanga o Usa de o Ahio de ona o Abinadaba ai ngofaka yahinooto. De ona gea ko yofarenua o gorobauku ho ihidutuda ma hapi o pasanga moi de ma goroba ka ma moi la itagi itiai.

⁴ De o Ahio una wotagi o goroba ma hapi ma himangoka la wohidatauru ma ngekomika.

⁵ De o Dautu de o Isiraele ma nyawa mata-mata, abe yomakiniiki manga dodagi ma goronaka, ona yorame-rame duru de manga horomati ma amoko Ma Jou o Yaweika abe yonyanyi de yoselo-selo de manga garago de manga buturungu ma gahumu. De nagaoo manga totabua irupa-rupa yarago-ragoho, de manga damunu yatakoro, de manga gogereengoo ihiboha-boha, de nagali ma rupa abe hoka o dodai o tabaagaino enangoo ihikokaboha.

⁶ De hokogea yotagi-tagi yorame-rame moduku ka hiadono o gandumu ma rorero ma ngiika yomahiadono abe ma dutu ai romanga o Nakono. De naga genangoka o goroba ma hapi ma hononga ma lou itugama hiadono ngade-ngade irubauku. De o Usa una wafikiri done Ma Jou ai Peti iotaka ho watumungu.

⁷ Masara Ma Jou o Yawe ai ngamo iwidubuku unangika ho itodokanino de o Usa Ma Jou wihohonenge ho ai honenge iruba duru Ma Jou ai Peti ma datekoka. De hokogea idadi angamoi Ma Jou wato ko idadiua o nyawa yaso Ma Jou ai Peti ma debi-debinika gea.

⁸ Ka de hokogea idadi de o Dautu unangoo wongamo angamoi Ma Jou ai ngamo iwidaene o Usaika hiadono una wohonenge. Ho o rorero ma ngi gea ihiromanga o Peres-Usa abe ma titi iwidaene o Usaika. De hokogea ma ngi gea ma romanga ka hiadono o ade-ade naa itulihuku.

⁹ De ma oraha gea o Dautu ai modongo itagi Ma Jou o Yaweika. De una womatemo wato, “Ho done sarakia abe Ma Jou o Yawe ai Behehongo ma Peti ka idadi tao ahi kotaika?”

¹⁰ Ho o Dautu ka wanoaikahi Ma Jou o Yawe ai Behehongo ma Peti genangoka ho ko wogila-gilauahi o Dautu ai kotaika. Abe ai hininga waturuuru de womaputuhu abe wato wanoaikahi o nyawa manga tauoka. De naga o tau moi itigino o rorero ma ngi gea abe womatengo o Gaata ma kotaino wogogere genangoka ai romanga o Obed-Edomo. Ho o Dautu worehene ai tauika de Ma Jou ai Peti wanoaika o Obed-Edomo ai tau ma goronaka.

¹¹ De genangoka Ma Jou o Yawe ai Behehongo ma Peti wohidodogumika ma dekana o mede hange. De Ma Jou o Yawe duru wihiowa o Obed-Edomo de abe ona mata-mata to una ai tauoka duru wahiowa.

¹² De ahao naga o nyawa iwihingahu o Dautika ato, “Mia baluhu, duru kiani nohioriki abe Ma Jou o Yawe duru wahiowa o Obed-Edomo de to una ai tau hiadono ngaro o nyawa eko ai kiahonanga ma, mata-mata wahikokiowa. De gea mangale ma titi Ma Jou ai Peti naga imanoa to una ai tau ma goronaka.” Hokogea iwihingahu o Dautika ho de ahao una wale Ma Jou ai Peti genangino de wohigila-gila o Dautu ai kotaika abe genangoka ai gogere la wahikoano o Isiraele ma nyawa. De naga yomakiniiki o Isiraele ma nyawa ko manga ngoe. Ka de o Obed-Edomo ai tauoka yosobo de ka hiadono o Dautu ai kotaika de ona mata-mata duru iwihigiriiri Ma Jou de manga gogarago manga dodagi ma goronaka.

¹³ De o Dautu wohiaturu la ona o nauru yaiata abe Ma Jou o Yawe ai Peti ihidomoku yotagi manga aguru butaangaika dika de genangoka kiani yomatogumukuohi. De genangoka una womahihubahi o hapi ma nauru ma baluhu moi de o hapi ma ngofaka moi abe o nyawa yatofo la ena duru de ma hakioka. Ho ma hapi hinooto gea womahihuba Ma Jouika ibooto de ahao yogila-gilali.

¹⁴ De naga o Dautu ai pakeanga ai baju o efodo imaketero hoka ona yomahinoauku abe yahidemo o Isiraele ma nyawa Ma Jouika. De ai baju o efodo gea o Dautu womahinoauku de una gea duru woselo-selo Ma Jou o Yawe ai himangoka de ai buturungu ma gahumu.

