2 Samuele 13 - Ma Jou ai Demo-demo o Totobelohoka

O Pasala 13 ko atailakouahi O Anono ai datoro ma dorou

¹ De o Dautu naga ai ngofaka womatengo ai romanga o Abasalomo de to una ngoi firanga ami romanga o ngo Tamara. De nagali o Dautu ai ngofaka womatengoli ai romanga o Anono, masara una de o giabiranga gea manga ayo yomaleko. De ipahaino de o ngo Tamara ami iranga o Anono una gea duru iwihirarama de ai hafini ai birangika.

² De ika-ika o Anono gea imaketero hoka iwigogama mangale ma titi ai hininga ma dodagi ka ihikaika ka munangika dika. Masara ngoi biranga gea muna ko ma moiuahi momaidu de o nauru ho una wato bote duru ko idadiuali womile.

³ Masara nagali o Anono ai dodiawo womatengo abe ai romanga o Yonadaba, de una gea tanu ai dutu adaene angamoi ai baba o Simea, de o Simea gea o Dautu ai riaka womatengo.

⁴ De ipaha o wange moiuku de o Yonadaba wimake abe o Anono ai himanga itafukuoka ho wileha unangika wato, “Adodoa ho ani hininga ihuha o wange-wangeiye? Angamoi ngona naa nanga koano ai ngofaka ho tanu ko iwa ma titi hiadono nohuha hokonaa!” De o Anono wipaluhu wato, “Masara ngohi duru ahi hininga adaene de ahi dodoto ngoi biranga o ngo Tamara.”

⁵ De o Yonadaba wipaluhu de wihigaro wato, “Hokonaa ma ngekomo abe koaho ngona nodiai. Noiki ani ngingiduika de nomaiduoli la o nyawa inimake hoka inigogama. De ahao ma oraha ani baba woboa wonitutumu kiani nomagahoko unangika hiadono womihuloko o ngo Tamara moboa ngonaino la ani inomo monihidiai. Abe ani gogahoko ma demo ma goronaka de ka idadi nihitararono unangika nato, ‘Marai nako ka idadi tomilega-lega ma oraha mohihakai de ahao muna mohitoofo de to muna ma hirete ami giama ahao bote ahi hininga hatoli iuwini.’ Hokogea ahi higaro ma demo ngonaika.”

⁶ De o Anono wosanangi de ai dodiawo ai demo gea ho woiki womaidu de ai datoro wodiai hoka o nyawa abe yagogama. De igoungu ai baba o Dautu woboa witutumu, ho una womagahoko unangika wato, “Baba, duru tomagahoko la ngona nomihuloko ngohi biranga o ngo Tamara la moboa ahi himangino de mohihakai o inomo abe duru tohafini. De mohihakai ipahaino de ka idadi mohitoofo de to muna ami giama.”

⁷ Ho o Dautu womihidingoto o ngo Tamara ma tauika gea wato, “Ngona noikohi ani iranga o Anono ai tauika de nihakai ai inomo la ka idadi wolomo.”

⁸ Ho muna mohimoteke ami baba ai demoika de moiki ami iranga o Anono ai tauika, de una womaidu-idu dika genangoka. De gea muna o tarigu maleino de mohikasapuru de mohidoojo enangika de ahao mohakai hiadono ai inomo gea idadioka. De gea mata-mata modiai duru to una ai himangoka la ka idadi womiwuningi.

⁹ Masara ma oraha muna makelenga ma inomo gea to una ai himangoka de una ka woluku wolomo. De naga ai duduhunu yamuruono naga genangoka ho una wahuloko onangika wato, “Ngini mata-mata nikokihupuoka.” Ho ona yokokisoboka mata-mata.

¹⁰ Yokokisoboka de ahao una womitemo o ngo Tamarika wato, “Ka idadi ngona naoino ahi inomo ahi ngingiduino naa la nohitoofo nenangoka.” De muna mihigihene ai demoika ho moboa unangino.

¹¹ Masara abe ma oraha muna mohitoofo ami goronaka de una womiso de womihuloko wato, “Ngohi biranga abe duru ahi hininga adaene ngonaika, abeika nainohi la ka idadi ngone homakitigi.”

¹² Masara gea o ngo Tamara duru moluku de mopoaka mato, “Ahi iranga, ufa! Done ngona nohihimaleke ma titi ani datorino! Angamoi o datoro abe hokonaa ma dorou duru ko idadiua ngone o Isiraele ma nyawa nanga hidogoronaka!

