2 Samuele 12 - Ma Jou ai Demo-demo o Totobelohoka

O Pasala 12:26-31 ko atailakouahi Ma Jou wipake ai uru ma dodofanga o Natana la witaere o Dautika

¹ De Ma Jou o Yawe wihidingoto ai uru ma dodofanga, ai romanga o Natana, la woiki o Dautika. Ho una woboa o Dautu ai himangino de ai hingahu unangika ma rupa o hiketero ma ade-ade. Abe o Natana wiade-ade o Dautika hokonaa, wato, “Koano, naga moi abe idadioka kiani toniade-ade de hokonaa ma ade-ade. Naga o nauru yahinooto yogogere o kota moioka de womatengo wohuha o kiahonanga de womatengoli una gea wokaya.

² De abe una gea wokaya to una ai kiahonanga ma ngoe hiadono ai domba ma duduono ma ngoe de ai hapi ma duduono enangoo ma ngoe.

³ Masara womatengoli gea abe una duru wohuha, to una ai domba ka moi abe ena ma beka ka ma ngofakohi. De ai domba ma ngofaka gea womaijaino de duru wahidopaliara ka ma moi de ai ngofa-ngofaka. De ai dofo o domba ma ngofaka gea duru iwibiaha ho ka ihikaika naga ai datekoka de iolomo to una ai inomino de iokere to una ai ngokerino. De ma oraha womaidu de ai dofo gea duru yoigo imahitotirika ma dutuika de unangoo duru wosanangi imapanginino ai aluoka. Hokogea ai domba ma beka wodora imaketero hoka to una ngoi ora womidora.”

⁴ “De ahao naga womatengo warekata o kotaika gea de una woboa wokaya-kayaika de woigo womahidodogumu unangoka. Masara wokaya-kaya gea duru ko woigoua to una abe ai duduonino wale la abe wihiolomo una wirekatino gea. Ho wokaya-kaya gea woiki wohu-huhaika de to una dika ai domba ma beka wale de womadoma la ma roehe wahakai la una wirekatino gea waolomo.” Hokogea o Natana wiade-ade o Dautika.

⁵ De ma ade-ade gea o Dautu ka de woihene de duru wongamo wokaya-kayaika de wihingahu o Natanika, wato, “De naa tohibehehongo de Ma Jou o Yawe ai romanga tapake, kiani o kaya ma nyawa gea iwihohowono ka hiadono wohonenge!

⁶ De una naa kiani duru o domba ma beka gea waturuuru de o domba ma gahumu iata de angamoi hokogea wodiai itorou de angamoi ai dora ma hiokoo ko iwa unangoka hiadono ko wamaoua ai huha abe wihikangela gea.” Hokogea o Dautu ai demo ma ngamo o Natanika.

⁷ De o Natana wihiree-reeika o Dautika wato, “Gea o hiketero ma ade-ade ma titi ngona naa! Ngona nodiaioka imaketero ma titi abe hoka wokaya-kaya wodiaioka gea. Ho Ma Jou o Yawe abe o Isiraele ma nyawa manga Jou hokonaa ai dodaere ma demo ngonaika. Una wato, ‘Dautu, kiani nomahihohininga abe ma dihira ngonaoo nohuha de Ngohi tonihitunguuoka abe tonihidadi o Isiraele ma nyawa manga koano. De abeika ma dihira gea Ngohi tonihihupu o boditoino abe ani baluhu o Saulu wonihidee ngonaika.

⁸ De ma oraha naa to una ai tau tonihidoakoka ngonaika la idadi to ngonali ani tau. De ngaro to una ngoi feka-fekata ma onangoo tonihidoaka ngonaika. De o Isiraele ma nyawa mata-mataika tahidoaka to ngona ani kuahaika la ona nahikoano ngaro dau o Isiraele ma tonakoka de onangoo daku o Yehuda ma tonakoka. De nako hokogea ko iniwedonuahi Ngohi tosanangi tonihidogo ngonaika ahi hidoaka hokogenangoli ma amoko.

⁹ Masara abeika ngona nahohedu dika to Ngohi Ma Jou o Yawe ahi demo-demoika abe ma oraha naa ngona nodiai itorou ahi himangoka. Adodoa ho hokogea ngona nodiai? Abeika ani howono Ngohino, abe o Uria, o Hete ma nyawa, una gea ngona ma hirete nitoma de napake o Amono ma nyawa manga dae. Hokogea ngona nodiai la to una ngoi fekata ngona nomagora de nomihidadi to ngonali ngoni fekata.

