2 Peturusu 3 - Ma Jou ai Demo-demo o Totobelohoka

Abe ma titi nanga Baluhu ai gahe ma wange abe ahao woboali

^1-2 Ahi gogianongoru abe ngohi duru tinidora nginika. Ngohi ahi hininga ma dumutu naga la tato tinihihohininga nginika ma titi abe nengokadau nimadotokoka. Angamoi ngini niihenoka ma hingahu ma demo ma ngoe, abe naga utu ma hingahu Ma Jou ai uru ma dodofangino iboa, abe ona gea yotebi-tebini to Una ai himangoka. De nagali ma huhuloko ma demo nanga Baluhu idodutu de nanga Duduhunoka, abe nengokadau ai demo gea ngomi ai hidingoto ma nyawa miadofanga nginika. De ma dodotoko gea tato tinihihohininga nginika la ka idadi ma debi-debini niongano-nganono nia kokihiningaka homoi-homoi. De hokogea ahi hininga ma dumutu, ho gea ma titi hiadono ngohi tinihurata ma hinooto ibooto nginika. De ngaro ahi hurata ihira-hiraika nginika abe nengokadau ngini niamakeoka, de ngaro abe ahi hurata naa ena, masara ahi hurata hinootoo naa abe ma goronaka de ahi hininga ma dumutu ka moi dika. De ahi hininga gea la tato tinihihohininga nginika ma titi abe nengokadau nimadotokoka, la ka idadi ma debi-debini niongano-nganono nia kokihiningaka.

³ De naa moi abe kiani ngini duru nihioriki itararono, abe nako nanga Baluhu idodutu ai gahe abe ahao woboali, gea duru wagoungu woboa nako ma oraha adonoka. Masara nako ai gahe gea itigioka, de ma oraha gea ahao naga o nyawa abe yatobaniiki dika to ona ma hirete manga hininga ma hafini ma dorouika. De ona gea ahao yoboaino de duru yomia-mia ma titi ko yongakua abe ahao nanga Baluhu woboali naa o duniauku.

⁴ De ona ahao yomia-mia ato, “Ee, bari ma dihiraino winihibehehongoka wato Una ahao woboali. Masara ngomi naa ko wiwimakeuahi! Ho Una o kiaikaka Una gea? Angamoi abeika ngaro ma dihiraino abe ma oraha nanga balu-baluhu yohira-hiraika yokokihonengoka de ka hiadono ma oraha naa naga, masara ko iwahi ma dodunguu abe Una woboa. De o dunia ma oraha naa ko ihowonua de abe duru ma dodihiraino de idadi, masara ma rupa gea ka moi de ma oraha naa naga, de ko aturuurua. Ho marai Una gea ko woboauali!” Hokogea to ona manga mia-mia ma demo ma oraha gea.

⁵ Masara abe ona yomia-mia Ma Jou ai demoika de gea duru yangofuoka ma gurutika, de gea ma titi naga moi atamunuku manga hiningaka angamoi ona ato borotaua de yafikiri genangika. De gea ma titi abe hokokia ma amoko Ma Jou ai demo ma kuaha wonahimatokoka ma dodihiraino. Angamoi ngone hohiorikoka abe duru ma deka-dekanuku abe Ma Jou wohidadi o dunia naa de ma dihangoo, de gea wohidadi ma titi ai demoino dika ai uruoka de aino ihupu. De ma dunia naa wahuloko la o ngootoka de aiye ipuda, de ma ngooto gea wapake la ka idadi ma dunia ma rupa idadi.

⁶ De ipahaino de ahao naga ma oraha abe ma titi to Una ai demo ma kuahaino hiadono ma ngooto gea ena wapake la o dunia naa duru wohibinaaha de o nguihi. Ho ona gea done sarakia manga demo ato o dunia naa duru ko aturuurua? Ona gea ka yofeto-feto dika!

⁷ De naa abeika homafikirohi abe ma titi hokokia hiadono o dunia naa ka itagiohi de ko ikiliangua. De nako o dunia ma oraha naa de ma dihangoo, ena gea mata-mataika ma oraha naa de Ma Jou ka wapaliarohi ma titi to Una ai demoino dika. De gea ka wapaliarohi hiadono ai hohowono ma wange adonoka, de genangoka de ahao gea mata-mata wohikokibinaaha de o uku. De ma wange gea enangoo abe Ma Jou wahibinaaha o nyawa iwilawa-lawana Unangika. De ma wange gea de ko o akerinoua Ma Jou wapake la wahibinaaha o duniaika, masara gea de wapake o ukuino. Ho ngaro abe o dunia naa wohidadi eko wapaliara, eko ngaro hiadono Una ahao wohikokibinaaha enangika, masara gea mata-mataika Una wodiai ma titi to Una ai Demo ma kuahaino dika. Masara ona abe ahao yamia-mia Ma Jou ai nyawaika de ai gaheika, ona gea ka yoluku yafikiri ma titi mata-mata gea.

