2 Samuele 22 - Ma Jou ai Demo-demo o Totobelohoka

O Pasala 22 ko atailakouahi O Dautu wihigiriiri Ma Jou o Yaweika ma titi widatokoka ai musuino la ufa wobodito

¹ O Dautu ai nyanyianga naa una wonyanyi Ma Jou o Yaweika abe ma oraha Ma Jou widuhunu ai musu mata-mataino. De ngaro o Saulu unangoo naga ai hidee ma dorou o Dautika masara Ma Jou duru widatoko o Dautu.

^2-3 De hokonaa to una ai nyanyianga ma demo, “Ma Jou o Yawe, Una gea womaketero hoka ahi loku ma tubu angamoi ko wokelu-kelua. De Unangoo wodadioka ahi dadatoko ma ngi abe genangoka duru ko idadiua ihihikala! De Una dika abe wohiduhunu hiadono o bodito ko ihidaenua. De to Una ai duduhunu gea ngohino ma titi hiadono tihiromanga Unangika tato, Una wagou-goungu to ngohi ahi lokuhakaru de ahi dadatoko de ahi duduhunu.

⁴ Ho ngohi tomagahoko o duduhunu ahi Jou o Yaweiye, de Una wohiduhunu ho wohigoraka ahi musu manga hidee ma dorouoka de taino. Ho duru itaana abe ngone hihigiriiri Unangiye!

⁵ Abe ma oraha gea de duru tamao hoka o hohonenge ihihikorobitino, de o binaaha ihilufungoka.

⁶ De gea tamao imaketero ihipaki-pakitoka la ihiao o hohonenge ma ngiika, de hoka o lungunu ma modoi ihitaokoka.

⁷ Ho ahi kangela ma goronaka de o duduhunu tomagahoko o Yaweika, abe to ngohi ahi Jouiye ahi gogahoko idoaiye. De Una gea daku ai Tau o Horogaka de wohigihene, ho Una wohibaluhu ahi gogahoko de wohiduhunu ngohi!”

⁸ “Abe hokonaa Ma Jou wohiduhunu ahi musu manga hideeino. Una wodiai la o tonaka duru ikelu-kelu, de ngaro o loku-loku o dihanga ma timiuku masara enangoo wohikelu-kelu. De gea mata-mata wodiai ma titi ai ngamo ahi musuika.

⁹ De nagali ma nofo abe ihupu to Una ai ngunungoka de aino, de ai uruino ihupu o uku ma dokara, de o uku ma ngaboho duru ma hau-hauku enangoo ihupu de ipuraraha dau o duniauku.

¹⁰ De ahao Una wafelenga ma dihanga de woutiuku, de gea woboaino o lobi-lobi ma birini ma goronaka.

¹¹ De ngohi timake una hoka womaokoino o kerubu ma malaekata womatengo ai gafuufuoka la wohohoino, eko hoka o hidaloko ma amokoka womawooto daku de waino.

¹² De gea woboaino de womahihawoino de o fufutu, abe o lobi ma biri-birini iwihigororomino.

¹³ De Unangoka naga ai dararono abe ihitawange aika aino. De o leletongo ihupu Unangino de yadaene dau ma duniauku.

¹⁴ De nagali abe yokuruuhu daku Ma Jou o Yawe ai ngioka de aino, de gea tanu Una abe Wokokurutiye ai ilingi toihene.

¹⁵ De ahao Una wodiai la o leletongo idadi, de gea wohidumutu ma leletongo imaketero hoka o hihiipi wohitoimika. ho ma musu ona wahililifanga hiadono ona mata-mata yomahikabarihoka.

¹⁶ De ipahaino de mangale ma titi ai ngamo ai musuika, ho Una duru wowuwu de ai buturungu o gahika, hiadono o gahi wakiniikika de ka idadi tamake ma tonaka o gahi ma timiuku.

¹⁷ De ahao Una abe daku o Horogaka womanoa, Una gea wohidoaka ai giama ngohiuku la wohiduhunu, ho ngaro ngohi o gahi ma lukuoka masara wohigorakiye done tobodito.

¹⁸ De gea ma titi abe Una wohiduhunu ahi musu manga giamino, abe ngaro ona gea duru de manga bobuturungoka de ka ihidohata ngohino, masara Una ka idadi wohigorakiye de wohiduhunu ngohi.

¹⁹ Abe ahi musu gea ihibaata ngohino ho ahi bodito taohana, masara Ma Jou o Yawe wohidatoko done tobodito,

²⁰ de Una wohihihira-hira o dame ma ngiika, angamoi Una wohisanangi ngohino ho hiadono wohiduhunu.”

²¹ “Ma Jou womalega-lega ngohino de wamake ahi datoro ma totiai, ho Una wohihiowa de ahi utumu ma rorahai.

²² Angamoi ngohi tatobaniiki to Una ai pareta ma demo, de Unangika ko tiporetua ho ma dorou dika toporete.

²³ De to Una ai hitiari ma demo tongano-nganono, abe ngohi ko tawohangua ai demo gea.

²⁴ Ho to Una ai himangoka wohietongo wato to ngohi ahi howono ko iwa, angamoi duru tomahitiari done tahowono Unangika.

²⁵ De naa Una womalega ngohino de wohimake ngohi totebini ai himangoka, ho Ma Jou o Yawe wohihiowa de ahi utumu duru ma rorahai.”

²⁶ De ahao o Dautu wohigila-gila ai higiriiri ma demo Ma Jouiye wato, “Iti o nyawa yatobaniiki ani mau de gea Ngona duru natobagou-goungu nao itiai onangika. De onangika abe manga datoro irahai de Ngona duru nao irahai onangika gea.