¹⁰ Mangale ma titi ani howono gea nodiai itorou hiadono ahao ani ngofa-ngofakuku de ka hiadono ani totoforauku ahao naga manga honenge itorou hoka o Uriali ai honenge ma modorou. De ahao idadi angamoi ngona ko nohihingounua Ngohino de angamoi o Uria ngoi fekata nomahitongona.’

¹¹ ‘Ho Ngohi Ma Jou o Yawe tonitemo ngona o Dautika, abeika, Ngohi ahao tohikawalimi de ma dorou tohiboa ngonaika abe duru ihititi to ngona ani tau ma goronaka. Abe Ngohi ahao to ngona ngoni feka-fekata tagora de tahidoaka o nauru utuikali de ona ahao yomakitigi duru o nyawa manga hima-himangoka.

¹² De angamoi ngona nodiai hokogea de o nyawa ngoi fekata o fufutuoka ho ahao tohiaturu la idadi ngoni fekatikali duru o Isiraele ma nyawa manga hima-himangoka o wange-wangeoka.’” Hokogea o Dautu woihene o Natanino Ma Jou ai hohowono ma demo unangika.

O Dautu womangaku ai howono masara ai ngofaka kiani wohonenge

¹³ De o Dautu duru itaiti womatoduba wato, “Ngohi naa duru tahowonoka Ma Jou o Yaweika.” De o Natana wipaluhu wato, “Ma Jou ani howono wonihiapongoka ho ngona ko nohonengua ma titi ani howono gea.

¹⁴ Masara ningelo Ma Jou o Yaweika mangale ma titi ani howono nenanga. De angamoi ningelo Unangika hokogea ho ani ngofaka naa abe namake o ngo Basebaino, una womaboa de ahao wohonenge.”

¹⁵ Hokogea wihingahu o Dautika de ahao o Natana wolio ai tauika. De ma oraha o Uria ngoi fao momagerewoto abe o Dautu ai ngofaka de Ma Jou o Yawe wihipoha o ngofaka ma gilauika de o panyake.

¹⁶ De o Dautu duru wigahoko ai ngofaka gea Ma Jouika la ufa wohonenge. De duru wohuha hiadono woluku wolomo de wowohama o ngi moiika abe ai tau ma goronaka ko iwa ma nanao de womangumo o meheluku de womamotumuku genangoka ka hiadono iwihidetebiniye.

¹⁷ De ona o dimo-dimono ai tau ma goronaka yoboaino de yomaokoino ai datekoka de duru iwilaru de iwihigaro la hiadono womomiki la wolomo masara una duru woluku de ngaro o wange tumidi ma dekanino ma ko wolomua.

¹⁸ Ho adonoka o wange ma tumidi gea de ai ngofaka gea wohonenge de ona abe ai datekoka iwileleani duru yohawana iwihingahu o Dautika abe ai ngofaka wohonengoka. Abe ona o dimo-dimono ai tau ma goronaka yomakoketemo ato, “Nako hokonaa ai huha ma oraha ai ngofaka gea ka wowangohi de sarakia nako ngone hihingahu wohonengoka ho done utuohi ai hininga ma huha ma amoko. Abeika ngaro ai ngofaka wowangohi ma ko wonahigihenua ho done ai hininga sarakia naa nako hihingahu ai ngofaka gea wohonengoka. Done ka de hihingahu de una duru womahikangela ai badangika.” Hokogea yomakokuhudu.

¹⁹ Masara o Dautu woihene ai duduhunu ma nyawa o dimo-dimono yomakokuhudu de una wato bote ai ngofaka wohonengoka ho una waleha onangika wato, “Ho sarakia ahi ngofaka una gea wohonengoka?” De ona iwipaluhu ato, “Iya, nagoungu una gea wohonengoka.”

²⁰ De o Dautu ka de gea woihene de womomiki o mehelino gea de womaohiki, de womaminya de womawuhi. Gea ibooto de woiki Ma Jou o Yawe ai Tauika de womahuba Unangika. De womahuba ibooto de ahao wolio ai tau ma goronaika de womagahoko o inomo ho ona iwihidiai ai inomo de wolomo.