⁸ Ho ona yotobamia-mia ona gea hoka yawohanga ma titi Ma Jou ai Demo-demo ma kuaha de abe Una ahao wohingodumu ai demo mata-mataika. Masara ahi gogianongoru abe duru tinidora, abe ma titi nanga Baluhu ai gahe, naga moi abe koaho homafikirohi la ufa ngoneoli hawohanga. De gea ka idadi tonaleha, ma titi o kia hiadono hokonaa ma dekanoka de Ma Jou ko wohingodumuahi to Una ai gahe abe wato woboali? De gea ma titi abe nako Una waetongo ma oraha, gea duru imakohowono de abe ngone o nyawa haetongo. Angamoi nako Ma Jou ai himangoka ngaro ka o wange moiino dika ma dekana eko ngaro o taongo o sana moiino, ma gea waetongo ka imaketero dika ma dekana Unangoka, ho ko imakohowonua.

⁹ De naga ma titi moioli hiadono Una ka womahiainohi ho ko woboauahi. De igoungu naga o nyawa utu yataoko ato bote Una gea ka wohiaka-aka dika ma titi ai gahe ma behehongo ho ko woboauali. Masara ko hokogenangua ma titi abe ko woboauahi de ko wahohowonuahi o nyawa. De abe ma titi ko woboauahi, gea tanu ai hiningaka wato ka wahiainohi la o nyawa utuohi yowoe yotoba manga hiningaka de iwingaku Unangika. Angamoi ai hininga ma dongohono naga o nyawaika abe Una wato tanu ngaro ufa o nyawa onagona dika wahibinaaha, ma koaho o nyawa mata-mataika yotoba de yomangali Unangikali. Ho gea ufa ngone hawohanga ma titi o kia naga Ma Jou ai hiningaka hiadono ka womatongohonohi ho ai gahe ma oraha ko yadonuahi.

¹⁰ De igoungu Una ma oraha naa ka womatongohonohi, masara ahao nako ai gahe ma wange adonoka de gea kiani woboali. De gea woboa imaketero hoka womatengo wotobatohiki woboa nanga tauino la wonadohiki, abe ngone duru ko hohiorikua o wange o kia ahao una woboaino. De ma oraha gea ahao naga ma koroongo ma ilingi moi duru kohaamokiye de gea ka itodokanino de ma dihanga ka aiaho. De ngaro ma dihanga ma dola mata-mataika ma duru youkuoka hiadono ikokitinoka. De ngaro o dunia naa ena ma enangoo de ma dola mata-mataika ikokibinaahaka ma oraha gea. Ho ngini ufa hiadono ona yotobamia-mia gea inihirehene nia ngongakuino, ma koaho ka ihikaika niangaku to Ma Jou ai Demo-demoika angamoi ma bahauku de kiani idadi imaketero hoka Una wonahibehehongoka.

Abe hokokia kiani howango Ma Jou ai himangoka

¹¹ Ho mangale ma titi o dunia naa de ma dihangoo igoungu ahao duru wohikokibinaahaka, ho koaho ngini niongano-nganono de nimaleha-leha abe ma titi hokokia ti ngini nia wowango ma dumutu. Abe nako nia hiningaka koaho niongano-nganono abe ahao hokokia ma oraha nimafafoino de Ma Jou. Angamoi o dunia naa ma bobaha ipahaikaka de ahao ngone ka idadi homafafoino de Ma Jou Unangoka. De mangale ma titi ngini ahao naga de de Una, ho gea kiani ma oraha naa niwango nitotiai to Una ai himangoka de kiani nimaaduru abe hoka to Unangoli ai hininga.

