2 Samuele 1 - Ma Jou ai Demo-demo o Totobelohoka

O Dautu woihene abe o Saulu wohonengoka

¹ De naa o Isiraele ma nyawa manga koano o Saulu wohonengoka masara ma abari gea o Dautu ko woihenuahi angamoi unangoo de ai tentara manga musu yaparangi o ngi moiikali abe yomakitingaka kohagurutika de o parangi ma ngi abe genangoka o Saulu wohonenge. De o Dautu ai tentara duru yolaku abe o Amaleke ma nyawa yaparangi hiadono duru ko manga ngoe yahibinaahaka. De ahao ona yolio o Sikaga ma kotaika abe ma oraha naa o Dautu wogogere genangoka. Ho gea ona yoboaka de o wange hinooto yomahiaini o Sikaga ma kotaka.

² De ahao ma wange hangeoka de womatengo ka o goohi abe o Saulu ai tentaraino manga dodogumino woboa. De woboa o Sikaga ma kotaino de naga ma abari wototaka. De una gea ai pakeanga wakakihoka de duru wokutu ai mumukuku de o tonaka ma kafo la wohitunguu abe duru wohuha. Ka de womahiadono o Dautu ai himangino de womahimotumuku o tonakuku la duru wohitunguu ai horomati o Dautika.

³ De o Dautu wileha unangika abe woboa o Saulu ai tentaraino gea de wato, “Ngona naa o kiaino noboa?” De una wopaluhu wato, “Ahi baluhu, ngohi naa o Isiraele ma tentara ma doomuino de toara la ka idadi tonitutumu naa.”

⁴ De o Dautu wilehali wato, “Ho o kia idadi? Tonihuloko la ngona noade-ade hokokia ngohino abe ma oraha idadi o parangi ma goronaka.” De una wopaluhu wato, “Ahi baluhu, nanga tentara ma hou yokokiloaroka. De ona yoara angamoi to ngone nanga tentara duru ko manga ngoe yokokihonengoka nanga musu manga giamino. Masara kiani tonihingahuoo abe genangoka o Saulu de ai ngofaka o Yonatana onangoo yokokihonengoka.”

⁵ De ahao o Dautu wilehali o naurika gea, wato, “De ngona hokokia nohioriki abe o Saulu de ai ngofaka o Yonatana yohonengoka?”

⁶ De una ma goduuru gea woade-ade, wato, “Abe ma oraha gea idadi ngohi naga genangoka o Giliboa ma loku ma geleforoka de timake o Saulu womahitumungiye de ai kuama la ufa woruba. De naga o Filistina ma nyawa manga tentara iwidoara abe utu yobarene manga kudauku de utu naga manga goroba parangi ho hiadono iwihitiginoka.

⁷ De o Saulu womadogilioro de wohimake de wohiahoko ngohi la toboa. De ngohi topaluhu, tato, ‘Ngohi naga nenangoka ahi baluhu!’”

⁸ “De una wohileha, wato, ‘Ho ngona naa onagona?’ De ngohi tipaluhu, tato, ‘Ahi baluhu, ngohi naa o Amaleke ma nyawa.’”

⁹ “De ahao o Saulu wohihuloko ngohino, wato, ‘Nomataiti ngohino! Ngohi ka towoma-womahohi ho nohikiditokoka.’ Hokogea womagahoko la ngohi tiduhunu.

¹⁰ De ngohi timake wagoungu ai demo gea ho toboa unangino de tikiditokoka la itaiti wohonenge. De ahao tagoraka ai peaino o koano ma sapeo, de ai gogoli tahuputu ai pangaino, de o koano ma kiahonanga gea tonigao ngonaino. De naa ena mata-mata tonihidoaka ngonaika ahi baluhu.” Hokogea o tentara womatengo gea wiade-ade o Dautika.

¹¹ Ka de ma hingahu gea woihene de o Dautu ai pakeanga wakakihoka la wohitunguu duru ai hininga ma huha. De o nau-nauru mata-mata abe naga unangoka onangoo yodiai imaketero hoka o Dautoli.

¹² De manga hininga duru de ma huhaka de hiadono ona kahumutaigarika de ko yolomua ka hiadono yofutu. Gea yagari o Saulu de o Yonatana de Ma Jou o Yawe ai nyawa mata-mataika abe yokokihonengoka. De yagari o Isiraele manga tentara angamoi duru ko manga ngoe yohonenge o parangioka gea.

1:13-27 ko atailakouahi

¹³ De o Dautu wileha ma tentaraika gea abe wihingahu ma titi o Saulu ai honenge wato, “Ngona naa o kiaino ma nyawa?” De wipaluhu wato, “Ngohi naa tomaboa o Amaleke ma nyawaino masara ngomi migogere o Isiraele ma tonakoka naa.”

¹⁴ Ho o Dautu witemoli wato, “Ho done adodoa ho ngona nomoroiniholi hiadono nihohonenge ma koano abe Ma Jou o Yawe Una ma hirete wigoraka la wokoano?”