²¹ De o Dautu ai duduhunu abe o wange tumidino gea ai datekoka duru yoheranga, ato, “Mia koano, ngomi naa duru ko mimangaratiiua abe nodiai! Abe ma oraha ani ngofaka ka wowangohi de ngona duru ko nolomua de noari-ari dika. Masara ka de wohonenge de ngona ko nigariokaua, de nomomiki, de nolomo masara hokogenangua o nyawa manga biaha.”

²² De o Dautu wopaluhu onangika wato, “Ma oraha ahi ngofaka ka wowangohi de ngohi duru de ahi huha tato done Ma Jou o Yawe womalega ngohino de ai dora ka hiadono ahi niniata wohigihene de hiadono widuhunu ahi ngofaka la wotogumu. De ngohi ahi huha ma amoko, de toari, de o inomo taoluku la duru ahi hininga ma dumutu ka Ma Jouika dika.

²³ Masara naa ahi ngofaka wohonengoka de ko idadiokaua tiduhunu ho de ma titi o kia de o inomo tolukohi? Ka idadi ngohi todiai la timomiki ai honengino? Ko tadadiua! Ahao naga ma oraha abe ngohi toboa unangika masara una ko idadiua wolio ngohino.” Hokogea wahitararono onangika.

²⁴ De ahao o Dautu womitutumu o ngo Basebaika ho womilaru. De ahao abe ma oraha yomaiduoli una de muna de ipaha mamake o ngofaka womatengoli de o Dautu wihiromanga o Saloomo de Ma Jou o Yawe duru widora o Saloomo gea.

²⁵ De mangale Ma Jou hokogea widora ho ahao wihingahu ai uru ma dodofanga o Natana, wato, “Ngona kiani nahingahu o Dautu de ngoi fekata abe Ngohi Ma Jou o Yawe tato manga ngofaka naa kiani iwihiromangoli o Yedija.”

O Pasala 12:26-31 ko atailakouahi O Dautu de ai nyawa yahikala o Amono ma nyawaika o Raba ma kotaka

²⁶ De ma oraha gea o Dautu ai tentara ma hidimono o Yoaba, una de ai nyawa yomaketeparangi de o Raba ma kota ma nyawa, abe o Raba gea o Amono manga kota ma mayo. De o Yoaba de ai tentara ngade-ngade yahikala de yataokino manga musu gea.

²⁷ Ho o Yoaba wohidingoto ai demo o Dautika la wihingahu wato, “Ngomi mimakalawana de o Raba ma kota ma nyawa de ka idadi miataokino to ona manga jobuubu abe genangino o kota ma nyawa mata-mata yamake manga akere.

²⁸ Ho naa irahai la ngona natoomuino o tentara ma nyawa mata-mata abe naga ngonaka de nahihira-hira la ngini niboa de niadoruhu ma kota naa hiadono niahikala onangika. Angamoi done ka ngohi dika tahikala o Raba ma kotaika de ahao o nyawa yofetongo ahi romanga dika ma oraha yomaketeade-ade ma titi ma hilaku naa ena. Hokogea ahi higaro ma demo ngona ahi koanoika.”

²⁹ De o Dautu woihene o Yoaba ai higaro ma demo gea ho watoomuino ai tentara ma nyawa de ona mata-mata yosobo yoiki o Rabaika de yomaketeparangi de ona ka hiadono wahikalaka.

³⁰ De wahikala ipaha de ahao o Dautu wagoraka manga koano ai sapeo ai peaino de gea iwihinoauku to unangoli ai peauku. De ma sapeo gea yodiai o gurasino ho duru itubuho, abe gea ngade-ngade o kilo moruange de motoa ma dubuho. De nagali o hakaru ma leto-letongo ma rorahai abe ihibotokaoko gea ma himangoko. De ahao una de ai nyawa yomale ma parangi ma lolaku ma kiahonanga kohangoe ma kotaka de aino gea.

³¹ De abe o Raba ma nyawa gea yaribuutu onangika la ona mata-mata yodadi manga gogilaongo. Abe kiani yokarajaanga ma dubuho de gea manga karajaanga ma goronaka de utu kiani yapake o garagaji, de utu yapake o pasolo de o bahuku, de utuoli kiani yatobadiai o tela ho yokarajaanga o tela ma haharongoka. De hokogea o Dautu waribuutu o Amono ma nyawa mata-mata abe ngaro yomanoa o Raba ma kotaka eko manga kota utuokali, masara ona mata-mata manga karajaanga kiani hokogea. De ipahaino de o Dautu de ai tentara mata-mata yokokisobo yolio o Yerusaleemika.