¹² De kiani hokogea nia wowangoka ka ihikaika niatobaniiki ka hiadono Ma Jou ai gahe ma wange adonoka abe ma wange gea de wahohowono o duniaika. Angamoi kiani ngone duru de nanga magaweoka hongano-nganono to Una ai gahe ma wange gea, de hongolioo hohitataiti ai wange ma titi nanga datoro ma totiaiino hodiai nanga wowangoka la hato to Una ai wange utuohi itaiti yadono. De nako ai wange gea adonoka, gea ahao ma dihanga youkuoka hiadono ibinaahaka, de ngaro o dunia de ma dola mata-mataika, ma enangoo yokokiuku ka hiadono ikokiwaroka.

¹³ Masara abe ngone naa hongano-nganono o dunia ma hungioli de o dihangoo ma hungioli, angamoi hokogea ma dodihiraino de Ma Jou wonahibehehongoka ngoneino. De genangoka ahao o totiai ma nyawa dika abe homanoa ma ngi ma hungiokali gea.

¹⁴ Ho, ahi gogianongoru abe ngohi duru tinidora nginika, naa tinihibehehongo tato ngaro ma oraha naa naga abe ka niododamaahi Ma Jou ai gahe ma wange la yadono, masara ma oraha nenangoo ma kiani nimaribuutu la nia hininga duru iriidi Unangoka. De gea kiani nia wowango ma datoro duru itotiai de itebini dika to Una ai himangoka la duru ko iwa nia howono nginioka.

¹⁵ De nimahihohininga abe nanga Baluhu idodutu ka womatongohonohi de ko woboauahi naa o duniauku mangale ma titi ai hiningaka wato ma oraha utuohi ka wohidogohi o nyawaika la ka idadi waduhunu manga howo-howonino. De abe ahi dodotoko abe ma titi nanga Baluhu ai gahe woboali, gea ka idadi ngini duru niangaku ahi demoika. Angamoi gea ka ngohiua dika abe tinidotoko nginika ma titi nanga Baluhu idodutu ai gahe. Masara ngaro nanga gianongoru o Paulusu abe ngone duru hidora unangika, ma to unangoo ai dodotoko nginika ka imakadaene dika hoka to ngohioli ahi dodotoko abe ahi hurata ma goronaka naa. De ma oraha abe ai dodotoko wohitulihuku nginika de gea ai sosawaroka de aino wapake, angamoi hokogea Ma Jou wihisawaro unangika la wotulihi.

¹⁶ De ngaro to una ai hurata mata-mataika abe gea ma goronaka de naga ai dodotoko abe ma titi nanga Baluhu ai gahe woboali, masara gea ai hurata homoi-homoiika de ai demo duru imakiniiki de to ngohioli ahi demo nginika, ho ngini ka idadi duru niangaku mia demoika abe ma titi nanga Baluhu ai gahe woboali. De igoungu, abe nako to Paulusu ai dodotoko, naga ma titi utu genangino abe hatoli ikangela hataoko itararono, de ena gea ma titi abe o nyawa utu ihikawalimi la hiadono to ena ma dumutu ihikohowonoka. De ona gea o nyawa abe ikuranga yomadotoko de manga ngongaku ka idomo-domohi. De gea ka to Paulusua dika ai dodotoko abe ona ihikawalimi, masara Ma Jou ai Demo-demoino utuoli naga abe enangoo ona ihikawalimoka. De ona gea ahao yamake ma hofoko to ona manga datorino de gea o bobinaahaka.

O Peturusu ai hurata naa wohibobaha

¹⁷ Masara ngini ahi gogianongoru abe ngohi duru tinidora nginika, ngini tinihitiariokau abe ma titi o nyawa manga rerehene ma dodotoko ahao hokokia ihofoko, de naa ngini duru nihiorikoka ma titi ena gea. Ho kiani ngini nimaagoa-goana nia hiningaka, done ahao o nyawa inihiloara abe to ona manga rerehene ma dodotokika, abe ona gea o pareta o kia dika naga ma ko yaniikua de ko yolegaikaua. De done ti ngini nia ngongaku ma bitu-bitumoka de aino inihirehene ma hoanika.

¹⁸ Masara koaho ngini ka ihikaika nioaguru nia ngongakuika la to Una ai owa utuohi ma amoko niamao nia kokihiningaka. De koaho ka ihikaika idogo-dogo nia tobahioriki la utuohi itararono niwihioriki o Yesusu Kristusika, abe Una gea nanga Baluhu idodutu de nanga Duduhunoo. Ho naa ngone ngaro ka hihigiriirioka Unangika ma oraha naa naga de ka hiado-adonika. Amin.