2 Samuele 23 - Ma Jou ai Demo-demo o Totobelohoka

O Dautu ai behehongo ma demo ma baha

¹ De naa adonoka abe o Dautu, o Isai ai ngofaka, una iwiperekioka. De o Dautu ai wowango ma goronaka Ma Jou wigorakiye abe hiadono ka unangohi wokokurutiye o duniaka. Ma Jou, abe ma dodihiraka o Yakubu womahijou Unangika, Una gea abe wiiriki o Dautu la wahikoano o Yakubu ai totoforauku. De una wososawaro wonyanyi de wodiai o nyanyianga duru ihohailoa ma ngoe abe yahiutumu de yahisanangi o Isiraele ma nyawaika. De hokonaa o Dautu ai behehongo ma demo ma baha:

² “Ma Jou o Yawe de ai Womaha watemo o nyawaika, De wapake to ngohi ahi uru la to Una ai demo wahidoaka onangika.

³ O Isiraele ma nyawa manga Jou Una wotemoka, Una hoka o Isiraele ma nyawa manga lokuhakaru, Abe manga buturungu de manga nganganono ihititi Unangoka. De Una wohihingahu ngohino, wato, O nyawa manga hihira abe una de o totiai wahipareta, De naga ai horomati ma modongo Ma Jouika,

⁴ Una wodadi hoka o dararono abe yadaene o ngorumino onangika, Hoka o wange ma dararono abe ahao ipotokaiha, Abe o lobi ko iwa ma dihangoka, ho duru yahitawange onangika, Hokogea o nyawa manga hihira abe wototiai ai kokawaaha wahipareta. De imaketero hoka o awana abe o ruruubu ihiwango o tonakino, Hokogenangoli o hihira ai kokawaaha wahiwango, Iti una waniiki Ma Jou ai totiai de wimodongo Unangika. De ngohi ahi wowangoka hokogea ahi horomati Unangika.

⁵ De to ngohi ahi tau Ma Jou wahiowa ma ngoe, De angamoi Una wohihibehehongo abe ahi tau wairikoka, De ai behehongo ngohino ka ihikaika ilaku ka hiado-adonika, Abe Una wohiaturu la idadi imakiniiki de ai behehongo gea, De ena gea igogere Unangoka ho gea ko idadiua wawohanga. De ngaro ahi howono naga masara ahi hohowono waofioka. De wohiduhunu la naga o lolaku ahi wowangoka, Ho o duduhunu mata-mata abe ngohi tonganono ahao idadi, Abe Una de ai hininga ma igoka de aino wohingodumu ai behehongo.

⁶ Masara abe o nyawa ko iwingakua Ma Jouika, Ona ahao yaumo imaketero hoka o ruruubu de ma hihikaka, Abe o nyawa ko yapoaua ho de manga giama yaso o ruruubuika gea, La ma ruruubu de ma hihikaka ka idadi ihibinaaha.

⁷ De ona abe ma hihika gea yapairi de yotoomu kiani yomahitiari, Abe yale manga dia o behino eko manga gota o bobeleuru, De gea ena yapake la o ruruubu yatoomuino de hiadono yatufukoka. De hokogea imaketero abe ona ko iwingakua Ma Jouika, Ona gea ahao Una watufuku de o bobinaaha ma uku!” Hokogea o Dautu ai behehongo ma baha abe ma oraha adonoka wohonenge.