¹⁵ Hokogea una de o Isiraele ma nyawa manga dutu-dutu homoi-homoiino naga manga ngoe yomakiniiki ma oraha Ma Jou o Yawe ai Peti yao o Dautu ai kotaika. De ona mata-mata duru de manga gogarago ihiboa-boaka de naga manga guguli o domba ma tatadukino ma ngoe abe yawuwu ka ihikaika manga dodagi ma goronaka.

¹⁶ Masara o Dautu ngoi fekata, abe o Saulu ngoi ora o ngo Mikala, naga ami jendelaka abe muna mowuni-wuningi ma oraha yowohama o kota ma goronaika de Ma Jou o Yawe ai Peti. De muna mimake ami rokata o Dautu abe una womapaa-paatiye de woselo-selo Ma Jou o Yawe ai himangoka de muna duru ami hiningaka mihitipokouku ka hiadono midohata unangika.

¹⁷ De abe ma oraha Ma Jou ai Peti ko yaleuahi de o Dautu o tau o ngoerino ihira wohidiaiukuoka la Ma Jou o Yawe ai Peti ka idadi yakelenga o tau o ngoerino gea ma goronaka. Ho naa yomahiadono genangika de o Isiraele ma nyawa manga gogianongoru o Lewi ma dutuino Ma Jou ai Peti ihingohama de yakelenga to ena ma ngioka abe ihidiaiokau. De ahao naga o Dautu ai huhuba o aewani muruono naga abe womahihuba ma gahumu iharo-harongo. De nagaoo o hikadame ma huhuba muruono naga abe enangoo womahihuba Ma Jou o Yawe ai himangoka.

¹⁸ Ka de ai huhuba mata-mata gea womahihuba ibooto de ahao o Dautu ai nyawa mata-mataika genangoka wahiowa onangika de o demo abe ihititi Ma Jou o Yawe Wokokurutiye ai romangoka.

¹⁹ De ahao o Dautu nagaoo ai hidoaka o nyawa mata-mataika ngaro o nauru eko ngaro o ngofekaoo ma wahikokidoaka ona homoi-homoiika o roti iharo-harongo amomoi, de o roehe o luiti amomoi homoi-homoiika wahidoaka, de o angguru ma hofoko abe ma doolenge o belaka homoi-homoiika wahidoaka. Hokogea o Dautu wodiai de ahao ona abe yomatoomuino yokokilio homoi-homoi manga tauika.

²⁰ De ahao o Dautu wolio ai tauika una wato onangoo wahiowa abe ai tauoka masara ngoi fekata o ngo Mikala, abe o Saulu ngoi ora, muna mohupu manga tauino mibuhuku ami rokata. De mitaere, mato, “Abeika o Isiraele ma nyawa manga koano! Done sarakia o nyawa ka idadiohi yomalega ngonaika de manga horomati? De o wange naa ngona nohirusaka o koano ma horomati! De ani popareta manga gogilaongo, abe utu o ngo-ngofeka, ngona duru manga himangoka de ani pakeanga nahuputu imaketero hoka o nauru ma dorou abe una womahekono o ngo-ngofeka manga himangoka. Hokogea ngona naa nodiai. De ngona o koano! Ho ko iwa ani maleke?” Hokogea o ngo Mikala mitaere ami rokatika.

²¹ De o Dautu womipaluhu munangika de womihiree-reeika wato, “Mata-mata ngohi todiai o wange naa gea mata-mata todiai Ma Jou o Yawe ai himangoka de ahi horomati ma gahumu Unangika. Una wonapaliara ngone o Isiraele ma nyawaika abe wonahidadioka to Una ai nyawa. De gea Una Ma Jou abe wohiiriki ngohi de wohihitunguu abe wohihidadi o Isiraele ma nyawa manga hihira. De nako to ngona ani baba, de utu o nau-nauru to una ai tauoka, Ma Jou womihikohowono ona de ngohi de ka ngohiohi wohiiriki. Ho gea ma titi hiadono ngohi ko topusingua de o nyawa manga hininga nako yafikiri ngohi todiai abe o bodo ma datoro. Ngohi hokogea tomahimatoko ahi garago ma amoko Ma Jou o Yaweino.

²² De ngohi tagoungu, marai utuohi ilamoko ahao todiai abe ngona nato duru ibodo masara o ngo-ngofeka gea abe kangano nafetongo, ona gea ahao yomalega ngohino de manga horomati.” Hokogea o Dautu womahingahu ngoi fekata o ngo Mikalaika.

²³ Hokogea o ngo Mikala ami hininga, ho muna gea ami ngofaka moioo de duru ko mamakeua ka hiadono ami wowango ma bahaika.