¹³ De nako hokogea idadi, done o kiaika ngohi toiki la ahi maleke todokaowara? De maraioka ngonaoo inidaene, angamoi ahao o nyawa iniahoko ngonaika ato duru nobodo ma titi ani datorino naa. Ho koaho ngona noiki dika ani baba o koanoika de nomagahoko la una wohidunia de ngona (/wohihidoaka ngonaika la todadi ngoni fekata). Iti ufa hokonaa nodiai!”

¹⁴ De ngaro hokogea ami demo masara una ka woluku dika womihigihene. De mangale ma titi ona yahinooto de ka unangohi woputurungu ho una ka womiribuutu dika la yomahigelenga.

¹⁵ Masara ka de gea ipaha de una duru womiemono munangika. Abe ngaro ma dihiraino de ai hininga duru adaene munangika masara naa ai hininga ma gemono enangohi duru ilamoko unangoka. Ho womipoaka munangika wato, “Nomataiti nohupuohi dika ma poretika de nosobo!”

¹⁶ De ahao o ngo Tamara muna mipaluhu mato, “Duru ko itiaiua ngona nohihuloko la ka tosobo dika. Abe ngaro ani howono ma amoko kangano masara ka nenangohi itorou nako ngona nato kiani ngohi toninoaika.” Masara una gea ka woluku dika womihigihene ami demoika.

¹⁷ Ho wiahoko ai duduhunika de wihuloko wato, “Kiani o ngofeka naa nomiaoika ma hoanika de abe bootino nihupuoka de kiani ma ngorana nohidukusioka la ufa hiadono muna molioino!”

¹⁸ De ai duduhunu wihingounu unangika ho womiaoika de wohidukusi ma ngorana gea. De to muna ami pakeanga gea naga ami baju ma gogurutuku de duru irahai. Angamoi nako o koano manga ora-ora abe ko yoilakuahi, hokogea manga biaha yomahinoauku.

¹⁹ Masara naa o ngo Tamara ami baju gea ka makakihi enangika de ahao o uku ma kafo momadoburaraha ami peauku ma titi ami hininga ma huha mohitunguu. De ahao ami himanga matatoko de ami giama de ka mosobo moari-ari.

²⁰ De gea ahao ami iranga o Abasalomo yomakamake de muna de una womileha wato, “Sarakia, gea igoungu abe ani iranga o Anono gea woniribuutu?” De muna mipaluhu, “Iya, gea igoungu ai datoro hokogea.” De ahao una wato, “Ufa hiadono ani hininga ihuha, de ufa nahingahu o nyawaika ma titi gea, angamoi una gea to ngona ani iranga.” Ho muna ami hininga duru ihuhaholi de momahitingaka o nyawaino de mogogere momatengo dika o Abasalomo ai tauoka.

²¹ De ipahaino de ma koano o Dautu wogihene ma titi ma datoro gea abe idadioka de una duru wongamo ai hiningaka.

²² De o Abasalomo unangoo duru wingamo o Anonika ma titi womihimalekoka to una ma hirete ngoi biranga o ngo Tamarika. Ho una duru ko witemo-temokaua ai riaka o Anonika.

O Abasalomo witoma ai riaka o Anono

²³ De o Anono ai datoro ma dorou gea idadioka de o taongo hinooto ipahaikali de ahao ma oraha adonoka la o Abasalomo ai domba ma gogo yaguti. De gea yaguti o Efaraimi ma kota ma digi-digino abe ma ngi ihiromanga ato o Baala Hasoro. Ho o Abasalomo wahoko ai ria-dodoto mata-mata abe onangoo ma koano ai ngofa-ngofaka o nauru la ona mata-mata yaniiki ma oraha ai domba ma gogo yaguti.

²⁴ De ahao una woiki ai baba o koano o Dautu ai himangika de wotemo wato, “Ahi nyawa abe yatobaguti ahi domba ma gogo ona yomulaengoka manga karajaanga. Ho ngohi tato irahai nako ngona de ani duduhunu mata-mata nginioo niminiiki la ngone ka ma moi hohirame-rame genangoka.”

²⁵ Masara o Dautu wipaluhu wato, “Marai ngomi naa ko mininiikua done ahao ti ngini nia karajaanga ilamokoholi abe nimileleani ngomi.” De ngaro o Abasalomo wohigali-gali witemo masara ai baba ko wohimotekua ai demoika. Abe una ka wotemo wato, “Ngini dika nihirame-rame ma guguti de tonganono la mata-mata gea itagi irahai.”

