2 Samuele 10 - Ma Jou ai Demo-demo o Totobelohoka

O Pasala 10 ko atailakouahi O Dautu de o Amono ma nyawa yomaketeparangi

¹ De ipahaino de o Amono manga koano o Nahasa wohonenge ho ai ngofaka o Hanunu wituruuru wodadi manga koano.

² Ho o Dautu womatemo ai hiningaka wato, “Ma dihirainohi de o Nahasa gea wohiao irahai, ho koaho ngohioli tiao irahai to una ai ngofaka.” De gea ahao o Dautu wahidingoto ai nyawa yamuruono naga o Hanunika. De una wahuloko onangika la ahao yomahiadono ma koano ma hungika de iwidofanga o Dautu ai hininga ma huha ma titi una gea ai baba wopahaka. De ipahaino ma oraha o Dautu ai nyawa yomahiadono o Amono manga tonakika

³ de naga o Amono manga hihira utu abe yoboa manga koano ai himangoka de iwitemo unangika ato, “Ngaro ufa dika ngone hingaku to Dautu ai hininga ma dumutu! Abe ngaro wahidingoto ai nyawa la ato bari ai hininga ma huha inidofanga ngonaika masara gea una duru wonieluku! De maraioka to una ai hininga ma gou-goungu la ai nyawa inatotailako nanga kota naa, de ahao o wange moiuku de ona yoboa de inabaata la inahikala ngone naa!”

⁴ De o Hanunu wangaku ai nyawa manga demoika gea ho wataokino o Dautu ai nyawa de ahao manga gumi homoi-homoi yakulu ma hononga dika la duru yahimaleke onangika. De yakulu manga gumi ma hononga ipahaino de ahao yagutioli o Dautu ai nyawa homoi-homoi manga baju ma guru-gurutuku la manga hale imatawangeika dika. De hokogea duru yahimaleke onangika de ahao yahigunoa la ka idadi yolio manga tonakika.

⁵ Masara mangale ma titi manga himaleke ma amoko yamao ho ma oraha yolio de ko yogila-gilauahi o Yerusaleemika. De ipahaino naga abe iwihingahu o Dautika hokokia idadi ai nyawaika gea ho wohidingoto ai demo onangika abe wato, “Ngarouahi ngini niboa o Yerusaleemino naa. Ka idadi nimagoo-gogerohi o Yeriko ma kotaka la nia gumi niohiaini hiadono ilio imaketero hoka ma dihiraino, de gea ahao ngini nigila-gila nilio naangino.”

⁶ De ahao o Amono ma nyawa iwihioriki abe o Dautu duru wangamo onangika, ho yomahidiai la yomaketeparangi de o Isiraele ma nyawa. De gea yomahiketehibehehongo de o tonaka utuika manga nyawa abe yahewa manga tentara ma nyawa la ka idadi yomakuduhunu yalawana o Isiraele ma nyawaika. Ho o Siria ma tonaka manga nyawaino yahewa yasana monaoko abe yogogere o Bete Rehobo de o Soba ma kapongoka. De ahao o tentara yasana ngimoi de yasana hinooto yahewa o Tobo ma kapongino. De nagali abe yomahiketehibehehongo de o Maka ma nyawa manga koano la yahewa to una ai tentara ma nyawa yasana moi.

⁷ De ipahaino abe ma oraha o Dautu woihene ma titi o Amono ma nyawa manga behehongo gea de o nyawa utuika de una wahidingoto o Yoaba de ai tentara mata-mataika la yomaketeparangi de o Amono ma nyawa gea.

⁸ Ho o Amono manga tentara mata-mata yohupu manga kotaino de yomahikaaturu duru ma kota ma ngorana ma himangoka. De abe ma tentara o Siria ma tonakino de o Toboino de onangoli abe o Makaino, ona gea mata-mata yomahikaaturu doka o tonaka ma homoaka de yomahidiaioka la yomaketeparangi de o Isiraele manga tentara.

⁹ De ahao o Yoaba womalegaika de wamake ai musu manga ngi hinooto o kiaka yomahidiai de wahioriki abe manga musu utu ahao ai himangoka de utuoli ahao ai poretoka. Ho una waregu ai tentara ma nyawa de wairiki utu onangino abe duru yojago / yososawaro yoparangi la ahao yomakiniiki de de una o parangi ma goronaka. Abe una ai hidee la wahihira-hira ona gea la yomaketeparangi de o Siria ma nyawa o homoa ma tonakoka.

