2 Samuele 2 - Ma Jou ai Demo-demo o Totobelohoka

O Pasala 2 ko atailakouahi O Dautu iwigoraka la wahikoano o Yehuda ma nyawaika

¹ De ipahaino de o Dautu woleha Ma Jou o Yaweika la ka idadi wohioriki ai hininga, ho wileha wato, “Sarakia, irahai ngohi tomaturuuruoli de tolio o kapongo moiika abe o Yehuda manga tonakoka?” De Ma Jou wipaluhu wato, “Iya, irahai nomaturuuru genangika.” Ho o Dautu wilehali wato, “Masara koaho o kapongo o kiaika?” De gea Una wipaluhu wato, “Irahai ngona noiki o Heboronika.”

² Ho o Dautu womaturuuru o Heboronika, de ngoi fekata yahinooto yomakiniiki de de una genangika. Abe ngoi fekata momatengo o ngo Ahinoama o Yisereeloka de momatengoli o ngo Abi abe muna ami rokata wohira-hira o Nabala de una o Karameloka ma nyawa.

³ De nagali o Dautu ai nyawa de to ona homoi-homoi manga feka-fekata de manga ngofa-ngofaka. Ho ona mata-mata yomakokiniiki yomaturuuru o Heboronika de o kapo-kapongo utuikali abe imahitigi-tigino.

⁴ De yomaturuuru ipaha de ahao o Yehuda ma nyawa manga ngoe yoboa o Dautino la iwigoraka de iwihidadi manga koano. Ho ona iwihituagi ai peauku de o minya la ka idadi wagou-goungu wodadi o Yehuda ma nyawa manga koano. De ahao o Dautu woihene ma abari o Yabese ma kotaka de aino, de o Yabese gea imanoa o Gileada ma tonakoka. Ho naga o nyawa iwihingahu ato, “O Yabese ma nyawa gea iwilungunoka o Saulu ai honenge.”

⁵ De ma abari gea woihene ipaha de ahao una wohidingoto ai demo o Yabese ma nyawaika, abe una wato, “Ngohi tonganono la Ma Jou o Yawe winihiowa nginika ma titi nia hininga ma rorahai nia hidimono o Saulika ma oraha to una ai honenge ngini nialungunu.

⁶ De gea ma titi hiadono tinigahoko Unangiye la winihiowa ai hininga ma rorahaiino. De ngohioo ahi hininga la tiniao irahai nginika ma titi nia datoro ma rahai gea.

⁷ De ma oraha naa ngohi tinihigaro la ngini mata-mata nimahipoputurungu de ka idadi ngohioli nihinii-niiki! Angamoi o Saulu una wopahaka, de o Yehuda ma nyawa ihigorakoka ho todadi to ona manga koano ma hungi. De duru tosanangi nako nginioli nihinii-niiki ngohi!”

O Dautu de o Saulu manga tentara ma nyawa yomakalawana

⁸ Masara ma dihirainohi de o Abanera abe o Nere ai ngofaka gea, una wodadi o Saulu ai tentara manga hidimono duru wokokurutiye. De o Abanera gea to una ai hidee imakohowono. Abe ka de o Saulu wohonenge de o Abanera woiki wile o Saulu ai ngofaka o Isibosete de wiao o Mahanaimi ma kotaika.

⁹ De yomahiadono ma kotaka gea de wigoraka la o Isibosete gea wodadi o nyawa manga ngoe manga koano. Abe una wahikoano o Gileada ma nyawaika de o Aseroka de o Yisereeloka de o Efaraimoka de o Benyaminoka, de o Isiraele ma nyawa utu mata-mataika.

¹⁰ De ma oraha o Isibosete wodadi wokoano de to una ai ngumuru ai taongo moruata ibooto. De una gea ai dekana abe wahikoano o Isiraele ma nyawaika ai taongo hinooto dika. Masara nako o Yehuda ma nyawa ona yomahikoano o Dautika.

¹¹ De o Dautu una wogogere o Heboronoka de wahikoano o Yehuda ma nyawaika, de ai dekana abe wahikoano genangoka ai taongo tumidi de ai mede butaanga.