²⁷ De ona abe manga hininga itebini, gea Ngonali nao de ani hininga ma debi-debinino. Masara o nyawa abe manga hininga ifuludioka, onangika gea Ngona nahibalaha abe nahililifanga manga hiningaika.

²⁸ De o nyawa abe manga hininga ma dodipokouku de Ngona natobaduhunu onangika, masara ona abe yomatobagorakiye Ngona nomalega-lega onangika de ahao nahitipokouku.

²⁹ Ahi Jou o Yawe, Ngona nodadioka hoka ahi hilo, ho ma fufutu abe ihihawoka Ngona nodiai la idadi itararonoka!

³⁰ De ma titi ani duduhunu ngohino ho ka idadi ahi musu manga ngoe tabaatika, angamoi nako de ahi Jou ai buturungu ngohioka ka idadi todoaiye de tatilakuru o kota ma dadaduhu.

³¹ Abe Ngona ahi Jou ani hininga ma datoro duru ko iwa ma howono, ho to Ngona ani behehongo ma demoino de duru notobagou-goungu. De Ngona nomahidadi o dadatoko la duru nagoana onagona dika abe yoigo yomahitatoko Ngonaka.

³² Angamoi abeika, nako ko Ngona o Yaweua, ka onagonali yodadi ahi Jou? De nako ko ahi Jouua, ka onagonali yodadi ahi hakaru abe ko ihelo-helorua? Utu duru ko iwa!

³³ Abe Ma Jou Ngona ma hirete nohihiputurungu, de ka Ngona dika nohirikoto ahi ngekomo.

³⁴ De Ngona nohihiakunu la ma oraha o loku ma geleforiye todoaiye de ufa ahi lou ihooro de ihiotaka ma geleforuku.

³⁵ De ahi giama nahiputurungu la ahi musuika taparangi, ho ngaro o toimi abe kohabuturungu masara ka idadi todauroko.

³⁶ Ngona nohihidoaka ani lolaku ma dae la ka idadi tolaku, de ani giama kohabuturungu gea idadi ahi dadaga, ho ma titi ani duduhunino de nohihilaku-laku!

³⁷ De Ngona nohitiai de nohiwoata ahi ngekomo done ngohi topeleke de torubauku.”

³⁸ “Ngohi ka idadi taginiiki ahi musu de tahikala onangika, de duru ko tomatogumua hiadono ona yobinaahaka.

³⁹ Duru tahikala onangika hiadono ko yomomikokaua, abe ona gea yorubaka ahi louoka de ko yakunokaua yomaokoino.

⁴⁰ Angamoi ka Ngona dika nohihiputurungu la ka idadi o lolaku tamake, de Ngona dika ma titi hiadono ka idadi tahikala ahi musu gea.

⁴¹ Abe Ngona nahiaturu la ahi musu yomadogilioro de yoara, ho ona abe ihidohata, gea ona duru tahikalaka.

⁴² Abe ngaro ona yomagaho-gahoko o duduhunu masara moioo de ko iwa yahigihene onangika. De ngaro hiadono yopoaka Ngonaiye de yomalingiri o duduhunu, masara gea Ngonaoo ko nalegaikaua onangika.

⁴³ Ho ka idadi ngohi duru tahikala onangika, abe imaketero hoka ona tahiwewederuku ka hiadono yomaketero hoka o tonaka ma kuhuhunu dika, de tadoko-doko onanguku hoka o tonaka ma peseke dika.

⁴⁴ De ahi musu manga tentara manga giamoka de aino Ngona nohigorakiye, de nohihidadi o nyawa manga ngoe manga hidimono. Abe ma dihiraino naga o dutu de o nyawa abe duru ko tahiorikua, masara ma oraha naa de ona yodadioka to ngohioli ahi kokawaaha.

⁴⁵ O homoa ma nyawa ona duru ihimodongo, ho ka de yoihene ahi romanga dika de naga manga hingounu ngohino.

⁴⁶ De to ona gea manga domoroini ka ihihanga dika, ho hiadono duru yofafara dika de manga dadatoko ma ngi yanoaika la yomahidoaka dika ngohino.”

⁴⁷ “Ma Jou o Yawe Una gea wotobawango! Ho ngohi duru tihigiriiri Unangika abe wodadi ahi lokuhakaru! De duru itaana abe ngone mata-mata hihigogiriiri Unangiye, abe Una wohiduhunu ahi boditoino!

⁴⁸ O dutu ma nyawa gea abe ihihikangela ngohino, Una duru wohihibalaha de wahohowono onangika gea! De ona mata-mata Una wahikala hiadono wahigutiuku, de ahao wahihidadi la ona ahi giama ma hoatoka.

⁴⁹ Ho igoungu Una wohiduhunu ahi musu manga giamoka de aino, de wohidatoko la ibootohi ona ihihikangela ngohi. Abe ngaro ahi musu gea duru yotualono, masara Una wohiduhunu la ka idadi tahikala onangika.

⁵⁰ De gea ma titi hiadono ngohi naa duru totarimakase Ngonaika ahi Jou o Yawe, de ani romanga tagorakiye o nyawa mata-mata manga hima-himangoka!

⁵¹ Angamoi Ngona nohigoraka ngohi naa la todadi o koano, de ipahaino nahiaturu la duru tolaku-laku de ka idadi tahikala ahi musuika. Abe ma dihiraino de nohiiriki ngohi la tonileleani Ngonaika, de to Ngona ani dora nomihimatoko ngohi de ahi dutu mata-mataino, ngaro ma oraha naa de ka hiado-adonika! Ho gea ma titi hiadono ngohi duru tonihigogiriiri Ngonaiye!”