2 Samuele 3 - Ma Jou ai Demo-demo o Totobelohoka

O Pasala 3 ko atailakouahi

¹ Masara gea ko yomahipipidiluahi yomaketeparangi. Abe ma titi ona yomahikoano o Saulu ai tauika de onangoli abe yomahikoano o Dautika ihoa-hoana yomaketeparangohi ho manga dekanohi yomakalawana. De nako o Dautu de ai nyawa ona manga buturungu ka idogo moduku, masara o Saulu ai nyawa manga buturungu ka ihihanga moduku.

O Dautu ai ngofa-ngofaka abe yomaboa o Heboronoka

² De abe ma oraha o Dautu wogogere o Heboronoka de wamake ai ngofaka o nauru yabutaanga. Abe wohira-hira womaboa ai romanga o Anono, de ngoi meme o ngo Ahinoama abe o Yisereeloka.

³ De ipaha womaboa o Dautu ai ngofaka womatengoli gea o Kileaba, de to una ngoi meme o ngo Abi abe ami rokata wohira-hira o Nabala o Karameloka. De ahao ai ngofaka womatengoli womaboa abe ai romanga o Abasalomo, de to una ngoi meme o ngo Maaka. De muna gea ami baba o Gesuru manga koano, de ai romanga o Tamai.

⁴ De ipaha ai ngofaka womatengoli womaboa abe ai romanga o Adonia de una gea ngoi meme o ngo Hagiti. De ipaha ahao womaboa ai ngofaka abe ai romanga o Sefasa de ngoi meme o ngo Abitala.

⁵ De ipaha naga womatengohi womaboa o Dautu ai ngofaka, de to una ai romanga o Yitirama. De to una ngoi meme o ngo Egala o Dautu ngoi fekata momatengoli. Hokogea o Dautu ai ngofaka o nauru yabutaanga manga roma-romanga abe yomaboa o Heborono ma kapongoka.

O Abanera womangali ai hininga la winiikoli o Dautu

⁶ De ma oraha gea ona abe yomahikoano o Saulu ai tauika de onangoli abe yomahikoano o Dautika ka yomaketeparangohi. De nako o Saulu ai hidimonino de o Abanera una gea ai buturungu de ai romanga ka ihikaika idogo.

⁷ De marai ma dihiraino de naga o Saulu ngoi fekata momatengo o gilaongino abe ami romanga o Risapa, de to muna ami baba ai romanga o Aya. De ipahaino naga o wange moiuku abe ma koano o Isibosete witae o Abaneraika wato, “Ngona naa duru nahowonoka angamoi ngona de ahi baba ngoi fekata o gilaongino o ngo Risapa ngini nimahigelenga!”

⁸ De woihene o dadae ma demo gea de o Abanera duru wongamoholi ho wipaluhu wato, “Ho done ma titi o kia hiadono ngona nato bote ngohi naa tiniao itorou hokogea? De sarakia, ngona nagou-goungu nohietongo nato tiniporete ngini mata-mata abe ani baba ai tauoka de tomangali o Yehuda ma nyawaika? Masara ma dihirainohi de ngohi naa duru tatobagou-goungu ani baba ai nyawa mata-mataika. Abe ka ihikaika tinidato-datoko o Dautu de ai nyawaino de ko tinifukunua onangika. De ngaro ahi datoro ma rorahai gea mata-mata nginika masara naa de ngona nohitae ngohino ma titi ma ngofeka gea!

^9-10 Ho naa tomahikoboto Ma Jou ai himangoka ho duru tagou-goungu tato tomangali o Dautika de titobaduhunu de ahi buturungu ma gahumu la hiadono una wamake mata-mata abe Ma Jou wihibehehongoka unangika! Abe ngohi ahi mau la tiduhunu hiadono una ka idadi wahikoano o Yehuda ma nyawaika de o Isiraele ma nyawaikaoo ka ma moi! De gea ka idadi wahipareta o Isiraele ma tonaka mata-mataika, abe ngaro o Daana ma kapongo dau ma dobikuku hiadono o Bereseba ma kapongo daku ma tonaka ma dobikiye masara duru mata-mataika ahao o Dautu wahikoano. De hokogea ahi demo abe tomahikoboto genangino, ho nako hoka o Dautu ko tiduhunua de ahao ka idadi Ma Jou wohihohowono de o hohonenge dika!