^12-13 De o wange moiuku o Isibosete ai tentara ma nyawa de o Dautu ai tentara ma nyawa ona mata-mata yomaketeparangi. Abe o Abanera una wahihira-hira o Isibosete ai tentara o Mahanaimoka de yaika o Gibeono ma kapongika. De ma oraha genangoo naga o Yoaba o ngo Seruya ami ngofaka, una wahihira-hira o Dautu ai tentara la yoagurika o taaga moiika abe imahitigino de o Gibeono gea. Ho ma taagaka gea de ma tentara ma nyawa mata-mata yoarihononga ho yomarihimanga.

¹⁴ De ahao manga hidimono homoi-homoi, abe o Abanera de o Yoaba, ona yahinooto yomaketemohi. Ho o Abanera witemo o Yoabika wato, “Abeika ngone haboriiriki nanga nyawa yamuruono dika la yomakalawana nanga hima-himangoka, de ngone utu ka idadi hawuni-wuningi dika onangika.” De o Yoaba wipaluhu wato, “Ka idadi hokogea hodiai.”

¹⁵ Ho o Isibosete ai tentaraino de yairiki o nyawa yangimoi de yahinooto abe o Benyamini ai dutuino la yalawana manga musuika. De o Dautu ai tentaraino hokogenangoo, abe yairiki o nyawa yangimoi de yahinooto.

¹⁶ De yairiki ipahaino de ona gea yomakalawana. Ho ona homoi-homoi yomakoso manga musu yomatengoika manga tadaurika de ahao ka yatopoko manga gumurukika de manga humaranga. Ho ma bahauku de ona yamonaoko de yaiata mata-mata yoborihonenge ma titi manga nabo gea. De mangale ma titi gea hiadono o nyawa yahiromanga ma hikalawana ma ngi gea ato “O Humaranga ma Tonaka.”

¹⁷ De gea ipaha de ahao o tentara ma nyawa utu mata-mata onangoli yomaketeparangi, de manga parangi gea duru kohagiria. De ma wange gea o Dautu ai tentara ma nyawa ona yahikala manga musu o Isiraele manga tentara abe ona manga hidimono o Abanera.

¹⁸ De o Dautu ai tentara ma nyawaino naga o ngo Seruya ami ngofaka yahangeika, abe o Yoaba de o Abisai de o Asaele. De nako o Asaele, una gea duru wopalesa womapopaata, abe una ai palesa imaketero hoka o luadanoli ma palesa.

¹⁹ De una gea womulaenge wikiniiki o Abaneraika wato widaene, de duru ko womatogu-togumua wihidoduruika.

²⁰ De ahao o Abanera womadogilioro ai poretoko de wimake o Asaele gea womahitigino, ho wiahoko unangika wato, “Ngona gea nagoungu o Asaele abe noboaino?” De wipaluhu o Abaneraika wato, “Iya, ngohi naa o Asaele.”

²¹ Ho o Abanera wihitiari unangika wato, “Koaho ngona noikohi dika la nimakalawana de o nyawa utuoli abe ka o goduuruohi, la ahao ngona ka idadi nahikala de nataokino to ona manga parangi ma dae abe onangoka.” De ngaro hokogea o Abanera wihitiari unangika masara ka womahitigi moduku unangino.

²² De ahao ma moioli o Abanera wihitiari wato, “Kiani ngona nomahirehene ngohioka de naika! Angamoi ngohi naa duru ko toigoua tonihohonenge ngona. Abe nako hoka tonihohonenge done sarakia ngohi de ani riaka o Yoaba mimarihimangoli? Gea marai ko tadadiokaua!”

²³ Masara o Asaele gea duru woluku winoaika dika ho ka uku dika wikiniiki la wato widaene. De ahao ma bahauku de widaene ho yomarihimanga, de o Abanera witopoko o Asaele ai pokoroko, abe gea wohingohama ai kuama ma otini o Asaeloko. De witopoko duru de ai buturungoka ho hiadono ai kuama igila-gila de ihupu o Asaele ai poretoka de aoko. Ho o Asaele ka genangoka dika de worubauku de ai ngomaha itoakoka. De ahao ai dodiawoino onagona dika iwitilakuru ai honenge gea ka de iwimake de yomatogumuku de iwidamaana unangika.