¹⁰ De ai tentara ma nyawa utu wahitagongo ai dodoto o Abisaiika la ona yomakalawana de o Amono ma nyawa.

¹¹ De ko yosobouahi de o Yoaba widotoko ai dodotika wato, “Nako ahao o Siria ma nyawa gea yoputurunguholi de yomulaenge imihikala ngohi de ahi nyawa de gea kiani ngini niboa nimiduhunu. Masara nako hoka o Amono ma nyawa yoputurunguholi ho hiadono inihikala nginika, gea ahao ngomi miboa nginika la homakokuduhunu haparangi nanga musuika.

¹² Ho kiani ngone homatotomoroini dika la haparangi duru de nanga buturungoka. Done ahao nanga musu gea yoboa nanga tonakino de inahibinaaha to ngone nanga nyawa mata-mata de nanga kota-kota abe Ma Jou wonahidoakoka. Ho iti to Una gea ai mau de ngone ka idadi hahikala nanga musuika gea!”

¹³ De ipahaino abe ma oraha o Yoaba de to una ai nyawa yabaata o Siria ma nyawaika de manga musu gea yomataiti dika yoara onangino ma hoanika.

¹⁴ De ahao o Amono ma nyawa ka de yamake manga dodiawo o Siria ma nyawa yoara dika de onangoli yomadohuku o Abisai de ai nyawaino la yowohamikali manga kota ma goronaika. De ipahaino de o Yoaba de ai tentara yadogunoaika dika manga kotaka de ka yolio o Yerusaleeme ma kotaika.

¹⁵ De o Siria ma nyawa gea ka idadi ihioriki abe nako ona dika ko yakunua yahikala o Isiraele ma nyawaika. Ho ona yahoko manga dodiawo utuoli ko manga ngoe la ka idadi yomakutuono yaparangi o Isiraelika.

¹⁶ Abe manga koano o Hadadesere wahoko ai tentara manga ngoe abe yogogere doka o Efaraata ma akere ma honongaka. Ho ona yoboa de yomahihora ma akere gea de yomahiadono o Helama ma kotaino. De una abe wahihira-hira ona yoboa-boaino ai romanga o Sobaka, abe una gea manga koano ai tentara ma hidimono wokokurutiye.

¹⁷ De ipahaino de o Dautu woihene ma abari ma titi o Siria manga tentara gea yomahidiaiokali la yoparangi. Woihene ipaha de watoomuinoli ai tentara mata-mata de ahao wahihira-hira la yomakutuono yomahihora o Yorodani ma akere ma honongaika de yogila-gila yomahiadono o Helama ma kotaika. Ho o Siria ma nyawa yomahikaaturu la yomarihimanga de o Isiraele manga tentara, de ona mata-mata yomulaengoli yomaketeparangi.

¹⁸ De gea idadiokali abe hoka ma dihiraino angamoi o Siria ma nyawa gea yoara dika o Dautu ai himangoka de yaika. De o Dautu ai tentara yakiniiki manga musuika de yahohonenge o Siria manga tentara yaratuhu tumidi abe ona homoi-homoi yofarene o goroba parangioka. De nagali o Siria manga tentara abe yotobalou-lou dika, de o Isiraele ma nyawa yahohonenge yasana moruata onangino. De to ona manga hidimono o Sobaka, unangoo iwihohonengoka.

¹⁹ De nagali o kokoano yamuruono naga o Siria ma tonakoka abe o Hadadesere ai timiuku ho ka unangohi duru wokokurutiye. De ma oraha ma kokoano gea yamake abe o Isiraele ma nyawa yahikala manga tentaraika de ka yomahidoaka dika de yomagahoko la ka idadi yomahikadame de o Isiraele ma nyawaika. De hongoli yomahiketehibehehongo de o Dautu la ona mata-mata yodadi to una ai duduhunu ho yatobaleleani o Isiraele ma nyawaika. De ma oraha gea de imahikaika de o Siria ma nyawa duru yamodongo o Isiraelika ho duru ko yamoroinokaua yomakuduhunu de o Amono ma nyawa gea.