¹¹ De wotemo ibooto de o Isibosete ai demo moioo de ko wipaluhua angamoi duru wimodongo o Abaneraika.

¹² De ahao o Abanera wohidingoto ai hingahu ma demo moi o Dautika, de ai demoino gea wato, “Ho koaho onaguna wahipareta ma tonaka mata-mataika naa? Abeika ngone inahinooto homahiketehibehehongo ma titi ma tonaka, de ahao ngohi ka idadi toniduhunu hiadono ngona dika nahipareta o Isiraele ma tonaka mata-mataika.”

¹³ De o Abanera ai nyawa yadofanga ai demo gea o Dautika de o Dautu wosanangi de wotemo wato, “Ka idadi homahiketehibehehongo hokogea, iti ma oraha ngona noboaino de nomiao ngohi fekata o ngo Mikala abe o Saulu ngoi ora gea de nomihigilio ngohino.”

¹⁴ De ahao o Dautu wohidingoto ai demo moi o Isibosetika wato, “Ngona kiani nomihigilio ngohi fekata o ngo Mikala ngohino. Angamoi ma dihiraino gea de tomiijaka, de ami bobangu o Filistina ma nyawa yaratuhu moi. Abe gea kiani tahohonenge de manga mamaleke ma kai taluiti de tohidoaka ani babaika.” Hokogea o Dautu ai demo abe wohidingoto o Isibosetika.

¹⁵ De ahao yadofanga ma demo gea unangika de ipaha o Isibosete wahidingoto ai nyawa la yahikoluku o ngo Mikala ami rokatino. Abe una gea ai romanga o Palati abe o Laisi ai ngofaka.

¹⁶ De ma oraha yahikoluku de imiaoika de ami rokata womihidoduruino ami poretino de duru woari-ari. De hokogea una wominii-niiki ka hiadono o Bahurimi ma kapongika. Masara genangoka de ahao o Abanera wihuloko ami rokatika wato, “Ibooto! Ngona kiani nolio dika ani tauika!” Ho gea una womaleloro de wolio ai tauika.

¹⁷ De ma oraha gea o Abanera de o Isiraele manga dimo-dimono yomakoketemo, de una wotemo wato, “Ngohi tinihioriki nia hininga abe ma dihirainohi de nioigo la o Dautu dika wodadi ti ngini nia koano.

¹⁸ Ho naa tinihingahu abe ma oraha adonoka la niwigoraka de niwihidadi nia koano. Angamoi ma dihiraino Ma Jou o Yawe wohibehehongoka wato ahao wipake o Dautu la wonaduhunu ngone o Isiraele ma nyawa la ka idadi hahikala o Filistina ma nyawaika de nanga musu utuoli onangoo hahikala. Ho irahai la ma oraha naa dika de ngini nimahikoano o Dautika.”

¹⁹ De ona yomakoketemo ipahaino de ahao o Abanera woiki o Benyamini ma nyawaika la onangoo wahigaro ma titi o Dautu. De ipahaino ahao una woiki o Heboronika de wihingahu o Dautu ma titi o Isiraele ma nyawa de o Benyamini ma nyawa ona mata-mata yomahininga moi abe yosanangi yomahikoano o Dautika.

²⁰ De ipahaino abe ma oraha o Abanera de ai nyawa yamonaoko yoboa o Heboronino, o Dautu wohidiai o rame-rame ma amoko la ona ka idadi yomakutuono yolomo ma ngolo-ngolomo gea.