²⁶ De ahao o Abasalomo ka witemohi ai babaika wato, “Nako hoka ngona ko noboaua, irahai la nihigunoa ahi riaka o Anono una de ngomi mimakiniiki.” De ma koano wato, “Done ma titi o kia noigo la una de ngini nimakiniiki?”

²⁷ Masara o Abasalomo wohigali-gali ai gogahoko ma demo gea hiadono ai baba wahigunoa la o Anono de ai ria-dodoto utu mata-mata yomakokiniiki de de una ma guguti ma ngiika.

²⁸ De ahao o Abasalomo wahuloko ai duduhunika wato, “Ngini kiani nitotoihene ahi demoino naa. Bootino abe ma oraha o Anono o angguru wokere hiadono iwidalukoka, gea ahao tinihingahu abe ma oraha adonoka la niwitoma unangika. De gea ngaro ufa de ngini nihawana angamoi ngohi dika tinihuloko la hokogea nidiai. Ho ngini kiani nimahitomoroini dika de nidiai imaketero hoka ahi demo nginika!”

²⁹ Ho ipaha abe ma oraha adonoka de to una ai duduhunu gea iwihingounu ho iwitoma o Anono. De ma koano ai ngofa-ngofaka utu yamake ma datoro gea de duru yohawana ho yomataiti yofarene manga keledai homoi-homoi ma poretuku de yosobo yoara ma hoanika.

³⁰ De ma oraha ona ka manga dodagiokahi abe yoara o Abasalomoka de yaika de doka o Yerusaleemoka naga o nyawa abe yoboaino de iwihingahu o abari o Dautika. De ona ato, “Ahi koano, marai ani ngofaka o Abasalomo watomaka ani ngofaka o nauru utu mata-mataika ho duru ko moiokaua angamoi yokokihonengoka.”

³¹ De ma koano o Dautu woihene ma abari gea de womaokoino de wakakihi ai baju ma gogurutuku de ahao ka womamotumuku o tonakoka. De ai nyawa abe ka ihikaika ihikodoku o hiowa ma demo ma koanoika onangoo mata-mata manga baju yakakihi ma titi manga hininga duru ihuhaholi.

^32-33 De duru ma oraha gea o Dautu ai riaka o Simea ai ngofaka woboa ma koano ai himangino, de to una ai romanga o Yonadaba. Ho o Yonadaba gea wotemo o Dautika wato, “Ahi koano, ufa hiadono ngona nangaku dika o abari ma demo gea ma titi ani ngofaka mata-mata yokokihonengoka. Ngohi tato bote gea o Anono dika wohonenge. Angamoi naa ma dekanino o Abasalomo wihideeoka wato witoma o Anono ma titi ai datoro ma dorou gea abe womiribuutu ngoi biranga o ngo Tamara. Ho ngohi tato ka o Anono dika wohonenge, ko mata-mataua ani ngofaka.

³⁴ De maraioka o Abasalomo una woaroka done iwihohowono unangika.” De ahao gea ma koano ai nyawa abe wotobagoa-goana ai tau una womalegaika o wange ma dumuniha de abe ma gurutika una wamake o nyawa ko manga ngoe yotagi-tagi yoboaino o tapakoka abe o loku moi ma datekoka.

³⁵ Ho o Yonadaba witemo o Dautika wato, “Abeika! Ahi demo kangano duru itaana, angamoi ona gea to ngona ani ngofa-ngofaka naga yoboainoka!”

³⁶ De una wotemo ipahaino de igoungu ma koano ai ngofa-ngofaka yomahiadono, de ona mata-mata duru iwigari-gari de yopoaka ma titi manga riaka o Anono ai honenge. De ahao o Dautu de to una ai duduhunu onangoo mata-mata duru yoari-ari.

³⁷ De gea o Dautu wigari-gari ai ngofaka o Anono ma dekana, abe o wange-wangeiye ai hininga ma huha ka nagahi. Masara o Abasalomo una woaroka ai ete o Talamai ai tonaka o Gesurika. De ai ete gea una o Amihudu ai ngofaka de wodadi o Gesuroka manga koano.

O Abasalomo woara

³⁸ Ho o Abasalomo womanoa ai taongo hangeino ma tonakoka gea.

³⁹ De ma dekana ipahaika de o Dautu ai hininga ma huha iowahoka angamoi o Anono ai honenge gea ma dekanoka. Ho naa o Dautu ai hiningaka wato irahai la yomakamakeoli de ai ngofaka o Abasalomo.