²⁴ De ipahaino abe ma oraha o Asaele ai riaka o Yoaba de o Abisai yoihene ma abari ma titi manga dodoto gea de yomataiti yosobo la onangoli iwikiniiki o Abaneraika. De ma wange gea abe ihumuririhuku de ona yomahiadonoka o Ama ma lokuino abe imahitigino de ma ngi moi abe ihiromanga o Gia. De ma ngekomo genangoka nako hanii-niiki, gea ma dumutu o Gibeono ma tonaka ma kakaahaika.

²⁵ De o Abanera ai tentara ma nyawa abe yomakiniiki de una, ona o Benyamini ai dutuino yoboa. De o loku moi ma tubuoka o Abanera ai tentara gea yomahitatorino ai poretoka de yomahidiai la ato genangoka yomaketeparangi de o Yoaba de ai tentara.

²⁶ Masara ko yomakalawanuahi de o Abanera wopoaka o Yoabika wato, “Nako ngohi ahi hininga marai inawedonoka ma oraha abe ngini de ngomi ka ihikaika homaketeparangi. Ho ngaro ufa dika ngone homakalawana ka ihikaika, angamoi gea ma hofoko ka moi dika, abe ngone mata-mata haborijanggutu. Ho hokokiahi ma dekana hiadono ngona nahuloko ani nyawa la ibootohi yakiniiki manga gogianongoru o Isiraele ma nyawaino?”

²⁷ De gea o Yoaba wohimoteke de o Abanera ai hininga ho wipaluhu wato, “Nagoungu, irahai la ngone haboripidili nanga hininga abe homaketeparangi. De naa tagou-goungu tonihingahu Ma Jou ai himangoka abe nako ani demo gea ko nohidetemoiyeua, maraioka ahi nyawa yogila-gilahi dika yakiniiki de yaparangi to ngona ani nyawaika o futu naa ma gahumu ka hiadono yahidetebiniye. Masara naa ka idadi tahuloko la ibootohi yomaketeparangi de manga gogianongoru!”

²⁸ Ho o Yoaba wotemo ipaha de ahao ai guguli wawuwu. De ai nyawa ka de yoihene ma guguli ma ilingi gea de yomatogumuku abe ko yakiniikokaua manga gogianongoru o Isiraele ma nyawaino, ho manga parangi gea ibooto.

²⁹ Ho ona mata-mata yoborilio manga poretoko, abe o Abanera de ai nyawa ma futu gea yotagi-tagi yolio yaniiki o Yorodani ma akere ma dolaino. De ipahaino yomahihora ma akere gea doka ma honongaika de yogila-gilahi ka hiadono yolio o Mahanaimika. De manga dodagi gea aolomo ma futu moi gea ma gahumu de ahao ngade-ngade o wange ikorona ma oraha yomahiadono o Mahanaimi.

³⁰ De o Yoaba de ai nyawa onangoo yosobo la yolio manga kapongika. De abe ma oraha una watoomuino ai tentara ma nyawa mata-mata la ka idadi waetongo de ahao wahioriki abe ai nyawa yamonaoko dika yohonenge o parangioka, abe gea o Asaele de ai dodiawo yangimoi de yahiwoli o tentaraino.

³¹ Masara nako o Abanera ai tentara ma nyawa ma oraha yaetongo de naga yaratuhu hange de yamoributaanga abe yohonengoka, de ona mata-mata o Benyamini ma nyawaino.

³² De ipahaino de o Yoaba de ai nyawa o Asaele ai honenge yao o Beteleheeme ma kapongika de iwilungunu ai baba ai lungunoka genangoka. Iwilungunu ibooto de ahao o Yoaba de ai nyawa yosoboli de yotagi-tagi manga futu moi hiadono yahdetebiniye. Ho ma dawangeino gea de ona yomahiadono o Heborono manga kapongika.