²¹ De gea o Abanera witemo o Dautika wato, “Nako ngona nosanangi, ngohi ka idadi toiki de taahoko o Isiraele ma nyawa mata-mata la yokokiboa yomatoomuino ngonaka de iwigoraka la yomahikoano ngonaika. De gea ka idadi ona mata-mata yomahibehehongo la yodadi ani kokawaaha de ininii-niiki ngonaika. De ahao ngona ka idadi nahipareta mata-mata imaketero hoka ani hininga ma mau.” De o Dautu wosanangi ai demoika ho wihidingoto o Abanera la ka idadi wakokiahoko o Isiraele ma nyawa mata-mataika. De gea o Dautu wisanangi dika o Abaneraika ma oraha una wosobo.

O Abanera iwihohonenge

²² Abe ma oraha o Abanera de o Dautu yomakoketemo o Heboronoka, o Yoaba de o Dautu ai tentara ma nyawa utu ko yaiwa. Angamoi ona gea yoikoka yaparangi de yahikala manga musuika, ho yomahitoona manga musu manga kiahonanga duru kohangoe. Ho naa ona yolioino o Heboronino masara o Abanera una wosobokau angamoi o Dautu wihidingoto de gea ona yahinooto manga borihininga isanangi dika ma oraha una wosobo.

²³ De gea o Yoaba de ai tentara ma nyawa yomahiadonino de naga abe iwihingahu unangika ato, “Naa ma duru o Abanera woboa wirekata nanga koanoika, de ipahaino nanga koano wihidingoto ho wosobo, de gea ma koano wisanangi dika o Abaneraika.”

²⁴ Ma hingahu gea o Yoaba woihene ipaha de ahao una woiki ma koanoika de witemo unangika wato, “Naa done sarakia ani hininga? Angamoi toihene bari o Abanera woboa wonitutumu masara ngona nihigunoa dika la wosobo! Ho done ma titi o kia ani datoro hokogea?

²⁵ Ngona nihiorikoka to una gea ai hininga, abe maraioka una woboaino la ka idadi wonibudi de watotailako ani datoro de ani hidee mata-mata!”

²⁶ De wotemo ipahaino de winoaika o Dautu de ahao o Yoaba wahidingoto ai nyawa yamuruono naga la iwihidoduruika o Abaneraika hiadono iwidaene de iwihigilio o Heboronino. Masara o Dautu ko wihiorikua o Yoaba ai datoro gea. De ipahaino de ona iwimake o Abanera o Sira ma humuoka de iwingotaka iwihigilio o Heboronino.

²⁷ Ho ka de yomahiadono de o Yoaba wihidohikika o Abanera ma kapongo ma ngorana ma datekika, abe bari ai hininga la wihingahu o demo moi unangika. Masara genangoka ka itodokanino de witopoko o Abanera ai pokoroko hiadono wihohonenge. De hokogea o Yoaba wihibalaha ai dodoto o Asaele abe ma dihiraino de o Abanera wihohonengoka.

²⁸ De ipahaino abe ma oraha o Dautu woihene ma titi o Yoaba ai datoro gea de womahingahu wato, “Ngohi naa duru tagou-goungu tomahingahu Ma Jou o Yawe ai himangoka abe ngohi de ahi totoforauku duru ko iwa mia howono ma titi o datoro ma dorou naa abe idadioka o Abanera o Nere ai ngofakika.

²⁹ Masara gea o Yoaba de to una ai tau, ka ona dika manga tagongo ma titi ai datoro ma dorou gea. Ho naa ngohi tagahoko ma dorou o Yoabika de ai tau mata-mataika, la to ona manga lape homoi-homoiuku de naga womatengoani onangino abe Ma Jou wahidaene de ma kangela ma dubuho. Abe marai utu yagogama de o boroho ma dorou de utu yapado-pado de utuoli marai yolugu-lugu. De hiadono ona utu marai yohonenge o parangi ma goronaka eko duru yohuha hiadono kaini yomagaho-gahoko dika manga inomo. Marai kiani hokogea o Yoaba ai totoforauku manga kangela yadaene!”

