2 Samuele 11 - Ma Jou ai Demo-demo o Totobelohoka

O Dautu de o ngo Baseba yahowono

¹ De o tao-taongiye abe ma oraha o maata ipahaka de ahao naga o poparangi ma oraha abe o tonaka ma koano manga ngoe manga biaha ona de manga tentara yoiki yaparangi manga musuika. De naa adonokali ma oraha gea abe o maata ipahaka de o Dautu wihuloko ai tentara manga hidimono o Yoabika la una de ona utu abe yahihira o Isiraele ma nyawa manga tentara la ona mata-mata yoiki ihigila-gilali manga parangi o Amono ma nyawaika. Ho ona de o Amono ma nyawa manga tentara yomaketeparangi ma hoanoka de o Isiraele ma tentara yolaku hiadono o Amono ma nyawa manga tentara yahikalaka. De ahao o Isiraele ma nyawa manga tentara yahigiloliti o Amono ma nyawa manga kota abe ma romanga o Raba. De o Raba ma kota yangika la ato enangoo yahibinaaha. Masara o Dautu ko waniikua o parangioka abe una womagoo-gogere dika ai tauoka abe o Yerusaleeme ma kotaka.

² De o wange moiuku o Dautu womaiduoka ai koioka de ahao womomikino o bobimaowaka de wohupu o koano ma tau daku ma poretiye de ai tau ma poretoka gea wotagi-tagi. De una womalega dau ai timiuku de womimake momatengo abe muna momaohiki de duru mohailoa.

³ De o Dautu wihidingoto ai gilaongo womatengo la woiki woleha-leha o nyawaika abe muna gea o ngo kia. De una wolio o Dautika de wotemo, wato, “Marai muna gea o ngo Baseba abe ami baba o Eliama de ami rokata o Uria de una gea o Hete ma nyawa abe wodadi to ngone nanga tentara.”

⁴ Hokogea woihene de o Dautu ai hidingoto ma nyawa wahidingoto la yoiki imile. Ho muna imiao o Dautino. De ahao idadi una de muna yomaidu. Abe muna ma oraha gea maniiki ibooto o ngofeka manga hiaturu la yomahitebini abe manga mede yapahaka. De yomaidu ibooto de muna ahao molio ami tauika.

⁵ De muna modami ho ahao ami hingahu mohidingoto o Dautika, mato, “Ngohi naa naga de ahi badangoka.”

⁶ Ho o Dautu ami hingahu gea ka de wamake de ai behehongo wohidingoto manga tentara manga hidimono o Yoabika wato, “Ngohi ani koano togahoko la o Uria, o Hete ma nyawa gea, nihidingoto ngohino.” De o Yoaba wiahoko o Uriaika de wihidingoto o Dautika.

⁷ De ma oraha o Uria woboa yomarihimanga de o Dautu de wileha o Uriaika abe ma titi sarakia de manga hidimono o Yoaba, de wilehali ma titi manga tentara manga hininga de manga buturungu. De utuohi wileha ma titi manga parangi ma aguru, wato, “Sarakia itagi irahai eko koua?” Ho o Uria mata-mata wopaluhu ai leleha gea.

⁸ De ahao o Dautu woigo la ai howono watamunu ho wihigaro o Uriaika la wolio ai tauika de womaidu de ngoi fekata o ngo Baseba ho wihingahu unangika wato, “Ngona nolio dika o futu naa ani tauika la nomahiainohi.” Hokogea o Uria o Dautu wihigaro ho o koano ai tauoka wohupuoka de bootino dika de o Dautu ai hadia ma hidoaka wihidingoto o Uriaika.

⁹ Masara o Uria gea una ko wogila-gilaua ai tauika de womaidu ka ma hoanokahi abe o koano ai tau ma ngorana ma poretoka wadodiawo abe o koano ai gogilaongo o nau-nauru yomaidu genangoka.

¹⁰ De ahao o Dautu ai gogilaongo iwihingahu manga koanoika ato, “O futu o Uria ko wolioua ai tauika masara womaidu ngomioka dika.” De ahao o Dautu wileha o Uriaika wato, “Maraioka ngona o futuika duru iniboleoka ani dodagino ho adodoa ho ngona ko nolioua ani tauika la nososanangi nomahiaini?”

¹¹ De o Uria wopaluhu wato, “Ngaro Ma Jou o Yawe ai Behehongo ma Peti, de ngaro o Isiraele ma tentara, eko o Yehuda ma tentara, ona mata-mata yomatau o ngoerino dika. De ngaro nanga tentara ma hidimono o Yoaba, de abe utu nanga hidimono iwiduhunu, masara to onangoo manga ngidu ikangela ma hoanoka dika. Ho gea duru ko itiaiua nako tomahiaini tososanangi dika ahi tauoka la tolomo, de tokere, de tomaidu de ngohi fekata! Ahi koano, ngohi naa duru tagoungu tonihibehehongo, ngohi duru toluku hokogea todiai abe ko itiaiua!” Hokogea o Uria ai demo duru de ma buturungoka o koanoika.

¹² Ho o Dautu ka witumungohi wato, “Ngona nomahiainohi nenangoka o wange naa de ahao ngohi itebini tonihigunoa nolio o tentara ma ngiika.” Ho o wange gea de ka hiadono ma dawangeino o Uria ka wogogerohi o Yerusaleeme ma kotaka.