¹⁵ De witemo ipaha de ahao o Dautu wiahoko ai tentara ma nyawa womatengo de wihuloko wato, “Naino la nihohonenge dika o nauru naa!” De ma tentara gea woboaino de ka witopoko unangika ho wohonenge.

¹⁶ De o Dautu wotemoli unangika wato, “Ani hohonenge naa to ngona ma hirete ani tagongo ma titi ani howono. Abe ngona ani uru ma demoino de nomangakuoka nato nihohonenge ma koano abe Ma Jou o Yawe Una ma hirete wigoraka.”

O Dautu ai dakoro ma titi o Saulu de o Yonatana

¹⁷ De ahao o Dautu una wotulihi o dakoro ma nyanyianga moi ma titi womahihohininga o Saulu de ai ngofaka o Yonatana.

¹⁸ De wohitulihuku ipaha de wahuloko la ai nyawa yadoto-dotoko ma dakoro gea o Yehuda ma nyawa mata-mataika. De ma nyanyianga gea ihiromanga “O Toimi” de ihitulihuku o buku moiuku abe ihiromanga “O Totiai ma Nyawa manga Buku.” De hokonaa ma dakoro ma demo abe yonyanyi, ato,

¹⁹ “Hiokoo ngone o Isiraele ma nyawa, Angamoi to ngone nanga hihira abe homahingano-nganono onangika, Abe duru ma titi ona gea hiadono ngone homorene, Ona yorubaka o loku-loku ma geleforino angamoi yohonengoka, Ho duru nanga hininga ihuhaholi.

²⁰ Ho ma abari gea ufa hiadono hahingahu ona o Gaata ma kotaika, De gea ufa hoade-ade o Asekelono manga kota ma ngeko-ngekomoka. Angamoi nako hiadono o Filistina ma nyawa gea yoihene ma ade-ade, Ahao to ona manga ngo-ngofeka yogogarago dika, De ona gea mata-mata abe ko iwihiorikua Ma Jouika ona ihirame-rame dika manga hohonenge.

²¹ De nanga tentara ma nyawa abe duru yojago yopoparangi, Ona manga ngoe yohonenge o Giliboa ma loku-lokuoka, De manga parangi ma dadatoko yaboripidili ho ka imanoa dika o tonaka ma lokuoka. De hokogenangoo to Saulu ai dadatoko gea duru ko ihieheokaua de o minya ho ko ileletongokaua. Ho naa marai todoana o Giliboa ma loku-lokuika gea, Abe ngohi tato irahai la ko idadiokaua ma loku gea amake o akere, Ho ngaro o awana de ngaro o gagini masara ufa hiadono ipurarahuku ma lokuku gea. De ibootohi o joro iwangoiye ma loku-lokuoka gea.

²² De o Yonatana ai toimi gea duru ibiha, Ho nanga musu manga hohidimono manga ngoe yatopoko genangino hiadono yohonenge. De o Saulu ai humaranga enangoo ko yangofu-ngofua, Ho to ona gea manga ngoe manga awunu ihahuru genangino.

²³ De o Saulu de ai ngofaka o Yonatana, ngone duru hahigiriiri onangika, De manga romanga duru ikokurutiye ngoneoka. De ona yahinooto ka ihikaika yomakiniiki manga wowango ma dodagioka, De ngaro ma oraha manga hohonengoka masara ko yomakitingakokaua. De ona gea nako yakiniiki manga musuika de duru de manga hiapotoka. Abe nako ona de o kawihi masara ka onangohi yohiapoto. De onangoo duru de manga bobuturungoka. Abe nako ona de o singa ma boki masara ka onangohi duru yoputurungu.

²⁴ Ho ngini abe o Isiraele ma ngo-ngofeka, kiani duru niwigari o Saulu, Angamoi una gea winihidailako nia baju duru ma hohailoa, La ka idadi nimahinoauku de o baju ma doka-dokara de utuoli abe yobilere de o gurasi.

²⁵ De ngone naa nanga hiningaka de duru hamao o hiokoo ma amoko, Mangale ma titi nanga hihira abe duru yojago yoparangi, manga gogiriaka yoparangi de yorubaka. Ho o Yonatana ma oraha naa de to una ai honenge imaiduiha o loku-lokuoka.

²⁶ Ho ngohi ahi hiningaka de duru tonigari ma titi ngona o Yonatana, Abe tonietongo nomaketero dika hoka ahi dodoto ma gou-goungu, ho duru tonidora! De tohioriki abe ngonaoo duru nohidora ngohino, Abe nako to ngona ani dora de o ngo-ngofeka manga dora, Masara ka to ngonahi ani dora ilamoko ngohino!

²⁷ Ho igoungu nanga hiokoo ma amoko ngone hamao nanga hiningaka, Angamoi ona abe duru yojago yorubaka, De to ona manga parangi ma dae yanoaka ho ka parahaja dika!” Hokogea dika aika o Dautu ai dakoro ma nyanyianga ma demo.