³⁰ De hokogea idadi ma oraha o Yoaba de o Abisai iwihibalaha manga dodoto o Asaele mangale ma dihiraino de o Abanera wihohonengoka o parangi ma goronaka abe o Gibeonoka.

O Dautu ona iwigari-gari o Abanera

^31-32 De ahao o Dautu wahuloko o Yoaba de ai nyawa mata-mata unangoka wato, “Ngini kiani nia baju homoi-homoi niakakihi de ahao nimaturuuru la o pakeanga ma kekekere nimahinoauku! Nimaturuuruoka de kiani niwigari-gari o Abanera!” De o nyawa manga ngoe iwilungunu o Abanera o Heborono ma kapongoka, de ma oraha ai honenge iwingotaka ma lungunika de o Dautu wahidoduruika manga poretika. De ipaha ma oraha ai honenge ihiguti ma tonaka ma goronauku de o Dautu de ona mata-mata abe yomatoomuinoka genangoka duru kahumutaigarika ma titi o Abanera.

³³ De ahao o Dautu wonyanyi o gari ma nyanyianga moi la wingano-nganono ma titi o Abanera, de hokonaa ai gari ma nyanyianga ma demo, wato, “Hiokoo ngona o Abanera inibudi dika hiadono initoma, Abe koaho hokogenangua idadi ngonaika!

³⁴ De gea ani giama ko yapakitua, De ani lou ko yahidaranteua. Masara ani hohonenge gea duru itorou, Abe inibudi de inihiruba imaketero hoka o nyawa ma dorou yorubauku.” De o Dautu wonyanyi ipahaino de ahao ona mata-mata iwigarioli ma titi o Abanera.

³⁵ De ma wange gea de o Dautu duru woluku wolomo, ho ahao o nyawa manga ngoe yoboa o Dautu ai himangino de iwihigaro la ato koaho o inomo waolomo. Masara gea o Dautu womahikoboto wato, “Ngohi naa duru toluku o inomo taolomo o wange naa. Abe nako hoka ko tagou-goungua ahi koboto ma demoino de ahao kiani Ma Jou wohihohowono de ma dubuho! Masara bootino yofutuku de ahao ka idadi tolomoli.” Hokogea o Dautu womahikoboto.

^36-37 De ma nyawa mata-mata genangoka iwimake manga koano ai hininga gea de duru iwisanangi unangika. Angamoi ma titi ai demo de ai datoro gea de ka idadi duru iwihioriki abe ko ma titiua manga koano hiadono o Abanera iwitoma. Abe ngaro to una ai nyawa genangoka de ngaro o Isiraele ma nyawa mata-mataika masara ona iwihikokioriki abe o Dautu ko iwa ai howono ma titi o Abanera ai doma gea. De marai manga koano gea ai datoro mata-mata yahisanangi dika ai kokawaahaika.

³⁸ De gea o Dautu wotemo ai tentara ma hohidimonika wato, “O wange naa nanga gianongoru de nanga hidimono womatengo worubaka, abe ai kuaha duru ikurutiye o Isiraeloka naa.

³⁹ De marai ngohi naa todadioka ti ngini nia koano angamoi Ma Jou wohigorakoka. De ngaro ngohi nia koano ahi kuaha hatoli ilamoko masara done ko iwedonua angamoi ko takunua tahipareta o ngo Seruya ami ngofaka o nauru yahinooto gea. Abe o Yoaba de o Abisai onangoo manga kuaha ilamoko. Ho ngohi tato marai kiani Ma Jou o Yawe dika abe wahibalaha ona yahinootoika ma titi manga datoro ma dorou!” Hokogea o Dautu ai demo ai tentara ma hohidimonika.