¹³ De ahao o Dautu wibehehongo la o Uria woboainoli de ona yomakutuono yolomo de yokere o koano ai tauoka. De gea ka hiadono o Uria iwidaluku angamoi hokogea o Dautu ai hidee unangika la ahao wolio ngoi fekatika. Masara ma moioli o Uria ko wolioua de ai nanaooka womaiduoli abe ai koano ai gogilaongo manga ngioka. De gea hiadono una ko wolioua ai tauika.

O Dautu wohiaturu la o Uria wohonenge

¹⁴ De ahao ma dawangeino o Dautu ai hurata wotulihi wohidingoto o Yoabika ho ma hurata gea wihidoaka o Uriaika la wigao ai hidimonika o Yoabika.

¹⁵ De o hurata ma goronaka naga o Dautu ai behehongo hokonaa, “Kiani ngona nihuloko o Uriaika la una duru o parangi ma himangoka abe genangoka yomarihimanga de o Amono ma nyawa abe duru inaparangi de manga buturungu ilamoko. De nohiaturu la ai dodiawo ahao yomadohuku la ona o Uria iwinoaika la hiadono wohonenge.” Hokogea o Dautu ai hidee ma dorou.

¹⁶ Ho ka de o parangi ma goronaka de o Yoaba ai tentara yotigioka o Amono ma nyawa manga kota o Raba de o Yoaba wohiaturu la o Uria naga duru manga doomu ma himangoka ma oraha yahimanga o Amono ma nau-nauru abe duru manga hiningaka la manga kota o Raba yoduhunu.

¹⁷ De igoungu, o Amono ma nau-nauru ona yohupu manga kotaino de duru yaparangi o Yoaba ai tentaraika ka hiadono o Dautu ai tentara utu yahohonenge. De o Uria, o Hete ma nyawa gea, unangoo wohonenge genangoka.

¹⁸ De ahao o Yoaba ai hidingoto ma nyawa wihidingoto o Dautika de o parangi ma abari.

¹⁹ De wihingahu unangika abe wihidingoto wato, “Kiani nihingahu nanga koanoika mata-mata abe naa ma duruika idadi nanga parangi ma goronaka.

²⁰ De ahao marai una ahao wongamo angamoi duru ngomi mitigi manga kota ma dadaduhika de marai wonitaere, wato, ‘Adodoa ho ngini nitigiholi manga kota ma dadaduhika? Done ko nihiorikua abe naga ona daku o kota ma dadaduhu ma poretoka abe ka idadi inidaene initoimi?

²¹ Sarakia, ngini niawohangoka ma oraha o Tebesoka abe o Gideono ai ngofaka o Abimeleke wohonenge? Gea o ngofeka dika mihohonenge una gea! Abe muna daku o kota ma dadaduhu ma poretoka de o ngengedere ma hakaru ma amoko midotumo unanguku de iwidaene! Hokogea ma bodito irupa-rupa onangino gea angamoi ona duru yoduhunu manga kota ho ufa ngini nimahitigiholi manga kota ma dadaduhika!’ Marai hokogea nanga koano wonitaere ma oraha nitutumu de ahao kiani nipaluhu unangika nato, ‘O koano, ani gilaongo o Uria, o Hete ma nyawa gea, unangoo wohonengoka.’” Hokogea o Yoaba widotoko abe una wotobaao-ao o abari wihidingoto o Dautika.

²² De o hidingoto ma nauru woiki de o Yoaba ai hingahu mata-mata gea wadofanga o Dautika.

²³ Abe una wiade-ade unangika wato, “Naga o Amono ma nyawa manga tentara abe yohupu manga kotaino de imiparangi ma hoanoka de tanu ona yolaku masara ngomi ahao duru mia hininga yohauku onangika ho miaparangi hiadono yomadohuku moduku ka hiadono manga kota ma ngoranika.

²⁴ De genangoka ngomi mimahiadono de nanga musu abe yotobatoimi naga daku manga kota ma dadaduhu ma poretoka de duru yatoimi ani tentarauku hiadono manga hihiipi yadaene hiadono utu yohonengoka. De ani gilaongo o Hete ma nyawa abe o Uria, unangoo wohonenge genangoka.” Hokogea ai hingahu o Dautika.

²⁵ De o Dautu wipaluhu, wato, “Ngohi toigo tohibehehongo dika o Yoabika ngaro ufa de ai hininga ihuhaholi abe ma titi ai nyawa yohonengoka. Abe nako o parangi ma goronaka gea ko moiua ihioriki abe onagona honanga ahao yohonenge. De nihingahuoo o Yoabika abe ngohi tato kiani utuohi yowoe abe ai tentara wahuloko la yangika yadagi o Raba ma kotaika angamoi kiani hokogea ka hiadono yahikalaka. Hokogea dika aika ahi behehongo la tilaru ani hidimono o Yoabika.” Hokogea o Dautu wotemo.

²⁶ Ka de o ngo Baseba moihene ami rokata o Uria wohonengoka de muna duru moari-ari de hokogea ami huha mohitunguu.

²⁷ De gea ami gari ma wange muruono ipaha de ahao o Dautu ai duduhunu wahidingoto munangika la imingotaka to una ai tauika. De ahao o ngo Baseba gea womihidadi to unangoli ngoi fekata de muna ma oraha momagerewoto de ami ngofaka o nauru. Masara Ma Jou o Yawe duru ko wosanangiua abe de ena gea o Dautu wodiai.